ಅಮೆರಿಕದ ಡೀಸೆಲ್ ರಫ್ತು ನಿಷೇಧ ಜಾಗತಿಕ ಇಂಧನ ಬೆಲೆಗಳ ಮೇಲೆ ಬೀರುವ ಪರಿಣಾಮವೇನು?

ಅಮೆರಿಕ ಮತ್ತು ಇರಾನ್ ನಡುವಿನ ಬಿಕ್ಕಟ್ಟು ಹಾಗೂ ರಷ್ಯಾ–ಉಕ್ರೇನ್ ಯುದ್ಧವು ಪ್ರಮುಖ ತೈಲ ಮತ್ತು ಇಂಧನ ವ್ಯಾಪಾರ ಮಾರ್ಗಗಳಿಗೆ ಅಡ್ಡಿಪಡಿಸುತ್ತಿರುವ ಹಿನ್ನೆಲೆಯಲ್ಲಿ, ಡೀಸೆಲ್ ಬೆಲೆ ಸಾರ್ವಕಾಲಿಕ ಗರಿಷ್ಠ ಮಟ್ಟ ತಲುಪಿದೆ.

ಇಂಧನ ಬೆಲೆಗಳನ್ನು ಪ್ರತಿದಿನ ಪತ್ತೆಹಚ್ಚುವ 'ಅಮೆರಿಕನ್ ಆಟೋಮೊಬೈಲ್ ಅಸೋಸಿಯೇಷನ್' (AAA) ಪ್ರಕಾರ, ಶುಕ್ರವಾರದಂದು ಪ್ರತಿ ಗ್ಯಾಲನ್ (3.79 ಲೀಟರ್) ಡೀಸೆಲ್ ನ ಸರಾಸರಿ ಬೆಲೆಯು ಒಂದು ತಿಂಗಳ ಹಿಂದೆ ಇದ್ದ 5.61 ಡಾಲರ್ನಿಂದ ಏರಿಕೆಯಾಗಿ 6.50 ಡಾಲರ್ಗೆ ತಲುಪಿದೆ.

ಈ ಬೆಲೆ ಏರಿಕೆಯು, ಮುಂಬರುವ ಮಧ್ಯಂತರ ಚುನಾವಣೆಗಳಿಗೂ ಮುನ್ನ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತ ಮತ್ತು ರಿಪಬ್ಲಿಕನ್ ಕಾನೂನು ರೂಪಕರು ಅಮೆರಿಕದ ಡೀಸೆಲ್ ರಫ್ತಿನ ಮೇಲೆ ನಿರ್ಬಂಧ ವಿಧಿಸುವುದನ್ನು ಪರಿಗಣಿಸಲು ಪ್ರೇರೇಪಿಸಿದೆ.

ಮಧ್ಯಂತರ ಚುನಾವಣೆಯಲ್ಲಿ ತಾವು ಹೇಗೆ ಮತ ಚಲಾಯಿಸಬೇಕು ಎಂಬುದನ್ನು ನಿರ್ಧರಿಸುವಲ್ಲಿ ಜೀವನ ವೆಚ್ಚವೇ ಅತ್ಯಂತ ಪ್ರಮುಖ ಅಂಶವಾಗಿದೆ ಎಂದು ಆಗಸ್ಟ್ ನಲ್ಲಿ ನಡೆಸಿದ ರಾಯಿಟರ್ಸ್/ಇಪ್ಸೊಸ್ ಸಮೀಕ್ಷೆಯಲ್ಲಿ ಶೇ. 47ರಷ್ಟು ಮತದಾರರು ತಿಳಿಸಿದ್ದಾರೆ. ಇದು ಎರಡನೇ ಪ್ರಮುಖ ಸಮಸ್ಯೆಯಾದ 'ಪ್ರಜಾಪ್ರಭುತ್ವದ ಮೌಲ್ಯಗಳು ಮತ್ತು ನಿಯಮಗಳು' ಎಂದು ಉಲ್ಲೇಖಿಸಿದವರಿಗಿಂತ ಎರಡು ಪಟ್ಟು ಹೆಚ್ಚಾಗಿದೆ.

ಹೊಸ ಮರಿಸ್ಟ್ ಸಮೀಕ್ಷೆಯ ಪ್ರಕಾರ, ಆರ್ಥಿಕತೆಯನ್ನು ನಿರ್ವಹಿಸುವ ವಿಚಾರದಲ್ಲಿ ರಿಪಬ್ಲಿಕನ್ಗಳಿಗಿಂತ ಡೆಮೋಕ್ರಾಟ್ ಗಳ ಮೇಲೆ ಅಮೆರಿಕನ್ನರಿಗೆ ಹೆಚ್ಚಿನ ವಿಶ್ವಾಸವಿದೆ. ಶೇ. 42ರಷ್ಟು ಜನರು ಡೆಮೋಕ್ರಾಟ್‌ ಗಳನ್ನು ಆಯ್ಕೆ ಮಾಡಿದ್ದರೆ, ಶೇ. 34ರಷ್ಟು ಜನರು ರಿಪಬ್ಲಿಕನ್ ಗಳನ್ನು ಆಯ್ಕೆ ಮಾಡಿದ್ದಾರೆ.

