ಅ.14ರಂದು ಕಲಬುರಗಿಯಲ್ಲಿ ಬೃಹತ್ ‘ಧಮ್ಮ ಜ್ಯೋತಿ ಯಾತ್ರೆ: ಸೂರ್ಯಕಾಂತ ನಿಂಬಾಳ್ಕರ್

ಕಲಬುರಗಿ: ಡಾ.ಬಾಬಾಸಾಹೇಬ್‌ ಅಂಬೇಡ್ಕರ್ ಅವರು ಬೌದ್ಧ ಧಮ್ಮ ಸ್ವೀಕರಿಸಿದ ಐತಿಹಾಸಿಕ ಘಟನೆಯ 70ನೇ ವರ್ಷದ ಸ್ಮರಣಾರ್ಥವಾಗಿ ರಾಹುಲ ಯುವಕ ಸಂಘದ ವತಿಯಿಂದ ಅ.14ರಂದು ನಗರದಲ್ಲಿ ಬೃಹತ್ ‘ಧಮ್ಮ ಜ್ಯೋತಿ ಯಾತ್ರೆ–2026’ ಆಯೋಜಿಸಲಾಗಿದೆ ಎಂದು ಸಂಘದ ಮುಖಂಡ ಸೂರ್ಯಕಾಂತ ನಿಂಬಾಳ್ಕರ್ ತಿಳಿಸಿದರು.

ನಗರದ ಪತ್ರಿಕಾ ಭವನದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಅಂದು ಬೆಳಗ್ಗೆ 8.30ಕ್ಕೆ ನಗರದ ಜಗತ್ ವೃತ್ತದಲ್ಲಿರುವ ಡಾ. ಬಾಬಾಸಾಹೇಬ ಅಂಬೇಡ್ಕರ್ ಅವರ ಪುತ್ಥಳಿಯಿಂದ ಯಾತ್ರೆ ಆರಂಭವಾಗಿ, ಬಸವನಗರದ ಕರುಣಾ ಬುದ್ಧ ವಿಹಾರದವರೆಗೆ ಸಾಗಲಿದೆ. ಯಾತ್ರೆಯಲ್ಲಿ ಬುದ್ಧನ ಮೂರ್ತಿ ಹಾಗೂ ಧಮ್ಮ ಗ್ರಂಥಗಳನ್ನು ಮೆರವಣಿಗೆಯಲ್ಲಿ ಕೊಂಡೊಯ್ಯಲಾಗುವುದು. ನಗರದ ಎಲ್ಲ ಬಡಾವಣೆಗಳ ನಾಗರಿಕರು ಹಾಗೂ ಬೌದ್ಧ ಉಪಾಸಕ-ಉಪಾಸಕಿಯರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳಬೇಕು ಎಂದು ಮನವಿ ಮಾಡಿದರು.

1956ರ ಅ.14ರಂದು ನಾಗಪುರದಲ್ಲಿ ಡಾ. ಬಾಬಾಸಾಹೇಬ ಅಂಬೇಡ್ಕರ್ ಅವರು ಲಕ್ಷಾಂತರ ಅನುಯಾಯಿಗಳೊಂದಿಗೆ ಬೌದ್ಧ ಧಮ್ಮ ಸ್ವೀಕರಿಸಿ, 22 ಪ್ರತಿಜ್ಞೆಗಳ ಮೂಲಕ ಹೊಸ ಬದುಕಿಗೆ ದಾರಿ ತೋರಿಸಿದರು. ಈ ಐತಿಹಾಸಿಕ ಘಟನೆ ದೇಶದಲ್ಲಿ ಮಹತ್ವದ ಸಾಮಾಜಿಕ ಪರಿವರ್ತನೆಗೆ ನಾಂದಿ ಹಾಡಿತು ಎಂದು ಸೂರ್ಯಕಾಂತ ನಿಂಬಾಳ್ಕರ್ ಹೇಳಿದರು.

ಧಮ್ಮ ದೀಕ್ಷೆಯಿಂದ ಪ್ರೇರಿತರಾದ ಅನೇಕರು ಶಿಕ್ಷಣದ ಮೂಲಕ ತಮ್ಮ ಬದುಕನ್ನು ರೂಪಿಸಿಕೊಂಡು, ಸಮಾನತೆ ಮತ್ತು ಸ್ವಾಭಿಮಾನದ ಜೀವನ ಕಟ್ಟಿಕೊಳ್ಳಲು ಮುಂದಾದರು. ಧಾರ್ಮಿಕ ಗುಲಾಮಗಿರಿ ಹಾಗೂ ಶೋಷಣೆಯ ಮನೋಭಾವದಿಂದ ಹೊರಬಂದು, ಸ್ವತಂತ್ರ ಚಿಂತನೆ ಮತ್ತು ಮಾನವೀಯ ಮೌಲ್ಯಗಳೊಂದಿಗೆ ಬದುಕಲು ಅಂಬೇಡ್ಕರ್ ಅವರ ಚಿಂತನೆಗಳು ದಾರಿದೀಪವಾಗಿವೆ ಎಂದರು.

