ಸಲ್ಮಾನ್ ಖಾನ್ ಅಭಯದಲ್ಲಿ ‘ಪ್ರನೂತನ್’

ಪ್ರತಿಭೆಯಿರುವವರನ್ನು ಗುರುತಿಸಿ ಅವರಿಗೆ ಬಾಲಿವುಡ್‌ನಲ್ಲಿ ಅವಕಾಶ ನೀಡುವಲ್ಲಿ ನಟ ಸಲ್ಮಾನ್ ಖಾನ್ ಮೊದಲಿಗರು. ಸ್ನೇಹಾ ಉಳ್ಳಾಲ್, ಝರೀನ್ ಖಾನ್, ಆದಿತ್ಯ ಪಾಂಚೋಲಿ, ಅತಿಯಾ ಶೆಟ್ಟಿ ಹೀಗೆ ಸಲ್ಮಾನ್ ಬಾಲಿವುಡ್‌ನಲ್ಲಿ ಅವಕಾಶ ನೀಡಿದ ಜನರ ಸಂಖ್ಯೆ ಬಹಳ ದೊಡ್ಡದಿದೆ.

ಇದೀಗ ಈ ಪಟ್ಟಿಗೆ ಹೊಸದಾಗಿ ಸೇರ್ಪಡೆಯಾಗುತ್ತಿರುವ ಹೆಸರು ಪ್ರನೂತನ್. 60 ದಶಕದಲ್ಲಿ ಹಿಂದಿ ಸಿನೆಮಾರಂಗದ ಪ್ರತಿಭಾನ್ವಿತ ನಾಯಕಿಯರಲ್ಲಿ ಒಬ್ಬರಾಗಿದ್ದ ನೂತನ್ ಅವರ ಮೊಮ್ಮಗಳೇ ಈ ಪ್ರನೂತನ್. ಈಕೆ ನಟ ಮೊನಿಶ್ ಬೆಹೆಲ್‌ನ ಮಗಳು. ಬೆಹೆಲ್ ಮತ್ತು ಸಲ್ಮಾನ್ ಈ ಹಿಂದೆ ಮೈನೆ ಪ್ಯಾರ್ ಕಿಯಾ, ಹಮ್ ಆಪ್ಕೆ ಹೇ ಕೌನ್, ಹಮ್ ಸಾಥ್ ಸಾಥ್ ಹೇ ಮುಂತಾದ ಸಿನೆಮಾಗಳಲ್ಲಿ ಜೊತೆಯಾಗಿ ನಟಿಸಿದ್ದಾರೆ. ಸದ್ಯ ಸಲ್ಮಾನ್ ಖಾನ್ ಫಿಲ್ಮ್ಸ್ ನಿರ್ಮಿಸುತ್ತಿರುವ ಈ ಚಿತ್ರದಲ್ಲಿ ಪ್ರನೂತನ್‌ಗೆ ನಾಯಕನಾಗಿ ಝಹೀರ್ ಇಕ್ಬಾಲ್ ನಟಿಸುತ್ತಿದ್ದಾರೆ. ಝಹೀರ್ ಇಕ್ಬಾಲ್, ಸಲ್ಮಾನ್‌ನ ಇನ್ನೋರ್ವ ಸ್ನೇಹಿತ ಇಕ್ಬಾಲ್ ರತನ್ಸಿಯ ಪುತ್ರನಾಗಿದ್ದಾನೆ. ಝಹೀರ್ ಕೂಡಾ ಈ ಸಿನೆಮಾದ ಮೂಲಕ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡುತ್ತಿದ್ದಾರೆ.

ಒಟ್ಟಾರೆಯಾಗಿ ಸದ್ಯ ಬಾಲಿವುಡ್‌ನಲ್ಲಿ ಹೊಸಮುಖಗಳದ್ದೇ ಕಾರುಬಾರು. ಸೂಪರ್ ಸ್ಟಾರ್‌ಗಳ ಸಿನೆಮಾದ ಕ್ರೇಝ್ ಕಡಿಮೆಯಾಗುತ್ತಿದ್ದು ಸಿನಿಪ್ರಿಯರು ಕೂಡಾ ಹೊಸ ಪ್ರತಿಭೆಗಳಿಗೆ ಮಣೆ ಹಾಕುತ್ತಿರುವುದು ಈ ಬದಲಾವಣೆಗೆ ಕಾರಣವಾಗಿರಬಹುದು. ಸದ್ಯ ಸಲ್ಮಾನ್ ಅಭಯದೊಂದಿಗೆ ಸಿನೆಮಾರಂಗಕ್ಕೆ ಕಾಲಿಡುತ್ತಿರುವ ಪ್ರನೂತನ್ ಮತ್ತು ಝಹೀರ್ ಯಾವ ರೀತಿಯ ಕಮಾಲ್ ಮಾಡುತ್ತಾರೆ ಎಂದು ಮುಂದೆ ನೋಡ ಬೇಕಿದೆ.