ಪ್ರಸಿದ್ಧ ಬಾಲಿವುಡ್ ನಿರ್ದೇಶಕನ ವಿರುದ್ಧ ಕಂಗನಾ ರಾಣವತ್ ಲೈಂಗಿಕ ಕಿರುಕುಳ ಆರೋಪ

ಹೊಸದಿಲ್ಲಿ, ಅ.7: ‘ಕ್ವೀನ್’ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ಕಂಗನಾ ರಾಣವತ್,  ಚಿತ್ರದ ನಿರ್ದೇಶಕ ವಿಕಾಸ್ ಬಹ್ಲ್ ವಿರುದ್ಧ ಲೈಂಗಿಕ ಕಿರುಕುಳ ಆರೋಪ ಹೊರಿಸಿದ್ದಾರೆ.  ಚಿತ್ರದ ಸೆಟ್ ‍ಗಳಲ್ಲಿ 2014ರಲ್ಲಿ ಲೈಂಗಿಕ ಕಿರುಕುಳ ನೀಡಿದ್ದಾರೆ ಎನ್ನುವುದು ಅವರ ಆರೋಪ.

‘ಇಂಡಿಯಾ ಟುಡೇ’ಗೆ ಇತ್ತೀಚೆಗೆ ನೀಡಿದ ಸಂದರ್ಶನದಲ್ಲಿ, ನಿರ್ದೇಶಕ ವಿಕಾಸ್ ವಿರುದ್ಧ ಸಂತ್ರಸ್ತೆಯೊಬ್ಬರು ಮಾಡಿದ ಆರೋಪವನ್ನು ಕಂಗನಾ ಬೆಂಬಲಿಸಿದ್ದಾರೆ. "ನಾನು ಆಕೆಯನ್ನು ಸಂಪೂರ್ಣವಾಗಿ ನಂಬುತ್ತೇನೆ. ವಿಕಾಸ್‍ಗೆ 2014ರ ವೇಳೆಗೆ ಅಂದರೆ ಕ್ವೀನ್ ಚಿತ್ರದ ಚಿತ್ರೀಕರಣ ವೇಳೆ ವಿವಾಹವಾಗಿದ್ದರೂ, ಪ್ರತಿ ದಿನ ಕೂಡಾ ಹೊಸ ಮಹಿಳೆಯ ಜತೆ ಸಾಂದರ್ಭಿಕ ಲೈಂಗಿಕತೆಯಲ್ಲಿ ತೊಡಗಿದ್ದಾಗಿ ಹೇಳಿಕೊಳ್ಳುತ್ತಿದ್ದರು. ಜನರು ಹಾಗೂ ಅವರ ವಿವಾಹವನ್ನು ನಾನು ನಂಬುವುದಿಲ್ಲ. ಆದರೆ ಈ ಚಟ, ರೋಗವಾಗುತ್ತದೆ ಎಂದಷ್ಟೇ ಹೇಳಬಲ್ಲೆ. ಆತ ಪ್ರತಿ ರಾತ್ರಿಯೂ ಪಾರ್ಟಿ ಮಾಡುತ್ತಿದ್ದ ಹಾಗೂ ಬೇಗನೆ ಮಲಗುವುದಕ್ಕೆ ನನ್ನನ್ನು ಅಣಕಿಸುತ್ತಿದ್ದರು ಹಾಗೂ ಸಾಕಷ್ಟು ಸಭ್ಯತೆಯಿಂದ ಇರಲಿಲ್ಲ" ಎಂದು ವಿವರಿಸಿದ್ದಾರೆ.

ನಿರ್ದೇಶಕರನ್ನು ಭೇಟಿ ಮಾಡಿದಾಗ ಆತ ಬಿಗಿಯಾಗಿ ಹಿಡಿದುಕೊಳ್ಳುತ್ತಿದ್ದರು. ಆದಾಗ್ಯೂ ನಾವು ಪ್ರತಿ ಬಾರಿ ಭೇಟಿಯಾದಾಗಲೂ, ಶುಭಾಶಯ ವಿನಿಮಯ ಮಾಡಿಕೊಂಡು, ಪರಸ್ಪರ ತಬ್ಬಿಕೊಳ್ಳುತ್ತಿದ್ದೆವು. ಅವರು ನನ್ನ ಕುತ್ತಿಗೆಯಲ್ಲಿ ತನ್ನ ಮುಖವನ್ನು ಹುದುಗಿಸಿಕೊಳ್ಳುತ್ತಿದ್ದರು. ನಿಜವಾಗಿಯೂ ಬಿಗಿದಪ್ಪಿಕೊಂಡು, ನನ್ನ ಕೂದಲನ್ನು ಆಘ್ರಾಣಿಸುತ್ತಿದ್ದರು. ಆತನ ಆಲಿಂಗನದಿಂದ ಬಿಡಿಸಿಕೊಳ್ಳಲು ನಾನು ಎಲ್ಲ ಬಲ ಬಳಸಿಕೊಳ್ಳಬೇಕಾಗುತ್ತಿತ್ತು. "ನೀವು ಎಷ್ಟು ಸುಗಂಧ ಸೂಸುತ್ತೀರೊ ಅಷ್ಟು ನಾನು ನಿಮ್ಮನ್ನು ಪ್ರೀತಿಸುತ್ತೇನೆ" ಎಂದು ಹೇಳುತ್ತಿದ್ದರು. ಆತನಲ್ಲಿ ಏನೋ ಎಡವಟ್ಟಾಗಿದೆ ಎಂದು ಹೇಳಬಲ್ಲೆ" ಎಂದು ಕಂಗನಾ ಬಣ್ಣಿಸಿದ್ದಾರೆ.

"ವಿಕಾಸ್ ವಿರುದ್ಧ ದೂರು ನೀಡಿದ ಸಂತ್ರಸ್ತೆಯ ಪರವಾಗಿ ನಿಂತದ್ದಕ್ಕೆ ಹಲವು ಯೋಜನೆಗಳಿಂದ ನನ್ನನ್ನು ಕೈಬಿಡಲಾಗಿದೆ" ಎಂದೂ ಬಹಿರಂಗಪಡಿಸಿದ್ದಾರೆ.