ಇರಾನ್ ಯುದ್ಧ | ರಕ್ಷಣಾ ಕಾರ್ಯದರ್ಶಿ ಹೆಗ್ಸೆತ್ ವಿರುದ್ಧ ದೋಷಾರೋಪಣೆ ನಿರ್ಣಯ ಮಂಡಿಸಿದ ರಿಪಬ್ಲಿಕನ್ ಸಂಸದ

ವಾಷಿಂಗ್ಟನ್: ಇರಾನ್ ವಿರುದ್ಧದ ಯುದ್ಧವನ್ನು ಸಮರ್ಥಿಸಿಕೊಳ್ಳುತ್ತಿರುವ ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ವಿರುದ್ಧ ಅವರದೇ ರಿಪಬ್ಲಿಕನ್ ಪಕ್ಷದ ಕೆಲವು ಸಂಸದರು ದೋಷಾರೋಪಣೆ ಪ್ರಕ್ರಿಯೆ ಆರಂಭಿಸಲು ಮುಂದಾಗಿದ್ದಾರೆ. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ರಿಪಬ್ಲಿಕನ್ ಪಕ್ಷ ಮಧ್ಯಂತರ ಚುನಾವಣೆಯಲ್ಲಿ ಭಾರಿ ಸೋಲು ಅನುಭವಿಸಿದ ಕೆಲವೇ ದಿನಗಳಲ್ಲಿ ಈ ಬೆಳವಣಿಗೆ ನಡೆದಿದ್ದು, ಟ್ರಂಪ್ ಆಡಳಿತಕ್ಕೆ ರಾಜಕೀಯ ಒತ್ತಡ ಹೆಚ್ಚಿಸಿದೆ.

ಕೆಂಟುಕಿಯ ಕಾಂಗ್ರೆಸ್ ಸದಸ್ಯ ಥಾಮಸ್ ಮಾಸ್ಸಿ ಅವರು ಹೆಗ್ಸೆತ್ ವಿರುದ್ಧ ಎಂಟು ದೋಷಾರೋಪಣೆ ನಿರ್ಣಯಗಳನ್ನು ಮಂಡಿಸಿದ್ದಾರೆ. ಕಾಂಗ್ರೆಸ್‌ ನ ಅನುಮತಿ ಪಡೆಯದೆ ಕಾನೂನುಬಾಹಿರವಾಗಿ ಯುದ್ಧ ನಡೆಸಿರುವುದು ಮತ್ತು ಪೆಂಟಗನ್ ಮುಖ್ಯಸ್ಥರಾಗಿ ಅಧಿಕಾರ ದುರುಪಯೋಗಪಡಿಸಿಕೊಂಡಿರುವ ಆರೋಪವನ್ನು ಅವರ ಮೇಲೆ ಹೊರಿಸಲಾಗಿದೆ.

ರಿಪಬ್ಲಿಕನ್ ಪಕ್ಷದ ನಿಯಂತ್ರಣದಲ್ಲಿರುವ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ ನಲ್ಲಿ ಬುಧವಾರ ಈ ಬಗ್ಗೆ ಮತದಾನ ನಡೆಯುವ ಸಾಧ್ಯತೆಯಿದೆ. ರಿಪಬ್ಲಿಕನ್ ಪಕ್ಷದ ಕೆಲವು ಸಂಸದರು ನಿರ್ಣಯವನ್ನು ಬೆಂಬಲಿಸಿ ಡೆಮಾಕ್ರಟಿಕ್ ಪಕ್ಷದ ಸದಸ್ಯರೊಂದಿಗೆ ಕೈಜೋಡಿಸುವ ಸೂಚನೆ ನೀಡಿದ್ದಾರೆ ಎಂದು ತಿಳಿದು ಬಂದಿದೆ.

ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ ನಲ್ಲಿ ದೋಷಾರೋಪಣೆ ನಿರ್ಣಯ ಅಂಗೀಕಾರವಾದರೂ ಹೆಗ್ಸೆತ್ ತಕ್ಷಣವೇ ಹುದ್ದೆ ಕಳೆದುಕೊಳ್ಳುವುದಿಲ್ಲ. ಅವರನ್ನು ಹುದ್ದೆಯಿಂದ ವಜಾಗೊಳಿಸಬೇಕೇ ಎಂಬುದನ್ನು ಸೆನೆಟ್ ನಿರ್ಧರಿಸಲಿದೆ. ಇದಕ್ಕಾಗಿ ಸೆನೆಟ್‌ ನಲ್ಲಿ ವಿಚಾರಣೆ ನಡೆಯಬೇಕು. ಒಟ್ಟು ಸದಸ್ಯರ ಪೈಕಿ ಮೂರನೇ ಎರಡರಷ್ಟು ಸದಸ್ಯರು ಅವರನ್ನು ತಪ್ಪಿತಸ್ಥರೆಂದು ಪರಿಗಣಿಸಿ ಶಿಕ್ಷೆಗೆ ಒಪ್ಪಿಗೆ ನೀಡಿದರೆ ಮಾತ್ರ ಹೆಗ್ಸೆತ್ ಅವರನ್ನು ಹುದ್ದೆಯಿಂದ ವಜಾಗೊಳಿಸಲು ಸಾಧ್ಯ. ಹೀಗಾಗಿ, ದೋಷಾರೋಪಣೆ ನಿರ್ಣಯ ಅಂಗೀಕಾರವಾದರೂ ಹೆಗ್ಸೆತ್ ಅವರನ್ನು ವಜಾಗೊಳಿಸುವುದು ಸುಲಭವಲ್ಲ ಎಂದು ಹೇಳಿದ್ದಾರೆ.

ಮಿಲಿಟರಿ ಕಾರ್ಯಾಚರಣೆಗಳೇ ತಮ್ಮ ಸಾಧನೆ: ಹೆಗ್ಸೆತ್

ತಮ್ಮ ವಿರುದ್ಧ ದೋಷಾರೋಪಣೆ ಪ್ರಕ್ರಿಯೆ ಆರಂಭಿಸುವ ಬೆದರಿಕೆ ಎದುರಾಗಿರುವ ನಡುವೆಯೇ ಹೆಗ್ಸೆತ್, ಇರಾನ್, ಯೆಮನ್‌ ನ ಇರಾನ್ ಬೆಂಬಲಿತ ಹೂತಿ ಬಂಡುಕೋರರು ಹಾಗೂ ವೆನೆಝುವೆಲಾದ ಮಾಜಿ ನಾಯಕ ನಿಕೊಲಸ್ ಮಡುರೊ ವಿರುದ್ಧ ಅಮೆರಿಕ ಕೈಗೊಂಡ ಮಿಲಿಟರಿ ಕಾರ್ಯಾಚರಣೆಗಳನ್ನು ಸಮರ್ಥಿಸಿಕೊಂಡಿದ್ದಾರೆ.

'ಎಪಿಕ್ ಫ್ಯೂರಿ', 'ರಫ್ ರೈಡರ್' ಕಾರ್ಯಾಚರಣೆಗಳು ಹಾಗೂ ಮಡುರೊ ಅವರನ್ನು ಬಂಧಿಸಿದ ಕ್ರಮಗಳನ್ನು ಪ್ರಶ್ನಿಸುವುದೆಂದರೆ, ಅಮೆರಿಕದ ಸೈನಿಕರು ಮತ್ತು ಅವರು ಸಾಧಿಸಿರುವ ಐತಿಹಾಸಿಕ ಯಶಸ್ಸನ್ನೇ ಪ್ರಶ್ನಿಸಿದಂತೆ ಎಂದು ಸೋಮವಾರ ಸುದ್ದಿಗಾರರಿಗೆ ತಿಳಿಸಿದ್ದರು.

ಇರಾನ್ ವಿರುದ್ಧದ ಯುದ್ಧಕ್ಕೆ 'ಎಪಿಕ್ ಫ್ಯೂರಿ' ಎಂಬ ಹೆಸರು ಬಳಸಲಾಗಿತ್ತು. ಮಧ್ಯಪ್ರಾಚ್ಯದಲ್ಲಿ ವಾಣಿಜ್ಯ ಹಡಗುಗಳ ಮೇಲೆ ಹೂತಿ ಬಂಡುಕೋರರು ನಡೆಸುತ್ತಿದ್ದ ದಾಳಿಗಳನ್ನು ತಡೆಯಲು ಅಮೆರಿಕ ಕೈಗೊಂಡ ಕಾರ್ಯಾಚರಣೆಗೆ 'ರಫ್ ರೈಡರ್' ಎಂದು ಹೆಸರಿಡಲಾಗಿತ್ತು.

