ಗಾಝಾದಲ್ಲಿ ಇಸ್ರೇಲ್ ನಿಂದ ಮುಂದುವರಿದ ನರಮೇಧ: ತಂದೆ–ಮಗಳು ಸೇರಿ ಮೂವರು ಮೃತ್ಯು

ಖಾನ್ ಯೂನಿಸ್ (ಗಾಝಾ) : ದಕ್ಷಿಣ ಗಾಝಾದ ಖಾನ್ ಯೂನಿಸ್ ನಗರದಲ್ಲಿ ಇಸ್ರೇಲಿ ಡ್ರೋನ್ ದಾಳಿಯಲ್ಲಿ ತಂದೆ ಮತ್ತು ಅವರ ಮಗಳು ಸಾವನ್ನಪ್ಪಿದ್ದಾರೆ. ಇರಾನ್ ವಿರುದ್ಧ ಅಮೆರಿಕ–ಇಸ್ರೇಲ್ ಯುದ್ಧದತ್ತ ಜಗತ್ತಿನ ಗಮನ ಕೇಂದ್ರೀಕೃತವಾಗಿರುವ ಸಂದರ್ಭದಲ್ಲಿಯೂ ಗಾಝಾದಲ್ಲಿ ಫೆಲೆಸ್ತೀನ್ ಜನರ ಮೇಲೆ ದಾಳಿ ಮತ್ತು ಹಿಂಸಾಚಾರ ಮುಂದುವರಿದಿದೆ ಎಂದು Aljazeera ವರದಿ ಮಾಡಿದೆ.

ಶನಿವಾರ ಮುಂಜಾನೆ ನಡೆದ ಡ್ರೋನ್ ದಾಳಿಯಲ್ಲಿ ಇಬ್ಬರು ಸಾವನ್ನಪ್ಪಿದ್ದಾರೆ. ಬಳಿಕ ಖಾನ್ ಯೂನಿಸ್‌ನಲ್ಲಿ ನಡೆದ ಮತ್ತೊಂದು ಪ್ರತ್ಯೇಕ ದಾಳಿಯಲ್ಲಿ ಇನ್ನೊಬ್ಬ ವ್ಯಕ್ತಿ ಸಾವನ್ನಪ್ಪಿದ್ದು, ಒಂದು ಚಿಕ್ಕ ಹುಡುಗಿ ಗಾಯಗೊಂಡಿದ್ದಾಳೆ ಎಂದು ಅಲ್ ಜಝೀರಾ ವರದಿಗಾರರು ತಿಳಿಸಿದ್ದಾರೆ.

ಅಕ್ಟೋಬರ್ 11ರಿಂದ ಇಸ್ರೇಲ್ ತನ್ನ ದಾಳಿಗಳನ್ನು ಮುಂದುವರಿಸುತ್ತಿದ್ದು, ‘ಕದನ ವಿರಾಮ’ದ ಹೊರತಾಗಿಯೂ ಗಾಝಾ ಪ್ರದೇಶದ ಮೇಲೆ ಪ್ರತಿದಿನ ವಾಯುದಾಳಿ, ಫಿರಂಗಿ ಶೆಲ್ ದಾಳಿ ಮತ್ತು ನೌಕಾಪಡೆಯಿಂದ ಬಾಂಬ್ ದಾಳಿಗಳು ನಡೆಯುತ್ತಿವೆ.

ಇರಾನ್ ಮೇಲಿನ ಅಮೆರಿಕ–ಇಸ್ರೇಲ್ ಬಾಂಬ್ ದಾಳಿಯತ್ತ ಜಗತ್ತಿನ ಗಮನ ಹರಿದಿರುವಾಗಲೂ ಗಾಝಾ ಮತ್ತು ಆಕ್ರಮಿತ ಪಶ್ಚಿಮ ದಂಡೆಯಲ್ಲಿ ಫೆಲೆಸ್ತೀನ್ ಜನರ ಸಂಕಷ್ಟ ತೀವ್ರವಾಗಿಯೇ ಉಳಿದಿದೆ. ಕಳೆದ 48 ಗಂಟೆಗಳಲ್ಲಿ ಇಬ್ಬರು ಗಾಯಗೊಂಡಿದ್ದಾರೆ ಎಂದು ಫೆಲೆಸ್ತೀನ್ ಆರೋಗ್ಯ ಸಚಿವಾಲಯ ತಿಳಿಸಿದೆ.

