ಆಮಿರ್ ಖಾನ್ ಗರಡಿಯಲ್ಲಿ ಪಳಗಿರುವ ಸಾನ್ಯಾ

ಮಲ್ಹೋತ್ರಾಳ ಎರಡನೇ ಸಿನೆಮಾ ಪಟಾಕಾ ಬಿಡುಗಡೆಗೆ ಸಿದ್ಧವಾಗಿದ್ದು ಚಿತ್ರದ ಟ್ರೈಲರ್ ಮಂಗಳವಾರ ಸಾಮಾಜಿಕ ಮಾಧ್ಯಮಗಳಲ್ಲಿ ಬಿಡುಗಡೆ ಮಾಡ ಲಾಯಿತು. ಚಿತ್ರದ ಟ್ರೈಲರ್ ವೈರಲ್ ಆಗುತ್ತಿದ್ದಂತೆ ಈ ಕುರಿತು ಟ್ವೀಟ್ ಮಾಡಿದ ಆಮಿರ್ ಖಾನ್, ಸಾನ್ಯಾ ಮತ್ತು ಸಿನೆಮಾಕ್ಕೆ ಶುಭ ಕೋರಿದ್ದಾರೆ. ಸಾನ್ಯಾ ಮಲ್ಹೋತ್ರಾ 2016ರಲ್ಲಿ ಬಿಡುಗಡೆಯಾದ ಆಮಿರ್ ಖಾನ್ ಅಭಿನಯದ ‘ದಂಗಲ್’ ಸಿನೆಮಾದಲ್ಲಿ ಆತನ ಮಗಳ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಕುಸ್ತಿಪಟು ಮಹಾವೀರ್ ಪೋಗಟ್ ಅವರ ಜೀವನಕತೆಯನ್ನು ಹೊಂದಿರುವ ಈ ಸಿನೆಮಾದಲ್ಲಿ ಸಾನ್ಯಾ ಪೋಗಟ್ ಅವರ ಎರಡನೇ ಮಗಳು ಬಬಿತಾಳ ಪಾತ್ರವನ್ನು ನಿಭಾಯಿಸಿದ್ದರು.

ಅಷ್ಟು ಮಾತ್ರವಲ್ಲ, ದಂಗಲ್ ನಂತರ ಬಿಡುಗಡೆಯಾದ ಆಮಿರ್ ಖಾನ್‌ರ ಸೀಕ್ರೆಟ್ ಸೂಪರ್‌ಸ್ಟಾರ್ ಚಿತ್ರದಲ್ಲಿರುವ ಒಂದು ಹಾಡಿಗೆ ಸಾನ್ಯಾ 53ರ ಹರೆಯದ ನಟನಿಗೆ ನೃತ್ಯ ಕೂಡಾ ಕಲಿಸಿದ್ದರು. ಬಾಲಿವುಡ್‌ನಲ್ಲಿ ವಿಭಿನ್ನ ಅಭಿರುಚಿಯ ಸಿನೆಮಾಗಳನ್ನು ನಿರ್ದೇಶಿಸುವ ವಿಶಾಲ್ ಭಾರದ್ವಾಜ್ ಪಟಾಕಾ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಈ ಸಿನೆಮಾ ಎರಡು ಸಹೋದರಿಯರ ಕತೆಯನ್ನು ಹೊಂದಿದೆ. ಈ ಇಬ್ಬರು ಸಹೋದರಿಯರು ಸದಾ ಜಗಳವಾಡುತ್ತಲೇ ಇರುತ್ತಾರೆ. ಸಾನ್ಯಾ ಮತ್ತು ರಾಧಿಕಾ ಮದನ್ ಈ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸಹೋದರಿಯರ ಜಗಳದಿಂದ ರೋಸಿ ಹೋಗುವ ಅವರ ತಂದೆ ಅವರಲ್ಲಿ ಒಬ್ಬಾಕೆಗೆ ಗ್ರಾಮದ ಶ್ರೀಮಂತ ವ್ಯಕ್ತಿಯ ಜೊತೆ ವಿವಾಹ ಮಾಡಲು ಮುಂದಾಗುತ್ತಾರೆ. ಆದರೆ ಆ ವ್ಯಕ್ತಿಯನ್ನು ಇಬ್ಬರು ಸಹೋದರಿಯರೂ ನಿರಾಕರಿಸುತ್ತಾರೆ ಮತ್ತು ಮನೆಯಿಂದ ಓಡಿಹೋಗಿ ತಮ್ಮಿಷ್ಟದ ಯುವಕರನ್ನು ವಿವಾಹವಾಗುತ್ತಾರೆ. ಆದರೆ ನಂತರವೇ ಅವರಿಗೆ ನಾವು ಈಗ ಪರಸ್ಪರ ನಾದಿನಿಯರಾಗಿದ್ದೇವೆ ಎಂಬುದು ತಿಳಿಯುತ್ತದೆ. ಮಕ್ಬೂಲ್, ಕಮೀನೆ, ಓಂಕಾರ, ಹೈದರ್‌ನಂಥ ಸಿನೆಮಾಗಳನ್ನು ನೀಡಿರುವ ವಿಶಾಲ್ ಭಾರದ್ವಾಜ್ ಈ ಬಾರಿ ಮತ್ತೊಂದು ವಿಭಿನ್ನ ಚಿತ್ರಕತೆಯುಳ್ಳ ಸಿನೆಮಾವನ್ನು ನಿರ್ದೇಶಿಸಲು ಮುಂದಾಗಿದ್ದಾರೆ. ಅವರ ಕೊನೆಯ ನಿರ್ದೇಶನದ ಚಿತ್ರ ರಂಗೂನ್ ಪ್ರೇಕ್ಷಕರ ಮನ ಗೆಲ್ಲುವಲ್ಲಿ ವಿಫಲವಾಗಿತ್ತು. ಪಟಾಕಾ ಯಾವ ರೀತಿಯ ಪರಿಣಾಮ ಬೀರುತ್ತದೆ ಎಂದು ಕಾದು ನೋಡಬೇಕಿದೆ.