`ಟ್ರಂಪ್ ಅಕೌಂಟ್ಸ್' ಯೋಜನೆ ಘೋಷಿಸಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್

ವಾಶಿಂಗ್ಟನ್, ಜು.4: ಅರ್ಹ ಅಮೆರಿಕನ್ ಮಕ್ಕಳ `ಟ್ರಂಪ್ ಅಕೌಂಟ್ಸ್' ನಿಧಿಗೆ ಸಹಾಯ ಮಾಡಲು ಮುಕ್ತವಾಗಿ ವ್ಯಾಪಾರ ಮಾಡಬಹುದಾದ, ಸಾರ್ವಜನಿಕವಾಗಿ ಲಿಸ್ಟ್ ಆಗಿರುವ ಷೇರುಗಳ ಸ್ವಯಂಪ್ರೇರಿತ ದೇಣಿಗೆಗಳನ್ನು ಸ್ವೀಕರಿಸಲು ಖಜಾನೆ ಇಲಾಖೆಯು ಚಾಲನೆ ನೀಡಲಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರದಂದು ಘೋಷಿಸಿದ್ದಾರೆ.

ಈ ಉಪಕ್ರಮವು ಅಧಿಕೃತವಾಗಿ ಪ್ರಾರಂಭವಾಗುವ ಮೊದಲೇ 60 ಲಕ್ಷಕ್ಕೂ ಹೆಚ್ಚು ಟ್ರಂಪ್ ಅಕೌಂಟ್ಸ್‌ ಗಳಿಗಾಗಿ ವಿನಂತಿಗಳು ಬಂದಿವೆ. ಅಮೆರಿಕದ ಸುವರ್ಣ ಯುಗ ಈಗಷ್ಟೇ ಪ್ರಾರಂಭವಾಗುತ್ತಿದೆ ಎಂದು ಟ್ರಂಪ್ ಹೇಳಿಕೊಂಡಿದ್ದಾರೆ. ಅಮೆರಿಕದ 250ನೇ ವಾರ್ಷಿಕೋತ್ಸವದ ಆಚರಣೆಯ ಸಂದರ್ಭದಲ್ಲೇ, ಶನಿವಾರದಂದು ಈ ಉಪಕ್ರಮವು ಅಧಿಕೃತವಾಗಿ ಪ್ರಾರಂಭವಾಗುತ್ತದೆ.

ಈ ಉಪಕ್ರಮದೊಂದಿಗೆ, ಅಮೆರಿಕದಲ್ಲಿನ ವ್ಯಕ್ತಿಗಳು ಮತ್ತು ಉದ್ಯಮಗಳು ಈಗ ಸಾರ್ವಜನಿಕವಾಗಿ ಲಿಸ್ಟ್ ಆಗಿರುವ ಷೇರುಗಳನ್ನು ಟ್ರಂಪ್ ಅಕೌಂಟ್ಸ್‍ಗೆ ದಾನ ಮಾಡಲು ಸಾಧ್ಯವಾಗುತ್ತದೆ. ಈ ಕಾರ್ಯಕ್ರಮದ ಅಡಿಯಲ್ಲಿ, ಫೆಡರಲ್ ಸರಕಾರವು 2025 ಮತ್ತು 2028ರ ನಡುವೆ ಜನಿಸಿದ ಪ್ರತಿಯೊಬ್ಬ ಅರ್ಹ ಮಗುವಿನ ಹೂಡಿಕೆ ಖಾತೆಗೆ 1,000 ಡಾಲರ್ ಜಮಾ ಮಾಡುತ್ತದೆ. ದಾನಿಗಳು ಸಾರ್ವಜನಿಕವಾಗಿ ಲಿಸ್ಟ್ ಆಗಿರುವ ಷೇರುಗಳನ್ನು ನೇರವಾಗಿ ಖಜಾನೆ ಇಲಾಖೆಗೆ ವರ್ಗಾಯಿಸಲು ಸಾಧ್ಯವಾಗುತ್ತದೆ ಮತ್ತು ಇಲಾಖೆಯು ದಾನಿಗಳ ಸೂಚನೆಗಳು, ಅನ್ವಯವಾಗುವ ಕಾನೂನುಗಳು ಮತ್ತು ಖಜಾನೆಯ ಮಾರ್ಗಸೂಚಿಗಳಿಗೆ ಅನುಗುಣವಾಗಿ ಅರ್ಹ ಮಕ್ಕಳ ಖಾತೆಗಳಿಗೆ ಸ್ವತ್ತುಗಳನ್ನು ಹಂಚಿಕೆ ಮಾಡುತ್ತದೆ ಎಂದು ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.