ಮರಿಯಾ ಶರಪೋವಾ ಫೇಸ್ಬುಕ್ ಖಾತೆಗೆ ತೆರಳಿ ಕ್ಷಮೆ ಯಾಚಿಸುತ್ತಿರುವ ಮಲಯಾಳಿಗಳು: ಕಾರಣವೇನು ಗೊತ್ತೇ?

ಹೊಸದಿಲ್ಲಿ: ಖ್ಯಾತ ಟೆನಿಸ್ ಆಟಗಾರ್ತಿ ಮರಿಯಾ ಶರಪೋವಾರವರ ಸಾಮಾಜಿಕ ತಾಣ ಖಾತೆಗಳಿಗೆ ತೆರಳಿ ಮಲಯಾಳಿಗಳು ಕ್ಷಮೆ ಯಾಚನೆಯನ್ನು ಪ್ರಾರಂಭಿಸಿದ್ದಾರೆ ಎಂದು thehindu.com ವರದಿ ಮಾಡಿದೆ.

 ಈ ಹಿಂದೆ ಮರಿಯಾ ಶರಪೋವಾ "ನನಗೆ ಸಚಿನ್ ತೆಂಡುಲ್ಕರ್ ಅಂದರೆ ಯಾರೆಂದು ತಿಳಿದಿಲ್ಲ" ಎಂದು  ಹೇಳಿಕೆ ನೀಡಿದ್ದಾಗ ಮಲಯಾಳಿಗಳು ಟ್ರೋಲ್ ಮಾಡಿದ್ದರು. ಇದೀಗ ಸಚಿನ್‌ ತೆಂಡೂಲ್ಕರ್,‌ ಪ್ರತಿಭಟನೆ ನಡೆಸುತ್ತಿರುವ ರೈತರನ್ನು ಬೆಂಬಲಿಸದೇ ಕೇಂದ್ರ ಸರಕಾರದ ಪರ ಟ್ವೀಟ್‌ ಮಾಡಿದ್ದನ್ನು ಖಂಡಿಸಿ ಮಲಯಾಳಿಗಳು ಈ ಹಿಂದೆ ಶರಪೋವಾರನ್ನು ಟೀಕಿಸಿದ್ದಕ್ಕಾಗಿ ಕಮೆಂಟ್‌ ಮೂಲಕ ಕ್ಷಮೆ ಯಾಚಿಸುತ್ತಿದ್ದಾರೆ ಎಂದು ವರದಿ ತಿಳಿಸಿದೆ.

"ನೀವು ಈ ಹಿಂದೆ ಸಚಿನ್‌ ತೆಂಡೂಲ್ಕರ್‌ ಯಾರೆಂದು ತಿಳಿದಿಲ್ಲ ಎಂದಾಗ ನಾವು ನಿಮ್ಮ ಕುರಿತು ಟ್ರೋಲ್‌ ಮಾಡಿದ್ದೆವು. ದಯವಿಟ್ಟು ಕ್ಷಮಿಸಿ. ಈಗ ಸಚಿನ್‌ ಯಾರೆಂದು ನಮಗೂ ತಿಳಿದಿಲ್ಲ" ಎಂದು ಬಳಕೆದಾರರು ಕಮೆಂಟ್‌ ಮಾಡಿದ್ದಾರೆ. ಓರ್ವ ಫೇಸ್‌ ಬುಕ್‌ ಬಳಕೆದಾರ ಮಲಯಾಳಂನ ಪ್ರಸಿದ್ಧ ಚಿತ್ರ ದೇವಾಸುರಂʼ ನ ಹಾಡೊಂದರ ಯೂಟ್ಯೂಬ್‌ ಲಿಂಕ್‌ ಅನ್ನೂ ಕಮೆಂಟಿಸಿದ್ದು, ಈ ಹಾಡಿನಲ್ಲಿ ತಪ್ಪುಕಲ್ಪನೆಗೊಳಗಾದ ಮಗ ತನ್ನ ತಂದೆಯೊಂದಿಗೆ ಕ್ಷಮೆ ಯಾಚಿಸುವ ದೃಶ್ಯವಿದೆ. ಇನ್ನೋರ್ವ ವ್ಯಕ್ತಿ ಶರಪೋವಾರೊಂದಿಗೆ ಕ್ಷಮೆ ಯಾಚಿಸಿ ʼತ್ರಿಶೂರ್‌ ಪೂರಂʼಗೆ ಆಗಮಿಸುವಂತೆ ಆಹ್ವಾನವನ್ನೂ ನೀಡಿದ್ದಾನೆ ಎನ್ನಲಾಗಿದೆ.