ಬೆಂಗಳೂರು: ಪ್ರವಾಸಿ ಕೂಟ ವಿಟ್ಲ ನಿಯೋಗದಿಂದ ಸಚಿವ ಝಮೀರ್ ಅಹ್ಮದ್ ಖಾನ್ ಭೇಟಿ

ಬೆಂಗಳೂರು: ಪ್ರವಾಸಿ ಕೂಟ ವಿಟ್ಲ (ರಿ) ನಿಯೋಗವು ಫೆ.5ರಂದು ಸಚಿವ BZ ಝಮೀರ್ ಅಹ್ಮದ್ ಖಾನ್ ರನ್ನು ಬೆಂಗಳೂರಿನ ವಿಕಾಸ ಸೌಧ ಸಭಾಂಗಣದಲ್ಲಿ ಭೇಟಿಯಾಗಿ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿತು.

ಅನಿವಾಸಿ ಕನ್ನಡಿಗರ ಪರವಾಗಿ ಪ್ರಮುಖ ಹದಿನೈದು ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ಸಮಿತಿ ಅಧ್ಯಕ್ಷರಾದ ಮೊಹಮ್ಮದ್ ಮಸೂದ್ ವಿಟ್ಲ (ಬಹರೈನ್) ಅವರ ನೇತೃತ್ವದಲ್ಲಿ ಝಮೀರ್ ಅಹ್ಮದ್ ಖಾನ್ ರನ್ನು ಭೇಟಿಯಾಗಿ ಚರ್ಚೆ ನಡೆಸಿದರು.

ನಮ್ಮ ಬೇಡಿಕೆಗಳನ್ನು ಪರಿಶೀಲಿಸಿದ ಸಚಿವರು ಮುಂದಿನ ರಾಜ್ಯ ಬಜೆಟ್ ನಲ್ಲಿ ಅನಿವಾಸಿ ಕನ್ನಡಿಗರಿಗೆ ಆದ್ಯತೆ ನಿಡುವ ಭರವಸೆ ನೀಡಿದರು. ಸಚಿವರ ಕಚೇರಿ ಸಂದರ್ಶನ ವೇಳೆ ಅಲ್ಹಾಜ್ ಅಶ್ರಫ್ ಸಖಾಫಿ ತಂಙಳ್ ಆದೂರ್‌ (ಸದಸ್ಯರು ಹಜ್ ಕಮಿಟಿ ಹಾಗೂ ವಕ್ಫ್ ಬೋರ್ಡ್, ಕರ್ನಾಟಕ) ಅವರನ್ನು ಅನಿರೀಕ್ಷಿತವಾಗಿ ಭೇಟಿ ಮಾಡಲಾಯಿತು ಮತ್ತು ನಮ್ಮ ಸಮಿತಿಯ ಮನವಿ ಪತ್ರವನ್ನು ಅಶ್ರಫ್ ಸಖಾಫಿ ತಂಙಳ್ ಮುಖಾಂತರ ಸಚಿವ ಝಮೀರ್ ಅಹ್ಮದ್ ಖಾನ್ ರಿಗೆ ಹಸ್ತಾಂತರಿಸಲಾ ಯಿತು. ನಮ್ಮ ಸಮಿತಿಯ ಕಾರ್ಯವೈಖರಿಗೆ ಮೆಚ್ಚುಗೆ ಸೂಚಿಸಿ ಶುಭ ಹಾರೈಸಿದರು ಎಂದು ಪ್ರವಾಸಿ ಕೂಟ ವಿಟ್ಲ ನಿಯೋಗ ತಿಳಿಸಿದೆ.

ನಿಯೋಗದಲ್ಲಿ ಪ್ರವಾಸಿ ಕೂಟ ವಿಟ್ಲ (ರಿ) ಸ್ಥಾಪಕರಾದ ಹೈದರಾಲಿ ಇಸ್ಮಾಯಿಲ್ ಮೇಗಿನಪೇಟೆ (ಸೌದಿ ಅರೇಬಿಯಾ) ಸಮಿತಿ ಸದಸ್ಯರಾದ ಝಕರಿಯಾ ಸಾಲೆತ್ತೂರು (ಖತರ್) ಹಾಗೂ ಬದ್ರುದ್ದೀನ್ (ಬಹರೈನ್) ಉಪಸ್ಥಿತರಿದ್ದರು.

