ಚಾಲೆಂಜಿಂಗ್ ಪಾತ್ರಗಳಲ್ಲಿ ತಾಪ್ಸಿ ಪನ್ನೂ

ಬೇಬಿ, ಪಿಂಕ್ ಚಿತ್ರಗಳಿಂದ ಬಾಲಿವುಡ್‌ನಲ್ಲಿ ಹೆಸರು ಮಾಡಿರುವ ನಟಿ ತಾಪ್ಸಿ ಪನ್ನೂ, ಈ ವರ್ಷವೂ ಬಾಲಿವುಡ್‌ನಲ್ಲಿ ಮಿಂಚಲಿದ್ದಾರೆ. ಫಿಲೌರಿ ಹಾಗೂ ಉಡ್ತಾ ಪಂಜಾಬ್ ಚಿತ್ರಗಳ ಮೂಲಕ ಬಾಲಿವುಡ್ ಪ್ರೇಕ್ಷಕರ ಗಮನಸೆಳೆದ ದಿಲಿಜಿತ್ ದೊಸಾಂಜ್ ನಿರ್ದೇಶನದ ಬಯೋಪಿಕ್ ಚಿತ್ರ ಸೂರ್ಮಾದಲ್ಲಿ ಅವರು ಮುಖ್ಯಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಭಾರತೀಯ ಹಾಕಿ ತಂಡದ ಮಾಜಿ ಕ್ಯಾಪ್ಟನ್ ಸಂದೀಪ್‌ಸಿಂಗ್ ಅವರ ಜೀವನಕಥೆಯನ್ನು ಆಧರಿಸಿದ ಸೂರ್ಮಾ , ಜೂನ್ 29ರಂದು ತೆರೆಕಾಣಲಿದೆ.ತಾಪ್ಸಿ ಪನ್ನೂ ಈ ಚಿತ್ರದಲ್ಲಿ , ಸಂದೀಪ್‌ಸಿಂಗ್ ಸಹೋದರಿ ಹರ್‌ಪ್ರೀತ್‌ರ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಚಿತ್ರದಲ್ಲಿ ತನ್ನ ಪಾತ್ರಕ್ಕೆ ಅಭಿನಯ ಪ್ರದರ್ಶನಕ್ಕೆ ಹೇರಳ ಅವಕಾಶವಿರುವುದು ತಾಪ್ಸಿಗೆ ತುಂಬಾ ಖುಷಿ ತಂದಿದೆಯಂತೆ. ಆಂಗದ್‌ಬೇಡಿ ನಾಯಕನಟನಾಗಿ ನಟಿಸಿರುವ ಸೂರ್ಮಾದಲ್ಲಿ ಚಿತ್ರಾಂಗದಾ ಸಿಂಗ್ ಹಾಗೂ ದೀಪಕ್‌ಸಿಂಗ್ ಕೂಡಾ ನಟಿಸಿದ್ದಾರೆ. ಸೂರ್ಮಾ ಅಲ್ಲದೆ ಮುಲ್ಕ್ ತಾಪ್ಸಿ ಪನ್ನೂ ಅಭಿನಯದ ಇನ್ನೊಂದು ಬಹುನಿರೀಕ್ಷೆಯ ಚಿತ್ರ. ಹಿರಿಯ ನಟ ರಿಶಿಕಪೂರ್ ಮುಖ್ಯಪಾತ್ರದಲ್ಲಿ ನಟಿಸಿರುವ ಈ ಚಿತ್ರದ ಫಸ್ಟ್ ಲುಕ್ ಈಗಾಗಲೇ ಬಿಡುಗಡೆಯಾಗಿದ್ದು, ಚಿತ್ರದ ಬಗ್ಗೆ ಸಾಕಷ್ಟು ಕುತೂಹಲ ಕೆರಳಿಸುವಲ್ಲಿ ಯಶಸ್ವಿಯಾಗಿದೆ. ವಿವಾದವೊಂದರಲ್ಲಿ ಸಿಲುಕಿದ ಕುಟುಂಬದ ಸುತ್ತ ತಿರುಗುವ ಈ ಚಿತ್ರದ ಕಥಾವಸ್ತು ನೈಜ ಘಟನೆ ಗಳನ್ನು ಆಧರಿಸಿದೆ. ಚಿತ್ರದಲ್ಲಿ ನ್ಯಾಯವಾದಿಯಾಗಿ ನಟಿಸಿರುವ ತಾಪ್ಸಿ ಪನ್ನೂ, ಈ ಕಳಂಕಿತ ಕುಟುಂಬದ ಘನತೆಯನ್ನು ಕಾಪಾಡಲು ಹೋರಾಡುವುದೇ ಚಿತ್ರದ ಕಥಾವಸ್ತುವಾಗಿದೆ. ಪ್ರತೀಕ್‌ಬಬ್ಬರ್, ರಜತ್‌ಕಪೂರ್, ಅಶುತೋಷ್ ರಾಣಾ, ನೀನಾಗುಪ್ತಾ ಇತರ ಮುಖ್ಯಪಾತ್ರಗಳಲ್ಲಿದ್ದಾರೆ. ತುಮ್‌ಬಿನ್, ದಸ್ ಹಾಗೂ ರಾ ಓನ್ ಚಿತ್ರಗಳ ನಿರ್ದೇಶಕ ಅನುಭವ್‌ಸಿನ್ಹಾ ಈ ಚಿತ್ರ ನಿರ್ದೇಶಿಸಿದ್ದಾರೆ.