ಡೊನಾಲ್ಡ್ ಟ್ರಂಪ್ (Photo: PTI)

ವಾಷಿಂಗ್ಟನ್: ಅಮೆರಿಕದ ಆರ್ಥಿಕತೆ ಉತ್ತಮ ಸಾಧನೆ ಮಾಡುತ್ತಿದ್ದರೂ, ಬಡ್ಡಿದರಗಳನ್ನು ಹೆಚ್ಚಿಸುವ ಮೂಲಕ ಬೆಳವಣಿಗೆಗೆ ಅಡ್ಡಿಪಡಿಸಲಾಗುತ್ತಿದೆ ಎಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅಮೆರಿಕದ ಕೇಂದ್ರೀಯ ಬ್ಯಾಂಕ್ ಫೆಡರಲ್ ರಿಸರ್ವ್ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ಭಾರತದ ಆರ್ಥಿಕ ಬೆಳವಣಿಗೆಯನ್ನು ಉಲ್ಲೇಖಿಸಿದ ಅವರು, ಅಲ್ಲಿ ಕಡಿಮೆ ಬಡ್ಡಿದರಗಳ ನಡುವೆಯೂ ಶೇ. 7ರಷ್ಟು GDP ಬೆಳವಣಿಗೆ ದಾಖಲಾಗುತ್ತಿದೆ. ಅಮೆರಿಕದಲ್ಲೂ ಬಡ್ಡಿದರಗಳನ್ನು ಕಡಿಮೆ ಮಾಡಿದ್ದರೆ ಬೆಳವಣಿಗೆ ಶೇ. 15ರಿಂದ 20ರಷ್ಟಿರಬಹುದಿತ್ತು ಎಂದು ಪ್ರತಿಪಾದಿಸಿದರು.

ಫೆಡರಲ್ ರಿಸರ್ವ್ ರಾಜಕೀಯ ಪ್ರೇರಿತವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಆರೋಪಿಸಿದ ಟ್ರಂಪ್, ಉತ್ತಮ ಆರ್ಥಿಕ ಅಂಕಿಅಂಶಗಳು ದಾಖಲಾಗುವ ಸಂದರ್ಭದಲ್ಲೂ ಬಡ್ಡಿದರಗಳನ್ನು ಹೆಚ್ಚಿಸಲಾಗುತ್ತಿದೆ. ಆರ್ಥಿಕತೆ ಉತ್ತಮವಾಗಿರುವಾಗ ಬಡ್ಡಿದರಗಳನ್ನು ಕಡಿಮೆ ಮಾಡಬೇಕು ಎಂದು ಹೇಳಿದರು.

ಶುಕ್ರವಾರ ಶ್ವೇತಭವನದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘‘ನಮ್ಮ ಫೆಡರಲ್ ರಿಸರ್ವ್ ಅತ್ಯಂತ ರಾಜಕೀಯ ಪ್ರೇರಿತವಾಗಿದೆ. ಹೀಗಾಗಿ ಬಡ್ಡಿದರಗಳು ತುಂಬಾ ಹೆಚ್ಚಿವೆ. ನಾನು ಅದರ ಅಧ್ಯಕ್ಷರನ್ನು ದೂಷಿಸುತ್ತಿಲ್ಲ. ಆದರೆ ಫೆಡರಲ್ ರಿಸರ್ವ್ ವ್ಯವಸ್ಥೆಯೇ ರಾಜಕೀಯ ಪ್ರೇರಿತವಾಗಿದೆ ಎಂಬುದು ವಾಸ್ತವ. ನಾವು ಉತ್ತಮ ಆರ್ಥಿಕ ಅಂಕಿಅಂಶಗಳನ್ನು ಪ್ರಕಟಿಸಿದಾಗಲೆಲ್ಲ ಅವರು ಬಡ್ಡಿದರಗಳನ್ನು ಹೆಚ್ಚಿಸುತ್ತಾರೆ. ಉದ್ದೇಶಪೂರ್ವಕವಾಗಿಯೇ ಹೀಗೆ ಮಾಡುತ್ತಿದ್ದಾರೆ. ವಾಸ್ತವವಾಗಿ, ಆರ್ಥಿಕತೆ ಉತ್ತಮವಾಗಿರುವಾಗ ಬಡ್ಡಿದರಗಳನ್ನು ಕಡಿಮೆ ಮಾಡಬೇಕು’’ ಎಂದು ಹೇಳಿದರು.