ಮತದಾರರ ಈ ಒಲವಿನ ನಡುವೆ, ಡೀಸೆಲ್ ರಫ್ತಿನ ಮೇಲೆ ಸ್ವಯಂಪ್ರೇರಿತ ನಿರ್ಬಂಧ ವಿಧಿಸುವ ಕುರಿತು ಆಸಕ್ತಿ ಎಷ್ಟಿದೆ ಎಂಬುದನ್ನು ಅರಿಯಲು ಪ್ರಮುಖ ತೈಲ ಸಂಸ್ಕರಣಾಗಾರಗಳೊಂದಿಗೆ ತಾವು ಸಂಪರ್ಕದಲ್ಲಿರುವುದಾಗಿ ಅಮೆರಿಕದ ಇಂಧನ ಕಾರ್ಯದರ್ಶಿ ಕ್ರಿಸ್ ರೈಟ್ ಗುರುವಾರ ತಿಳಿಸಿದ್ದಾರೆ ಎಂದು ರಾಯಿಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ವಿಶ್ವದ ಅತಿ ದೊಡ್ಡ ಡೀಸೆಲ್ ರಫ್ತುದಾರ ರಾಷ್ಟ್ರವಾಗಿರುವ ಅಮೆರಿಕದಿಂದ ಡೀಸೆಲ್ ರಫ್ತನ್ನು ನಿರ್ಬಂಧಿಸುವುದನ್ನು ತಾವು ಬೆಂಬಲಿಸುವುದಾಗಿ ಮಂಗಳವಾರ ಟ್ರಂಪ್ ನೀಡಿದ ಹೇಳಿಕೆಯ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ.

ಆದರೆ, ರಫ್ತು ನಿಷೇಧವು ಅಮೆರಿಕದಲ್ಲಿ ಹಾಗೂ ವಿದೇಶಗಳಲ್ಲಿ ಇಂಧನ ಬೆಲೆಗಳನ್ನು ಮತ್ತಷ್ಟು ಹೆಚ್ಚಿಸುವ ಅನಿರೀಕ್ಷಿತ ಪರಿಣಾಮಗಳಿಗೆ ಕಾರಣವಾಗಬಹುದು ಎಂದು ಇಂಧನ ವಿಶ್ಲೇಷಕರು ಮತ್ತು ಉದ್ಯಮ ಗುಂಪುಗಳು ಎಚ್ಚರಿಕೆ ನೀಡಿವೆ.

►ಡೀಸೆಲ್ ಬೆಲೆ ಇಷ್ಟು ಹೆಚ್ಚಾಗಲು ಕಾರಣವೇನು?

ಅಮೆರಿಕವು ವಿಶ್ವದ ಅತಿ ದೊಡ್ಡ ಡೀಸೆಲ್ ರಫ್ತುದಾರನಾಗಿದ್ದರೂ, ಡೀಸೆಲ್ ಜಾಗತಿಕ ಮಾರುಕಟ್ಟೆಯಲ್ಲಿ ವಹಿವಾಟು ನಡೆಸುತ್ತದೆ.

ರಷ್ಯಾ ಮತ್ತು ಮಧ್ಯಪ್ರಾಚ್ಯದಲ್ಲಿರುವ ತೈಲ ಶುದ್ಧೀಕರಣ ಘಟಕಗಳಿಗೆ ಉಂಟಾದ ಅಡಚಣೆಗಳು ಜಾಗತಿಕವಾಗಿ ಲಭ್ಯವಿರುವ ಇಂಧನದ ಪ್ರಮಾಣವನ್ನು ಕಡಿಮೆ ಮಾಡಿದ್ದು, ಆ ಕೊರತೆಯನ್ನು ನೀಗಿಸಲು ಅಮೆರಿಕದ ಉತ್ಪಾದಕರ ಮೇಲೆ ಹೆಚ್ಚಿನ ಒತ್ತಡ ಹೇರುತ್ತಿವೆ. ಉದಾಹರಣೆಗೆ, ರಷ್ಯಾದಲ್ಲಿ ಡ್ರೋನ್ ದಾಳಿಗಳು ಪ್ರಮುಖ ತೈಲ ಶುದ್ಧೀಕರಣ ಘಟಕಗಳಿಗೆ ಹಾನಿ ಮಾಡಿದ್ದು, ಉತ್ಪಾದನೆಯನ್ನು ತಗ್ಗಿಸಲು ಅಥವಾ ಸ್ಥಗಿತಗೊಳಿಸಲು ಒತ್ತಾಯಿಸಿವೆ.

