ಬಿಹಾರಶರೀಫ್ ಹಿಂಸಾಚಾರ ಉಲ್ಬಣಗೊಳ್ಳಲು ಬಜರಂಗ ದಳ ಕಾರಣ: ಪಿಯುಸಿಎಲ್ ವರದಿ
ಹೊಸದಿಲ್ಲಿ: ಬಿಹಾರಶರೀಫ್ ಕೋಮು ಹಿಂಸಾಚಾರ ಕುರಿತು ಪೀಪಲ್ಸ್ ಯೂನಿಯನ್ ಫಾರ್ ಸಿವಿಲ್ ಲಿಬರ್ಟೀಸ್ (PUCL) ವರದಿಯು ಪರಿಸ್ಥಿತಿಯು ಉಲ್ಬಣಗೊಳ್ಳಲು ಬಜರಂಗ ದಳದಂತಹ ಸಂಘಟನೆಗಳ ಪಾತ್ರ, ಪೊಲೀಸರ ನಿರ್ಲಕ್ಷ್ಯ ಮತ್ತು ಅರೆ ಸೇನಾಪಡೆಗಳ ಅನುಪಸ್ಥಿತಿ ಕಾರಣವಾಗಿತ್ತು ಎಂದು ದೂಷಿಸಿದೆ ಎಂದು telegraphindia.com ವರದಿ ಮಾಡಿದೆ.
ಹಿಂಸಾಚಾರವನ್ನು ತ್ವರಿತವಾಗಿ ನಿಯಂತ್ರಿಸುವಲ್ಲಿ ವೈಫಲ್ಯಕ್ಕಾಗಿ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರ ಸರಕಾರವನ್ನು ಟೀಕಿಸಿರುವ ವರದಿಯು ಸಂತ್ರಸ್ತರಿಗೆ ಪರಿಹಾರವನ್ನು ನೀಡುವಂತೆ ಹಾಗೂ ದ್ವೇಷ ಮತ್ತು ಹಿಂಸೆಯನ್ನು ಹರಡಲು ಧಾರ್ಮಿಕ ಮೆರವಣಿಗೆಗಳ ಬಳಕೆಯ ಕುರಿತು ಆಳವಾದ ತನಿಖೆ ನಡೆಸುವಂತೆ ಆಗ್ರಹಿಸಿದೆ. ವಿಹಿಂಪ ಮತ್ತು ಬಜರಂಗ ದಳದ ಪಾತ್ರದ ಬಗ್ಗೆಯೂ ತನಿಖೆಗೆ ಅದು ಒತ್ತಾಯಿಸಿದೆ.
ಮಾ.30ರಂದು ರಾಮನವಮಿ ಮೆರವಣಿಗೆ ಸಂದರ್ಭ ಭುಗಿಲೆದ್ದಿದ್ದ ಹಿಂಸಾಚಾರವು ಹಲವು ದಿನಗಳ ಕಾಲ ಮುಂದುವರಿದಿತ್ತು. ಓರ್ವ ವ್ಯಕ್ತಿ ಕೊಲ್ಲಲ್ಪಟ್ಟು, ಹಲವಾರು ಜನರು ಗಾಯಗೊಂಡಿದ್ದರು. ಉಭಯ ಸಮುದಾಯಗಳಿಗೆ ಸೇರಿದ ಆಸ್ತಿಪಾಸ್ತಿಗಳಿಗೆ ಹಾನಿಯುಂಟಾಗಿತ್ತು.
ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಸುಮಾರು 148 ಜನರನ್ನು ಪೊಲೀಸರು ಬಂಧಿಸಿದ್ದು, ಇತರ ಹಲವರು ನ್ಯಾಯಾಲಯದಲ್ಲಿ ಶರಣಾಗಿದ್ದರು. ಬಂಧಿತರಲ್ಲಿ ಬಜರಂಗ ದಳದ ಜಿಲ್ಲಾ ಸಂಚಾಲಕ ಕುಂದನ ಕುಮಾರ ಮತ್ತು ಹಲವಾರು ಸಹಚರರು ಸೇರಿದ್ದಾರೆ.
ಎ.8ರಂದು ಬಿಹಾರಶರೀಫ್ಗೆ ತೆರಳಿ ಹಿಂಸಾಚಾರದಿಂದ ಸಂತ್ರಸ್ತ ಜನರು ಮತ್ತು ಜಿಲ್ಲಾಡಳಿತದ ಅಧಿಕಾರಿಗಳನ್ನು ಭೇಟಿಯಾದ ರಾಜ್ಯ ಪರಿಷತ್ ಸದಸ್ಯ ಚಕ್ರವರ್ತಿ ಅಶೋಕ ಪ್ರಿಯದರ್ಶಿ ಸೇರಿದಂತೆ ಪಿಯುಸಿಎಲ್ನ ನಾಲ್ವರು ಸದಸ್ಯರ ಸತ್ಯಶೋಧನಾ ತಂಡವು ತನ್ನ ಸಂವಾದದ ವೇಳೆ ಹೇಳಿಕೆಗಳು ಮತ್ತು ಸಾಕ್ಷ್ಯಗಳನ್ನು ಸಂಗ್ರಹಿಸಿದೆ.
