ನಿರ್ಮಾಪಕಿಯಾಗಿ ದೀಪಿಕಾ ಪಡುಕೋಣೆ

ಬಾಲಿವುಡ್ ಈವರೆಗೆ ಕಂಡ ಶ್ರೇಷ್ಠ ನಟಿಯರಲ್ಲಿ ತಾನೂ ಓರ್ವರೆಂಬುದನ್ನು ದೀಪಿಕಾ ಪಡುಕೋಣೆ ಸಮಯದಿಂದ ಸಮಯಕ್ಕೆ ಸಾಬೀತುಪಡಿಸುತ್ತಾ ಬಂದಿದ್ದಾರೆ. ಭಾರತದಲ್ಲಿ ಮಾತ್ರವಲ್ಲ, ಪಾಶ್ಚಾತ್ಯ ದೇಶಗಳಲ್ಲೂ ತನ್ನ ಅಭಿನಯದಿಂದ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿರುವ ದೀಪಿಕಾ, ಇದೀಗ ಸಿನೆಮಾರಂಗದಲ್ಲಿ ಇನ್ನೊಂದು ಸಾಹಸಕ್ಕೆ ಕೈಹಾಕಿದ್ದಾರೆ. ಹೌದು. ದೀಪಿಕಾ ಶೀಘ್ರದಲ್ಲೇ ಚಿತ್ರನಿರ್ಮಾಪಕಿ ಯಾಗಲಿದ್ದಾರೆ. ಆ ಮೂಲಕ ಚಿತ್ರ ನಿರ್ಮಾಣದಲ್ಲೂ ಯಶಸ್ಸು ಗಳಿಸಿರುವ ಜನಪ್ರಿಯ ನಟಿಯರಾದ ಪ್ರಿಯಾಂಕಾ ಚೋಪ್ರಾ ಹಾಗೂ ಅನುಷ್ಕಾ ಶರ್ಮಾ ಅವರ ಸಾಲಿಗೆ ಸೇರಲಿದ್ದಾರೆ.

ದೀಪಿಕಾ ತನ್ನದೇ ಆದ ಚಿತ್ರ ನಿರ್ಮಾಣಸಂಸ್ಥೆಯನ್ನು ಸ್ಥಾಪಿಸುವ ಬಗ್ಗೆ ಗಮನಹರಿಸಿದ್ದಾರೆ. ಕುತೂಹಲಕಾರಿ ಹಾಗೂ ಸತ್ವಪೂರ್ಣವಾದ ಕಥೆಯಿರುವ ಚಿತ್ರಗಳಿಗೆ ಹಣ ಸುರಿಯಲು ಆಕೆ ಉದ್ದೇಶಿಸಿದ್ದಾರೆ. ಬಹಳ ಸಮಯದಿಂದಲೂ ದೀಪಿಕಾಗೆ ಚಿತ್ರನಿರ್ಮಾಪಕಿಯಾಗಬೇಕೆಂಬ ಮಹದಾಸೆಯಿದ್ದಿತಂತೆ. ಹಾಗೆಂದು ಆಕೆ ಹಲವಾರು ಸಂದರ್ಶನಗಳಲ್ಲಿ ಹೇಳಿಕೊಂಡಿದ್ದೂ ಇದೆ.

‘‘ಒಂದಲ್ಲ ಒಂದು ದಿನ ಚಿತ್ರನಿರ್ಮಾಣ ಕ್ಷೇತ್ರವನ್ನು ಪ್ರವೇಶಿಸಲು ನಾನು ಬಯಸಿದ್ದೇನೆ. ಯಾಕೆಂದರೆ ಅಂತಹ ವ್ಯಕ್ತಿತ್ವವನ್ನು ಹೊಂದಲು ನಾನು ಬಯಸಿದ್ದೇನೆ. ಆದರೆ ಹಣಗಳಿಸಬೇಕೆಂಬ ಏಕೈಕ ಉದ್ದೇಶದಿಂದ ನಾನು ನಿರ್ಮಾಪಕಿಯಾಗಲು ಬಯಸಿಲ್ಲವೆಂದು ಆಕೆ ಈ ಹಿಂದೆ ಸಂದರ್ಶನವೊಂದರಲ್ಲಿ ತಿಳಿಸಿದ್ದರು.

ಈ ನಡುವೆ ದೀಪಿಕಾ ಪಡುಕೋಣೆ ತನ್ನ ಸ್ನೇಹಿತ, ಜನಪ್ರಿಯ ನಟ ರಣವೀರ್‌ಸಿಂಗ್ ಜೊತೆ ಹಸೆಮಣೆಯೇರಲಿದ್ದಾರೆಂಬ ಸುದ್ದಿಗಳು ಸುದ್ದಿಮಾಧ್ಯಮಗಳಲ್ಲಿ ಕಾಡ್ಗಿಚ್ಚಿನಂತೆ ಹರಡುತ್ತಿವೆ. ಆದಾಗ್ಯೂ ಇವರಿಬ್ಬರೂ ತಮ್ಮ ಮದುವೆಯ ಬಗ್ಗೆ ಒಂದೇ ಒಂದು ಮಾತನ್ನೂ ಆಡುತ್ತಿಲ್ಲ. ಆದರೆ ಈ ತಾರೆಯರ ಅಭಿಮಾನಿಗಳಲ್ಲಿ ಮಾತ್ರ, ದೀಪಿಕಾ-ರಣವೀರ್ ಮದುವೆ ಯಾವಾಗ ಎಂದು ಚಾತಕಪಕ್ಷಿಗಳಂತೆ ಕಾದುಕುಳಿತಿರುವುದಂತೂ ನಿಜ.