ನಟಿ ಸ್ವರಾ ಭಾಸ್ಕರ್-ಫಹದ್‌ ಅಹ್ಮದ್ ವಿವಾಹ ಆಮಂತ್ರಣದಲ್ಲಿ ಗಮನಸೆಳೆದ 'ಘೋಷಣೆಗಳು'
ಹೊಸದಿಲ್ಲಿ: ಇತ್ತೀಚೆಗೆ ವಿವಾಹವಾಗಿರುವ ಬಾಲಿವುಡ್‌ ನಟಿ ಸ್ವರಾ ಭಾಸ್ಕರ್ (Swara Bhasker) ಹಾಗೂ ಸಾಮಾಜಿಕ ಹೋರಾಟಗಾರ ಫಹದ್‌ ಅಹ್ಮದ್ (Fahad Ahmad) ಅವರ ವಿವಾಹ ಆಮಂತ್ರಣ ಪತ್ರಿಕೆಯಲ್ಲಿ ಅವರು ಭಾಗವಹಿಸಿದ್ದ ಸಿಎಎ ವಿರೋಧಿ ಪ್ರತಿಭಟನೆಯ ಇಣುಕುನೋಟವಿದೆ ಹಾಗೂ ʻಹಮ್‌ ಕಾಗಝ್‌ ನಹೀ ದಿಖಾಯೇಂಗೆ" "ಇಂಕ್ವಿಲಾಬ್‌ ಜಿಂದಾಬಾದ್," ಮತ್ತು "ಲವ್‌ ಇಸ್‌ ದಿ ಗ್ರೇಟೆಸ್ಟ್‌ ರಿವೊಲ್ಯೂಶನ್" (ಪ್ರೀತಿ ಅತಿ ದೊಡ್ಡ ಕ್ರಾಂತಿ) ಎಂದು ಬರೆದಿರುವ ಬ್ಯಾನರ್‌ಗಳು ಮತ್ತು ಭಿತ್ತಿಪತ್ರಗಳನ್ನು ಹಿಡಿದಿರುವ ಜನರನ್ನು ಕಾಣಬಹುದಾಗಿದೆ.
ವಿವಾಹ ಆಮಂತ್ರಣ ಪತ್ರಿಕೆಯ ವಿನ್ಯಾಸಕಾರರೊಬ್ಬರು ಸ್ವರಾ-ಫಹದ್‌ ಅವರ ವಿವಾಹ ಆಮಂತ್ರಣ ಪತ್ರಿಕೆಯ ಹತ್ತಿರದ ಚಿತ್ರಣವನ್ನು ಪೋಸ್ಟ್‌ ಮಾಡಿದ್ದಾರಲ್ಲದೆ, ಜೋಡಿ ಈ ರೀತಿಯ ಆಮಂತ್ರಣ ಪತ್ರಿಕೆ ಏಕೆ ಬಯಸಿತ್ತೆಂಬುದರ ಕುರಿತು ಮಾಹಿತಿ ನೀಡಿದ್ದಾರೆ.
"ಪೌರತ್ವ ಕಾಯಿದೆಯ ವಿರುದ್ಧದ ಪ್ರತಿಭಟನೆ ವೇಳೆ ತಾವು ಹೇಗೆ ಭೇಟಿಯಾಗಿ ಪ್ರೇಮಪಾಶಕ್ಕೆ ಸಿಲುಕಿದೆವು, ಮುಂಬೈ ಮತ್ತು ಮೆರಿನ್‌ ಡ್ರೈವ್‌ನಲ್ಲಿನ ಅವರ ಅನುಭವ, ಸಿನೆಮಾ ಮೇಲೆ ಮತ್ತು ಅವರ ಸುಂದರ ಬೆಕ್ಕು ಘಾಲಿಬ್‌ ಮೇಲೆ ಅವರಿಗಿರುವ ಅಪರಿಮಿತ ಪ್ರೀತಿಯನ್ನು ಅವರ ವಿವಾಹ ಆಮಂತ್ರಣ ಪತ್ರಿಕೆ ಬಿಂಬಿಸಬೇಕೆಂದು ಅವರು ಬಯಸಿದ್ದರು," ಎಂದು ವಿನ್ಯಾಸಕಾರರು ಪೋಸ್ಟ್‌ ಮಾಡಿದ್ದರು.
ಇದಕ್ಕೆ ಪ್ರತಿಕ್ರಿಯಿಸಿದ ಸ್ವರಾ "ನೀವು ಅದ್ಭುತ ಕೆಲಸ ಮಾಡಿದ್ದೀರಿ, ತುಂಬಾ ಧನ್ಯವಾದಗಳು," ಎಂದು ಬರೆದಿದ್ದಾರೆ.
ಇದನ್ನೂ ಓದಿ: ಶಾರುಖ್ ಖಾನ್ ಮನೆಗೆ ನುಗ್ಗಿದ್ದ ಇಬ್ಬರು 8 ಗಂಟೆಗಳ ಕಾಲ ಮೇಕಪ್ ರೂಂನಲ್ಲಿ ಅಡಗಿ ಕುಳಿತಿದ್ದರು: ಪೊಲೀಸರು