ಉತ್ತಮ ಆರ್ಥಿಕ ಅಂಕಿಅಂಶಗಳು ದಾಖಲಾಗಿರುವ ಸಂದರ್ಭದಲ್ಲಿ ಬಡ್ಡಿದರಗಳನ್ನು ಕಡಿಮೆ ಮಾಡಲು ಅಮೆರಿಕಕ್ಕೆ ಅವಕಾಶವಿದೆ. ಆದರೆ, ಇದಕ್ಕೆ ವಿರುದ್ಧವಾಗಿ ನಡೆದುಕೊಳ್ಳಲಾಗುತ್ತಿದೆ ಎಂದು ಟ್ರಂಪ್ ಟೀಕಿಸಿದರು.

‘‘ನಾವು ಇದಕ್ಕೆ ತದ್ವಿರುದ್ಧವಾಗಿ ಮಾಡುತ್ತಿದ್ದೇವೆ. ದೇಶವನ್ನು ನಾಶಪಡಿಸುವ ಕೆಲಸ ಮಾಡುತ್ತಿದ್ದೇವೆ. ಇಂತಹ ಉತ್ತಮ ಅಂಕಿಅಂಶಗಳು ಇರುವಾಗ ಬಡ್ಡಿದರಗಳನ್ನು ಹೆಚ್ಚಿಸುತ್ತಲೇ ಹೋಗಬಾರದು. ನಮ್ಮ ಸಾಲ ತೀರಿಸುವ ಸಾಮರ್ಥ್ಯ ಉತ್ತಮವಾಗಿರುವುದರಿಂದ ಬಡ್ಡಿದರಗಳನ್ನು ಕಡಿಮೆ ಮಾಡಬೇಕು. ಆಗ ನಮ್ಮ GDP ಬೆಳವಣಿಗೆ ಶೇ. 4ರ ಬದಲಿಗೆ ಶೇ. 15 ಅಥವಾ 20ರಷ್ಟಿರುತ್ತಿತ್ತು. ನಾವು ಸಾಲವನ್ನು ಬಹಳ ವೇಗವಾಗಿ ತೀರಿಸಬಹುದಿತ್ತು. ವ್ಯವಸ್ಥೆ ಹೀಗೆಯೇ ಕೆಲಸ ಮಾಡಬೇಕು. ಆದರೆ, ನಾವು ಇದನ್ನು ತಲೆಕೆಳಗಾಗಿ ಮಾಡುತ್ತಿದ್ದೇವೆ’’ ಎಂದು ಹೇಳಿದರು.

ಭಾರತವನ್ನು ಉಲ್ಲೇಖಿಸಿದ ಟ್ರಂಪ್, ಇಲ್ಲಿ ಬಡ್ಡಿದರಗಳು ಕಡಿಮೆ ಇದ್ದು, GDP ಬೆಳವಣಿಗೆ ಶೇ. 7ರಷ್ಟಿದೆ ಎಂದರು. ಅಮೆರಿಕದಲ್ಲೂ ಬಡ್ಡಿದರಗಳನ್ನು ಇನ್ನಷ್ಟು ಕಡಿಮೆ ಮಾಡಬೇಕು ಎಂದು ಪ್ರತಿಪಾದಿಸಿದರು.

‘‘ಭಾರತವನ್ನು ನೋಡಿ. ಅಲ್ಲಿ ಬಡ್ಡಿದರಗಳು ಕಡಿಮೆ ಇವೆ ಮತ್ತು ಶೇ. 7ರಷ್ಟು GDP ಬೆಳವಣಿಗೆ ಇದೆ. ನಮ್ಮ GDP ಬೆಳವಣಿಗೆ ಶೇ. 14, 15 ಅಥವಾ ಬಹುಶಃ ಶೇ. 20ರಷ್ಟೂ ಇರಬಹುದಿತ್ತು. ನಾವು ಇಷ್ಟು ಉತ್ತಮ ಸಾಧನೆ ಮಾಡುತ್ತಿರುವಾಗ ಫೆಡರಲ್ ರಿಸರ್ವ್ ಬಡ್ಡಿದರಗಳನ್ನು ಹೆಚ್ಚಿಸುವುದು ನಿಜಕ್ಕೂ ವಿಷಾದನೀಯ. ವಾಸ್ತವವಾಗಿ, ನಾವು ಎಲ್ಲ ಮಿತಿಗಳನ್ನು ಮೀರಿ ಉತ್ತಮ ಸಾಧನೆ ಮಾಡಿದ್ದೇವೆ’’ ಎಂದು ಟ್ರಂಪ್ ಹೇಳಿದರು.

