ಡೆಲ್ಟಾ ರೂಪಾಂತರಿ ವೈರಸ್‌ ಚಿಕನ್ ಪಾಕ್ಸ್‌ ನಷ್ಟೇ ವೇಗವಾಗಿ ಹರಡಬಹುದು: ವರದಿ

ನ್ಯೂಯಾರ್ಕ್: ಕೋವಿಡ್-19ನ ಡೆಲ್ಟಾ ರೂಪಾಂತರಿ ಹಿಂದಿನ ರೂಪಾಂತರಿಗಳಿಗಿಂತ ತೀವ್ರವಾಗಿ ಜನರನ್ನು ಕಾಡಬಹುದು ಹಾಗೂ ಸಿಡುಬು ಅಥವಾ ಚಿಕನ್‍ ಪಾಕ್ಸ್ ಹರಡುವಷ್ಟೇ ವೇಗವಾಗಿ ಹರಡಬಹುದು ಎಂದು ಅಮೆರಿಕಾದ ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್ ಎಂಡ್ ಪ್ರಿವೆನ್ಶನ್‍ನ ಇನ್ನೂ ಪ್ರಕಟಗೊಳ್ಳದೇ ಇರುವ ವರದಿಯನ್ನಾಧರಿಸಿ ಅಮೆರಿಕಾದ ಮಾಧ್ಯಮಗಳು ವರದಿ ಮಾಡಿವೆ.

ಮೊದಲು ಭಾರತದಲ್ಲಿ ಕಂಡು ಬಂದ ಡೆಲ್ಟಾ ರೂಪಾಂತರಿ ಎರಡೂ ಡೋಸ್ ಲಸಿಕೆ ಪಡೆದವರಿಂದಲೂ ಅಥವಾ ಪಡೆಯದೇ ಇರುವವರಿಂದಲೂ ಒಂದೇ ರೀತಿಯಲ್ಲಿ ಹರಡಬಹುದು ಎಂದು ವರದಿಗಳು ಸೂಚಿಸಿವೆ.

ಇತ್ತೀಚೆಗೆ ನಡೆಸಲಾದ ಇನ್ನೊಂದು ಅಧ್ಯಯನದ ಪ್ರಕಾರ ಡೆಲ್ಟಾ ರೂಪಾಂತರಿಯಿಂದ ಸೋಂಕಿಗೊಳಗಾದ ವ್ಯಕ್ತಿಯಲ್ಲಿ ಈ ಹಿಂದಿನ ಕೋವಿಡ್ ರೂಪಾಂತರಿಗಿಂತಲೂ ಹೆಚ್ಚಿನ ಪ್ರಮಾಣದ ವೈರಸ್ ಇರುತ್ತದೆ.

ಲಸಿಕೆ ಪಡೆದವರಿಗೆ ಸೋಂಕಿನಿಂದ ಅಪಾಯ ಕಡಿಮೆಯಾದರೂ ಇತರರಂತೆಯೇ ಅವರು ಸೋಂಕು ಹರಡಬಲ್ಲರು ಆದರೆ ಲಸಿಕೆ ಪಡೆದವರು ಹೆಚ್ಚು ಸುರಕ್ಷಿತವಾಗಿರುತ್ತಾರೆ ಎಂದು ವರದಿ ಹೇಳಿದೆ. ಇದೇ ಕಾರಣದಿಂದ ಲಸಿಕಾ ಅಭಿಯಾನದ ಹೊರತಾಗಿಯೂ ಡೆಲ್ಟಾ ರೂಪಾಂತರಿ ಸಮುದಾಯದಲ್ಲಿ ಬಹಳ ವೇಗವಾಗಿ ಹರಡಬಹುದು  ಎಂದು ಅವರು ಹೇಳಿದ್ದಾರೆ.