ನಾನು ಮೊದಲಿಗೆ ಮನುಷ್ಯಳು, ನಂತರ ತಾಯಿ,ಆನಂತರ ತಾರೆ: ಕಿರುಕುಳಕ್ಕೊಳಗಾದ ಬಗ್ಗೆ ನಟಿ ಪ್ರೀತಿ ಝಿಂಟಾ ಪ್ರತಿಕ್ರಿಯೆ

ಮುಂಬೈ: ಮುಂಬೈ ನಗರಕ್ಕೆ ಇತ್ತೀಚೆಗೆ ಎರಡು ಬಾರಿ ಪ್ರತ್ಯೇಕ ಭೇಟಿ ನೀಡಿದ್ದಾಗ ಅನುಭವಿಸಿದ ಕಿರುಕುಳದ ಕುರಿತು ಮೌನ ಮುರಿದಿರುವ ಉದ್ಯಮಿಯಾಗಿ ಬದಲಾಗಿರುವ ನಟಿ ಪ್ರೀತಿ ಝಿಂಟಾ, ಆ ಘಟನೆಗಳು ನನ್ನಲ್ಲಿ ಕೊಂಚ ನಡುಕ ಹುಟ್ಟಿಸಿದವು ಎಂದು ಹೇಳಿದ್ದಾರೆ.

ಈ ಕುರಿತು ಇನ್ಸ್ಟಾಗ್ರಾಮ್ ಪೋಸ್ಟ್ ಮಾಡಿರುವ ಪ್ರೀತಿ ಝಿಂಟಾ, ಮಹಿಳೆಯೊಬ್ಬರು ನನ್ನ ಅಂಬೆಗಾಲಿನ ಮಗು ಗಿಯಾ ಜೊತೆ ಒಂದು ಭಾವಚಿತ್ರ ತೆಗೆಸಿಕೊಳ್ಳುವುದಾಗಿ ಕೋರಿದಾಗ, ನಾನು ನಯವಾಗಿ ಅದನ್ನು ನಿರಾಕರಿಸಿದೆ. ಆದರೆ, ಆ ಮಹಿಳೆ ತಕ್ಷಣವೇ ನನ್ನ ಮಗಳನ್ನು ನನ್ನ ಕೈಯಿಂದ ಕಸಿದುಕೊಂಡು, ಆಕೆಯ ಮುತ್ತಿಟ್ಟು, "ಎಂತಹ ಸುಂದರ ಮಗು!" ಎಂದು ಹೇಳಿ ಓಡಿ ಹೋದಳು" ಎಂದು ಹೇಳಿದ ಅವರು, "ಆ ಮಹಿಳೆ ವೈಭವೋಪೇತ ಕಟ್ಟಡದಲ್ಲಿ ವಾಸಿಸುತ್ತಿದ್ದು, ನನ್ನ ಮಕ್ಕಳು ಆಟವಾಡುತ್ತಿದ್ದ ಉದ್ಯಾನದಲ್ಲಿದ್ದಳೆಂದು ಕಾಣಿಸುತ್ತದೆ. ಒಂದು ವೇಳೆ ನಾನು ತಾರೆಯಾಗಿರದೆ ಇದ್ದಿದ್ದರೆ ಬಹುಶಃ ಕೆಟ್ಟದಾಗಿ ಪ್ರತಿಕ್ರಿಯಿಸಿರುತ್ತಿದ್ದೆ ಅನ್ನಿಸುತ್ತದೆ. ಆದರೆ, ನನಗೆ ಯಾವುದೇ ಗಲಾಟೆ ಮಾಡಲು ಇಷ್ಟವಿಲ್ಲದೆ ಇದ್ದುದರಿಂದ ಸಂಯಮ ವಹಿಸಿದೆ" ಎಂದು ತನ್ನ ಅವಳಿ ಮಕ್ಕಳಾದ ಗಿಯಾ ಹಾಗೂ ಜಿಯಾ ಭಾವಚಿತ್ರಗಳನ್ನು ಹಂಚಿಕೊಂಡಿರುವ ಪ್ರೀತಿ ಝಿಂಟಾ ಬರೆದುಕೊಂಡಿದ್ದಾರೆ.

ಎರಡನೆಯ ಘಟನೆಯ ಕುರಿತು ವಿವರಿಸಿರುವ ಕಿಂಗ್ಸ್ ಇಲೆವೆನ್ ತಂಡದ ಸಹ ಮಾಲಕಿಯೂ ಆದ ಪ್ರೀತಿ ಝಿಂಟಾ, ನಾನು ವಿಮಾನ ನಿಲ್ದಾಣಕ್ಕೆ ತರಾತುರಿಯಲ್ಲಿ ಹೋಗುತ್ತಿದ್ದಾಗ, ನನ್ನ ಬಳಿ ನೀಡಲು ಆ ಹೊತ್ತು ನಗದು ಇಲ್ಲದೆ ಇದ್ದುದರಿಂದ ಅಂಗವಿಕಲ ವ್ಯಕ್ತಿಯೊಬ್ಬ ನನ್ನ ಮೇಲೆ ಆಕ್ರಮಣಕಾರಿಯಾಗಿ ವರ್ತಿಸಿದ ಎಂದು ಹೇಳಿದ್ದಾರೆ.

48 ವರ್ಷದ ನಟಿ ಪ್ರೀತಿ ಝಿಂಟಾ ತಮ್ಮ ಕಿಂಗ್ಸ್ ಇಲೆವೆನ್ ತಂಡದೊಂದಿಗೆ 2023ರ ಐಪಿಎಲ್ ಪಂದ್ಯಾವಳಿಯಲ್ಲಿ ಪಾಲ್ಗೊಳ್ಳಲು ಸದ್ಯ ಭಾರತಕ್ಕೆ ಆಗಮಿಸಿದ್ದಾರೆ‌. ಅವರು ತಮ್ಮ ಪತಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ಲಾಸ್ ಏಂಜಲೀಸ್ ಹಾಗೂ ಕ್ಯಾಲಿಫೋರ್ನಿಯಾದಲ್ಲಿ ವಾಸಿಸುತ್ತಿದ್ದಾರೆ.