ಝೈರಾ ವಾಸಿಂ ಚಿತ್ರದಲ್ಲಿ ಅಭಿಷೇಕ್-ಪ್ರಿಯಾಂಕಾ

9 ವರ್ಷಗಳ ಸುದೀರ್ಘ ಅವಧಿಯ ಬಳಿಕ ಪ್ರಿಯಾಂಕಾ ಚೋಪ್ರಾ ಹಾಗೂ ಅಭಿಷೇಕ್ ಬಚ್ಚನ್ ಮತ್ತೊಮ್ಮೆ ಜೊತೆಯಾಗಿ ಚಿತ್ರ ರಸಿಕರನ್ನು ರಂಜಿಸಲು ಸಿದ್ಧರಾಗುತ್ತಿದ್ದಾರೆ. ಬ್ಲಫ್‌ಮಾಸ್ಟರ್ ಹಾಗೂ ದೋಸ್ತಾನದಂತಹ ಸೂಪರ್‌ಹಿಟ್ ಚಿತ್ರಗಳನ್ನು ನೀಡಿರುವ ಈ ತಾರಾ ಜೋಡಿ, ಶೊನಾಲಿ ಬೋಸ್ ನಿರ್ದೇಶನದ ಪಿಸಿ ಚಿತ್ರದಲ್ಲಿ ಮತ್ತೆ ಒಂದಾಗುತ್ತಿದ್ದಾರೆ. ಈ ಚಿತ್ರದಲ್ಲಿ ಅಭಿಷೇಕ್ ಹಾಗೂ ಪ್ರಿಯಾಂಕಾ ಚೋಪ್ರಾ ವಿವಾಹಿತ ಜೋಡಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ.

ದಂಗಲ್ ಹಾಗೂ ಸೀಕ್ರೆಟ್ ಸೂಪರ್‌ಸ್ಟಾರ್ ಚಿತ್ರಗಳಿಂದ ಬಾಲಿವುಡ್ ಪ್ರೇಕ್ಷಕರಿಗೆ ಚಿರಪರಿಚಿತಳಾಗಿರುವ ಬಾಲನಟಿ ಝೈರಾವಾಸಿಂ, ಈ ಚಿತ್ರದಲ್ಲಿ ಪ್ರಧಾನಪಾತ್ರದಲ್ಲಿ ನಟಿಸಲಿದ್ದಾರೆ. ಹುಟ್ಟಿನಿಂದಲೇ ರೋಗನಿರೋಧಕಶಕ್ತಿಯ ಕೊರತೆಯಿಂದ ಜನಿಸಿದರೂ, ‘‘ಮೈ ಲಿಟಲ್ ಎಪಿಫನೀಸ್’ ಎಂಬ ಪುಸ್ತಕ ಬರೆದು ಭಾರೀ ಹೆಸರು ಪಡೆದ ಬಾಲಕಿ ಆಯಿಶಾ ಚೌಧುರಿಯ ಪಾತ್ರದಲ್ಲಿ ಆಕೆ ನಟಿಸಲಿದ್ದಾಳೆ. ಹಲವಾರು ರೋಗಗಳಿಗೆ ತುತ್ತಾಗಿದ್ದರೂ, ತನ್ನ ಸಾಧನೆಯ ಮೂಲಕ ಹೆಸರು ಮಾಡಿದ ಆಯಿಶಾಳ ಜೀವನಕಥೆಯನ್ನು ಆಧರಿಸಿ ಈ ಚಿತ್ರ ತಯಾರಾಗಲಿದೆ. ನಿಜಜೀವನದಲ್ಲಿ ರಿಯಲ್ ಸ್ಟಾರ್ ಆಗಿರುವ ಆಯಿಶಾಳ ಬಗ್ಗೆ ಚಿತ್ರ ಮಾಡಬೇಕೆಂದು ಶೋನಾಲಿ ಬೋಸ್ ಬಹಳ ಸಮಯದ ಹಿಂದೆಯೇ ಯೋಚಿಸುತ್ತಿದ್ದರಂತೆ. ಇದೀಗ ಅವರ ಹಂಬಲ ಈಡೇರುತ್ತಿದೆ. ಇನ್ನೊಂದು ವಿಷಯವೆಂದರೆ, ಈ ಚಿತ್ರದಲ್ಲಿ ಆಯಿಶಾಳ ತಂದೆತಾಯಿಗಳ ಪಾತ್ರದಲ್ಲಿ ಅಭಿಷೇಕ್ ಹಾಗೂ ಪ್ರಿಯಾಂಕಾ ಚೋಪ್ರಾ ನಟಿಸುತ್ತಿದ್ದಾರೆ.

ಚಿತ್ರದ ಕಥೆ ಝೈರಾಗೆ ತುಂಬಾ ಹಿಡಿಸಿದ್ದು, ಈ ಪ್ರಾಜೆಕ್ಟ್‌ಗೆ ಆಕೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರಂತೆ. ಸದ್ಯನಿರ್ದೇಶಕಿ ಶೋನಾಲಿ ಬೋಸ್, ಸಿನೆಮಾದ ಚಿತ್ರೀಕರಣಪೂರ್ವ ಕೆಲಸಗಳಲ್ಲಿ ಮಗ್ನರಾಗಿದ್ದಾರೆ. ಇನ್ನಷ್ಟೇ ಹೆಸರಿಡಬೇಕಾದ ಈ ಚಿತ್ರದ ಶೂಟಿಂಗ್ ಜುಲೈ-ಆಗಸ್ಟ್ ತಿಂಗಳ ವೇಳೆಗೆ ಆರಂಭವಾಗುವ ನಿರೀಕ್ಷೆಯಿದೆ.