ಸತ್ಯಶೋಧನಾ ತಂಡವು ಹಿಂಸಾಚಾರವನ್ನು ನಿಭಾಯಿಸುವಲ್ಲಿ ಮತ್ತು ತಡೆಯುವಲ್ಲಿ ಪೊಲೀಸರು ನಂಬಲಾಗದ ನಿರ್ಲಕ್ಷ್ಯವನ್ನು ತೋರಿಸಿದ್ದರು ಎಂಬ ತೀರ್ಮಾನಕ್ಕೆ ಬಂದಿದೆ. ಇದು ಗುಪ್ತಚರ ವೈಫಲ್ಯ ಅಥವಾ ಆ ಕುರಿತು ಕ್ರಮ ಕೈಗೊಳ್ಳುವಲ್ಲಿ ಪೊಲೀಸರ ವೈಫಲ್ಯವಾಗಿದೆ. ಹಿಂಸಾಚಾರಕ್ಕೆ ತಿಂಗಳುಗಳಿಂದ ಸಿದ್ಧತೆ ನಡೆಯುತ್ತಿತ್ತು ಎನ್ನುವುದು ಜನರಿಗೆ ಗೊತ್ತಿದ್ದರಿಂದ ಪೊಲೀಸರ ವೈಫಲ್ಯದ ಸಾಧ್ಯತೆಯೇ ಹೆಚ್ಚು ಎಂದು ತಂಡವು ಭಾವಿಸಿದೆ ಎಂದು ವರದಿಯು ತಿಳಿಸಿದೆ.
ಹಿಂಸೆಯ ಜ್ವಾಲೆಯು ಉಲ್ಬಣಗೊಳ್ಳಲು ಅವಕಾಶ ನೀಡಿದ್ದು ಸರಕಾರದ ವೈಫಲ್ಯವಾಗಿದೆ ಎಂದು ಒತ್ತಿ ಹೇಳಿರುವ ವರದಿಯು,ಆ ಬಗ್ಗೆ ತನಿಖೆಗೆ ಕರೆ ನೀಡಿದೆ. ಮೆರವಣಿಗೆಯಲ್ಲಿ ಜನರ ಸಂಖ್ಯೆ ಹೆಚ್ಚುತ್ತಿದ್ದಂತೆ ಹೆಚ್ಚುವರಿ ಪಡೆಗಳೊಂದಿಗೆ ಪೊಲೀಸರು ಉತ್ತಮವಾಗಿ ಸಿದ್ಧರಾಗಿರಬೇಕಿತ್ತು ಎಂದು ಹೇಳಿರುವ ವರದಿಯು, ಹಿಂಸಾಚಾರ ಆರಂಭಗೊಂಡಾಗ ಬಿಹಾರಶರೀಫ್ ಪಟ್ಟಣದಲ್ಲಿ ಅರೆ ಸೇನಾಪಡೆಗಳೂ ಉಪಸ್ಥಿತವಿರಲಿಲ್ಲ ಎಂದಿದೆ.
ಜಿಲ್ಲಾಡಳಿತವು ಕೇವಲ 5,000 ಜನರಿಗೆ ಅವಕಾಶ ನೀಡಿದ್ದರೂ ಸುಮಾರು 30,000 ದಿಂದ 40,000 ಜನರು ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದರು. ವಿಹಿಂಪ ಮತ್ತು ಬಜರಂಗದಳದಂತಹ ಪ್ರಮುಖ ಸಂಘಟನೆಗಳು ಘಟನೆಯಲ್ಲಿ ಭಾಗಿಯಾಗಿದ್ದವು ಎನ್ನುವುದು ಸ್ಪಷ್ಟವಾಗಿದೆ. ಅವುಗಳ ಉದ್ದೇಶ ಮತ್ತು ಕೃತ್ಯಗಳ ಬಗ್ಗೆ ಸೂಕ್ತ ತನಿಖೆ ನಡೆಸಬೇಕು ಎಂದು ಪಿಯುಸಿಎಲ್ ವರದಿಯು ಹೇಳಿದೆ.
ವಿಹಿಂಪ ಮತ್ತು ಬಜರಂಗ ದಳಗಳ ಶಂಕಿತ ಪಾಲ್ಗೊಳ್ಳುವಿಕೆಯ ಬಗ್ಗೆ ಮಾತನಾಡಿರುವ ವರದಿಯು,ರಾಮನವಮಿ ಮೆರವಣಿಗೆಗಾಗಿ ಸುಮಾರು 4,000 ಖಡ್ಗಗಳನ್ನು ವಿತರಿಸಲಾಗಿತ್ತು ಎಂದು ಹೇಳಿರುವ ಜನರಿಂದ ಸಾಕ್ಷ್ಯಗಳನ್ನು ಸಂಗ್ರಹಿಸಿದೆ. ಮೆರವಣಿಗೆಯಲ್ಲಿ ಪಾಲ್ಗೊಳ್ಳಲು ಹಲವಾರು ನಿರುದ್ಯೋಗಿ ಯುವಕರಿಗೆ ಹಣ, ಹೊಸ ಬಟ್ಟೆಗಳು ಮತ್ತು ಅವರ ದ್ವಿಚಕ್ರವಾಹನಗಳಿಗೆ ಪೆಟ್ರೋಲ್ ಒದಗಿಸಲಾಗಿತ್ತು. ಹೋರ್ಡಿಂಗ್ಗಳಲ್ಲಿ ಪ್ರಚೋದನಾಕಾರಿ ಘೋಷಣೆಗಳನ್ನು ಪ್ರದರ್ಶಿಸಲಾಗಿತ್ತು ಎಂದೂ ತಿಳಿಸಿದೆ.