ಈ ಬಾರಿಯ ಯಾತ್ರೆಯಲ್ಲಿ ಆನೆ ಮತ್ತು ಕುದುರೆಗಳ ಮೇಲೆ ಬುದ್ಧನ ಮೂರ್ತಿ ಹಾಗೂ ಧಮ್ಮ ಗ್ರಂಥಗಳನ್ನು ಕೊಂಡೊಯ್ಯುವ ಮೂಲಕ ಭವ್ಯ ಮೆರವಣಿಗೆ ನಡೆಸಲಾಗುವುದು. ಬುದ್ಧನ ಪವಿತ್ರ ಗ್ರಂಥ ತ್ರಿಪಿಟಕ ಸೇರಿದಂತೆ ಧಮ್ಮ ಸಾಹಿತ್ಯಕ್ಕೆ ಗೌರವ ಸಲ್ಲಿಸಲಾಗುವುದು. ಪೂಜ್ಯ ಭಿಕ್ಕುಗಳ ಸಾನ್ನಿಧ್ಯದಲ್ಲಿ ನಡೆಯುವ ಯಾತ್ರೆಯಲ್ಲಿ ಧಮ್ಮ ಬಂಧುಗಳು, ಉಪಾಸಕರು ಮತ್ತು ಉಪಾಸಕಿಯರು ಬಿಳಿ ವಸ್ತ್ರ ಧರಿಸಿ, ಕೈಯಲ್ಲಿ ಧಮ್ಮ ಜ್ಯೋತಿ ಹಿಡಿದು ಧಮ್ಮ ಘೋಷಣೆಗಳನ್ನು ಮೊಳಗಿಸುತ್ತಾ ಭಾಗವಹಿಸಲಿದ್ದಾರೆ ಎಂದು ತಿಳಿಸಿದರು.

ಹನೂರಿನ ಅಶೋಕ ಆರಾಮ ಬುದ್ಧ ವಿಹಾರದ ಪೂಜ್ಯ ಭಿಕ್ಕು ಧಮ್ಮತಿಸ್ಸ ಬಂತೇಜಿ ಅವರ ಸಾನ್ನಿಧ್ಯದಲ್ಲಿ ಕಾರ್ಯಕ್ರಮ ನಡೆಯಲಿದೆ. ಕಲಬುರಗಿ ನಗರ ಪೊಲೀಸ್ ಆಯುಕ್ತ ಶರಣಪ್ಪ ಡಿ.ಎಸ್. ಅವರು ಯಾತ್ರೆಯನ್ನು ಉದ್ಘಾಟಿಸಲಿದ್ದು, ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಮಹೇಶ ಮೇಘಣ್ಣನವರ ಅತಿಥಿಯಾಗಿ ಪಾಲ್ಗೊಳ್ಳಲಿದ್ದಾರೆ. ಮುಖ್ಯ ಅತಿಥಿಗಳಾಗಿ ಮಹಾನಗರ ಪಾಲಿಕೆ ಆಯುಕ್ತ ಅವಿನಾಶ ಸಿಂಧೆ, ನಿವೃತ್ತ ಅಧೀಕ್ಷಕ ಅಭಿಯಂತರ ಮಲ್ಲಿಕಾರ್ಜುನ ಸುಬಾನಿ, ಕಾಳಗಿ ತಾಲ್ಲೂಕಿನ ಕೊಡ್ಲಿಯ ಕಿತ್ತೂರು ರಾಣಿ ಚನ್ನಮ್ಮ ವಸತಿ ಶಾಲೆಯ ಪ್ರಾಂಶುಪಾಲ ರಾಜಶೇಖರ ಮಾಂಗ್ ಹಾಗೂ ಚಿಂಚೋಳಿ ತಾಲ್ಲೂಕಿನ ಗಡಿಕೇಶ್ವರದ ಹಿರಿಯ ಆರೋಗ್ಯ ಅಧಿಕಾರಿ ಡಾ. ಸಂಧ್ಯಾ ಎಸ್. ಕಾಣೆಕರ್ ಭಾಗವಹಿಸಲಿದ್ದಾರೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ದೇವೇಂದ್ರ ಸಿನ್ನೂರ, ಸಿದ್ರಾಮ ಬೆಳಕೋಟಿ, ಲಕ್ಷ್ಮೀಕಾಂತ ಹುಬ್ಬಳ್ಳಿ, ವಿಜಯಕುಮಾರ್ ಶಿಂಧೆ, ಶಿವಕುಮಾರ ನಂದಿ, ಸುರೇಶ್ ಕಾಣೆಕರ ಸೇರಿದಂತೆ ಸಂಘದ ಮುಖಂಡರು ಉಪಸ್ಥಿತರಿದ್ದರು.