ಸುಳ್ಯದಲ್ಲಿ ಗ್ಯಾಸ್ ದರ ಇಳಿಕೆಯಾಗದ ಹಿನ್ನೆಲೆ: ಎಲ್ಪಿಜಿ ಆಟೋ ಚಾಲಕರಿಂದ ಪ್ರತಿಭಟನೆ
ಸುಳ್ಯ: ಕಳೆದ ಎರಡು ದಿನಗಳ ಹಿಂದೆ ಎಲ್ಪಿಜಿ ಅಟೋ ಗ್ಯಾಸ್ಗಳ ದರ ಕಡಿತಗೊಳಿಸಲಾಗಿದ್ದು, ದ.ಕ. ಜಿಲ್ಲೆಯ ಕೆಲವು ಬಂಕ್ಗಳಲ್ಲಿ 58.61 ಪ್ರಸ್ತುತ ದರದಲ್ಲಿ ಅಟೋ ಗ್ಯಾಸ್ ನೀಡಲಾಗುತ್ತಿದೆ. ಆದರೆ ಸುಳ್ಯದಲ್ಲಿ ದರ ಕಡಿತಗೊಳಿಸದೆ ಈ ಹಿಂದಿನ ದರ 66.19ರೂ. ಇದನ್ನೇ ಮುಂದುವರಿಸಿರುವುದನ್ನು ಖಂಡಿಸಿ ಸುಳ್ಯದ ಎಲ್ಪಿಜಿ ಗ್ರಾಹಕ ಅಟೋ ಮಾಲಕರು ಮತ್ತು ಚಾಲಕರು ಪರಿವಾರನದಲ್ಲಿರುವ ಗ್ಯಾಸ್ ಫಿಲ್ಲಿಂಗ್ ಬಂಕ್ನಲ್ಲಿ ಗುರುವಾರ ಪ್ರತಿಭಟನೆ ನಡೆಸಿದರು.
ಸುಮಾರು 30ಕ್ಕೂ ಹೆಚ್ಚು ಅಟೋಗಳನ್ನು ಗ್ಯಾಸ್ ಬಂಕ್ ಮುಂಭಾಗದಲ್ಲಿ ನಿಲ್ಲಿಸಿ ಗ್ಯಾಸ್ ದರ ಕಡಿಮೆ ಮಾಡುವಂತೆ ಆಗ್ರಹಿಸಿದರು. ಈ ವೇಳೆ ಮಾತನಾಡಿದ ಅಟೋ ಚಾಲಕರು “ಪುತ್ತೂರು ಬಂಕ್ನಲ್ಲಿ ಬುಧವಾರ 54.25 ಪೈಸೆ ದರದಲ್ಲಿ ಗ್ಯಾಸ್ ಫಿಲ್ ಮಾಡಿದ್ದು, ಇದೀಗ ಸುಳ್ಯದಲ್ಲಿ ನೋಡಿದಾಗ 66.79 ಎಂದು ತಿಳಿದುಬಂದಿದೆ. ಈ ಹಿನ್ನಲೆಯಲ್ಲಿ ಬಂಕ್ನ ಮಾಲಕರೊಂದಿಗೆ ಕೇಳಿದಾಗ ಈ ದರವು ಸುಳ್ಯಕ್ಕೆ ಇನ್ನೂ ಅನ್ವಯವಾಗದ ಕಾರಣ ನಮ್ಮಿಂದ ಕಡಿಮೆ ಮಾಡಲು ಸಾಧ್ಯವಾಗುತ್ತಿಲ್ಲ. ಆದ್ದರಿಂದ ಮೇಲಿನ ಆದೇಶ ಬರುವ ತನಕ ನಮಗೆ ಕಾಯಬೇಕಾಗುತ್ತದೆ ಎಂದು ಅವರು ಹೇಳಿದ್ದಾರೆ. ಆದರೆ ಇವರು ಗ್ಯಾಸ್ನ ಬೆಲೆ ಹೆಚ್ಚಿಸಬೇಕಾದರೆ ಆ ಕೂಡಲೇ ಹೆಚ್ಚಿಸುವ ಕೆಲಸ ಮಾಡುತ್ತಾರೆ. ಕಡಿಮೆಯಾಗಿದ್ದರೆ ಅದನ್ನು ಮಾಡಲು ನೀತಿ ನಿಯಮವನ್ನು ಹೇಳುತ್ತಿದ್ದಾರೆ. ಆದ್ದರಿಂದ ದರ ಕಡಿಮೆ ಮಾಡದಿದ್ದಲ್ಲಿ ನಾವು ಅಧಿಕೃತವಾಗಿ ಪೊಲೀಸ್ ಇಲಾಖೆಯಿಂದ ಅನುಮತಿ ಪಡೆದು ಸುಳ್ಯದಲ್ಲಿ ಸುಮಾರು 200ಕ್ಕೂ ಹೆಚ್ಚು ಎಲ್ಪಿಜಿ ಅಟೋ ಗ್ರಾಹಕರಿದ್ದು ಅವರನ್ನೆಲ್ಲಾ ಒಗ್ಗೂಡಿಸಿ ಪ್ರತಿಭಟನೆಯನ್ನು ಮಾಡುವುದಾಗಿ ಎಚ್ಚರಿಕೆ ನೀಡಿದರು.
ಈ ವೇಳೆ ಬಂಕ್ನ ಮಾಲಕ ಸುನಿಲ್ ಮಾತನಾಡಿ ದರ ಕಡಿಮೆಯಾಗಿರುವುದು ವಾಸ್ತವ ಸಂಗತಿಯಾಗಿದ್ದು, ಆದರೆ ಜಿಲ್ಲೆಯ ಬೇರೆ ಬೇರೆ ಕಡೆಗಳಲ್ಲಿ ಅಧಿಕೃತವಾಗಿ ಕಂಪೆನಿಯಿಂದ ಆದೇಶ ಬಂದಿರುವುದಿಲ್ಲ. ಜಿಲ್ಲೆಯ ಮುಖಂಡರ ಜೊತೆ ಸುಳ್ಯದ ಗ್ಯಾಸ್ ಬಂಕ್ನಲ್ಲಿ ದರ ಕಡಿಮೆ ಮಾಡಿ ಕೊಡಲು ಪ್ರಯತ್ನ ಮಾಡುತ್ತಿದ್ದೇನೆ. ನಮಗೆ ಆದೇಶ ಬಂದ ಕೂಡಲೇ ದರ ಕಡಿಮೆ ಮಾಡುತ್ತೇವೆ ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಅಟೋ ಚಾಲಕರಾದ ರಾಧಾಕೃಷ್ಣ ಪರಿವಾರಕಾನ, ಸುಂದರ್ ಪೆರಾಜೆ, ದಿನಕರ ಕೇರ್ಪಳ, ಭಾನುಪ್ರಕಾಶ್, ಪದ್ಮನಾಭ ರ್ಹಲಡ್ಕ, ಕಾರ್ತಿಕ್ ದಂಬೆಕೋಡಿ, ಕಾರ್ತಿಕ್ ನಾಗಪಟ್ಟಣ, ಅಜೇಶ್ ಗಾಂಧಿನಗರ ಸೇರಿದಂತೆ ಮೂವತ್ತಕ್ಕೂ ಹೆಚ್ಚು ಅಟೋ ಚಾಲಕರು ಇದ್ದರು.