ಲಾಲ್‌ ಸಿಂಗ್ ಚಡ್ಡಾ ಸೋಲಿನ ಬಳಿಕ ಕಾಣಿಸಿಕೊಂಡ ಆಮಿರ್: ಕಾಜೊಲ್‌ ನೂತನ ಚಿತ್ರದ ಟ್ರೇಲರ್‌ನಲ್ಲಿ ಮಿ.ಪರ್ಫೆಕ್ಷನಿಸ್ಟ್
ಮುಂಬೈ: ಬಾಲಿವುಡ್‌ ನಟಿ ಕಾಜೋಲ್ ಅವರು ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ‘ಸಲಾಮ್ ವೆಂಕಿ' (salaam venky)ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದ್ದು, ಟ್ರೇಲರ್‌ ಕೊನೆಯಲ್ಲಿ ಮಿ. ಪರ್ಫೆಕ್ಷನಿಸ್ಟ್ ಖ್ಯಾತಿಯ ಆಮಿರ್ ಖಾನ್‌ ಕಾಣಿಸಿಕೊಂಡಿದ್ದಾರೆ. ಬಹು ನಿರೀಕ್ಷಿತ ಲಾಲ್‌ ಸಿಂಗ್ ಚಡ್ಡಾ ಸೋಲಿನ ಬಳಿಕ ಆಮಿರ್ ಖಾನ್‌ ಹೊಸ ಅವತಾರದಲ್ಲಿ ಕಾಣಿಸಿಕೊಂಡಿದ್ದು, ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದ್ದಾರೆ.
ಲಕ್ಷಾಂತರ ಮಂದಿ ಈಗಾಗಲೇ ಟ್ರೈಲರ್ ವೀಕ್ಷಣೆ ಮಾಡಿದ್ದು, ಚಿತ್ರದಲ್ಲಿ ವಿಶಾಲ್ ಜೇತ್ವಾ, ರಾಹುಲ್ ಬೋಸ್, ರಾಜೀವ್ ಖಂಡೇಲ್ವಾಲ್, ಅಹಾನಾ ಕುಮ್ರಾ, ಪ್ರಿಯಾಮಣಿ ಮತ್ತು ಪ್ರಕಾಶ್ರಾಜ್ ಕೂಡ ನಟಿಸಿದ್ದಾರೆ.
ಕಾಜೋಲ್ ಸುಜಾತಾ ಹೆಸರಿನ ಪಾತ್ರವನ್ನು ನಿರ್ವಹಿಸಿದ್ದು, ವೀಲ್‌ಚೇರ್‌ ಮೇಲೆ ಕುಳಿತ ಮಗನನ್ನು (ವೆಂಕಿ) ಪೋಷಿಸುವ ತಾಯಿ ಪಾತ್ರ ಇದು ಎಂದು ಚಿತ್ರತಂಡದ ಮೂಲಗಳು ಹೇಳಿಕೊಂಡಿವೆ. ವಿಶಾಲ್ ಜೇತ್ವಾ ವೆಂಕಿ ಎಂಬ ಪಾತ್ರವನ್ನು ಮಾಡುತ್ತಿದ್ದಾರೆ. ತಾಯಿ-ಮಗನ ಪಾತ್ರಗಳ ಸುತ್ತಲೇ ತಿರುಗುವ ಕಥಾ ಹಂದರವನ್ನು ಚಿತ್ರ ಹೊಂದಿದೆ ಎನ್ನುವುದು ಟ್ರೇಲರ್‌ ಹೇಳುತ್ತದೆ.
ಈ ಸಿನಿಮಾವನ್ನು ರೇವತಿ ನಿರ್ದೇಶಿಸಿದ್ದು, ಸೂರಜ್ ಸಿಂಗ್ ಹಾಗೂ ಶ್ರದ್ಧಾ ಅಗರ್ವಾಲ್ ನಿರ್ಮಾಣ ಮಾಡಿದ್ದಾರೆ. ಈ ಚಿತ್ರ ಡಿಸೆಂಬರ್ 9ರಂದು ತೆರೆಯ ಮೇಲೆ ಬರಲಿದೆ.