ಬಿಡುಗಡೆಗೂ ಮೊದಲೇ ‘ತಮಿಳ್ ರಾಕರ್ಸ್’ನಲ್ಲಿ ವಿಜಯ್ ದೇವರಕೊಂಡ ಅಭಿನಯದ ‘ಟ್ಯಾಕ್ಸಿವಾಲ’ ಸೋರಿಕೆ

ಹೊಸದಿಲ್ಲಿ, ನ.14: ನವೆಂಬರ್ 16ರಂದು ಬಿಡುಗಡೆಗೊಳ್ಳಲಿದ್ದ ವಿಜಯ್ ದೇವರಕೊಂಡ ಅಭಿನಯದ ಬಹು ನಿರೀಕ್ಷಿತ ಚಿತ್ರ “ಟ್ಯಾಕ್ಸಿವಾಲ”  ಅದಾಗಲೇ ಪೈರಸಿ ವೆಬ್ ಸೈಟ್ ‘ತಮಿಳ್ ರಾಕರ್ಸ್’ನಲ್ಲಿ ಸಂಪೂರ್ಣವಾಗಿ ಸೋರಿಕೆಯಾಗಿರುವುದು ಚಿತ್ರವನ್ನು ಕಾತರದಿಂದ ಎದುರು ನೋಡುತ್ತಿದ್ದ ಅಭಿಮಾನಿಗಳಲ್ಲಿ ಆಕ್ರೋಶ ಮೂಡಿಸಿದೆ.

ಸೋರಿಕೆಯಾದ ಚಿತ್ರವನ್ನು ಡೌನ್ ಲೋಡ್ ಮಾಡದಂತೆ ಅಭಿಮಾನಿಗಳು ಚಿತ್ರ ರಸಿಕರನ್ನು ಟ್ವಿಟರ್ ಮೂಲಕ ವಿನಂತಿಸುತ್ತಿದ್ದಾರಲ್ಲದೆ ಚಿತ್ರವನ್ನು ಥಿಯೇಟರಿನಲ್ಲಿಯೇ ವೀಕ್ಷಿಸುವಂತೆ ಮನವಿ ಮಾಡುತ್ತಿದ್ಧಾರೆ. ಚಿತ್ರ ತಂಡದಲ್ಲಿರುವವರೇ ಯಾರಾದರೂ ಈ ಕೃತ್ಯವೆಸಗಿರಬಹುದೆಂಬ ಅನುಮಾನವೂ ಕೆಲವರಿಗಿದೆ.

`ಟ್ಯಾಕ್ಸಿವಾಲ' ಚಿತ್ರವನ್ನು ರಾಹುಲ್ ಸಂಕೃತಿಯನ್ ನಿರ್ದೇಶಿಸಿದ್ದು, ಪ್ರಿಯಾಂಕ ಜವಲ್ಕರ್ ಈ ಚಿತ್ರದ ಮೂಲಕ ಬೆಳ್ಳಿತೆರೆಗೆ ಪಾದಾರ್ಪಣೆ ಮಾಡುತ್ತಿದ್ದಾರೆ.  ಚಿತ್ರದಲ್ಲಿ ನಾಯಕ ವಿಜಯ್ ದೇವರಕೊಂಡ  ಕ್ಯಾಬ್ ಚಾಲಕ ಪಾತ್ರಧಾರಿಯಾಗಿದ್ದು ಪ್ರೇತಬಾಧೆಗೊಳಗಾದ ಕಾರ್ ಒಂದರಿಂದ ಅವರು ಸಮಸ್ಯೆಗೀಡಾಗುವ ಕಥೆ ಈ ಚಿತ್ರದ್ದು.

ಈ ಹಿಂದೆ ವಿಜಯ್ ಅಭಿನಯದ `ಸರ್ಕಾರ್,' ಧನುಶ್ ಅವರ `ವಡ ಚೆನ್ನೈ,' ರಜಿನಿಕಾಂತ್ ಅವರ `ಕಾಲಾ,' ಹಾಗೂ ಕಮಲ ಹಾಸನ್ ಅವರ `ವಿಶ್ವರೂಪಂ 2' ಕೂಡ ತಮಿಳ್ ರಾಕರ್ಸ್ ನಲ್ಲಿ ಸೋರಿಕೆಯಾಗಿತ್ತು.

ರಜನೀಕಾಂತ್ ಅವರ ಮುಂಬರುವ ಚಿತ್ರ `2.0' ಕೂಡ ಸೋರಿಕೆ ಮಾಡುವುದಾಗಿ ತಮಿಳ್ ರಾಕರ್ಸ್ ಬೆದರಿಸಿದೆ. ತಮಿಳ್ ರಾಕರ್ಸ್ ಯುಆರ್‍ಎಲ್ ಅನ್ನು ಸರಕಾರ ನಿಷೇಧಿಸಿದ್ದರೂ ಅದನ್ನು ಪ್ರಾಕ್ಸಿ ಸರ್ವರ್‍ಗಳ ಮೂಲಕ  ಪಡೆಯಬಹುದಾಗಿದೆ.