ಮೋಡಿ ಮಾಡಿದ ಮಣಿಕರ್ಣಿಕಾ ಟೀಸರ್

ಕಂಗನಾ ರಾಣಾವತ್ ಅಭಿನಯದ ಪೀರಿಯಡ್ ಡ್ರಾಮಾ ಮಣಿಕರ್ಣಿಕಾ ಚಿತ್ರದ ಬಿಡುಗಡೆಗೆ ದಿನಗಣನೆ ಆರಂಭವಾಗಿದೆ. ಭಾರೀ ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ಈ ಚಿತ್ರದ ಟೀಸರ್ ಇದೀಗ ಬಿಡುಗಡೆಯಾಗಿದೆ. ಬ್ರಿಟಿಶರ ವಿರುದ್ಧ ಕೆಚ್ಚೆದೆಯ ಹೋರಾಟ ನಡೆಸಿದ ಝಾನ್ಸಿ ರಾಣಿ ಲಕ್ಷ್ಮೀ ಬಾಯಿಯ ವೀರಗಾಥೆಯನ್ನು ಆಧರಿಸಿದ ಈ ಚಿತ್ರ ಬಾಲಿವುಡ್‌ನಲ್ಲಿ ಭಾರೀ ಭರವಸೆ ಮೂಡಿಸಿದೆ.

ಮಣಿಕರ್ಣಿಕಾದ ಟೀಸರ್‌ಗೆ, ಬಾಲಿವುಡ್‌ನ ಬಿಗ್‌ಬಿ ಅಮಿತಾಭ್ ಬಚ್ಚನ್ ಕಂಠದಾನ ಮಾಡಿದ್ದಾರೆ. ಬ್ರಿಟಿಶರ ವಿರುದ್ಧ ರಾಣಿ ಮಣಿಕರ್ಣಿಕಾ ಸಾರಿದ ಬಂಡಾಯದ ಬಗ್ಗೆ ಅಮಿತಾಭ್ ಬಚ್ಚನ್ ಟೀಸರ್‌ನಲ್ಲಿ ಅದ್ಭುತವಾಗಿ ರೂಪಿಸಿದ್ದಾರೆ. ಚಿತ್ರದ ಟೀಸರ್‌ನಲ್ಲಿ ಅದ್ದೂರಿ ಸೆಟ್‌ಗಳು ಕಣ್ಣಿಗೆ ಹಬ್ಬವಾದರೆ, ತಾರೆಯರ ಆಕರ್ಷಕವಾದ ವೇಷಭೂಷಣಗಳು ಗಮನಸೆಳೆಯುತ್ತವೆ. ಈ ನಡುವೆ ರಣರಂಗದಲ್ಲಿ ಕಂಗನಾಳ ಕಾಳಗದ ದೃಶ್ಯಗಳು ವೀಕ್ಷಕರನ್ನು ರೋಮಾಂಚನಗೊಳಿಸುತ್ತವೆ.

ಒಂದು ದೃಶ್ಯದಲ್ಲಿ ಮಗುವನ್ನು ಲಾಲಿಸುವ ಅಕ್ಕರೆಯ ತಾಯಿಯಾಗಿ ಕಾಣಿಸಿಕೊಳ್ಳುವ ಕಂಗನಾ, ಇನ್ನೊಂದು ದೃಶ್ಯದಲ್ಲಿ ಶತ್ರುವಿನ ಎದೆಯನ್ನು ಸೀಳುವ ,ಕದನಕಲಿಯಾಗಿ ಕಾಣಿಸಿಕೊಂಡಿದ್ದಾರೆ.

 ಕಂಗನಾ ಅವರು ಮಣಿಕರ್ಣಿಕಾ ಚಿತ್ರಕ್ಕಾಗಿಯೇ, ಚಿತ್ರೀಕರಣಕ್ಕಿಂತ ಮುನ್ನ ಹಲವಾರು ದಿನಗಳವರೆಗೆ ಕತ್ತಿಕಾಳಗ ವಿದ್ಯೆಯನ್ನು ಕಲಿತಿದ್ದರು.ಈ ಐತಿಹಾಸಿಕ ಕಥಾವಸ್ತುವಿನ ಚಿತ್ರದಲ್ಲಿ ತಾತ್ಯಾಟೋಪೆಯಾಗಿ ಅತುಲ್ ಕುಲಕರ್ಣಿ ಹಾಗೂ ಮಣಿಕರ್ಣಿಕಾಳ ಮಹಿಳಾ ಸೈನ್ಯದ ನಾಯಕಿಯಾಗಿದ್ದ ಝಲ್ಕರ್‌ಬಾಯಿಯಾಗಿ ಅಂಕಿತಾ ಲೋಖಂಡೆ ನಟಿಸಿದ್ದಾರೆ.ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ, ಮಣಿಕರ್ಣಿಕಾ ಈ ವರ್ಷದ ಎಪ್ರಿಲ್‌ನಲ್ಲೇ ಬಿಡುಗಡೆಗೊಳ್ಳಬೇಕಿತ್ತು. ಆದರೆ ಕಾರಣಾಂತರಗಳಿಂದ ಚಿತ್ರದ ಬಿಡುಗಡೆ ಮುಂದೆ ಹೋಗಿತ್ತು. ಈ ನಡುವೆ ನಿರ್ದೇಶಕ ಕ್ರಿಶ್ ಕೂಡಾ ನಟಿ ಕಂಗನಾ ಜೊತೆಗಿನ ಭಿನ್ನಾಭಿಪ್ರಾಯದ ಹಿನ್ನೆಲೆಯಲ್ಲಿ ಚಿತ್ರದಿಂದ ಹೊರಬಂದಿದ್ದರು. ಆ ಬಳಿಕ ಚಿತ್ರದ ನಿರ್ದೇಶನದ ಹೊಣೆಯನ್ನು ಸ್ವತಃ ಕಂಗನಾ ವಹಿಸಿಕೊಂಡಿದ್ದರೆಂದು ಸುದ್ದಿಯಾಗಿತ್ತು.

ಇದೀಗ ಚಿತ್ರದ ಶೂಟಿಂಗ್ ಪೂರ್ಣಗೊಂಡಿದ್ದು, ಮಣಿಕರ್ಣಿಕಾ ಜನವರಿ 25ರಂದು ಬೆಳ್ಳಿತೆರೆಗೆ ಅಪ್ಪಳಿಸುವುದು ಬಹುತೇಕ ಖಚಿತವಾಗಿದೆ.