ಪೂರ್ವಾಂಚಲ್ ಎಕ್ಸ್ ಪ್ರೆಸ್‍ವೇ ಉದ್ಘಾಟನೆಯದ್ದೆಂದು ಹೇಳಲಾದ ವೈರಲ್ ಚಿತ್ರ ಹಂಗೇರಿ ದೇಶದ್ದು !

ಹೊಸದಿಲ್ಲಿ: ಉತ್ತರ ಪ್ರದೇಶದಲ್ಲಿ ಬುಧವಾರ ಪ್ರಧಾನಿ ನರೇಂದ್ರ ಮೋದಿ ಪೂರ್ವಾಂಚಲ್ ಎಕ್ಸ್‍ಪ್ರೆಸ್‍ವೇ ಉದ್ಘಾಟಿಸಿದ ಬೆನ್ನಲ್ಲೇ  ಸಾಮಾಜಿಕ ಜಾಲತಾಣ ಟ್ವಿಟ್ಟರ್‍ನಲ್ಲಿ  ಬಿಜೆಪಿ ನಾಯಕರ ಸಹಿತ ಹಲವು ಶೇರ್ ಮಾಡಿದ ಚಿತ್ರವೊಂದು ವೈರಲ್ ಆಗಿತ್ತು. ಈ ಚಿತ್ರದಲ್ಲಿ ಪ್ರಧಾನಿ ಮೋದಿ ಹಾಗೂ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ನೂತನ ಎಕ್ಸ್ ಪ್ರೆಸ್‍ವೇ ಯಲ್ಲಿ ನಡೆಯುತ್ತಿರುವುದು ಹಾಗೂ ಹಿನ್ನೆಲೆಯಲ್ಲಿ ಹಲವಾರು ಯುದ್ಧ ವಿಮಾನಗಳು ಭಾರತದ ತ್ರಿವರ್ಣದ ಬಣ್ಣಗಳ ಹೊಗೆಯನ್ನು ಹೊರಸೂಸುತ್ತಿರುವುದು ಕಾಣಿಸುತ್ತದೆ. ಈ ಕುರಿತು theprint.in ಸತ್ಯಶೋಧನಾ ವರದಿ ಪ್ರಕಟಿಸಿದ್ದು, ಚಿತ್ರವು ಹಂಗೇರಿ ದೇಶದ್ದಾಗಿದೆ ಎಂದು ವರದಿ ಮಾಡಿದೆ.

ಬಿಜೆಪಿ ರಾಷ್ಟ್ರೀಯ ಕಾರ್ಯದರ್ಶಿ ಕೆ ಸತ್ಯಕುಮಾರ್ ಈ ಚಿತ್ರವನ್ನು ಶೇರ್ ಮಾಡಿ ಉತ್ತರ ಪ್ರದೇಶ್ -ಎಕ್ಸ್ ಪ್ರೆಸ್ ಪ್ರದೇಶ್ ಎಂದು ಬರೆದಿದ್ದಾರೆ. ಏಕಲ್‍ಧಮ್ ಆಶ್ರಮದ ಮಹಂತ್ ಯೋಗಿ ದೇವನಾಥ್ ಕೂಡ ಈ ಚಿತ್ರ ಶೇರ್ ಮಾಡಿ "ಥ್ಯಾಂಕ್ಯೂ ಮೋದೀ ಜಿ ಮತ್ತು ಯೋಗೀ ಜಿ" ಎಂದು ಬರೆದಿದ್ದಾರೆ.

ಆದರೆ ಈ ಚಿತ್ರಕ್ಕೂ ಎಕ್ಸ್‍ಪ್ರೆಸ್ ವೇ ಉದ್ಘಾಟನೆಗೂ ಸಂಬಂಧವಿಲ್ಲವೆಂಬುದು ವಾಸ್ತವ. ಈ ಚಿತ್ರದ ಹಿನ್ನೆಲೆಯಲ್ಲಿರುವ ಯುದ್ಧವಿಮಾನಗಳು ಹಂಗೇರಿಯಲ್ಲಿ ಆಗಸ್ಟ್ 2008 ರಲ್ಲಿ ನಡೆದ ಕೆಕ್ಸೆಮೆಟ್ ಏರ್ ಶೋ ದ್ದಾಗಿತ್ತು. ಹಂಗೆರಿಯ ಕೆಕ್ಸೆಮೆಟ್‍ನಲ್ಲಿ ಇಟೆಲಿ ವಾಯು ದಳದ ಖ್ಯಾತ ಏರೋಬಾಟಿಕ್ಸ್ ತಂಡ ಫ್ರೆಕ್ಕೆ ಟ್ರೈಕೊಲೊರಿ  ಈ  ವೈಮಾನಿಕ ಶೋ ಪ್ರದರ್ಶಿಸಿತ್ತು. ಇದೀಗ ವೈರಲ್ ಆಗಿರುವ ಚಿತ್ರವನ್ನು ಶಟರ್ ಸ್ಟಾಕ್ ವೆಬ್‍ಸೈಟ್‍ನಿಂದ ನಕಲಿಸಲಾಗಿದೆ ಎಂದು ತಿಳಿದು ಬಂದಿದೆ.