"ಅಮೆರಿಕದ ತೈಲ ಶುದ್ಧೀಕರಣ ಘಟಕಗಳು ಪೂರ್ಣ ಸಾಮರ್ಥ್ಯದಲ್ಲಿ ಮತ್ತು ಎಂದಿಗಿಂತ ಹೆಚ್ಚಿನ ಮಟ್ಟದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರೂ, ಜಾಗತಿಕ ಮಟ್ಟದಲ್ಲಿ ಕೊರತೆ ಹಾಗೆಯೇ ಉಳಿದಿದೆ" ಎಂದು 'ಸೆಂಟರ್ ಫಾರ್ ಎ ನ್ಯೂ ಅಮೆರಿಕನ್ ಸೆಕ್ಯುರಿಟಿ'ಯ ಹಿರಿಯ ಸಂಯೋಜಕ ರೇಚಲ್ ಜಿಯೆಂಬಾ ಅವರು ಅಲ್ ಜಝೀರಾಕ್ಕೆ ತಿಳಿಸಿದ್ದಾರೆ.

ಅಮೆರಿಕದಲ್ಲಿ ಡೀಸೆಲ್ ದಾಸ್ತಾನು ಕೂಡ ಕುಸಿಯುತ್ತಿರುವ ಸಮಯದಲ್ಲಿ ಈ ಬೆಳವಣಿಗೆ ನಡೆದಿದೆ. ಯುಎಸ್ ಎನರ್ಜಿ ಇನ್ಫರ್ಮೇಷನ್ ಅಡ್ಮಿನಿಸ್ಟ್ರೇಷನ್ ಪ್ರಕಾರ, ಸೆಪ್ಟೆಂಬರ್ 11ರ ವೇಳೆಗೆ ದಾಸ್ತಾನು ಪ್ರಮಾಣವು 10 ಕೋಟಿ 79 ಲಕ್ಷ ಬ್ಯಾರೆಲ್‌ ಗಳಿಗೆ ಇಳಿದಿದ್ದು, ಇದು ನಾಲ್ಕು ದಶಕಗಳಿಗೂ ಹೆಚ್ಚಿನ ಅವಧಿಯಲ್ಲಿ ಅತ್ಯಂತ ಕಡಿಮೆ ಮಟ್ಟವಾಗಿದೆ.

ಜಾಗತಿಕ ಮಟ್ಟದಲ್ಲಿ ಪೂರೈಕೆ ಕಡಿಮೆಯಾಗುತ್ತಿರುವುದರಿಂದ, ಅಮೆರಿಕ ಸೇರಿದಂತೆ ವಿಶ್ವದಾದ್ಯಂತ ಡೀಸೆಲ್ ಬೆಲೆ ಏರಿಕೆಯಾಗಿದೆ. ಅಮೆರಿಕದ ಉತ್ಪಾದಕರು ತಮ್ಮ ಇಂಧನವನ್ನು ಜಾಗತಿಕ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಬಹುದಾದ್ದರಿಂದ, ದೇಶೀಯ ಗ್ರಾಹಕರಿಗೆ ಕಡಿಮೆ ಬೆಲೆಯನ್ನು ನಿಗದಿಪಡಿಸುವುದಕ್ಕಿಂತ ಗಗನಕ್ಕೇರುತ್ತಿರುವ ಜಾಗತಿಕ ಬೆಲೆಗಳೆಡೆಗೆ ಹೆಚ್ಚು ಆಕರ್ಷಿತರಾಗುತ್ತಿದ್ದಾರೆ.

►ಅಮೆರಿಕವು ರಫ್ತು ನಿಷೇಧವನ್ನು ಏಕೆ ಪರಿಗಣಿಸುತ್ತಿದೆ?

ವಾಷಿಂಗ್ಟನ್ ಡಿಸಿಯಲ್ಲಿರುವ ನಾಯಕರು, ಅಮೆರಿಕದ ಕಂಪನಿಗಳು ಡೀಸೆಲ್ ರಫ್ತು ಮಾಡುವುದನ್ನು ನಿಲ್ಲಿಸುವಂತೆ ಅಥವಾ ನಿಧಾನಗೊಳಿಸುವಂತೆ ಒತ್ತಡ ಹೇರುವ ಕುರಿತು ಚಿಂತನೆ ನಡೆಸುತ್ತಿದ್ದಾರೆ.

ಜೀವನ ವೆಚ್ಚವು ಅತ್ಯಂತ ನಿರ್ಣಾಯಕ ಸಮಸ್ಯೆಯಾಗಿ ಪರಿಣಮಿಸಿರುವ ಮುಂಬರುವ ಮಧ್ಯಂತರ ಚುನಾವಣೆಗಳಿಗೂ ಮುನ್ನ ಗ್ರಾಹಕರ ಮೇಲಿನ ಹಣಕಾಸಿನ ಹೊರೆಯನ್ನು ತಗ್ಗಿಸಲು, ರಫ್ತನ್ನು ನಿಧಾನಗೊಳಿಸುವಂತೆ ಅಥವಾ ಸಂಪೂರ್ಣವಾಗಿ ನಿಷೇಧಿಸುವಂತೆ ರಿಪಬ್ಲಿಕನ್ಗಳು ಒತ್ತಾಯಿಸುತ್ತಿದ್ದಾರೆ.