ತಮ್ಮ ದೇಶದಲ್ಲಿಯೇ ಅತ್ಯಂತ ಕಡಿಮೆ ಬಡ್ಡಿದರ ಇರಬೇಕು ಎಂಬುದಕ್ಕೆ ಕಾರಣವನ್ನೂ ನೀಡಿದ ಟ್ರಂಪ್, ಅಮೆರಿಕ ಇತರ ದೇಶಗಳ ಆರ್ಥಿಕ ಯಶಸ್ಸಿಗೆ ಕಾರಣವಾಗಿರುವ ರಾಷ್ಟ್ರವಾಗಿದೆ ಎಂದು ಹೇಳಿದರು.

‘‘ನಾವು ಇತರ ದೇಶಗಳನ್ನು ಯಶಸ್ವಿಗೊಳಿಸುವ ದೇಶವಾಗಿದ್ದೇವೆ. ಕೆಲವು ದೇಶಗಳನ್ನು ಆರ್ಥಿಕವಾಗಿ ಗಣ್ಯ ರಾಷ್ಟ್ರಗಳೆಂದು ಪರಿಗಣಿಸಲಾಗುತ್ತದೆ. ಆದರೆ, ವಾಸ್ತವವಾಗಿ ಅವು ಹಾಗಲ್ಲ. ನಮ್ಮ ಕಾರಣದಿಂದಲೇ ಅವು ಗಣ್ಯ ಸ್ಥಾನದಲ್ಲಿವೆ. ಆದ್ದರಿಂದ ನಮ್ಮಲ್ಲಿಯೇ ಅತ್ಯಂತ ಕಡಿಮೆ ಬಡ್ಡಿದರ ಇರಬೇಕು’’ ಎಂದು ಅಭಿಪ್ರಾಯಪಟ್ಟರು.

ಫೆಡರಲ್ ರಿಸರ್ವ್ ಸೆಪ್ಟೆಂಬರ್‌ ನಲ್ಲಿ ಬಡ್ಡಿದರಗಳನ್ನು ಹೆಚ್ಚಿಸಿತ್ತು. ಬಡ್ಡಿದರಗಳನ್ನು ಕಡಿಮೆ ಮಾಡಬೇಕೆಂಬ ಟ್ರಂಪ್ ಅವರ ಬೇಡಿಕೆಯನ್ನು ಕಡೆಗಣಿಸಿದ್ದ ಫೆಡ್ ಅಧ್ಯಕ್ಷ ಕೆವಿನ್ ವಾರ್ಶ್, ಹಣದುಬ್ಬರವನ್ನು ನಿಯಂತ್ರಿಸುವ ಅಗತ್ಯವನ್ನು ಒತ್ತಿಹೇಳಿದ್ದರು. ಜುಲೈ–ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಅಮೆರಿಕ ಶೇ. 3.4ರಷ್ಟು GDP ಬೆಳವಣಿಗೆ ದಾಖಲಿಸಿದೆ ಎಂದು ಅಂದಾಜಿಸಲಾಗಿದೆ.

ಭಾರತೀಯ ರಿಸರ್ವ್ ಬ್ಯಾಂಕ್ (RBI) ದ್ವಿಮಾಸಿಕ ಪರಿಶೀಲನೆಯ ಬಳಿಕ ಸೆಪ್ಟೆಂಬರ್‌ ನಲ್ಲಿ ರೆಪೊ ದರವನ್ನು 25 ಬೇಸಿಸ್ ಪಾಯಿಂಟ್‌ಗಳಷ್ಟು ಹೆಚ್ಚಿಸಿ ಶೇ. 5.5ಕ್ಕೆ ನಿಗದಿಪಡಿಸಿತ್ತು. ಇದು ಜಾಗತಿಕವಾಗಿ ಅತ್ಯಂತ ಕಡಿಮೆ ಸಾಲ ನೀಡುವ ದರಗಳಲ್ಲಿ ಒಂದಾಗಿದ್ದರೂ, ಎಲ್ಲ ದೇಶಗಳ ಪೈಕಿ ಅತ್ಯಂತ ಕಡಿಮೆ ದರವಲ್ಲ.

Tags:    

Writer - ವಾರ್ತಾಭಾರತಿ

contributor

Editor - ವಾರ್ತಾಭಾರತಿ

contributor

Byline - ವಾರ್ತಾಭಾರತಿ

contributor