ತಮ್ಮ ವಿರುದ್ಧದ ದೋಷಾರೋಪಣೆ ಬೆದರಿಕೆಯ ಕುರಿತು 180 ದಿನಗಳ ಬಳಿಕ ಮೊದಲ ಬಾರಿಗೆ ಮಂಗಳವಾರ ಸುದ್ದಿಗೋಷ್ಠಿ ನಡೆಸುವುದಾಗಿ ಹೆಗ್ಸೆತ್ ಘೋಷಿಸಿದ್ದಾರೆ. ಮೇ ತಿಂಗಳಲ್ಲಿ ಅವರು ಕೊನೆಯ ಸುದ್ದಿಗೋಷ್ಠಿ ನಡೆಸಿದ್ದರು. ಆ ಬಳಿಕ ಇರಾನ್ ಯುದ್ಧ, ಮಾದಕವಸ್ತು ಕಳ್ಳಸಾಗಣೆ ದೋಣಿಗಳ ಮೇಲಿನ ದಾಳಿ ಸೇರಿದಂತೆ ಅಮೆರಿಕ ಕೈಗೊಂಡ ಇತರ ಮಿಲಿಟರಿ ಕಾರ್ಯಾಚರಣೆಗಳ ಕುರಿತು ಸುದ್ದಿಗೋಷ್ಠಿ ನಡೆಸಿರಲಿಲ್ಲ.

ಇರಾನ್ ಯುದ್ಧ ಮತ್ತು ಅದರಿಂದ ಉಂಟಾದ ಆರ್ಥಿಕ ಪರಿಣಾಮಗಳು ಮಧ್ಯಂತರ ಚುನಾವಣೆಯಲ್ಲಿ ರಿಪಬ್ಲಿಕನ್ ಪಕ್ಷದ ಸೋಲಿಗೆ ಕಾರಣವಾಗಿವೆ ಎಂಬ ಆರೋಪ ಕೇಳಿಬಂದಿದೆ. ಚುನಾವಣೆಯಲ್ಲಿ ಪಕ್ಷವು ಕಾಂಗ್ರೆಸ್‌ನ ನಿಯಂತ್ರಣವನ್ನೂ ಕಳೆದುಕೊಂಡಿದೆ. ಈ ಹಿನ್ನೆಲೆಯಲ್ಲಿ ಹೆಗ್ಸೆತ್ ಅವರನ್ನು ಹುದ್ದೆಯಿಂದ ತೆಗೆದುಹಾಕಬೇಕೆಂಬ ಒತ್ತಾಯವೂ ಹೆಚ್ಚಾಗಿದೆ.

ಆದರೆ, ತಮ್ಮ ವಿರುದ್ಧದ ದೋಷಾರೋಪಣೆ ಪ್ರಯತ್ನವನ್ನು ಹೆಗ್ಸೆತ್ ಕೇವಲ 'ರಾಜಕೀಯ ಗದ್ದಲ' ಎಂದು ತಳ್ಳಿಹಾಕಿದ್ದಾರೆ.

ರೋಡ್ ಐಲ್ಯಾಂಡ್‌ ನ ನೇವಲ್ ವಾರ್ ಕಾಲೇಜಿನಲ್ಲಿ ಭಾಷಣ ಮಾಡಿದ ಬಳಿಕ ಸುದ್ದಿಗಾರರು ಈ ಕುರಿತು ಪ್ರಶ್ನಿಸಿದಾಗ, 'ರಾಜಕೀಯ ಉದ್ದೇಶ ಹೊಂದಿರುವ ಅನೇಕ ಜನರಿಗೆ ನಮ್ಮ ನೀತಿಗಳ ಬಗ್ಗೆ ಭಿನ್ನಾಭಿಪ್ರಾಯವಿರಬಹುದು. ಆದರೆ, ವಾಸ್ತವವಾಗಿ ಅವರಿಗೆ ನಮ್ಮ ಯಶಸ್ಸಿನ ಬಗ್ಗೆಯೇ ಅಸಮಾಧಾನವಿದೆ' ಎಂದು ಹೇಳಿದರು.