ಇಂತಹ ಕ್ರಮವು ಸ್ಥಳೀಯವಾಗಿ ಡೀಸೆಲ್ ಬೆಲೆಯನ್ನು ಕಡಿಮೆ ಮಾಡಬಹುದು ಎಂದು ಅವರು ಆಶಿಸಿದ್ದಾರೆ. ಟ್ರಕ್ಗಳಲ್ಲಿ ಆಹಾರ ಮತ್ತು ಬಹುತೇಕ ಉತ್ಪನ್ನಗಳನ್ನು ಸಾಗಿಸಲು ಡೀಸೆಲ್ ಅನ್ನು ಬಳಸುವುದರಿಂದ ಇದು ಮಹತ್ವದ್ದಾಗಿದೆ ಎಂದು ಜಿಯೆಂಬಾ ತಿಳಿಸಿದ್ದಾರೆ. ಅಮೆರಿಕದ ಡೀಸೆಲ್ ರಫ್ತುಗಳು ದೇಶೀಯ ಬಳಕೆಯ ಶೇ. 40ರಷ್ಟಕ್ಕೆ ಸಮಾನವಾಗಿವೆ ಎಂದಿದ್ದಾರೆ ಅವರು.

ಮಂಗಳವಾರ, ಅಯೋವಾದ ರಿಪಬ್ಲಿಕನ್ ಸೆನೆಟರ್ ಚಕ್ ಗ್ರಾಸ್ಲಿ ಅವರು ತಾತ್ಕಾಲಿಕವಾಗಿ ರಫ್ತು ನಿಷೇಧಿಸುವಂತೆ ಅಧ್ಯಕ್ಷರನ್ನು ಒತ್ತಾಯಿಸಿದ್ದಾರೆ.

"ಕಾರ್ಯನಿರ್ವಾಹಕ ಆದೇಶದ ಮೂಲಕ ಅಧ್ಯಕ್ಷ ಟ್ರಂಪ್ ಅವರು ಡೀಸೆಲ್ ರಫ್ತಿನ ಮೇಲೆ ತಾತ್ಕಾಲಿಕ ತಡೆ ವಿಧಿಸಬೇಕೆಂದು ನಾನು ಒತ್ತಾಯಿಸುತ್ತೇನೆ" ಎಂದು ಗ್ರಾಸ್ಲಿ ಹೇಳಿದ್ದಾರೆ.

ಅಲಾಸ್ಕಾದ ರಿಪಬ್ಲಿಕನ್ ಸೆನೆಟರ್ ಡಾನ್ ಸುಲ್ಲಿವಾನ್ ಕೂಡ ಇದೇ ರೀತಿಯ ಒತ್ತಾಯ ಮಾಡಿದ್ದಾರೆ. "ಡೀಸೆಲ್ ಬೆಲೆ ಅತಿ ಹೆಚ್ಚಾಗಿದೆ. ಚಳಿಗಾಲದ ಮುನ್ನ ನಮ್ಮ ಮೀಸಲು ನಿಧಿಯನ್ನು ಮರುನಿರ್ಮಾಣ ಮಾಡಲು ಅಮೆರಿಕದ ಡೀಸೆಲ್ ರಫ್ತಿಗೆ ತಾತ್ಕಾಲಿಕ ವಿರಾಮ ನೀಡುವಂತೆ ನಾನು ಕೋರುತ್ತೇನೆ" ಎಂದು ಸುಲ್ಲಿವಾನ್ ಮಂಗಳವಾರ ನೀಡಿದ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್, ಟೆನ್ನೆಸ್ಸಿಯ ಕಾಂಗ್ರೆಸ್ ಸದಸ್ಯ ಟಿಮ್ ಬರ್ಚೆಟ್ ಅವರು ಅಮೆರಿಕದ ಡೀಸೆಲ್ ರಫ್ತನ್ನು ನಿರ್ಬಂಧಿಸುವ ಎರಡು ಮಸೂದೆಗಳನ್ನು ಮಂಡಿಸಿದ್ದಾರೆ. ಒಂದು ಮಸೂದೆಯು 2027ರ ಜನವರಿವರೆಗೆ ನಿಷೇಧ ಹೇರುವುದಾದರೆ, ಮತ್ತೊಂದು ಮಸೂದೆಯು ರಾಷ್ಟ್ರೀಯ ಸರಾಸರಿ ಬೆಲೆಯು ಪ್ರತಿ ಗ್ಯಾಲನ್ಗೆ 5 ಡಾಲರ್ ತಲುಪಿದರೆ ರಫ್ತನ್ನು ನಿರ್ಬಂಧಿಸುತ್ತದೆ.

