ಒಮಾನ್ ಜೊತೆಗಿನ ಹಾರ್ಮುಝ್ ಒಪ್ಪಂದ ಅಂತಿಮ ಹಂತದಲ್ಲಿ: ಇರಾನ್ ಘೋಷಣೆ

ಟೆಹರಾನ್, ಆ. 6: ಹಾರ್ಮುಝ್ ಜಲಸಂಧಿಯನ್ನು ಹಡಗುಗಳ ಸಂಚಾರಕ್ಕೆ ಮರುತೆರೆಯುವ ನಿಟ್ಟಿನಲ್ಲಿ ಒಮಾನ್ ಜೊತೆಗೆ ಮಾಡಿಕೊಳ್ಳಲಾಗುತ್ತಿರುವ ಒಪ್ಪಂದವು ಈಗ ಅಂತಿಮ ಹಂತದಲ್ಲಿದೆ ಎಂದು ಇರಾನ್ ಹೇಳಿದೆ. ಮಹತ್ವದ ಜಲಮಾರ್ಗದ ಮೂಲಕ ಹಡಗು ಸಂಚಾರದ ದಾರಿಯನ್ನು ಗುರುತಿಸಲು ಉಭಯ ದೇಶಗಳು ಒಪ್ಪಿಕೊಂಡ ಬಳಿಕ ಈ ಬೆಳವಣಿಗೆ ನಡೆದಿದೆ.

ಈ ಜಲಸಂಧಿಯು ಪರ್ಶಿಯನ್ ಕೊಲ್ಲಿಯನ್ನು ಒಮಾನ್ ಕೊಲ್ಲಿಗೆ ಜೋಡಿಸುತ್ತದೆ. ಇದರ ಒಂದು ಬದಿಯಲ್ಲಿ ಒಮಾನ್ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಇದ್ದರೆ, ಇನ್ನೊಂದು ಬದಿಯಲ್ಲಿ ಇರಾನ್ ಇದೆ. ಹಾರ್ಮುಝ್ ಜಲಸಂಧಿಯು ಇರಾನ್ ಮತ್ತು ಒಮಾನ್‌ನ ಪ್ರಾದೇಶಿಕ ಜಲಪ್ರದೇಶಗಳ ಮೂಲಕ ಹರಿಯುತ್ತದೆ ಹಾಗೂ ಜಲಸಂಧಿಯ ಕೆಲವು ಹೊರಗಿನ ಭಾಗಗಳು ಯುಎಇ ಜಲಪ್ರದೇಶದಲ್ಲಿವೆ.

ಶಾಂತಿ ಸಮಯದಲ್ಲಿ ವಿಶ್ವದ ಐದನೇ ಒಂದು ಭಾಗದಷ್ಟು ತೈಲ ಮತ್ತು ದ್ರವೀಕೃತ ನೈಸರ್ಗಿಕ ಅನಿಲ (ಎಲ್‌ಎನ್‌ಜಿ) ಪೂರೈಕೆಯು ಇದರ ಮೂಲಕವೇ ಸಾಗುವುದರಿಂದ, ಇದು ಇರಾನ್ ಮತ್ತು ಅಮೆರಿಕ ನಡುವಿನ ಯುದ್ಧದಲ್ಲಿ ಪ್ರಮುಖ ಸಂಘರ್ಷದ ಕೇಂದ್ರವಾಗಿದೆ. ಫೆಬ್ರವರಿ ಕೊನೆಯಲ್ಲಿ

ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ದಾಳಿ ನಡೆಸಲು ಪ್ರಾರಂಭಿಸಿದ ನಂತರ ಇರಾನ್ ಈ ಜಲಸಂಧಿಯನ್ನು ಮುಚ್ಚಿತು. ಅದರ ಪರಿಣಾಮವಾಗಿ ತೈಲ ಬೆಲೆಗಳು ಗಗನಕ್ಕೇರಿದವು ಹಾಗೂ ಜಾಗತಿಕ ಇಂಧನ ಮಾರುಕಟ್ಟೆಗಳಲ್ಲಿ ಭಾರೀ ಅಸ್ಥಿರತೆ ತಲೆದೋರಿತು.

ಇತ್ತೀಚಿನ ವಾರಗಳಲ್ಲಿ, ಕದನ ವಿರಾಮವನ್ನು ಮರುಸ್ಥಾಪಿಸುವ ಮತ್ತು ಜಲಸಂಧಿಯನ್ನು ಮರುತೆರೆಯುವ ಒಪ್ಪಂದಕ್ಕೆ ಬರಲು ಮಾತುಕತೆಗಳು ನಡೆಯುತ್ತಿವೆ.

ಒಪ್ಪಂದವನ್ನು ಯಾವಾಗ ಘೋಷಿಸಲಾಗುತ್ತದೆ?

ಒಪ್ಪಂದವನ್ನು ಯಾವಾಗ ಘೋಷಿಸಲಾಗುವುದು ಎನ್ನುವುದು ಸ್ಪಷ್ಟವಾಗಿಲ್ಲ. ಆದರೆ, ಜಲಸಂಧಿಯ ಮೂಲಕ ಹೊಸ ವಾಣಿಜ್ಯ ಹಡಗು ಸಾರಿಗೆ ಕಾರಿಡಾರ್ ನಿರ್ಮಿಸುವ ಬಗ್ಗೆ ಟೆಹರಾನ್ ಮತ್ತು ಮಸ್ಕತ್ ನಡುವಿನ ಒಪ್ಪಂದವು ಅಂತಿಮ ಹಂತದಲ್ಲಿದೆ ಎಂಬ ಸುಳಿವನ್ನು ಇರಾನ್ ವಿದೇಶಾಂಗ ಸಚಿವಾಲಯದ

ವಕ್ತಾರ ಇಸ್ಮಾಯೀಲ್ ಬಘೈ ಬುಧವಾರ ನೀಡಿದ್ದಾರೆ.

ಇರಾನ್ ಮತ್ತು ಒಮಾನ್ ನಡುವಿನ ಮಾತುಕತೆಗಳು ಮುಂದಕ್ಕೆ ಸಾಗುತ್ತಿವೆ ಎಂದು ಬಘೈ ಸುದ್ದಿಗಾರರಿಗೆ ತಿಳಿಸಿದರು. ಇತ್ತೀಚಿನ ಅಮೆರಿಕ ದಾಳಿಗಳನ್ನು ಉಲ್ಲೇಖಿಸಿದ ಅವರು, ಕೆಲವು ಮೂರನೇ ವ್ಯಕ್ತಿಗಳು ಪ್ರಕ್ರಿಯೆಗೆ ಅಡ್ಡಿಪಡಿಸದಿದ್ದರೆ, ಉಭಯ ದೇಶಗಳು ಒಪ್ಪಂದದ ಮುಖ್ಯ ಅಂಶಗಳನ್ನು ಒಳಗೊಂಡ ಜಂಟಿ ಹೇಳಿಕೆಯನ್ನು ಸಿದ್ಧಪಡಿಸುವ ಅಂತಿಮ ಹಂತದಲ್ಲಿವೆ ಎಂದರು.