ಬೇಡಿಕೆಗಳು:-

1. ಕರ್ನಾಟಕ ರಾಜ್ಯದಲ್ಲಿ ಕನ್ನಡಿಗರಿಗೆ ಪ್ರತ್ಯೇಕ ಪ್ರವಾಸಿ ಸಚಿವಾಲಯ ಸ್ಥಾಪಿಸಬೇಕು (ನೆರೆಯ ರಾಜ್ಯ ಕೇರಳ ಸರ್ಕಾರ ಸ್ಥಾಪಿಸಿದಂತೆ)

2. ಅನಿವಾಸಿ ಕನ್ನಡಿಗರಿಗೆ ಕುಟುಂಬ ಕಲ್ಯಾಣ ಹಾಗೂ ಪ್ರತ್ಯೇಕ ಆರೋಗ್ಯ ವಿಮಾ ಯೋಜನೆ ಕಾರ್ಡ್ ರಾಜ್ಯ ಸರ್ಕಾರ ನೀಡಬೇಕು. (ಅನಿವಾಸಿ ಕನ್ನಡಿಗರಿಗೆ ವೈದ್ಯಕೀಯ ತುರ್ತು ಸಂದರ್ಭಗಳಲ್ಲಿ ಸಹಾಯ ಆಗುವಂತೆ)

3. ಉದ್ಯೋಗದಿಂದ ನಿವೃತ್ತಿಹೊಂದಿ ಹಾಗೂ ಉದ್ಯೋಗ ಕಳೆದುಕೊಂಡು ತಾಯ್ನಾಡಿಗೆ ಹಿಂದಿರುಗುವ ಅನಿವಾಸಿ ಕನ್ನಡಿಗರಿಗೆ ಸ್ವಯಂ ಉದ್ಯಮ ನಡೆಸಲು ಬಡ್ಡಿ ರಹಿತವಾದ ಸಾಲ ಹಾಗೂ ಆರ್ಥಿಕ ಸಹಾಯಕ್ಕೆ ಸರ್ಕಾರದ ಕಡೆಯಿಂದ ಯೋಜನೆಯನ್ನು ರೂಪಿಸಬೇಕು.

4. ಸರ್ಕಾರಕ್ಕೆ ಸಂಬಂಧಿಸಿದ ದಾಖಲೆ ಪತ್ರಗಳನ್ನು ಸೇರ್ಪಡೆ ಹಾಗೂ ತಿದ್ದುಪಡಿ ಮಾಡಲು ಅನಿವಾಸಿ ಕನ್ನಡಿಗರಿಗೆ ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲಿ ಕಾರ್ಯನಿರ್ವಹಿಸುವ ಪ್ರತ್ಯೇಕವಾದ NRI ಕೌಂಟರ್ ಸ್ಥಾಪಿಸಬೇಕು.

5. ಕರ್ನಾಟಕ ರಾಜ್ಯದ ವಿಮಾನ ನಿಲ್ದಾಣದಿಂದ ವಿಮಾನ ಸಂಸ್ಥೆಗಳ ವಿವೇಚನೆ ರಹಿತವಾದ ಟಿಕೆಟ್ ದರಗಳ ಏರಿಕೆಗೆ ಕಡಿವಾಣ ಹಾಕುವುದರ ಬಗ್ಗೆ ರಾಜ್ಯ ಸರ್ಕಾರ ಹಾಗೂ ಕೇಂದ್ರ ಸರ್ಕಾರಕ್ಕೆ ಒತ್ತಡ ಹೇರಬೇಕು. 

6. ಪ್ರವಾಸಿ ಕನ್ನಡಿಗರ ಅನುಕೂಲಕ್ಕಾಗಿ ಮಂಗಳೂರಿನಿಂದ ಸೌದಿ ಅರೇಬಿಯಾದ ಜಿದ್ದಾ ಹಾಗು ರಿಯಾದ್ ನಗರಗಳಿಗೆ ನೇರ ಸಂಪರ್ಕ ಮಾಡುವ ವಿಮಾನಗಳ ಹಾರಾಟ ಮಾಡುವಂತೆ ರಾಜ್ಯ ಸರ್ಕಾರ ಕೇಂದ್ರ ಸರ್ಕಾರಕ್ಕೆ ಒತ್ತಡ ಹೇರಬೇಕು. (ಕರಾವಳಿಯ ಭಾಗದಿಂದ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಸೌದಿ ಅರೇಬಿಯಾಕ್ಕೆ ಪ್ರಯಾಣ ಮಾಡುವ ಕನ್ನಡಿಗರ ಅನುಕೂಲಕ್ಕಾಗಿ ಅವರ ಸಮಯ ಮತ್ತು ದುಡ್ಡಿನ ಉಳಿತಾಯಕ್ಕಾಗಿ ನೇರ ಸಂಪರ್ಕ ಕಲ್ಪಿಸುವ ವಿಮಾನಗಳ ಹಾರಾಟ ಮಾಡುವಂತೆ)

7. ಅನಿವಾಸಿ ಕನ್ನಡಿಗರಿಗೆ ಹಾಗೂ ಅವರ ಕುಟುಂಬದ ಸಮಸ್ಯೆಗಳನ್ನು ಬಗೆಹರಿಸಲು ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲೂ ಪ್ರತ್ಯೇಕವಾದ NRI ಪೊಲೀಸ್ ಕೌಂಟರ್ ಗಳನ್ನು ಸ್ಥಾಪಿಸಿ.

