ಯುಎಇಯಲ್ಲಿ ಐಪಿಎಲ್‌ಗೆ ಕೇಂದ್ರ ಸರಕಾರದ ಅಧಿಕೃತ ಅನುಮೋದನೆ

ಹೊಸದಿಲ್ಲಿ, ಆ.10: ಯುಎಇಯಲ್ಲಿ ಈ ವರ್ಷದ ಇಂಡಿಯನ್ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಟೂರ್ನಿ ನಡೆಸಲು ಬಿಸಿಸಿಐಗೆ ಕೇಂದ್ರ ಸರಕಾರದ ಅಧಿಕೃತವಾಗಿ ಅನುಮೋದನೆ ನೀಡಿದೆ ಎಂದು ಐಪಿಎಲ್ ಅಧ್ಯಕ್ಷ ಬ್ರಿಜೇಶ್ ಪಟೇಲ್ ಸೋಮವಾರ ಪ್ರಕಟಿಸಿದ್ದಾರೆ.

ಯುಎಇಯಲ್ಲಿ ಸೆಪ್ಟಂಬರ್ 19ರಿಂದ ನವೆಂಬರ್10 ರವರೆಗೆ ಶಾರ್ಜಾ, ಅಬುಧಾಬಿ ಮತ್ತು ದುಬೈ ಈ ಮೂರು ನಗರಗಳಲ್ಲಿ ಐಪಿಎಲ್ ಟೂರ್ನಿ ನಡೆಯಲಿದೆ.
ದೇಶದಲ್ಲಿ ಹೆಚ್ಚುತ್ತಿರುವ ಕೋವಿಡ್ -19 ಪ್ರಕರಣಗಳಿಂದಾಗಿ ಪ್ರಮುಖ ಲೀಗ್‌ನ್ನು ಯುಎಇಗೆ ಸ್ಥಳಾಂತರಿಸಲು ಸರಕಾರ ಕಳೆದ ವಾರ ಬಿಸಿಸಿಐಗೆ ತಾತ್ವಿಕವಾಗಿ ಒಪ್ಪಿಗೆ ನೀಡಿತ್ತು.

ಗೃಹ ವ್ಯವಹಾರ ಸಚಿವಾಲಯ (ಎಂಎಚ್‌ಎ) ಮತ್ತು ವಿದೇಶಾಂಗ ಸಚಿವಾಲಯ (ಎಂಇಎ) ಎರಡರಿಂದಲೂ ಲಿಖಿತವಾಗಿ ಅನುಮತಿ ಬಂದಿದೆಯೇ ಎಂದು ಕೇಳಿದಾಗ ಬ್ರಿಜೇಶ್ ಪಟೇಲ್ ಅವರು ‘‘ಹೌದು, ನಾವು ಎಲ್ಲಾ ಲಿಖಿತ ಅನುಮೋದನೆಗಳನ್ನು ಸ್ವೀಕರಿಸಿದ್ದೇವೆ’’ಎಂದು ಸುದ್ದಿ ಸಂಸ್ಥೆಯೊಂದಕ್ಕೆ ತಿಳಿಸಿದರು.

ಭಾರತೀಯ ಕ್ರೀಡಾ ಸಂಸ್ಥೆಯು ದೇಶೀಯ ಪಂದ್ಯಾವಳಿಯನ್ನು ವಿದೇಶಕ್ಕೆ ಸ್ಥಳಾಂತರಿಸುವಾಗ ಅದಕ್ಕೆ ಕ್ರಮವಾಗಿ ಗೃಹ ವ್ಯವಹಾರ ಸಚಿವಾಲಯ, ವಿದೇಶಾಂಗ ಸಚಿವಾಲಯ ಮತ್ತು ಕ್ರೀಡಾ ಸಚಿವಾಲಯಗಳಿಂದ ಅನುಮತಿ ಪಡೆಯಬೇಕಾಗುತ್ತದೆ.

24 ಗಂಟೆಗಳ ಒಳಗೆ ಎರಡು ಕಡ್ಡಾಯ ಆರ್‌ಟಿ-ಪಿಸಿಆರ್ (ಸಿಒವಿಐಡಿ -19 ಪರೀಕ್ಷೆಗಳು) ನಡೆಸಿದ ನಂತರ ಹೆಚ್ಚಿನ ಫ್ರಾಂಚೈಸಿ ತಂಡಗಳು ಆಗಸ್ಟ್ 20ರ ನಂತರ ಯುಎಇ ತೆರಳಲಿವೆ. ಆಗಸ್ಟ್ 22ರಂದು ತೆರಳುತ್ತಿರುವ ಚೆನ್ನೈ ಸೂಪರ್ ಕಿಂಗ್ಸ್ ಆಟಗಾರರು ಮತ್ತು ಸಿಬ್ಬಂದಿಗಳು ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರ ಮನವಿ ಮೇರೆಗೆ ಚೆನ್ನೈನಲ್ಲಿ ಸಣ್ಣ ಶಿಬಿರ ನಡೆಸಲಿದ್ದಾರೆ.

ಗಡಿಯಲ್ಲಿ ಭಾರತ ಚೀನಾದ ಸೈನಿಕರ ಘರ್ಷಣೆಯ ಹಿನ್ನೆಲೆಯಲ್ಲಿ ಸಾರ್ವಜನಿಕರ ತೀವ್ರ ಆಕ್ರೋಶದಿಂದಾಗಿ ಈ ವರ್ಷ ಚೀನಾದ ಮೊಬೈಲ್ ಫೋನ್ ಕಂಪನಿ ವಿವೊ ಜೊತೆಗಿನ ಶೀರ್ಷಿಕೆ ಒಪ್ಪಂದವನ್ನು ರದ್ದುಗೊಳಿಸಿದ ನಂತರ ಬಿಸಿಸಿಐ ಪ್ರಾಯೋಜಕತ್ವದ ವಿಚಾರದಲ್ಲಿ ಸಮಸ್ಯೆಗಳನ್ನು ಎದುರಿಸುತ್ತಿದೆ.

ಇದು ವಾರ್ಷಿಕ 440 ಕೋಟಿ ರೂ.ಗಳ ಒಪ್ಪಂದವಾಗಿತ್ತು ಮತ್ತು ಬಿಸಿಸಿಐ ಸೂಕ್ತ ಪ್ರಾಯೋಜಕರ ಶೋಧ ನಡೆಸುತ್ತಿದೆ. ರಾಮದೇವ್ ಅವರ ಪತಂಜಲಿ ಕಂಪನಿ ಹೊಸ ಶೀರ್ಷಿಕೆ ಪ್ರಾಯೋಜಕತ್ವ ವಹಿಸಿಕೊಳ್ಳಲು ಆಸಕ್ತಿ ತೋರಿಸಿದೆ.