5 ಲಕ್ಷ ಗೂಗಲ್ ಪ್ಲಸ್ ಬಳಕೆದಾರರ ಮಾಹಿತಿ ಸೋರಿಕೆ
Update: 2018-10-09 16:53 GMT
ವಾಶಿಂಗ್ಟನ್, ಅ. 9: ಸಾಮಾಜಿಕ ಜಾಲತಾಣ ‘ಗೂಗಲ್ ಪ್ಲಸ್’ನ ಬಳಕೆದಾರ ವಿಭಾಗವನ್ನು ಮುಚ್ಚುವುದಾಗಿ ತಂತ್ರಜ್ಞಾನ ದೈತ್ಯ ಗೂಗಲ್ ಹೇಳಿದೆ.
ಸುಮಾರು 5 ಲಕ್ಷ ಬಳಕೆದಾರರಿಗೆ ಸಂಬಂಧಿಸಿದ ಮಾಹಿತಿಯು ಹೊರಗಿನವರಿಗೆ ಲಭಿಸಿರುವ ಸಾಧ್ಯತೆಯ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಈ ಕ್ರಮ ತೆಗೆದುಕೊಳ್ಳುತ್ತಿರುವುದಾಗಿ ಅದು ತಿಳಿಸಿದೆ.
ಈ ವೈಫಲ್ಯಕ್ಕೆ ತಾಂತ್ರಿಕ ದೋಷವೊಂದು ಕಾರಣವಾಗಿದ್ದು, ಗೂಗಲ್ ಪ್ಲಸ್ನ ವ್ಯವಸ್ಥೆಯಲ್ಲಿ ಎರಡು ವರ್ಷಕ್ಕಿಂತಲೂ ಹೆಚ್ಚು ಸಮಯದಿಂದ ಇದೆ ಎಂದಿದೆ.
ಈ ವರ್ಷದ ಮಾರ್ಚ್ನಲ್ಲಿ ಸೋರಿಕೆಯನ್ನು ಪತ್ತೆಹಚ್ಚಿ ಮುಚ್ಚಲಾಗಿದೆ ಹಾಗೂ ಬಳಕೆದಾರರ ದತ್ತಾಂಶ ದುರ್ಬಳಕೆ ಬಗ್ಗೆ ಯಾವುದೇ ಪುರಾವೆಯಿಲ್ಲ ಎಂದು ಸೋಮವಾರ ಬ್ಲಾಗ್ ಒಂದರಲ್ಲಿ ಕಂಪೆನಿ ಹೇಳಿದೆ.
ಇದರ ಬೆನ್ನಿಗೇ ಅದರ ಮಾತೃ ಕಂಪೆನಿ ‘ಆಲ್ಫಾಬೆಟ್ ಇಂಕ್’ನ ಶೇರುಗಳ ವೌಲ್ಯವು 1.5 ಶೇಕಡದಷ್ಟು ಇಳಿದಿದೆ.