8. ರಾಜ್ಯದಲ್ಲಿ ಕನ್ನಡಿಗರಿಗೆ ವಿಸಾ ಹಾಗೂ ವಿಸಿಟಿಂಗ್ ವಿಸಾದ ಹೆಸರಿನಲ್ಲಿ ಮೋಸ ಮಾಡುವಂತಹ ಟ್ರಾವೆಲ್ ಏಜೆಂಟ್‌ಗಳ ಬಗ್ಗೆ ರಾಜ್ಯ ಸರ್ಕಾರ ಕಠಿಣ ಕ್ರಮವಹಿಸಬೇಕು ಹಾಗೂ ಕನ್ನಡಿಗರಿಗೆ ವಿದೇಶದ ವಿಸಾ ಮೆಡಿಕಲ್ ನೆಪದಲ್ಲಿ ಅತಿ ಹೆಚ್ಚು ದರಗಳನ್ನು ಪಡೆದುಕೊಳ್ಳುವ ಏಜೆಂಟ್ಸ್ ಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು.

9. ಅನಿವಾಸಿ ಕನ್ನಡಿಗರ ಮಕ್ಕಳ ವಿದ್ಯಾಭ್ಯಾಸಕ್ಕೆ ರಾಜ್ಯ ಸರ್ಕಾರ ವಿಶೇಷ ವಿದ್ಯಾರ್ಥಿ ವೇತನ ಯೋಜನೆಯನ್ನು ಜಾರಿಗೆ ತರಲು ಪ್ರಯತ್ನಿಸಬೇಕು.

10. ಕರ್ನಾಟಕ ರಾಜ್ಯದ ಘನತೆಯನ್ನು ಕಾಪಾಡುವ ನಿಟ್ಟಿನಲ್ಲಿ ರಾಜ್ಯದ ಕನ್ನಡಿಗ ಪ್ರವಾಸಿಗರು ಮಾದಕ ವಸ್ತುಗಳ ಸಾಗಾಣಿಕೆ ತಡೆಗಟ್ಟಲು ರಾಜ್ಯದ ಎಲ್ಲಾ ವಿಮಾನ ನಿಲ್ದಾಣಗಳಲ್ಲಿ ಹೆಚ್ಚಿನ ಭದ್ರತೆ ತಪಾಸಣೆ ನಡೆಯಬೇಕು.

11. ಸ್ವದೇಶಕ್ಕೆ ಆಗಮಿಸುವ ಪ್ರವಾಸಿ ಕನ್ನಡಿಗರಿಗೆ ರಾಜ್ಯದ ಎಲ್ಲಾ ವಿಮಾನ ನಿಲ್ದಾಣಗಳಲ್ಲಿ ವಿಮಾನ ನಿಲ್ದಾಣದ ಎಲ್ಲಾ ಮಾದರಿಯ ಸಿಬ್ಬಂದಿ ಮತ್ತು ಅಧಿಕಾರಿಗಳು, ಅನಿವಾಸಿ ಕನ್ನಡಿಗರೊಂದಿಗೆ ಗೌರವಯುತವಾಗಿ ನಡೆದುಕೊಳ್ಳುವಂತೆ ಸೂಚನೆ ನೀಡಬೇಕು. 

12. ವಿದೇಶಗಳ ಜೈಲಿನಲ್ಲಿ ಇರುವ ಅಮಾಯಕ ಕನ್ನಡಿಗರ ಮಾಹಿತಿ ಪಡೆದು ಭಾರತೀಯ ರಾಯಭಾರಿ ಕಚೇರಿಗಳ ಜೊತೆ ಚರ್ಚಿಸಿ ಬಿಡುಗಡೆಗೆ ರಾಜ್ಯ ಸರ್ಕಾರ ಪ್ರಯತ್ನಿಸಬೇಕು.

13. ಅನಿವಾಸಿ ಕನ್ನಡಿಗರಿಗೆ ಮುಕ್ತವಾಗಿ ಮತದಾನ ಮಾಡಲು ಅವಕಾಶ ಕಲ್ಪಿಸಬೇಕು.

14. ಕರ್ನಾಟಕ ರಾಜ್ಯದ ಅನಿವಾಸಿ ಕನ್ನಡಿಗ ಸಮಾಜ ಸೇವಕರನ್ನು ಗುರುತಿಸಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ನೀಡಬೇಕು.

15. ವಿಟ್ಲದ ಜನರ ಬಹು ಕಾಲದ ಬೇಡಿಕೆಯಂತೆ ಹಳೆಯ ವಿಟ್ಲ ವಿಧಾನಸಭಾ ಕ್ಷೇತ್ರವನ್ನು ಪುನ: ಮರುಸ್ಥಾಪನೆ ಮಾಡಬೇಕಾಗಿ ವಿನಂತಿಸುತ್ತೇವೆ. (ರಾಜ್ಯದ ಕರಾವಳಿಯ ಗಡಿನಾಡು ಪ್ರದೇಶವಾದ ವಿಟ್ಲ ಕ್ಷೇತ್ರವನ್ನು ಕೈ ಬಿಟ್ಟ ನಂತರ ವಿಟ್ಲದ ಅಭಿವೃದ್ಧಿ ಕುಂಠಿತಕ್ಕೆ ಕಾರಣವಾಗಿದೆ)