ಶಾರೂಕ್ ಖಾನ್ ಒಬ್ಬ ಅಸಂಪೂರ್ಣ ನಟನಂತೆ!

ಬಾಲಿವುಡ್‌ನಲ್ಲಿ ನಟ ಶಾರೂಕ್ ಖಾನ್‌ಗೆ ಯಾರೂ ಶತ್ರುಗಳಿಲ್ಲ. ಹಳಬರು ಹೊಸಬರು ಎಲ್ಲರ ಜೊತೆಯೂ ಬೆರೆಯುವ ಶಾರೂಕ್ ಬಾಲಿವುಡ್ ಬಾದ್‌ಶಾಹ್, ಕಿಂಗ್ ಖಾನ್ ಎಂದೇ ಪ್ರಸಿದ್ಧಿ. ಹಾಗಾಗಿ ಕಿಂಗ್ ಖಾನ್ ನಟನೆ ಬಗ್ಗೆ ಉಲ್ಟಾ ಮಾತನಾಡುವವರು ಯಾರೂ ಇಲ್ಲ ಎಂದೇ ಹೇಳಬಹುದು.

ಆದರೆ ಸ್ವತಃ ಶಾರೂಕ್ ಖಾನ್ ಹೇಳುವಂತೆ ಅವರೊಬ್ಬ ಅಸಂಪೂರ್ಣ ನಟನಂತೆ!

“ನಾನು ಯಾವತ್ತೂ ನನ್ನನ್ನು ಓರ್ವ ಸಂಪೂರ್ಣ ನಟನೆಂದು ಭಾವಿಸಿಲ್ಲ. ಅದೇ ಕಾರಣದಿಂದ ನಾನು ಕಳೆದ ಮೂರು ದಶಕಗಳಿಂದ ಚಿತ್ರರಂಗದಲ್ಲಿ ವಿಶ್ರಮಿಸದೆ ಕೆಲಸ ಮಾಡುತ್ತಿದ್ದೇನೆ” ಎಂದು ಖಾನ್ ತಿಳಿಸಿದ್ದಾರೆ. ಅಂತಿಮ ಫಲಿತಾಂಶಕ್ಕೆ ಕಾಯುವ ಬದಲು ನಾನು ಮೈಲುಗಲ್ಲುಗಳನ್ನು ಸಂಭ್ರಮಿಸುವುದರಲ್ಲಿ ನಂಬಿಕೆಯಿಟ್ಟವನು ಎಂದು 53ರ ಹರೆಯದ ಶಾರೂಕ್‌ ತಿಳಿಸಿದ್ದಾರೆ.

“ಓರ್ವ ನಟನಾಗಿ ನಾನು ಅಸಂಪೂರ್ಣನಾಗಿದ್ದೇನೆ ಮತ್ತು ಅದು ನನಗೆ ತಿಳಿದಿದೆ. ನಾನು ಹಾಗೆ ತಿಳಿಯದಿದ್ದರೆ ನನಗೆ ಕೆಲಸ ಮಾಡಲು ಇಷ್ಟವಿರುವುದಿಲ್ಲ. ನಾನು ಓರ್ವ ಸಂಪೂರ್ಣ ನಟನಾಗಿದ್ದರೆ ಮತ್ಯಾಕೆ ನಾನು ಪ್ರತಿದಿನ ಬೆಳಿಗ್ಗೆ ಎದ್ದು ಇನ್ನೇನನ್ನಾದರೂ ಹೊಸತು ಮಾಡುವ ಪ್ರಯತ್ನವನ್ನು ಮಾಡಬೇಕು?” ಎಂದು ಶಾರೂಕ್ ಪ್ರಶ್ನಿಸಿದ್ದಾರೆ.

“ಓರ್ವ ನಟನಾಗಿ, ನಿರ್ಮಾಪಕನಾಗಿ ನಾನು ಕೆಲಸ ಮಾಡುವ ವಾಣಿಜ್ಯ ಸಿನೆಮಾದ ಮಿತಿಯಲ್ಲೇ ನನ್ನ ಸಾಮರ್ಥ್ಯಕ್ಕೆ ತಕ್ಕಂತೆ ಏನನ್ನಾದರೂ ಹೊಸತನ್ನು ತರಲು ಸಾಧ್ಯವೇ ಎಂಬ ಬಗ್ಗೆ ನಾನು ಯೋಚಿಸುತ್ತಿರುತ್ತೇನೆ. ನಾನು ಅಸಂಪೂರ್ಣನಾಗಿದ್ದೇನೆ ಮತ್ತು ಚಡಪಡಿಕೆ ಹೊಂದಿದ್ದೇನೆ. ನೀವು ನಿಮ್ಮನ್ನು ಸಂಪೂರ್ಣ ಎಂದು ತಿಳಿದರೆ ನೀವು ಆಸಕ್ತಿಹೀನರಾಗುತ್ತೀರಿ” ಎನ್ನುವುದು ಶಾರೂಕ್ ವಾದ. ಶಾರೂಕ್‌ನ ಮುಂದಿನ ಸಿನೆಮಾ ‘ಝೀರೊ’ ಜನರ ಅಸಂಪೂರ್ಣತೆಯನ್ನು ಸಂಭ್ರಮಿಸುತ್ತದೆ.

ಆನಂದ್ ಎಲ್ ರಾಯ್ ನಿರ್ದೇಶನದ ಝೀರೊ ಸಿನೆಮಾದಲ್ಲಿ ಶಾರೂಕ್ ಓರ್ವ ಕುಬ್ಜ ವ್ಯಕ್ತಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅನುಷ್ಕಾ ಶರ್ಮಾ ಸೆರೆಬ್ರಲ್ ಪಾಲ್ಸಿ ಎಂಬ ಕಾಯಿಲೆಯಿಂದ ಬಳಲುವ ಓರ್ವ ವಿಜ್ಞಾನಿಯಾಗಿ ಮತ್ತು ಕತ್ರೀನಾ ಕೈಫ್ ಭಾವನಾತ್ಮಕವಾಗಿ ಅಸಂಪೂರ್ಣವಾಗಿರುವ ಓರ್ವ ನಟಿಯಾಗಿ ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ಈ ಪಾತ್ರಗಳನ್ನು ಕರುಣೆಯ ದೃಷ್ಟಿಯಿಂದ ನೋಡಲಾಗಿಲ್ಲ ಮತ್ತು ಪ್ರೇಕ್ಷಕರು ಇವರ ಬಗ್ಗೆ ದಯೆ ತೋರಬೇಕೆಂದೂ ಹೇಳಲಾಗಿಲ್ಲ ಎಂದು ಕಿಂಗ್ ಖಾನ್ ತಿಳಿಸಿದ್ದಾರೆ.