ಟ್ರಂಪ್ ಆಡಳಿತ ಕೈಗೊಂಡಿರುವ ಮಿಲಿಟರಿ ಕಾರ್ಯಾಚರಣೆಗಳ ಕುರಿತು ಚರ್ಚೆ ಅಥವಾ ವಾದ ನಡೆಸಲು ತಾವು ಸದಾ ಸಿದ್ಧ ಎಂದು ತಿಳಿಸಿದ ಅವರು, 'ನನ್ನ ತಂಡಕ್ಕೆ ಈ ವಿಚಾರಗಳ ಬಗ್ಗೆ ಯಾವುದೇ ಚಿಂತೆಯಿಲ್ಲ. ಸೈನಿಕರಿಗೂ ಇದೇ ಮಾತು ಹೇಳಿದ್ದೇನೆ. ಇಂತಹ ಗದ್ದಲಗಳ ಬಗ್ಗೆ ತಲೆಕೆಡಿಸಿಕೊಳ್ಳಬೇಡಿ' ಎಂದರು.

ಮಧ್ಯಂತರ ಚುನಾವಣೆಯಲ್ಲಿ ರಿಪಬ್ಲಿಕನ್ ಪಕ್ಷ (GOP) ಅನುಭವಿಸಿದ ಭಾರಿ ಸೋಲಿಗೆ ಇರಾನ್ ಯುದ್ಧವೇ ಕಾರಣ ಎಂದು ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಆರೋಪಿಸಿರುವ ಕುರಿತು ಹೆಗ್ಸೆತ್ ಅವರನ್ನು ಪ್ರಶ್ನಿಸಲಾಯಿತು. ಈ ಸಂದರ್ಭದಲ್ಲಿ, ಇರಾನ್ ವಿರುದ್ಧದ ಕ್ರಮವನ್ನು ಮತ್ತೆ ಕೈಗೊಳ್ಳುವುದಾಗಿ ಟ್ರಂಪ್ ಹೇಳಿರುವುದನ್ನು ಉಲ್ಲೇಖಿಸಿದ ಅವರು, 'ನಾನೂ ಅದನ್ನು ಒಪ್ಪುತ್ತೇನೆ' ಎಂದರು.

ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಕೂಡ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದರು. 'ಒಂದು ಕ್ರಮ ಎಲ್ಲರಿಗೂ ಇಷ್ಟವಾಗಲೇಬೇಕೆಂದಿಲ್ಲ. ಆದರೆ, ಅದು ಅಗತ್ಯವಾಗಿರಬಹುದು' ಎಂದು ಅವರು ಹೇಳಿದ್ದರು.

ಇರಾನ್ ಪರಮಾಣು ಶಸ್ತ್ರಾಸ್ತ್ರಗಳನ್ನು ತಯಾರಿಸುವ ಪ್ರಯತ್ನವನ್ನು ತಡೆಯುವುದು ಅನಿವಾರ್ಯವಾಗಿತ್ತು ಎಂದು ಹೆಗ್ಸೆತ್ ಹೇಳಿದರು. 'ನಮ್ಮ ಮುಂದೆ ಎರಡು ಆಯ್ಕೆಗಳಿದ್ದವು. ಸಮಸ್ಯೆ ತಾನಾಗಿಯೇ ಬಗೆಹರಿಯಬಹುದು ಎಂದು ಸುಮ್ಮನೆ ಕುಳಿತು ಕಾಯುವುದು ಅಥವಾ ಧೈರ್ಯದಿಂದ ನಿರ್ಧಾರ ಕೈಗೊಳ್ಳುವುದು' ಎಂದು ಹೇಳಿದರು.

ತಮ್ಮ ಪರಮಾಣು ಕಾರ್ಯಕ್ರಮ ಶಾಂತಿಯುತ ಉದ್ದೇಶಗಳಿಗಾಗಿ ಮಾತ್ರ ಎಂದು ಇರಾನ್ ದೀರ್ಘಕಾಲದಿಂದ ಪ್ರತಿಪಾದಿಸುತ್ತಾ ಬಂದಿದೆ. ಆದರೆ, ಅಂತರರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆ (IAEA) ಪ್ರಕಾರ, ಇರಾನ್ ಬಳಿ ಶೇ. 60ರಷ್ಟು ಶುದ್ಧತೆಯವರೆಗೆ ಸಂಸ್ಕರಿಸಿದ 440.9 ಕೆ.ಜಿ. (972 ಪೌಂಡ್) ಯುರೇನಿಯಂ ದಾಸ್ತಾನಿದೆ. ಪರಮಾಣು ಶಸ್ತ್ರಾಸ್ತ್ರ ತಯಾರಿಕೆಗೆ ಅಗತ್ಯವಿರುವ ಶೇ. 90ರಷ್ಟು ಶುದ್ಧತೆಯ ಮಟ್ಟವನ್ನು ತಲುಪಲು ಇರಾನ್ ತಾಂತ್ರಿಕವಾಗಿ ಬಹಳ ಹತ್ತಿರದಲ್ಲಿದೆ.

