ಕೆಡವಲಾದ ಅವಳಿ ಗೋಪುರದ ಸ್ಥಳದಲ್ಲಿ ಮತ್ತೊಂದು ವಸತಿ ಸಮುಚ್ಛಯ ನಿರ್ಮಾಣ; ಸೂಪರ್ಟೆಕ್ ಲಿಮಿಟೆಡ್
Update: 2022-09-02 14:53 GMT
ಹೊಸದಿಲ್ಲಿ: ನೋಯ್ಡಾದಲ್ಲಿ ಕೆಡವಲಾದ ಅವಳಿ ಗೋಪುರಗಳ ಸ್ಥಳವನ್ನು ಮತ್ತೊಂದು ವಸತಿ ಯೋಜನೆಗೆ ಬಳಸಲಾಗುವುದು ಎಂದು ಸೂಪರ್ಟೆಕ್ ಲಿಮಿಟೆಡ್ ಗುರುವಾರ ತಿಳಿಸಿದೆ ಎಂದು ಎಎನ್‌ಐ ವರದಿ ಮಾಡಿದೆ.
ಆಗಸ್ಟ್ 28 ರಂದು, ಖಾಸಗಿ ಡೆವಲಪರ್ ನಿರ್ಮಿಸಿದ ಅಪೆಕ್ಸ್ ಮತ್ತು ಸೆಯಾನ್ ಟವರ್‌ಗಳು ಬಹು ಮಹಡಿ ನಿರ್ಮಾಣ ನಿಯಮಗಳನ್ನು ಉಲ್ಲಂಘಿಸಿವೆ ಎಂದು ಸುಪ್ರೀಂ ಕೋರ್ಟ್ ಗಮನಿಸಿದ ನಂತರ ನೆಲಸಮಗೊಳಿಸಲಾಯಿತು. ನೋಯ್ಡಾದ ಸೆಕ್ಟರ್ 93A ನಲ್ಲಿರುವ ಎಮರಾಲ್ಡ್ ಕೋರ್ಟ್ ಎಂಬ ಸೂಪರ್‌ಟೆಕ್‌ನ ಬಹು-ಮಹಡಿ ಹೌಸಿಂಗ್ ಸೊಸೈಟಿಯ ಹಸಿರು ಪ್ರದೇಶದ ಮೇಲೆ ಈ ಕಟ್ಟಡವನ್ನು ನಿರ್ಮಿಸಲಾಗಿತ್ತು.
ನೋಯ್ಡಾ ಪ್ರಾಧಿಕಾರದಿಂದ ಅನುಮೋದನೆ ಮತ್ತು ಎಮರಾಲ್ಡ್ ಕೋರ್ಟ್‌ನ ಮನೆ ಖರೀದಿದಾರರಿಂದ ಒಪ್ಪಿಗೆ ಪಡೆದ ನಂತರ ಹೊಸ ವಸತಿ ಯೋಜನೆಗೆ ಭೂಮಿಯನ್ನು ಬಳಸಲಾಗುವುದು ಎಂದು ಸೂಪರ್ಟೆಕ್ ಲಿಮಿಟೆಡ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಆರ್‌ಕೆ ಅರೋರಾ ಗುರುವಾರ ಎಎನ್‌ಐಗೆ ತಿಳಿಸಿದ್ದಾರೆ.
ಆಗಸ್ಟ್ 31, 2021 ರಂದು, ಕಟ್ಟಡ ನಿರ್ಮಾನದ ನಿಯಮಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ಅವಳಿ ಗೋಪುರಗಳನ್ನು ಕೆಡವಲು ಸುಪ್ರೀಂ ಕೋರ್ಟ್ ಆದೇಶಿಸಿತ್ತು.
ಅವಳಿ ಗೋಪುರಗಳನ್ನು ಕೆಡವಲು ಸೂಪರ್‌ಟೆಕ್‌ಗೆ ನಿರ್ದೇಶನ ನೀಡಿದ ಅಲಹಾಬಾದ್ ಹೈಕೋರ್ಟ್ ನ ಏಪ್ರಿಲ್ 2014 ರ ತೀರ್ಪನ್ನು ಸುಪ್ರೀಂ ಕೋರ್ಟ್ ಎತ್ತಿಹಿಡಿದಿತ್ತು. ಅಗ್ನಿಶಾಮಕ ಸುರಕ್ಷತೆ ಮತ್ತು ಕಟ್ಟಡಗಳ ನಡುವೆ ಕಾಯ್ದುಕೊಳ್ಳಬೇಕಾದ ಅಂತರದ ಬಗ್ಗೆ ಸೂಪರ್ಟೆಕ್ ನಿಯಮಗಳನ್ನು ಉಲ್ಲಂಘಿಸಿದೆ ಎಂದು ಹೈಕೋರ್ಟ್ ಗಮನಿಸಿತ್ತು.
40 ಅಂತಸ್ತಿನ ಟವರ್‌ಗಳಲ್ಲಿ ಫ್ಲಾಟ್‌ಗಳನ್ನು ಖರೀದಿಸಿದ ಎಲ್ಲರಿಗೂ ವಾರ್ಷಿಕ 12% ಬಡ್ಡಿದರದಲ್ಲಿ ಎರಡು ತಿಂಗಳೊಳಗೆ ಮರುಪಾವತಿ ಮಾಡುವಂತೆ ಸುಪ್ರೀಂ ಕೋರ್ಟ್ ಸೂಪರ್‌ಟೆಕ್‌ಗೆ ಆದೇಶಿಸಿತ್ತು.
"ನಾವು ಸೆಯಾನೆ ಅವಳಿ ಟವರ್‌ಗಳ 95% ರಷ್ಟು ಮನೆ ಖರೀದಿದಾರರಿಗೆ ಮರುಪಾವತಿ ಮಾಡಿದ್ದೇವೆ" ಎಂದು ಅರೋರಾ ಗುರುವಾರ ANI ಗೆ ತಿಳಿಸಿದರು. ಸೂಪರ್ಟೆಕ್ ಆಸ್ತಿಯನ್ನು ನೀಡುತ್ತಿದೆ ಅಥವಾ ಉಳಿದವರಿಗೆ ಬಡ್ಡಿಯೊಂದಿಗೆ ಅದರ ಹಣವನ್ನು ಹಿಂದಿರುಗಿಸುತ್ತದೆ ಎಂದು ಅವರು ಹೇಳಿದರು.
ಎರಡು ಗೋಪುರ ಕಟ್ಟಡಗಳನ್ನು ಕೆಡವಲು ಕಟ್ಟಡದ ವಿವಿಧ ಭಾಗದಲ್ಲಿ 9,640 ರಂಧ್ರಗಳನ್ನು ಕೊರೆದು ಸುಮಾರು 3,700 ಕಿಲೋಗ್ರಾಂಗಳಷ್ಟು ಸ್ಫೋಟಕಗಳನ್ನು ಬಳಸಲಾಗಿದೆ ಎಂದು ವರದಿಯಾಗಿದೆ.