ಈ ನಡುವೆ ಇಸ್ರೇಲಿ ಪಡೆಗಳು ಗಾಝಾ ನಗರದ ಪೂರ್ವ ಭಾಗದತ್ತ ಮುಂದುವರಿದಿದ್ದು, ಆ ಪ್ರದೇಶದಲ್ಲಿ ಭಾರೀ ಗುಂಡಿನ ದಾಳಿ ನಡೆದಿರುವುದಾಗಿ ವರದಿಯಾಗಿದೆ. ಆರಂಭಿಕ ಮಾಹಿತಿಯ ಪ್ರಕಾರ ಫೆಲೆಸ್ತೀನ್ ಪೊಲೀಸ್ ಸಿಬ್ಬಂದಿಯೊಬ್ಬರನ್ನು ಅಪಹರಿಸಲಾಗಿದೆ ಎಂದು ತಿಳಿದುಬಂದಿದೆ.

ಇಸ್ರೇಲಿ ಯುದ್ಧ ವಿಮಾನಗಳು ಗಾಝಾ ನಗರದ ಸಮೀಪದ ತುಫಾ ಪ್ರದೇಶದ ಪೂರ್ವ ಭಾಗದ ಹಲವು ಸ್ಥಳಗಳ ಮೇಲೆ ದಾಳಿ ನಡೆಸಿವೆ. ಅಲ್ಲದೆ ಇಸ್ರೇಲಿ ನೌಕಾಪಡೆಯು ಗಾಝಾ ನಗರದ ಕರಾವಳಿಯತ್ತ ಭಾರೀ ಮೆಷಿನ್ ಗನ್ ಮತ್ತು ಶೆಲ್ ದಾಳಿ ನಡೆಸಿದೆ ಎಂದು ಫೆಲೆಸ್ತೀನ್ ಸುದ್ದಿ ಸಂಸ್ಥೆ ‘ವಾಫಾ’ ವರದಿ ಮಾಡಿದೆ.

ಈ ಮಧ್ಯೆ ಗಾಝಾದ ದಕ್ಷಿಣ ಗಡಿಯಲ್ಲಿರುವ ರಫಾ ದಾಟುವಿಕೆಯನ್ನು ಇನ್ನೂ ಮುಚ್ಚಲಾಗಿದೆ. ಇರಾನ್ ಮೇಲಿನ ದಾಳಿಯ ಬಳಿಕ ಇಸ್ರೇಲ್ ಅದನ್ನು ಮುಚ್ಚಿದೆ.

ಗಾಝಾದ ದಕ್ಷಿಣ ಗಡಿಯಲ್ಲಿರುವ ಈ ದಾಟುವಿಕೆಯನ್ನು ಕಳೆದ ತಿಂಗಳು ಮಾತ್ರ ಪುನಃ ತೆರೆಯಲಾಗಿತ್ತು. ತಿಂಗಳುಗಳ ಬಳಿಕ ಮೊದಲ ಬಾರಿಗೆ ಸೀಮಿತ ಸಂಖ್ಯೆಯ ಫೆಲೆಸ್ತೀನ್ ಜನರಿಗೆ ಹೊರಹೋಗಲು ಅವಕಾಶ ನೀಡಲಾಗಿತ್ತು. ತುರ್ತು ವೈದ್ಯಕೀಯ ಚಿಕಿತ್ಸೆ ಅಗತ್ಯವಿರುವ ರೋಗಿಗಳು ಸಹ ಇದರಲ್ಲಿ ಸೇರಿದ್ದರು. ಆದರೆ ಚಿಕಿತ್ಸೆಗಾಗಿ ಪ್ರಯಾಣಿಸಲು ಸಾವಿರಾರು ಜನರು ಇನ್ನೂ ನಿರ್ಬಂಧಿತರಾಗಿದ್ದಾರೆ.