ರವಿವಾರ ರಾತ್ರಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅಧ್ಯಕ್ಷ ಟ್ರಂಪ್ ಕೂಡ ಹೆಗ್ಸೆತ್ ಅವರನ್ನು ಸಮರ್ಥಿಸಿಕೊಂಡರು. 'ಹೆಗ್ಸೆತ್ ಮಾಡಿರುವ ತಪ್ಪು ಎಂದರೆ ಎರಡು ಯುದ್ಧಗಳನ್ನು ಗೆದ್ದಿರುವುದು ಅಷ್ಟೇ. ನನ್ನ ಪ್ರಕಾರ, ನಾವು ಮಧ್ಯಪ್ರಾಚ್ಯ ಮತ್ತು ಇಸ್ರೇಲ್ ಎರಡನ್ನೂ ರಕ್ಷಿಸಿದ್ದೇವೆ. ಇಂತಹ ಸಾಧನೆ ಮಾಡಿರುವ ವ್ಯಕ್ತಿಯ ವಿರುದ್ಧ ದೋಷಾರೋಪಣೆ ಪ್ರಕ್ರಿಯೆ ಆರಂಭಿಸುವುದು ಅಸಂಬದ್ಧ' ಎಂದು ಟ್ರಂಪ್ ಹೇಳಿದರು.

'ಇರಾನ್ ತೀವ್ರವಾಗಿ ನಲುಗಿದೆ'

ಇರಾನ್ ಇನ್ನೂ ಮಧ್ಯಪ್ರಾಚ್ಯದಲ್ಲಿರುವ ಅಮೆರಿಕದ ಮಿಲಿಟರಿ ನೆಲೆಗಳ ಮೇಲೆ ದಾಳಿ ನಡೆಸುವ ಮತ್ತು ಹಾರ್ಮುಝ್ ಜಲಸಂಧಿಯಲ್ಲಿ ವಾಣಿಜ್ಯ ಹಡಗುಗಳನ್ನು ಗುರಿಯಾಗಿಸುವ ಸಾಮರ್ಥ್ಯ ಹೊಂದಿದೆ. ಈ ದಾಳಿಗಳಿಂದ ಶತಕೋಟಿ ಡಾಲರ್‌ ಗಳಷ್ಟು ಹಾನಿಯಾಗಿದೆ. ಈ ನಡುವೆಯೂ ಇರಾನ್ ತೀವ್ರವಾಗಿ ದುರ್ಬಲಗೊಂಡಿದೆ ಎಂದು ಹೆಗ್ಸೆತ್ ಪ್ರತಿಪಾದಿಸಿದ್ದಾರೆ.

ಯುದ್ಧಕ್ಕೂ ಮುನ್ನ ಜಗತ್ತಿನ ಒಟ್ಟು ತೈಲ ಸಾಗಣೆಯ ಐದನೇ ಒಂದು ಭಾಗ ಹಾರ್ಮುಝ್ ಜಲಸಂಧಿಯ ಮೂಲಕ ನಡೆಯುತ್ತಿತ್ತು. ಈಗ ಈ ಜಲಮಾರ್ಗದಲ್ಲಿ ಹಡಗುಗಳ ಸಂಚಾರಕ್ಕೆ ಅಡ್ಡಿಯಾಗಿರುವುದರಿಂದ ಇಂಧನ ಬೆಲೆ ಏರಿಕೆಯಾಗಿದೆ. ಇದರಿಂದ ಅಮೆರಿಕದ ಮತದಾರರ ಆರ್ಥಿಕತೆಯ ಮೇಲೂ ನೇರ ಪರಿಣಾಮ ಬೀರಿದೆ.