ಆಡಳಿತವು ಯಾವುದೇ ಅಧಿಕೃತ ನೀತಿ ಪ್ರಕಟಣೆಯನ್ನು ಮಾಡಿಲ್ಲ ಮತ್ತು ಅಧ್ಯಕ್ಷರು ಎಲ್ಲಾ ಆಯ್ಕೆಗಳನ್ನು ಮೌಲ್ಯಮಾಪನ ಮಾಡುತ್ತಿದ್ದಾರೆ ಎಂದು ಶ್ವೇತಭವನವು ಅಲ್ ಜಝೀರಾಕ್ಕೆ ತಿಳಿಸಿದೆ.

ಬೆಲೆಯನ್ನು ತಗ್ಗಿಸುವ ಬದಲು ರಫ್ತು ನಿಷೇಧವು ಬೆಲೆಯನ್ನು ಮತ್ತಷ್ಟು ಹೆಚ್ಚಿಸಬಹುದು ಎಂದು ತೈಲ ಮತ್ತು ಗ್ಯಾಸ್ ಉದ್ಯಮದ ತಜ್ಞರು ಹೇಳಿದ್ದಾರೆ.

"ಮೆಕ್ಕೆಜೋಳದಂತೆ ಡೀಸೆಲ್ ಕೂಡ ಜಾಗತಿಕ ಮಾರುಕಟ್ಟೆಯಲ್ಲಿ ವಹಿವಾಟು ನಡೆಸುತ್ತದೆ. ರೈತರು ಅಮೆರಿಕನ್ನರಿಗೆ ಕಡಿಮೆ ಬೆಲೆಗೆ ಮಾರಾಟ ಮಾಡುವುದಿಲ್ಲ, ಮತ್ತು ತೈಲ ಸಂಸ್ಕರಣಾಗಾರಗಳು ಜಾಗತಿಕ ಬೆಲೆಗೆ ಕಚ್ಚಾ ತೈಲವನ್ನು ಖರೀದಿಸುವುದರಿಂದ ಅವರಿಗೂ ಕಡಿಮೆ ಬೆಲೆಗೆ ಮಾರಲು ಸಾಧ್ಯವಿಲ್ಲ. ಕಡಿಮೆ ಬೆಲೆಗೆ ಒತ್ತಡ ಹೇರಿದರೆ ಅವರು ಕಡಿಮೆ ಡೀಸೆಲ್ ಉತ್ಪಾದಿಸುತ್ತಾರೆ. ಕಡಿಮೆ ಪೂರೈಕೆ ಎಂದರೆ ಬೆಲೆ ಇಳಿಕೆಯಲ್ಲ, ಬದಲಿಗೆ ಬೆಲೆ ಏರಿಕೆ" ಎಂದು 'GasBuddy'ಯ ಪೆಟ್ರೋಲಿಯಂ ವಿಶ್ಲೇಷಣಾ ಮುಖ್ಯಸ್ಥ ಪ್ಯಾಟ್ರಿಕ್ ಡಿ ಹಾನ್ ಅವರು ಎಕ್ಸ್ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ.

►ರಫ್ತು ನಿಷೇಧ ಹೇಗೆ ಕಾರ್ಯನಿರ್ವಹಿಸುತ್ತದೆ?

ನಿಷೇಧವು ಅಮೆರಿಕದ ತೈಲ ಸಂಸ್ಕರಣಾಗಾರಗಳು ವಿದೇಶಿ ಖರೀದಿದಾರರಿಗೆ ಡೀಸೆಲ್ ಮಾರಾಟ ಮಾಡುವುದನ್ನು ತಡೆಯುತ್ತದೆ ಅಥವಾ ನಿರ್ಬಂಧಿಸುತ್ತದೆ. ಇದು ಸೈದ್ಧಾಂತಿಕವಾಗಿ ದೇಶೀಯ ಮಾರುಕಟ್ಟೆಯಲ್ಲಿ ಹೆಚ್ಚಿನ ಇಂಧನ ಲಭ್ಯವಾಗುವಂತೆ ಮಾಡುತ್ತದೆ.

