ನಾನಾ ಪಾಟೇಕರ್ ವಿರುದ್ಧ ಬಾಲಿವುಡ್ ನ ಪ್ರಸಿದ್ಧ ನಟಿಯಿಂದ ಲೈಂಗಿಕ ಕಿರುಕುಳ ಆರೋಪ

ಹೊಸದಿಲ್ಲಿ, ಸೆ.26: ಹತ್ತು ವರ್ಷಗಳ ಹಿಂದೆ, 2009ರಲ್ಲಿ ‘ಹಾರ್ನ್ ಓಕೆ ಪ್ಲೀಸ್’ ಚಿತ್ರದ ಸೆಟ್ ನಲ್ಲಿ ತನಗೆ ಕಿರುಕುಳ ನೀಡಲಾಗಿತ್ತು ಎಂದು ಆರೋಪಿಸಿರುವ ನಟಿ ತನುಶ್ರೀ ದತ್ತಾ, ಆ ಚಿತ್ರದ ಪ್ರಮುಖ ನಟರಾಗಿದ್ದ ನಾನಾ ಪಾಟೇಕರ್ ಅವರತ್ತ  ಬೊಟ್ಟು ಮಾಡಿ ತೋರಿಸಿದ್ದಾರೆ.

‘ಝೂಮ್ ಟಿವಿ’ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ತನುಶ್ರೀ, ಚಿತ್ರೋದ್ಯದ ಒಳಹೊರಗು ಅರಿತಿರುವವರಿಗೆ ನಾನಾ ಪಾಟೇಕರ್ ಅವರು ಮಹಿಳೆಯರೊಂದಿಗೆ ಅಸಭ್ಯವಾಗಿ ವರ್ತಿಸುತ್ತಿರುವ ಬಗ್ಗೆ ತಿಳಿದಿದ್ದರೂ ಯಾರೂ ಅದರ ಬಗ್ಗೆ ಮಾತನಾಡಿಲ್ಲ” ಎಂದಿದ್ದಾರೆ. “ನಾನಾ ಪಾಟೇಕರ್ ಮಹಿಳೆಯರಿಗೆ ಅಗೌರವ ತೋರಿಸುತ್ತಾರೆಂದು ಎಲ್ಲರಿಗೂ ತಿಳಿದಿದೆ. ಅವರ ಹಿನ್ನೆಲೆ ಕೂಡ ಗೊತ್ತು, ಅವರು ನಟಿಯರಿಗೆ ಥಳಿಸಿದ್ದಾರೆ, ಅವರಿಗೆ ಲೈಗಿಕ ಕಿರುಕುಳ ನೀಡಿದ್ದಾರೆ, ಅವರು ಮಹಿಳೆಯರೊಂದಿಗೆ ಯಾವತ್ತೂ ಒರಟಾಗಿ ವರ್ತಿಸಿದ್ದಾರೆ. ಆದರೆ ಯಾರೂ ಅದರ ಬಗ್ಗೆ ವರದಿ ಮಾಡಿಲ್ಲ'' ಎಂದು ತನುಶ್ರೀ ಆರೋಪಿಸಿದ್ದಾರೆ.

ತನಗೆ ಒಂದು ದಶಕದ ಹಿಂದೆ ಆಗಿದ್ದನ್ನು ಎಲ್ಲರೂ ಒಪ್ಪಿಕೊಳ್ಳದೇ ಇದ್ದರೆ #ಮೀಟೂ ಆಂದೋಲನ ಭಾರತ ತಲುಪುವುದಿಲ್ಲ ಎಂದು ಅವರು ಹೇಳಿದರು. ``ಅಕ್ಷಯ್ ಕುಂದರ್ ಅವರು ನಾನಾ ಪಾಟೇಕರ್ ಜತೆ ಕೆಲ ಚಿತ್ರಗಳನ್ನು ಕಳೆದ ಎಂಟು ವರ್ಷಗಳಲ್ಲಿ ಮಾಡಿದ್ದಾರೆ. ರಜಿನಿಕಾಂತ್ ಕೂಡ ಅವರ ಜತೆ ಕೆಲಸ ಮಾಡಿದ್ದಾರೆ. ಇಂತಹ ದೊಡ್ಡ ನಟರು ಇಂತಹ  ತಪ್ಪಿತಸ್ಥರ ಜತೆ ನಟಿಸುವುದನ್ನು  ಮುಂದುವರಿಸಿದರೆ  ಯಾವುದೇ ಆಂದೋಲನ ನಡೆಯುವ ಬಗ್ಗೆ ಭರವಸೆಯಿಲ್ಲ,'' ಎಂದು ತನುಶ್ರೀ ಹೇಳಿದ್ದಾರೆ.

“ನೀವು ಈ ಚಿತ್ರೋದ್ಯಮದಲ್ಲಿರುವಾಗ ಕೆಲ ನಟರ ಬಗ್ಗೆ ಬಹಳಷ್ಟು ಕೇಳಿರುತ್ತೀರಿ. ಆದರೆ ಅವು ಹೊರ ಬರುವುದೇ ಇಲ್ಲ.  ಅವರು ಬಡ ರೈತರಿಗೆ ಸ್ವಲ್ಪ ಹಣ ನೀಡುತ್ತಾರೆ. ಎಲ್ಲವೂ ಕೇವಲ ತೋರಿಕೆಗಾಗಿ'' ಎಂದು ತನುಶ್ರೀ ಹೇಳಿದರು.