AI ದುರುಪಯೋಗ ಮಾನವಕುಲದ ಅಂತ್ಯಕ್ಕೆ ಕಾರಣವಾಗಬಹುದು: ‘ಲ್ಯಾನ್ಸೆಟ್’ ವರದಿ ಎಚ್ಚರಿಕೆ
Photo Credit : magnific.com
ಲಂಡನ್, ಅ. 11: ಅಣುಯುದ್ಧ ಮತ್ತು ಕೃತಕ ಬುದ್ಧಿಮತ್ತೆಯ (ಎಐ) ದುರುಪಯೋಗವು ಮಾನವಕುಲದ ಭವಿಷ್ಯವನ್ನು ಅಪಾಯಕ್ಕೆ ಸಿಲುಕಿಸಬಹುದು. ಈ ಬೆದರಿಕೆಗಳು 2100ರ ವೇಳೆಗೆ ಮಾನವಕುಲವನ್ನು ಸಂಪೂರ್ಣವಾಗಿ ನಾಶಪಡಿಸುವ ಸಾಧ್ಯತೆಯಿದೆ ಎಂದು ‘ದಿ ಲ್ಯಾನ್ಸೆಟ್’ ಪ್ರಕಟಿಸಿದ ಹೊಸ ವರದಿಯೊಂದು ಎಚ್ಚರಿಸಿದೆ.
ಮುಂದಿನ 75 ವರ್ಷಗಳಲ್ಲಿ ಮಾನವನ ಆರೋಗ್ಯಕ್ಕೆ ಹಾನಿ ಉಂಟುಮಾಡಬಹುದಾದ 17 ಪ್ರಮುಖ ಬೆದರಿಕೆಗಳನ್ನು ಈ ವರದಿ ಪಟ್ಟಿ ಮಾಡಿದೆ. ಇವುಗಳಲ್ಲಿ ಅಣುಯುದ್ಧ, ಎಐ ದುರುಪಯೋಗ, ಹವಾಮಾನ ವೈಪರೀತ್ಯ, ವಾಯು ಮಾಲಿನ್ಯ, ಬಾಲ್ಯದ ಅಪೌಷ್ಟಿಕತೆ, ಬೊಜ್ಜು ಮತ್ತು ಅಂತರರಾಷ್ಟ್ರೀಯ ನೆರವಿನ ಕಡಿತ ಸೇರಿವೆ.
ಈ ಸಮಸ್ಯೆಗಳು ಒಂದಕ್ಕೊಂದು ಸಂಪರ್ಕ ಹೊಂದಿದ್ದು, ಇವುಗಳನ್ನು ಒಟ್ಟಾಗಿ ಎದುರಿಸಬೇಕಾಗಿದೆ. ಸರಕಾರಗಳು ಈ ಅಪಾಯಗಳನ್ನು ಕಡಿಮೆ ಮಾಡಲು ಮತ್ತು ಭವಿಷ್ಯದ ಪೀಳಿಗೆಯನ್ನು ರಕ್ಷಿಸಲು ಕ್ರಮಗಳನ್ನು ತೆಗೆದುಕೊಳ್ಳಬಹುದು ಎಂದು ‘21ನೇ ಶತಮಾನದ ಜಾಗತಿಕ ಆರೋಗ್ಯ ಬೆದರಿಕೆಗಳ ಕುರಿತ ಲ್ಯಾನ್ಸೆಟ್ ಆಯೋಗ’ ಎಂಬ ಶೀರ್ಷಿಕೆಯ ಈ ವರದಿ ತಿಳಿಸಿದೆ.
ಜೈವಿಕ ಅಸ್ತ್ರಗಳು ಸೇರಿದಂತೆ ಕೃತಕ ಬುದ್ಧಿಮತ್ತೆಯ ದುರುಪಯೋಗ ಮತ್ತು ಅಣುಯುದ್ಧದಿಂದ ಉಂಟಾಗುವ ಕ್ಷಾಮವು ಮುಂದಿನ 75 ವರ್ಷಗಳಲ್ಲಿ ಮಾನವಕುಲದ ವಿನಾಶದ ಅಪಾಯವನ್ನು ಹೊಂದಿವೆ. ಹಾನಿಕಾರಕ ಜೈವಿಕ ಅಸ್ತ್ರಗಳನ್ನು ತಯಾರಿಸಲು ಎಐಯನ್ನು ದುರುಪಯೋಗಪಡಿಸಿಕೊಳ್ಳಬಹುದು. ಇಂತಹ ಅಸ್ತ್ರಗಳು ಲಕ್ಷಾಂತರ ಜನರ ಜೀವಗಳನ್ನು ಅಪಾಯಕ್ಕೆ ಸಿಲುಕಿಸಬಹುದು ಮತ್ತು ತೀವ್ರ ಸಂದರ್ಭಗಳಲ್ಲಿ ಮಾನವನ ಉಳಿವಿಗೇ ಬೆದರಿಕೆಯೊಡ್ಡಬಹುದು.