ಹೆಚ್ಚಿನ ಡೀಸೆಲ್ ಅನ್ನು ದೇಶದೊಳಗೆ ಉಳಿಸಿಕೊಳ್ಳುವುದರಿಂದ ಅಂತಿಮವಾಗಿ ಅಮೆರಿಕದ ಸ್ಟೋರೇಜ್ ಟ್ಯಾಂಕ್ಗಳು ತುಂಬಿಕೊಳ್ಳುತ್ತವೆ, ಆದರೆ ಇದು ತೈಲ ಶುದ್ಧೀಕರಣ ಘಟಕಗಳಿಗೆ ಉತ್ಪಾದನೆಯನ್ನು ಕಡಿಮೆ ಮಾಡಲು ಒತ್ತಾಯಿಸುತ್ತದೆ ಎಂದು ಸಂಶೋಧನಾ ಮತ್ತು ಸಲಹಾ ಸಂಸ್ಥೆಯಾದ 'ವುಡ್ ಮೆಕೆಂಝಿ'ಯ ವಿಶ್ಲೇಷಕರು ತಿಳಿಸಿದ್ದಾರೆ. ಇದು ಲ್ಯಾಟಿನ್ ಅಮೆರಿಕ ಮತ್ತು ಯುರೋಪ್ ಸೇರಿದಂತೆ ಅಮೆರಿಕದ ಇಂಧನವನ್ನು ಹೆಚ್ಚು ಅವಲಂಬಿಸಿರುವ ಇತರ ಮಾರುಕಟ್ಟೆಗಳ ಮೇಲೆ ಪರಿಣಾಮ ಬೀರಬಹುದು. ಅಲ್ಲದೆ, ಪೂರೈಕೆಗಾಗಿ ಇತರ ಜಾಗತಿಕ ಖರೀದಿದಾರರೊಂದಿಗೆ ಸ್ಪರ್ಧಿಸುವಂತೆ ಮಾಡಿ ಜಾಗತಿಕ ಮಾರುಕಟ್ಟೆಯಲ್ಲಿ ಬೆಲೆ ಏರಿಕೆಗೆ ಕಾರಣವಾಗಬಹುದು.

ಕೊರತೆಯನ್ನು ಗಣನೀಯವಾಗಿ ನೀಗಿಸಲು ಬೇಕಾದ ಬಿಡಿ ಶುದ್ಧೀಕರಣ ಸಾಮರ್ಥ್ಯವನ್ನು ಹೊಂದಿರುವ ಏಕೈಕ ಪ್ರಮುಖ ಉತ್ಪಾದಕ ಚೀನಾ ಎಂದು ವುಡ್ ಮೆಕೆಂಝಿ ಹೇಳಿದೆ.

"ಯುಎಸ್ ತೈಲ ಶುದ್ಧೀಕರಣ ಘಟಕಗಳ ನಷ್ಟವನ್ನು ಸರಿದೂಗಿಸಬಲ್ಲ ಗಮನಾರ್ಹ ಬಿಡಿ ಶುದ್ಧೀಕರಣ ಸಾಮರ್ಥ್ಯವನ್ನು ಹೊಂದಿರುವ ಏಕೈಕ ದೇಶ ಪ್ರಸ್ತುತ ಚೀನಾ ಆಗಿದೆ. ಆದರೆ, ಮಧ್ಯಪ್ರವೇಶಿಸುವುದು ತನ್ನ ಹಿತಾಸಕ್ತಿಯಲ್ಲ ಎಂದು ಚೀನಾ ನಿರ್ಧರಿಸಬಹುದು" ಎಂದು ವಿಶ್ಲೇಷಕರು ತಿಳಿಸಿದ್ದಾರೆ.

ರಫ್ತು ನಿಷೇಧವು ಅಮೆರಿಕದ ಡೀಸೆಲ್ ದಾಸ್ತಾನುಗಳನ್ನು ಬೇಗನೆ ತುಂಬುವಂತೆ ಮಾಡಬಹುದು, ಇದು ತೈಲ ಶುದ್ಧೀಕರಣ ಘಟಕಗಳಿಗೆ ಕಚ್ಚಾ ತೈಲದ ಬಳಕೆಯನ್ನು ಕಡಿಮೆ ಮಾಡಲು ಒತ್ತಾಯಿಸುವುದಲ್ಲದೆ, ಸಂಭಾವ್ಯವಾಗಿ ಅಮೆರಿಕದ ಪೆಟ್ರೋಲ್ ಆಮದನ್ನು ಹೆಚ್ಚಿಸಬಹುದು ಎಂದು ವುಡ್ ಮೆಕೆಂಝಿ ಎಚ್ಚರಿಸಿದೆ.