ಇಸ್ರೇಲಿನಲ್ಲಿ ‘ಕೆರೆಮ್ ಶಾಲೋಮ್’ ಎಂದು ಕರೆಯಲಾಗುವ ಕರೇಮ್ ಅಬು ಸಲೇಮ್ ಗಡಿ ದಾಟುವಿಕೆಯನ್ನು ಕಟ್ಟುನಿಟ್ಟಾದ ನಿಯಂತ್ರಣಗಳೊಂದಿಗೆ ಮಾನವೀಯ ನೆರವು ಸಾಗಿಸಲು ಭಾಗಶಃ ತೆರೆಯಲಾಗಿದೆ.

ಇಸ್ರೇಲ್‌ ನ ಭೂದಾಳಿಗಳ ಸಮಯದಲ್ಲಿ ಎರಡು ಮಿಲಿಯನ್‌ ಗಿಂತ ಹೆಚ್ಚು ಜನಸಂಖ್ಯೆಯಿರುವ ಗಾಝಾದ ಬಹುತೇಕ ಜನರು ಸ್ಥಳಾಂತರಗೊಂಡಿದ್ದರು. ಈಗ ಈ ಪ್ರದೇಶವು ಬಹುತೇಕ ಸಂಪೂರ್ಣವಾಗಿ ಮಾನವೀಯ ನೆರವಿನ ಮೇಲೆ ಅವಲಂಬಿತವಾಗಿದೆ.

ಫೆಬ್ರವರಿಯಲ್ಲಿ ಪ್ರಕಟವಾದ ವರದಿಯಲ್ಲಿ ಹ್ಯೂಮನ್ ರೈಟ್ಸ್ ವಾಚ್, ಇಸ್ರೇಲಿ ನಿರ್ಬಂಧಗಳ ಪರಿಣಾಮವಾಗಿ ಗಾಝಾ ಪಟ್ಟಿಯಲ್ಲಿ ಔಷಧಿ, ಪುನರ್ ನಿರ್ಮಾಣ ಸಾಮಗ್ರಿಗಳು, ಆಹಾರ ಮತ್ತು ನೀರಿನ ಕೊರತೆ ಉಂಟಾಗಿದೆ ಎಂದು ಹೇಳಿದೆ.

ಗಾಝಾದಲ್ಲಿ ಕದನ ವಿರಾಮ ಘೋಷಣೆಯಾದ ನಂತರ ಆರೋಗ್ಯ ಸಚಿವಾಲಯದ ಮಾಹಿತಿಯ ಪ್ರಕಾರ 640 ಫೆಲೆಸ್ತೀನ್ ಜನರು ಸಾವನ್ನಪ್ಪಿದ್ದು, ಕನಿಷ್ಠ 1,700 ಜನರು ಗಾಯಗೊಂಡಿದ್ದಾರೆ. 2023ರ ಅಕ್ಟೋಬರ್‌ ನಿಂದ ಆರಂಭವಾದ ಯುದ್ಧದ ಬಳಿಕ ಗಾಝಾದಲ್ಲಿ ಕನಿಷ್ಠ 72,123 ಫೆಲೆಸ್ತೀನ್ ಜನರು ಸಾವನ್ನಪ್ಪಿದ್ದು, 171,805 ಜನರು ಗಾಯಗೊಂಡಿದ್ದಾರೆ.

ಇನ್ನೊಂದೆಡೆ ಆಕ್ರಮಿತ ಪಶ್ಚಿಮ ದಂಡೆಯಲ್ಲಿ ಹೆಬ್ರಾನ್ ನಗರದ ಉತ್ತರ ಭಾಗದಲ್ಲಿರುವ ವಸಾಹತು ಸಮೀಪ ಗುಂಡಿನ ದಾಳಿ ನಡೆದಿದೆ. ಈ ದಾಳಿಯಲ್ಲಿ ಗಾಯಗೊಂಡ ಫೆಲೆಸ್ತೀನ್ ಜನರಿಗೆ ಫೆಲೆಸ್ತೀನ್ ರೆಡ್ ಕ್ರೆಸೆಂಟ್ ಸೊಸೈಟಿಯ ತಂಡಗಳು ಚಿಕಿತ್ಸೆ ನೀಡುತ್ತಿವೆ ಎಂದು ತಿಳಿಸಿದೆ.

