Bangaluru | ನಕಲಿ ಔಷಧ ಜಾಲ ಪ್ರಕರಣ: ಮುಖ್ಯ ಸೂತ್ರಧಾರ ಪ್ರಶಾಂತ್ ಬಂಧನ

ಬೆಂಗಳೂರು: ರಾಜ್ಯದಲ್ಲಿ ಸಾಕಷ್ಟು ಸದ್ದು ಮಾಡಿರುವ ನಕಲಿ ಔಷದ ಜಾಲ ಪತ್ತೆ ಪ್ರಕರಣದ ಕಿಂಗ್ ಪಿನ್ ಎನ್ನಲಾಗಿರುವ ಆರೋಪಿ ಪ್ರಶಾಂತ್ ನನ್ನು ವಿಶೇಷ ತನಿಖಾ ತಂಡ( ಎಸ್ ಐ ಟಿ) ಇಂದು (ಸೆ.28) ನಗರದ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬಂಧಿಸಿದೆ.

ಪ್ರಕರಣ ಪತ್ತೆಯಾಗುತ್ತಿದ್ದಂತೆ ಪ್ರಶಾಂತ್ ಅಝರ್ ಬೈಝಾನ್ ನಲ್ಲಿ ತಲೆಮರೆಸಿಕೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದರು. ನಂತರ ಆರೋಪಿ ಪ್ರಶಾಂತ್ ವಿರುದ್ಧ ಲುಕ್ ಔಟ್ ನೋಟಿಸ್ ಕೂಡ ಜಾರಿ ಮಾಡಲಾಗಿತ್ತು. ಸದ್ಯ ಪ್ರಶಾಂತ್ ಬಂಧನವಾಗಿದ್ದು ಇಂದು ನ್ಯಾಯಾಧೀಶರ ಎದುರು ಹಾಜರುಪಡಿಸಿ ಹೆಚ್ಚಿನ ಕಸ್ಟಡಿಗೆ ಪಡೆಯಲು ಸಿದ್ದತೆ ಮಾಡಿಕೊಂಡಿದೆ.

ರಾಮನಗರದ ಬಿಡದಿ ಹಾಗೂ ಬೆಂಗಳೂರಿನಲ್ಲಿ ಕೋಟ್ಯಂತರ ರೂಪಾಯಿ ಮೌಲ್ಯದ ನಕಲಿ ಔಷಧಿಗಳು ಪತ್ತೆಯಾಗಿದ್ದವು. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ರಾಜ್ಯ ಸರಕಾರ, ಇದರ ತನಿಖೆಗೆ ಆರು ಜನರ ವಿಶೇಷ ತನಿಖಾ ತಂಡವನ್ನು ರಚಿಸಿದೆ.

ಈ ವಿಶೇಷ ತನಿಖಾ ತಂಡವು ರಾಜ್ಯದ ವಿವಿಧ ಕಡೆ ದಾಳಿಗಳನ್ನು ಮಾಡಿ ಸಾಕಷ್ಟು ನಕಲಿ ಔಷಧಗಳನ್ನ ವಶಪಡಿಸಿಕೊಂಡಿತ್ತು.