ಅಣುಯುದ್ಧವು ಮಾನವಕುಲಕ್ಕೆ ಬೆದರಿಕೆಯಾಗಬಹುದು. ಇದು ವಾತಾವರಣದ ಮೇಲ್ಭಾಗಕ್ಕೆ ಬೃಹತ್ ಪ್ರಮಾಣದ ಕಣಗಳನ್ನು ಕಳುಹಿಸುವ ಮೂಲಕ ಸೂರ್ಯನ ಬೆಳಕನ್ನು ತಡೆದು ಆಹಾರ ಉತ್ಪಾದನೆಯ ಮೇಲೆ ಪರಿಣಾಮ ಬೀರಬಹುದು. ಇದು ವ್ಯಾಪಕ ಕ್ಷಾಮಕ್ಕೆ ಕಾರಣವಾಗಿ ಮಾನವನ ಉಳಿವನ್ನು ಅಪಾಯಕ್ಕೆ ಸಿಲುಕಿಸಬಹುದು ಎಂದು ವರದಿ ಎಚ್ಚರಿಸಿದೆ.
ಜಾಗತಿಕ ತಾಪಮಾನ ಹೆಚ್ಚುತ್ತಲೇ ಇದ್ದರೆ ಹವಾಮಾನ ವೈಪರೀತ್ಯವು ಮಾನವ ಆರೋಗ್ಯದ ಮೇಲೆ ಭಾರಿ ಪರಿಣಾಮ ಬೀರಬಹುದು. ಇಂದು ನಾಯಕರು ತೆಗೆದುಕೊಳ್ಳುವ ನಿರ್ಧಾರಗಳು ಮುಂದಿನ ಪೀಳಿಗೆಯ ಆರೋಗ್ಯ ಮತ್ತು ಕ್ಷೇಮವನ್ನು ರೂಪಿಸುತ್ತವೆ ಎಂದು ವರದಿ ತಿಳಿಸಿದೆ. ಈ ಆಯೋಗವು 35 ತಜ್ಞರನ್ನು ಒಳಗೊಂಡಿದೆ. ಇದರ ಸಂಶೋಧನೆಗಳನ್ನು ಜರ್ಮನಿಯ ಬರ್ಲಿನ್‌ನಲ್ಲಿ ನಡೆಯಲಿರುವ ವಿಶ್ವ ಆರೋಗ್ಯ ಶೃಂಗಸಭೆಯಲ್ಲಿ ಪ್ರಸ್ತುತಪಡಿಸಲಾಗುವುದು.
15 ಪ್ರಮುಖ ಬೆದರಿಕೆಗಳು
ವರದಿಯು ಮಾನವ ಆರೋಗ್ಯಕ್ಕೆ ಮಾರಕವಾದ ಇತರ 15 ಪ್ರಮುಖ ಬೆದರಿಕೆಗಳನ್ನು ಗುರುತಿಸಿದೆ. ಇವುಗಳಲ್ಲಿ ವಾಯು ಮಾಲಿನ್ಯ, ಹವಾಮಾನ ವೈಪರೀತ್ಯ, ಸೂಕ್ಷ್ಮಾಣುಜೀವಿಗಳು, ಬಾಲ್ಯದ ಅಪೌಷ್ಟಿಕತೆ, ಸಾಂಪ್ರದಾಯಿಕ ಯುದ್ಧಗಳು, ಅಂತರರಾಷ್ಟ್ರೀಯ ನೆರವಿನ ಕಡಿತ, ಅತಿಯಾದ ಮದ್ಯಪಾನ, ಅಧಿಕ ರಕ್ತದೊತ್ತಡ, ಆದಾಯ ಅಸಮಾನತೆ, ಕಡಿಮೆ ಶಿಕ್ಷಣ ಮಟ್ಟ, ನೈಸರ್ಗಿಕ ಸಾಂಕ್ರಾಮಿಕ ರೋಗಗಳು, ಬೊಜ್ಜು, ಕಳಪೆ ಮಾನಸಿಕ ಆರೋಗ್ಯ, ಧೂಮಪಾನ ಮತ್ತು ಅಸೌಖ್ಯದ ವೃದ್ಧಾಪ್ಯ ಸೇರಿವೆ.