'S&P Global' ವಿಶ್ಲೇಷಣೆಯು ಸಹ ಇದೇ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದು, ಮಾರಾಟವಾಗದ ಡೀಸೆಲ್ನಿಂದ ಸಂಗ್ರಹಣಾ ಸಾಮರ್ಥ್ಯವು ತುಂಬಿಕೊಳ್ಳುವುದರಿಂದ ಸಂಪೂರ್ಣ ನಿಷೇಧವು ಉತ್ಪಾದನೆ ಕಡಿಮೆಯಾಗಲು ಕಾರಣವಾಗಬಹುದು ಎಂದು ತಿಳಿಸಿದೆ. ಈ ವಿಶ್ಲೇಷಣೆಯ ಪ್ರಕಾರ, ಇದು ದಿನಕ್ಕೆ 75,000 ಬ್ಯಾರೆಲ್‌ ಗಳಷ್ಟು ಉತ್ಪಾದನೆ ಕಡಿತಕ್ಕೆ ಕಾರಣವಾಗಬಹುದು, ಇದರಿಂದಾಗಿ ಈ ವರ್ಷದ ನಾಲ್ಕನೇ ತ್ರೈಮಾಸಿಕದಲ್ಲಿ ಅಮೆರಿಕವು ನಿವ್ವಳ ಪೆಟ್ರೋಲ್ ಆಮದುದಾರ ರಾಷ್ಟ್ರವಾಗಿ ಬದಲಾಗಬಹುದು.

►ರಫ್ತು ನಿಷೇಧವು ಯಾರ ಮೇಲೆ ಪರಿಣಾಮ ಬೀರುತ್ತದೆ?

ರಫ್ತು ನಿಷೇಧವು ಅಮೆರಿಕದ ತೈಲ ಸಂಸ್ಕರಣಾಗಾರಗಳು ಮತ್ತು ಗ್ರಾಹಕರ ಮೇಲೆ ಹಾಗೂ ಅಮೆರಿಕದ ಡೀಸೆಲ್ ಅನ್ನು ಅವಲಂಬಿಸಿರುವ ದೇಶಗಳ ಮೇಲೆ ಪರಿಣಾಮ ಬೀರುತ್ತದೆ.

"ರಫ್ತು ನಿಷೇಧಗಳು ತಾತ್ಕಾಲಿಕ ನೆರವು ನೀಡಬಹುದು, ಆದರೆ ಡೀಸೆಲ್ ಎನ್ನುವುದು ಜಾಗತಿಕ ಸರಕು. ವ್ಯವಸ್ಥೆಯ ಒಂದು ಭಾಗದಲ್ಲಿ ಬದಲಾವಣೆ ಮಾಡಿದರೆ, ಅದರ ಪರಿಣಾಮಗಳು ಬೇರೆಡೆಗೆ ಹರಡುತ್ತವೆ. ಇವುಗಳ ನಡುವಿನ ಪರಿಣಾಮಗಳು ಅನಿವಾರ್ಯವಾಗಿರುತ್ತವೆ. ಸಂಸ್ಕರಣಾಗಾರಗಳು ಒಟ್ಟಾರೆಯಾಗಿ ನಿಷೇಧವನ್ನು ಸ್ವಾಗತಿಸುವ ಸಾಧ್ಯತೆಯಿಲ್ಲ. ಸ್ವಯಂಪ್ರೇರಿತ ಹಾಗೂ ನಿಯಂತ್ರಿತ ರಫ್ತು ಕಡಿತವು ಸಾಮಾನ್ಯವಾಗಿ ಅಲ್ಪಾವಧಿಯಲ್ಲಿ ಕಡಿಮೆ ಅಡಚಣೆಗಳನ್ನು ಉಂಟುಮಾಡುತ್ತದೆ" ಎಂದು ಸ್ಟ್ಯಾನ್ಫೋರ್ಡ್ ವಿಶ್ವವಿದ್ಯಾಲಯದ ಪ್ರೆಕೋರ್ಟ್ ಇಂಧನ ಸಂಸ್ಥೆಯ ವಿಸಿಟಿಂಗ್ ಸ್ಕಾಲರ್ ಮಕ್ಸಿಮ್ ಸೊನಿನ್ ಅಲ್ ಜಝೀರಾಕ್ಕೆ ತಿಳಿಸಿದ್ದಾರೆ.

ಅಮೆರಿಕದ ರಫ್ತಿಗೆ ಉಂಟಾಗುವ ಅಡಚಣೆಗಳು ಜಾಗತಿಕ ಮಾರುಕಟ್ಟೆಯಲ್ಲಿ ಲಭ್ಯವಿರುವ ಇಂಧನದ ಪ್ರಮಾಣವನ್ನು ಕಡಿಮೆ ಮಾಡಬಹುದು. ಅಮೆರಿಕದ ಇಂಧನವನ್ನು ಹೆಚ್ಚು ಅವಲಂಬಿಸಿರುವ ಯುರೋಪ್ ಮತ್ತು ಲ್ಯಾಟಿನ್ ಅಮೆರಿಕ ದೇಶಗಳು ಪೂರೈಕೆಗಾಗಿ ಇತರ ಉತ್ಪಾದಕರೊಂದಿಗೆ ಸ್ಪರ್ಧಿಸಬೇಕಾಗಬಹುದು ಎಂದು ವುಡ್ ಮೆಕೆಂಝಿ ವಿಶ್ಲೇಷಕರು ತಿಳಿಸಿದ್ದಾರೆ.

