ಎಚ್-4 ವೀಸಾದಾರರಿಗೆ ಕೆಲಸ ನಿರಾಕರಣೆ ಪ್ರಸ್ತಾಪ ಅಂತಿಮ ಹಂತದಲ್ಲಿ
Update: 2018-05-25 23:40 IST
ವಾಶಿಂಗ್ಟನ್, ಮೇ 26: ಎಚ್-4 ವೀಸಾ ಹೊಂದಿರುವವರಿಗೆ ಅಮೆರಿಕದಲ್ಲಿ ಕೆಲಸ ಮಾಡಲು ನೀಡಲಾಗಿರುವ ಪರವಾನಿಗೆಯನ್ನು ಹಿಂದಕ್ಕೆ ಪಡೆಯುವ ಪ್ರಸ್ತಾಪವು ಅಂತಿಮ ಹಂತದಲ್ಲಿದೆ ಎಂದು ಟ್ರಂಪ್ ಆಡಳಿತ ಅಮೆರಿಕದ ನ್ಯಾಯಾಲಯವೊಂದಕ್ಕೆ ಹೇಳಿದೆ.
ಈ ನಿರ್ಧಾರವು ಸಾವಿರಾರು ಭಾರತೀಯರ ಮೇಲೆ ದುಷ್ಪರಿಣಾಮ ಬೀರುವ ಸಾಧ್ಯತೆಯಿದೆ.
ಅಮೆರಿಕದಲ್ಲಿ ಕೆಲಸ ಮಾಡುವ ವಿದೇಶಿ ಕುಶಲ ಕೆಲಸಗಾರರಿಗೆ ಎಚ್-1ಬಿ ವೀಸಾಗಳನ್ನು ನೀಡಲಾಗುತ್ತಿದ್ದು, ಅವರ ಸಂಗಾತಿಗಳಿಗೆ ಎಚ್-4 ವೀಸಾಗಳನ್ನು ನೀಡಲಾಗುತ್ತದೆ. ಎಚ್-1ಬಿ ವೀಸಾಗಳನ್ನು ಪಡೆದಿರುವ ಹೆಚ್ಚಿನವರು ಭಾರತೀಯರು.
ಎಚ್-1ಬಿ ವೀಸಾಗಳನ್ನು ಹೊಂದಿರುವವರ ಸಂಗಾತಿಗಳಿಗೆ ಅಮೆರಿಕದಲ್ಲಿ ಕಾನೂನುಬದ್ಧವಾಗಿ ಕೆಲಸ ಮಾಡಲು ಅವಕಾಶ ನೀಡುವ ಒಬಾಮ ಆಡಳಿತದ ನೀತಿಯನ್ನು ರದ್ದುಗೊಳಿಸಲು ಪ್ರಸಕ್ತ ಟ್ರಂಪ್ ಆಡಳಿತ ನಿರ್ಧರಿಸಿದೆ.
ಪ್ರಸ್ತಾಪಿತ ಕಾನೂನು ಅಂತಿಮ ಹಂತದಲ್ಲಿದೆ ಎಂದು ಆಂತರಿಕ ಭದ್ರತೆ ಇಲಾಖೆಯು ಫೆಡರಲ್ ನ್ಯಾಯಾಲಯವೊಂದಕ್ಕೆ ತಿಳಿಸಿದೆ.