ದಕ್ಷಿಣಭಾರತದ ಜನಪ್ರಿಯ ನಟಿ ಮೀನಾ ಅವರ ಪತಿ ವಿದ್ಯಾಸಾಗರ್ ನಿಧನ, ಗಣ್ಯರಿಂದ ಸಂತಾಪ

ಹೊಸದಿಲ್ಲಿ: ದಕ್ಷಿಣದ ಜನಪ್ರಿಯ ನಟಿ ಮೀನಾ ಅವರ ಪತಿ ವಿದ್ಯಾಸಾಗರ್ ಸೋಮವಾರ ನಿಧನರಾದರು. ಅವರು ತಮಿಳುನಾಡಿನ ಚೆನ್ನೈನ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಮೀನಾ ಅವರ ಪತಿಯ ನಿಧನಕ್ಕೆ ಖುಷ್ಬು ಸುಂದರ್, ಲಕ್ಷ್ಮಿ ಮಂಚು, ಶರತ್ ಕುಮಾರ್ ಸೇರಿದಂತೆ ಅನೇಕ ಗಣ್ಯರು ಸಂತಾಪ ವ್ಯಕ್ತಪಡಿಸಿದ್ದಾರೆ.

 ವಿದ್ಯಾಸಾಗರ್ ಅವರು ತೀವ್ರ ಶ್ವಾಸಕೋಶದ ಸೋಂಕಿನಿಂದ ಬಳಲುತ್ತಿದ್ದರು ಮತ್ತು ಕಳೆದ ಕೆಲವು ತಿಂಗಳುಗಳಿಂದ ಚಿಕಿತ್ಸೆ ಪಡೆಯುತ್ತಿದ್ದರು ಎಂದು ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಮಾಡಿದೆ.

ಬೆಂಗಳೂರು ಮೂಲದ ಉದ್ಯಮಿ ವಿದ್ಯಾಸಾಗರ್   ಹಾಗೂ ಮೀನಾ  ಅವರು 2009 ರಲ್ಲಿ ಬೆಂಗಳೂರಿನಲ್ಲಿ ವಿವಾಹವಾಗಿದ್ದರು.

 ಖುಷ್ಬು ಸುಂದರ್, ಲಕ್ಷ್ಮಿ ಮಂಚು, ಶರತ್ ಕುಮಾರ್ ಸೇರಿದಂತೆ ಅನೇಕ ಗಣ್ಯರು ಮತ್ತು ಮೀನಾ ಅವರ   ಸ್ನೇಹಿತರು ತಮ್ಮ ದುಃಖವನ್ನು ವ್ಯಕ್ತಪಡಿಸಿದ್ದಾರೆ ಹಾಗೂ  ನಟಿ ಮತ್ತು ಅವರ ಕುಟುಂಬಕ್ಕೆ ಸಾಂತ್ವನ ಹೇಳಿದರು.

 "ಬೆಳಗ್ಗೆ ಎದ್ದಾಗ ಭಯಾನಕ ಸುದ್ದಿ  ಕೇಳಿದೆ. ನಟಿ ಮೀನಾ ಅವರ ಪತಿ ಸಾಗರ್ ಅವರು ನಮ್ಮೊಂದಿಗಿಲ್ಲ ಎಂದು ತಿಳಿದು ಹೃದಯ ಕಲಕಿತು. ಅವರು ದೀರ್ಘಕಾಲದವರೆಗೆ ಶ್ವಾಸಕೋಶದ ಕಾಯಿಲೆಯಿಂದ ಬಳಲುತ್ತಿದ್ದರು. ಮೀನಾ ಕುಟುಂಬಕ್ಕೆ ಆಳವಾದ ಸಂತಾಪಗಳು ಎಂದು  #RIP ಹ್ಯಾಶ್‌ಟ್ಯಾಗ್‌ನೊಂದಿಗೆ ಖುಷ್ಬು ಟ್ವೀಟಿಸಿದ್ದಾರೆ.

ಮೀನಾ ಬಾಲ ಕಲಾವಿದೆಯಾಗಿ ತಮ್ಮ ವೃತ್ತಿಜೀವನವನ್ನು ಆರಂಭಿಸಿದ್ದರು ಮತ್ತು 1990 ರ ದಶಕದಲ್ಲಿ ದಕ್ಷಿಣ ಚಿತ್ರರಂಗದಲ್ಲಿ ಜನಪ್ರಿಯ ನಟಿಯಾಗಿದ್ದರು. ಮೀನಾ ಅವರು ತಮಿಳು, ತೆಲುಗು, ಮಲಯಾಳಂ ಹಾಗೂ ಕನ್ನಡದ ಚಿತ್ರರಂಗದಲ್ಲಿ ಮಿಂಚಿದ್ದರು.ಅವರು ಇತ್ತೀಚೆಗೆ ಸನ್ ಆಫ್ ಇಂಡಿಯಾ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ ಹಿಂದೆ ಅವರು ದೃಶ್ಯಂ ಹಾಗೂ  ದೃಶ್ಯಂ 2 ನಲ್ಲಿ ನಟಿಸಿದ್ದರು. ಅವರ ಮಗಳು ನೈನಿಕಾ ಕೂಡ ಥೇರಿ ಚಿತ್ರದಲ್ಲಿ ವಿಜಯ್ ಅವರ ಮಗಳಾಗಿ ನಟಿಸುವ ಮೂಲಕ ಚಿತ್ರರಂಗಕ್ಕೆ ಅಂಬೆಗಾಲಿಟ್ಟಿದ್ದರು.