ಈ ಸಮಸ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು, ಅಮೆರಿಕವು ಉತ್ಪಾದನೆಯನ್ನು ಮುಂದುವರಿಸಲು ತೈಲ ಸಂಸ್ಕರಣಾಗಾರಗಳಿಗೆ ಪ್ರೋತ್ಸಾಹಿಸಲು ಹಾಗೂ ಉತ್ಪಾದನೆಯನ್ನು ಕಡಿಮೆ ಮಾಡಿದರೆ ದಂಡ ವಿಧಿಸುವಂತಹ ಕ್ರಮಗಳ ಮಿಶ್ರಣವನ್ನು ಆಯ್ಕೆ ಮಾಡಿಕೊಳ್ಳಬಹುದು. ಔಪಚಾರಿಕ ನಿಷೇಧಕ್ಕಿಂತ ಸ್ವಯಂಪ್ರೇರಿತ ರಫ್ತು ಕೋಟಾಗಳು ಇರಬಹುದು ಮತ್ತು ಮೆಕ್ಸಿಕೋದಂತಹ ಅಮೆರಿಕಕ್ಕೆ ಕಚ್ಚಾ ತೈಲವನ್ನು ಒದಗಿಸುವ ದೇಶಗಳಿಗೆ ವಿನಾಯಿತಿಗಳು ಇರಬಹುದು" ಎಂದು ಜಿಯೆಂಬಾ ಹೇಳಿದರು.

ಇದು ಪೆಟ್ರೋಲ್ ಬಂಕ್ಗಳಲ್ಲಿ ಮಾತ್ರವಲ್ಲದೆ ವಿಮಾನಯಾನ ಕ್ಷೇತ್ರದಲ್ಲೂ ಗ್ರಾಹಕರ ಮೇಲೆ ಒತ್ತಡ ಹೇರಬಹುದು.

ರಫ್ತು ನಿಷೇಧವು ವಿಮಾನಯಾನ ಸಂಸ್ಥೆಗಳು ಮತ್ತು ಪ್ರಯಾಣಿಕರಿಗೆ ಹೆಚ್ಚಿನ ಬೆಲೆಗೆ ಕಾರಣವಾಗಬಹುದು ಎಂದು ವಾಯುಯಾನ ಉದ್ಯಮದ ವ್ಯಾಪಾರ ಗುಂಪಾದ 'ಏರ್ಲೈನ್ಸ್ ಫಾರ್ ಅಮೆರಿಕ' ಎಚ್ಚರಿಸಿದೆ ಎಂದು ರಾಯಿಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಈ ವ್ಯಾಪಾರ ಗುಂಪು ಅಲ್ ಜಝೀರಾ ಕಳುಹಿಸಿದ ಪ್ರಶ್ನೆಗೆ ಪ್ರತಿಕ್ರಿಯಿಸಿಲ್ಲ.

ರಫ್ತನ್ನು ನಿರ್ಬಂಧಿಸುವುದರಿಂದ ದೇಶೀಯ ಗ್ರಾಹಕರಿಗೆ ಡೀಸೆಲ್ ಮರುನಿರ್ದೇಶಿಸುವ ಬದಲು ಅಮೆರಿಕದ ತೈಲ ಸಂಸ್ಕರಣಾ ಉತ್ಪಾದನೆಯನ್ನು ಕಡಿಮೆ ಮಾಡಬಹುದು ಎಂಬುದು ವಿಶ್ಲೇಷಕರ ಕಳವಳವಾಗಿದೆ. ಇದು ದೇಶೀಯವಾಗಿ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಇಂಧನ ಬೆಲೆಗಳ ಏರಿಕೆಗೆ ಕಾರಣವಾಗಬಹುದು.

"ಮೂಲ ಸಮಸ್ಯೆಗಳನ್ನು ಪರಿಹರಿಸುವಲ್ಲಿ ಇದು ವಿಫಲವಾಗಿರುವುದರಿಂದ ಅಮೆರಿಕದ ಗ್ರಾಹಕರಿಗೆ ಇದು ಹೆಚ್ಚು ಸಹಾಯ ಮಾಡುವುದಿಲ್ಲ. ಅಲ್ಲದೆ, ಸಂಸ್ಕರಣಾಗಾರಗಳು ಉತ್ಪಾದನೆಯನ್ನು ತಡೆಹಿಡಿದರೆ ಇದು ತಿರುಗುಬಾಣವಾಗಬಹುದು. ಕೊರತೆಗೆ ಕಾರಣವಾಗುವ ಸಂಘರ್ಷಗಳನ್ನು ಕೊನೆಗೊಳಿಸುವುದೇ ಇದಕ್ಕೆ ಅತ್ಯುತ್ತಮ ಮಾರ್ಗವಾಗಿದೆ" ಎಂದು ಜಿಯೆಂಬಾ ತಿಳಿಸಿದ್ದಾರೆ.

ಸೌಜನ್ಯ: Aljazeera.com