ಅಮಿತಾಬ್ ಬಚ್ಚನ್ ವಿರುದ್ಧ ಕಿಡಿಕಾರಿದ ತನುಶ್ರೀ ದತ್ತಾ

ಮುಂಬೈ, ಅ.1: ಬಾಲಿವುಡ್ ನಟಿ ತನುಶ್ರೀ ದತ್ತಾ ಅವರು ಹಿರಿಯ ನಟ ನಾನಾ ಪಾಟೇಕರ್ ವಿರುದ್ಧ ಲೈಂಗಿಕ ಕಿರುಕುಳದ ಬಾಂಬ್ ಸಿಡಿಸಿದ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿವಾದ ಸಂಚಲನ ಮೂಡಿಸಿದೆ. ಈ ಬಗ್ಗೆ ಹಲವು ಬಾಲಿವುಡ್ ಸೆಲೆಬ್ರಿಟಿಗಳು ಕೂಡಾ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ. ಫರ್ಹಾನ್ ಅಖ್ತರ್, ಪ್ರಿಯಾಂಕಾ ಛೋಪ್ರಾ ಅವರಿಂದ ಹಿಡಿದು ಶಿಲ್ಪಾ ಶೆಟ್ಟಿವರೆಗೆ ಹಲವು ಮಂದಿ ತನುಶ್ರೀ ದತ್ತಾ ಅವರ ಬೆಂಬಲಕ್ಕೆ ನಿಂತಿದ್ದಾರೆ.

ಆದರೆ, ಬಾಲಿವುಡ್ ಐಕಾನ್, ಅಮಿತಾಬ್ ಬಚ್ಚನ್ ಬಗ್ಗೆ ಬಾಲಿವುಡ್ ನಟಿ ಬೇಸರ ವ್ಯಕ್ತಪಡಿಸಿದ್ದಾರೆ. ಥಗ್ಸ್ ಆಫ್ ಹಿಂದೂಸ್ತಾನ್ ಚಿತ್ರದ ಟ್ರೇಲರ್ ಬಿಡುಗಡೆ ಸಮಾರಂಭದಲ್ಲಿ ಬಿಗ್ ಬಿ ಅವರನ್ನು ಈ ವಿವಾದದ ಬಗ್ಗೆ ಪ್ರಶ್ನಿಸಿದಾಗ, "ನಾನು ತನುಶ್ರೀಯೂ ಅಲ್ಲ ಅಥವಾ ನಾನಾ ಪಾಟೇಕರ್ ಕೂಡಾ ಅಲ್ಲ; ಅದನ್ನು ಅವರಿಗೇ ಬಿಟ್ಟುಬಿಡಿ" ಎಂದು ಪ್ರತಿಕ್ರಿಯಿಸಿದ್ದರು. ಬಿಗ್ ಬಿ ಯವರ ಈ ಪ್ರತಿಕ್ರಿಯೆ ಬಗ್ಗೆ ಹಿಂದೂಸ್ತಾನ್ ಟೈಮ್ಸ್‍ಗೆ ನೀಡಿದ ಸಂದರ್ಶನದಲ್ಲಿ ತನುಶ್ರೀ ಬೇಸರ ವ್ಯಕ್ತಪಡಿಸಿದ್ದಾರೆ. "ನನಗೆ ತೀರಾ ಆಘಾತವಾಗಿದೆ. ಏಕೆಂದರೆ ಈ ವ್ಯಕ್ತಿಗಳು ಸಾಮಾಜಿಕ ಕಾರಣಕ್ಕಾಗಿ ಚಿತ್ರ ಮಾಡುವವರು. ಆದರೆ ನಿಮ್ಮೆದುರಿಗೇ ನಡೆಯುತ್ತಿರುವುದರ ಬಗ್ಗೆ ಕೇಳಿದಾಗ ನುಣುಚಿಕೊಳ್ಳುವ ಹೇಳಿಕೆ ನೀಡುವುದರಲ್ಲಿ ಅರ್ಥವಿಲ್ಲ" ಎಂದು ತನುಶ್ರೀ ಹೇಳಿದ್ದರು.

ಈ ಮಧ್ಯೆ ತನುಶ್ರೀ ಹಾಗೂ ಪಾಟೇಕರ್ ನಡುವಿನ ವಿವಾದ ಉಲ್ಬಣಿಸಿದೆ. ಚಾರಿತ್ರ್ಯ ಹರಣಕ್ಕಾಗಿ ನಾನಾ ಪಾಟೇಕರ್ ಅವರು ದತ್ತಾಗೆ ಕಾನೂನು ನೋಟಿಸ್ ನೀಡಿದ್ದಾರೆ. ನಾನಾ ವಿವಾದದ ಬಗ್ಗೆ ಪತ್ರಿಕಾಗೋಷ್ಠಿಯನ್ನೇ ಕರೆದು, ತಮ್ಮ ದಾಖಲೆ ಸರಿಪಡಿಸಿಕೊಳ್ಳಲಿ ಎಂದು ದತ್ತಾ ಹೇಳಿದ್ದಾರೆ.