ಬಾಂಗ್ಲಾ ಗಗನಚುಂಬಿ ಕಟ್ಟಡದಲ್ಲಿ ಬೆಂಕಿ: 25 ಸಾವು
Update: 2019-03-29 17:37 GMT
ಢಾಕಾ (ಬಾಂಗ್ಲಾದೇಶ), ಮಾ. 29: ಬಾಂಗ್ಲಾದೇಶದ ಗಗನಚುಂಬಿ ಕಟ್ಟಡವೊಂದರಲ್ಲಿ ಸಂಭವಿಸಿದ ಅಗ್ನಿ ದುರಂತದಲ್ಲಿ ಮೃತಪಟ್ಟವರ ಸಂಖ್ಯೆ ಶುಕ್ರವಾರ 25ಕ್ಕೇರಿದೆ.
ರಾಜಧಾನಿ ಢಾಕಾದಲ್ಲಿರುವ 22 ಮಹಡಿಯ ‘ಎಫ್ ಆರ್ ಟವರ್’ ಗುರುವಾರ ಬೆಂಕಿಗೆ ಆಹುತಿಯಾಯಿತು. ಈ ಸಂದರ್ಭದಲ್ಲಿ ಕಟ್ಟಡದಲ್ಲಿದ್ದ ಕಚೇರಿಗಳಲ್ಲಿ ನೂರಾರು ಮಂದಿ ಕೆಲಸ ಮಾಡುತ್ತಿದ್ದರು. ಕೆಲವರು ಬೆಂಕಿಯ ಜ್ವಾಲೆಯನ್ನು ತಾಳಲಾರದೆ ಕೆಳಗೆ ಹಾರಿ ಮೃತಪಟ್ಟರು. ಓರ್ವ ಶ್ರೀಲಂಕಾ ಪ್ರಜೆ ಸೇರಿದಂತೆ ಕನಿಷ್ಠ 6 ಮಂದಿ ಈ ರೀತಿಯಾಗಿ ಹಾರಿ ಸಾವು ಕಂಡರು.
ಕೆಲವರು ಕಟ್ಟಡದ ಬದಿಯಲ್ಲಿದ್ದ ಕೇಬಲ್‌ಗಳನ್ನು ಹಿಡಿದುಕೊಂಡು ಕೆಳಗೆ ಜಾರಿ ಬಚಾವಾದರು. ಕಟ್ಟಡದ 8, 9 ಮತ್ತು 10ನೇ ಮಹಡಿಗಳಲ್ಲಿ ಬೆಂಕಿಯ ಜ್ವಾಲೆ ತೀವ್ರವಾಗಿತ್ತು.
‘‘ಬೆಂಕಿ ದುರಂತದಲ್ಲಿ ಮೃತಪಟ್ಟವರ ಸಂಖ್ಯೆ 25. 24 ದೇಹಗಳನ್ನು ನಾವು ಅವರ ವಾರೀಸುದಾರರಿಗೆ ಹಸ್ತಾಂತರಿಸಿದ್ದೇವೆ’’ ಎಂದು ಢಾಕಾ ಮೆಟ್ರೊಪಾಲಿಟನ್ ಪೊಲೀಸ್ ಡೆಪ್ಯುಟಿ ಕಮಿಶನರ್ ಮುಸ್ತಾಕ್ ಅಹ್ಮದ್ ಎಎಫ್ ಪಿ ಸುದ್ದಿ ಸಂಸ್ಥೆಗೆ ತಿಳಿಸಿದರು.