ಯುದ್ಧದ ಮುಂದಿನ ಹಂತಗಳ ಕುರಿತು ನಿರ್ಧಾರ ಕೈಗೊಳ್ಳುವ ಅಧಿಕಾರ ಅಧ್ಯಕ್ಷ ಟ್ರಂಪ್ ಅವರ ಕೈಯಲ್ಲಿದೆ ಎಂದು ಹೆಗ್ಸೆತ್ ಹೇಳಿದರು. ಯುದ್ಧವನ್ನು ಅಂತ್ಯಗೊಳಿಸುವ ಒಂದು ಸಾಧ್ಯತೆಯನ್ನು ವಿವರಿಸಿದ ಅವರು, 'ನಮ್ಮ ಕಡೆಯಿಂದ ಕಾರ್ಯಾಚರಣೆ ಮುಗಿದಿದೆ. ಆದರೆ, ಇರಾನ್‌ ನ ಪರಮಾಣು ಸಾಮಗ್ರಿಗಳ ಮೇಲೆ ನಿಗಾ ಇಡುತ್ತೇವೆ. ಅವುಗಳನ್ನು ಬೇರೆಡೆಗೆ ಸಾಗಿಸುವ ಪ್ರಯತ್ನ ಮಾಡಬೇಡಿ ಎಂದು ಇರಾನ್‌ ಗೆ ಹೇಳಬಹುದು' ಎಂದರು.

ಅಮೆರಿಕದಲ್ಲಿ 1,00,000ಕ್ಕೂ ಹೆಚ್ಚು ಮತದಾರರ ಅಭಿಪ್ರಾಯ ಸಂಗ್ರಹಿಸಿರುವ 'ಎಪಿ ವೋಟರ್ ಪೋಲ್' ಸಮೀಕ್ಷೆಯ ಪ್ರಕಾರ, ಸುಮಾರು ಶೇ. 60ರಷ್ಟು ಮತದಾರರು ಇರಾನ್ ವಿರುದ್ಧ ಮಿಲಿಟರಿ ಕ್ರಮ ಕೈಗೊಂಡಿದ್ದು ಅಮೆರಿಕದ ತಪ್ಪು ನಿರ್ಧಾರ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇಂತಹ ವಿರೋಧದ ನಡುವೆಯೂ ಹೆಗ್ಸೆತ್ ಯುದ್ಧವನ್ನು ಸಮರ್ಥಿಸಿಕೊಳ್ಳುತ್ತಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಹೆಗ್ಸೆತ್ ಪರ ಅಭಿಯಾನ

ಕಾಂಗ್ರೆಸ್‌ ನಲ್ಲಿ ತಮ್ಮ ವಿರುದ್ಧ ಅಸಮಾಧಾನ ಹೆಚ್ಚುತ್ತಿರುವ ಬೆನ್ನಲ್ಲೇ ಹೆಗ್ಸೆತ್ ಸಾಮಾಜಿಕ ಜಾಲತಾಣಗಳಲ್ಲೂ ತಮ್ಮ ಪರವಾಗಿ ಅಭಿಯಾನ ನಡೆಸುತ್ತಿದ್ದಾರೆ.

ಕಳೆದ ವಾರ ವೀಡಿಯೊವೊಂದನ್ನು ಹಂಚಿಕೊಂಡಿದ್ದ ಅವರು, ತಮ್ಮ ವಿರುದ್ಧದ ದೋಷಾರೋಪಣೆ ಪ್ರಯತ್ನವು ವ್ಯಕ್ತಿಯೊಬ್ಬರನ್ನು ಗುರಿಯಾಗಿಸಿಕೊಂಡು ನಡೆಸುತ್ತಿರುವ ರಾಜಕೀಯ ಎಂದು ಟೀಕಿಸಿದ್ದರು.

'ನನ್ನ ವಿಷಯದಲ್ಲಿ ಇದು ನಡೆಯುವುದಿಲ್ಲ. ಈ ಬಗ್ಗೆ ನೀವು ಖಚಿತವಾಗಿರಬಹುದು' ಎಂದು ಹೇಳಿದ್ದರು.

ಇದರ ಬೆನ್ನಲ್ಲೇ ಪೆಂಟಗನ್‌ ನಲ್ಲಿ ರಾಜಕೀಯ ನೇಮಕಾತಿ ಪಡೆದಿರುವ ಹಲವು ಅಧಿಕಾರಿಗಳು ಹೆಗ್ಸೆತ್ ಅವರ ಚಿತ್ರಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದಾರೆ. ಈ ಚಿತ್ರಗಳ ಮೇಲೆ ʼನಿಲ್ಲಿ. ಹೋರಾಡಿ. ದೇಶವನ್ನು ರಕ್ಷಿಸಿʼ ಎಂಬ ಘೋಷವಾಕ್ಯವನ್ನು ಪ್ರಕಟಿಸಲಾಗುತ್ತಿದೆ.