ರಣಬೀರ್ ‘ಸಂಜು’ ಟೀಸರ್ ವೈರಲ್
Update: 2018-05-05 12:10 GMT
ಬಾಲಿವುಡ್‌ನ ಆ್ಯಕ್ಷನ್ ಹೀರೋ ಸಂಜಯ್‌ದತ್ತ್‌ನ ಬಯೋಪಿಕ್ ಚಿತ್ರ ಸಂಜುವಿನ ಶೂಟಿಂಗ್ ಭರದಿಂದ ನಡೆಯುತ್ತಿದ್ದು, ಚಿತ್ರದ ಟೀಸರ್ ಕಳೆದ ವಾರ ಬಿಡುಗಡೆಯಾಗಿದೆ.ಸಂಜಯ್‌ದತ್ತ್ ಅವರ ಬದುಕಿನ ಅತ್ಯಂತ ತಲ್ಲಣಮಯ ದಿನಗಳ ಕಥೆಯನ್ನು ಹೇಳುವ ಈ ಚಿತ್ರ ಟೀಸರ್‌ನಿಂದಲೇ ವ್ಯಾಪಕವಾದ ಕುತೂಹಲವನ್ನು ಕೆರಳಿಸುವಲ್ಲಿ ಯಶಸ್ವಿಯಾಗಿದೆ.ಚಿತ್ರದಲ್ಲಿ ಸಂಜಯ್‌ದತ್ತ್‌ನ ಪಾತ್ರ ನಿರ್ವಹಿಸುತ್ತಿರುವ ರಣಬೀರ್ ಕಪೂರ್, ಟೀಸರ್‌ನಲ್ಲೇ ಚಿತ್ರಪ್ರೇಮಿಗಳ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದ್ದಾರೆ. ಟೀಸರ್‌ನಲ್ಲಿ ಸಂಜಯ್‌ದತ್ತ್‌ರ ಗೆಟಪ್‌ನಲ್ಲಿ ರಣಬೀರ್‌ನನ್ನು ಕಂಡು ಅದೆಷ್ಟೋ ಚಿತ್ರರಸಿಕರು ಮೂಗಿನಮೇಲೆ ಬೆರಳಿಟ್ಟಿದ್ದಾರೆ. ಅಭಿನಯದಲ್ಲೂ ಥೇಟ್ ಸಂಜಯ್‌ದತ್ತ್‌ರ ಮ್ಯಾನರಿಸಂನ್ನು ಅನುಕರಿಸಿ ಬೆರಗುಮೂಡಿಸಿರುವ ರಣಬೀರ್ ಚಿತ್ರದ ಬಗ್ಗೆ ಭಾರೀ ನಿರೀಕ್ಷೆಯನ್ನು ಮೂಡಿಸಿದ್ದಾರೆ.
ಸಂಜಯ್‌ದತ್ತ್ ಬದುಕಿನ ವಿಭಿನ್ನ ಹಂತಗಳ ಕಿರುನೋಟವನ್ನು ಟೀಸರ್‌ನಲ್ಲಿ ನೀಡಲಾಗಿದೆ. ಒಂದೂವರೆ ನಿಮಿಷಗಳ ಈ ಟೀಸರ್, ಯೂಟ್ಯೂಬ್‌ನಲ್ಲಿ ಈಗಾಗಲೇ ವೈರಲ್ ಆಗಿದೆ. ಸಂಜೂ ಚಿತ್ರದ ಟೀಸರ್ ಯೂಟ್ಯೂಬ್‌ನಲ್ಲಿ ರಿಲೀಸ್ ಆದ ಕೇವಲ 48 ತಾಸುಗಳಲ್ಲಿ ಅದು 3 ಕೋಟಿಗೂ ಅಧಿಕ ಬಾರಿ ವೀಕ್ಷಣೆಗೊಳಗಾಗಿದೆ.
ಈ ಚಿತ್ರಕ್ಕಾಗಿ ರಣಬೀರ್ ಒಂದು ವರ್ಷಗಳ ಮೊದಲೇ ಸಾಕಷ್ಟು ಬಾರಿ ಸ್ಕ್ರೀನ್‌ಟೆಸ್ಟ್‌ಗೊಳಗಾಗಿದ್ದಾರಂತೆ. ಹಾಗಂತ ಸ್ವತಃ ಅವರೇ ಹೇಳಿಕೊಂಡಿದ್ದಾರೆ. ಸಾಧಾರಣವಾಗಿ ನೀಳಕಾಯದವರಾದ ರಣಬೀರ್ ಕಪೂರ್ ಸಂಜಯ್‌ದತ್ತ್ ಹಾಗೆ ಕಾಣಿಸಿಕೊಳ್ಳುವುದಕ್ಕಾಗಿ, ಜಿಮ್‌ನಲ್ಲಿ ಸಾಕಷ್ಟು ಬೆವರಿಳಿಸಿ ಮೈಕಟ್ಟು ಬೆಳೆಸಿಕೊಂಡಿದ್ದಾರೆ. ಸಂಜಯ್ ದತ್ತ್ ಅವರ ಚಿತ್ರ ಬದುಕಿನ ಆರಂಭದ ದಿನಗಳು, ಡ್ರಗ್ಸ್‌ವ್ಯಸನ, ಜೈಲಿನ ದಿನಗಳು ಹೀಗೆ ಆ ಬಾಲಿವುಡ್‌ನ ನಟನ ಬದುಕಿನ ನಿರ್ಣಾಯಕ ಹಂತಗಳನ್ನು ಚಿತ್ರದಲ್ಲಿ ರೋಚಕವಾಗಿ ತೋರಿಸಲಾಗಿದೆ.