ಟುಬಾಸ್‌ ನ ದಕ್ಷಿಣದಲ್ಲಿರುವ ರಾಸ್ ಅಲ್-ಅಹ್ಮರ್ ಪ್ರದೇಶದಲ್ಲಿ ಇಸ್ರೇಲಿ ವಸಾಹತುಗಾರರು ದೈಹಿಕವಾಗಿ ಹಲ್ಲೆ ನಡೆಸಿದ ಪರಿಣಾಮ ಶನಿವಾರ ಮೂವರು ಫೆಲೆಸ್ತೀನ್ ಜನರು ಗಾಯಗೊಂಡಿದ್ದಾರೆ ಎಂದು ‘ವಾಫಾ’ ವರದಿ ಮಾಡಿದೆ. ಫೆಲೆಸ್ತೀನ್ ರೆಡ್ ಕ್ರೆಸೆಂಟ್ ಸೊಸೈಟಿಯ ವೈದ್ಯಕೀಯ ಮೂಲಗಳು ಗಾಯಗೊಂಡ ಮೂವರಿಗೆ ಚಿಕಿತ್ಸೆ ನೀಡಿರುವುದಾಗಿ ತಿಳಿಸಿವೆ.

ಇಸ್ರೇಲಿ ಪಡೆಗಳು ಶನಿವಾರ ಮುಂಜಾನೆ ತುಲ್ಕರೆಮ್‌ ನ ಉತ್ತರದಲ್ಲಿರುವ ಖಾಫಿನ್ ಮತ್ತು ಕಾಫ್ರ್ ಅಲ್-ಲಬಾದ್ ಪಟ್ಟಣಗಳಲ್ಲಿಯೂ ದಾಳಿ ನಡೆಸಿವೆ ಎಂದು ವರದಿಯಾಗಿದೆ.

ಆಕ್ರಮಿತ ಪಶ್ಚಿಮ ದಂಡೆಯ ನಬ್ಲಸ್ ನಗರದ ಪೂರ್ವದಲ್ಲಿರುವ ಅಜ್ಮುತ್ ಗ್ರಾಮದ ಸಮೀಪ ಇಸ್ರೇಲಿ ಸೈನಿಕರು ನಡೆಸಿದ ದಾಳಿಯಲ್ಲಿ ಮತ್ತೊಬ್ಬ ಫೆಲೆಸ್ತೀನ್ ವ್ಯಕ್ತಿ ಗಾಯಗೊಂಡಿದ್ದಾನೆ.

2023ರ ಅಕ್ಟೋಬರ್‌ ನಲ್ಲಿ ಗಾಝಾ ಮೇಲಿನ ಯುದ್ಧ ಆರಂಭವಾದ ಬಳಿಕ ಪಶ್ಚಿಮ ದಂಡೆಯಾದ್ಯಂತ ಫೆಲೆಸ್ತೀನ್ ಜನರು ಇಸ್ರೇಲಿ ಸೈನ್ಯ ಮತ್ತು ವಸಾಹತುಗಾರರಿಂದ ಹೆಚ್ಚುತ್ತಿರುವ ಹಿಂಸಾಚಾರವನ್ನು ಎದುರಿಸುತ್ತಿದ್ದಾರೆ.

ವಿಶ್ವಸಂಸ್ಥೆಯ ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, 2023ರ ಅಕ್ಟೋಬರ್‌ ನಿಂದ ಪಶ್ಚಿಮ ದಂಡೆಯಲ್ಲಿ ಇಸ್ರೇಲಿ ಪಡೆಗಳು ಮತ್ತು ವಸಾಹತುಗಾರರ ದಾಳಿಗಳಿಂದ ಕನಿಷ್ಠ 1,094 ಫೆಲೆಸ್ತೀನ್ ಜನರು ಸಾವನ್ನಪ್ಪಿದ್ದಾರೆ.