Bhalki | ‘ವಾಕ್ ಫಾರ್ ಹಾರ್ಟ್’ ಕಾರ್ಯಕ್ರಮಕ್ಕೆ ಚಾಲನೆ

ಭಾಲ್ಕಿ: ವಾಕಿಂಗ್ (ವಾಯುವಿಹಾರ) ಎಲ್ಲ ರೋಗಕ್ಕೂ ರಾಮಬಾಣವಾಗಿದೆ ಎಂದು ಹಿರೇಮಠದ ಪೀಠಾಧಿಪತಿ ಗುರುಬಸವ ಪಟ್ಟದೇವರು ಅಭಿಪ್ರಾಯಪಟ್ಟರು.

ನಗರದ ಚನ್ನಬಸವಾಶ್ರಮದ ಆವರಣದಲ್ಲಿ ಮಂಗಳವಾರ ರೋಟರಿ ಕ್ಲಬ್ ಆಫ್ ಭಾಲ್ಕಿ ಫೋರ್ಟ್ ವತಿಯಿಂದ ವಿಶ್ವ ಹೃದಯ ದಿನಾಚರಣೆ ಅಂಗವಾಗಿ ಆಯೋಜಿಸಿದ್ದ ‘ವಾಕ್ ಫಾರ್ ಹಾರ್ಟ್’ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು.

ಆಹಾರ, ವಿಹಾರ ಹಾಗೂ ವಿಚಾರಗಳನ್ನು ನಿಯಮಿತವಾಗಿ ಅಳವಡಿಸಿಕೊಂಡಲ್ಲಿ ರೋಗಮುಕ್ತ ಜೀವನ ನಡೆಸಬಹುದು. ಪ್ರತಿನಿತ್ಯ ನಡಿಗೆ ಮಾಡುವುದರಿಂದ ಹೃದಯ ಕಾಯಿಲೆಗಳನ್ನು ತಡೆಗಟ್ಟಬಹುದು. ಮಾನಸಿಕ ಒತ್ತಡ, ಜಂಕ್‌ಫುಡ್ ಸೇವನೆ ಹಾಗೂ ನಿದ್ರೆಯ ಕೊರತೆಯಿಂದ ಹೃದಯಾಘಾತ ಸಂಭವಿಸುತ್ತಿವೆ. ಹೃದಯದ ರಕ್ಷಣೆ ಹಾಗೂ ಅದರ ಪ್ರಾಮುಖ್ಯತೆ ಕುರಿತು ಜನರಲ್ಲಿ ಜಾಗೃತಿ ಮೂಡಿಸುವುದು ಅಗತ್ಯವಾಗಿದೆ ಎಂದು ಹೇಳಿದರು.

ಡಿವೈಎಸ್ಪಿ ಬಲ್ಲಪ್ಪ ನಂದಗಾಂವಿ ಮಾತನಾಡಿ, ವಾಕಿಂಗ್ ಒಂದು ದಿನಕ್ಕೆ ಸೀಮಿತವಾಗಬಾರದು. ಇತ್ತೀಚೆಗೆ ಎಲ್ಲ ವಯೋಮಾನದ ಮಹಿಳೆಯರು ಹಾಗೂ ಪುರುಷರಲ್ಲಿ ಹೃದಯ ಕಾಯಿಲೆ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದೆ. ಹೃದಯ ಉತ್ತಮವಾಗಿದ್ದರೆ ಯಾರಿಗೂ ‘ಹರ್ಟ್’ ಆಗುವುದಿಲ್ಲ. ಮನೆಯೊಡತಿ ಹೃದಯವಂತರಾಗಿದ್ದಲ್ಲಿ ಹಾರ್ಟ್ ಅಟ್ಯಾಕ್ ಸಂಭವಿಸುವುದಿಲ್ಲ ಎಂದು ಹಾಸ್ಯಮಿಶ್ರಿತವಾಗಿ ಹೇಳಿದರು.

ಹೃದ್ರೋಗ ತಜ್ಞ ಡಾ. ವಿಲಾಸ್ ಕನಸೆ ಮಾತನಾಡಿ, ಕೆಲಸದ ಒತ್ತಡ, ಮಾನಸಿಕ ಒತ್ತಡ ಹಾಗೂ ಆ್ಯಸಿಡಿಟಿಯಿಂದ ಬಿಪಿ, ಶುಗರ್ ಮತ್ತು ಹೃದಯ ಕಾಯಿಲೆಗಳು ಉಂಟಾಗುತ್ತಿವೆ. ಹೃದಯ ಕಾಯಿಲೆಯ ಲಕ್ಷಣಗಳು ಕಂಡುಬಂದಾಗ ತಕ್ಷಣ ಪರಿಣಿತ ವೈದ್ಯರನ್ನು ಸಂಪರ್ಕಿಸಿ ಇಸಿಜಿ, ಎಕೋಕಾರ್ಡಿಯೋಗ್ರಾಮ್ ಹಾಗೂ ಅಗತ್ಯ ಸ್ಕ್ಯಾನಿಂಗ್ ಮಾಡಿಸಿಕೊಳ್ಳಬೇಕು ಎಂದು ಸಲಹೆ ನೀಡಿದರು.

ಈ ಸಂದರ್ಭದಲ್ಲಿ ರೋಟರಿ ಕ್ಲಬ್ ಅಧ್ಯಕ್ಷ ಡಾ. ಶೈಲಜಾ ತಳವಾಡೆ, ಡಾ.ಸಜ್ಜಲ್‌ ಬಳತೆ, ಸಿಎಂಒ ಡಾ. ಶಶಿಕಾಂತ್‌ ಭೂರೆ, ಡಾ.ಅಮೀತ್‌ ಅಷ್ಟೂರೆ, ಡಾ. ವಸಂತ್‌ ಪವಾರ್‌, ಜೈಕಿಶನ್‌ ಬಿಯಾಣಿ, ಡಾ. ನಿತೀನ್‌ ಪಾಟೀಲ್, ಡಾ.ಅನೀಲಕುಮಾರ್‌ ತಳವಾಡೆ, ಡಾ.ಗುಂಡೆರಾವ್‌ ಶೆಡೋಳೆ, ಡಾ.ವಿಜಯಕುಮಾರ್ ರಾಠೋಡ್‌, ಶಾಂತನು ಕುಲಕರ್ಣಿ, ಡಾ.ಪ್ರಭು ಕೋಟೆ, ಸಂಜಯಕುಮಾರ್‌ ಪಂಡರಗೆರೆ, ಡಾ.ಶರತ್‌ ತುಕದೆ, ಡಾ.ಮಹೇಶ್ ಭಾಲ್ಕೆ, ಡಾ.ತಾನಾಜಿ ಉಚ್ಚೆ ಹಾಗೂ ಡಾ. ನಾಗೇಶ್ ಟೋಪಾರೆ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.