36ರ ವಯಸ್ಸಿನಲ್ಲೂ ಚಿನ್ನದ ಓಟ: ಏಶ್ಯನ್ ಗೇಮ್ಸ್ ನಲ್ಲಿ ಆರು ಪದಕ ಗೆದ್ದ ಕೊಡಗಿನ ಹೆಮ್ಮೆ ಪೂವಮ್ಮ

ಮಡಿಕೇರಿ: ಕೊಡಗಿನ ಮಣ್ಣಿನಲ್ಲಿ ಹುಟ್ಟಿ ಅಂತರ್‌ರಾಷ್ಟ್ರೀಯ ಅತ್ಲೆಟಿಕ್ಸ್ ಲೋಕದಲ್ಲಿ ಭಾರತದ ಕೀರ್ತಿ ಪತಾಕೆ ಹಾರಿಸಿದ ಮಾಚೆಟ್ಟಿರ ಪೂವಮ್ಮ ರಾಜು ಅವರು ಏಶ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ಬರೋಬ್ಬರಿ ಆರು ಪದಕಗಳನ್ನು ಗೆದ್ದು ಇತಿಹಾಸ ನಿರ್ಮಿಸಿದ್ದಾರೆ. ಇದರಲ್ಲಿ ನಾಲ್ಕು ಚಿನ್ನ, ಒಂದು ಬೆಳ್ಳಿ ಮತ್ತು ಒಂದು ಕಂಚಿನ ಪದಕ ಸೇರಿದೆ.

36ನೇ ವಯಸ್ಸಿನಲ್ಲೂ ಚಿನ್ನದ ಪದಕ ಗೆಲ್ಲುವ ಮೂಲಕ ವಯಸ್ಸು ಕೇವಲ ಸಂಖ್ಯೆ, ಫಿಟ್ನೆಸ್ ಮತ್ತು ಸಾಧನೆಯೇ ಮುಖ್ಯ ಎಂದು ಅವರು ಸಾಬೀತುಪಡಿಸಿದ್ದಾರೆ.

ಕೊಡಗು ಜಿಲ್ಲೆಯ ಗೋಣಿಕೊಪ್ಪಲು ತಾಲೂಕಿನಲ್ಲಿ ಜನಿಸಿದ ಮಾಚೆಟ್ಟಿರ ಪೂವಮ್ಮ ರಾಜು ಅವರು ಎಂ.ಆರ್. ಪೂವಮ್ಮ ಮತ್ತು ಜಾಜಿ ದಂಪತಿಯ ಪುತ್ರಿ. ಬಾಲ್ಯದಿಂದಲೂ ಕ್ರೀಡೆಯಲ್ಲಿ ಆಸಕ್ತಿ ಹೊಂದಿದ್ದ ಅವರು ಗೋಣಿಕೊಪ್ಪಲಿನ ಜ್ಞಾನಜ್ಯೋತಿ ಶಾಲೆಯಲ್ಲಿ 5ನೇ ತರಗತಿ ಓದುತ್ತಿದ್ದಾಗಲೇ ಅತ್ಲೆಟಿಕ್ಸ್ ಜೀವನ ಆರಂಭಿಸಿದರು.

ನಂತರ ಮಂಗಳೂರಿನ ಎಸ್‌ಡಿಎಂ ಕಾಲೇಜಿನಲ್ಲಿ ಬಿಸಿನೆಸ್ ಮ್ಯಾನೇಜ್‌ಮೆಂಟ್ ಪದವಿ ಪಡೆದು 400 ಮೀ. ಓಟ ಮತ್ತು ರಿಲೇ ಓಟದಲ್ಲಿ ಪರಿಣತಿ ಸಾಧಿಸಿದರು. ಅವರ ವೈಯಕ್ತಿಕ ಶ್ರೇಷ್ಠ ಸಾಧನೆ 400 ಮೀ. ಓಟದಲ್ಲಿ 51.73 ಸೆಕೆಂಡ್ ಆಗಿದ್ದು, ಇದನ್ನು 2014ರಲ್ಲಿ ದಾಖಲಿಸಿದ್ದರು. 2015ರಲ್ಲಿ ಭಾರತ ಸರಕಾರದಿಂದ ಅರ್ಜುನ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

2014ರಲ್ಲಿ ದಕ್ಷಿಣ ಕೊರಿಯಾದ ಇಂಚಿಯಾನ್‌ನಲ್ಲಿ ನಡೆದ ಏಶ್ಯನ್ ಗೇಮ್ಸ್‌ನಲ್ಲಿ ಮಹಿಳೆಯರ 4x400 ಮೀಟರ್ ರಿಲೇಯಲ್ಲಿ ಪೂವಮ್ಮ, ಟಿಂಟು ಲೂಕಾ, ಮಂದೀಪ್ ಕೌರ್ ಮತ್ತು ಪ್ರಿಯಾಂಕಾ ಪವಾರ್ ಅವರನ್ನೊಳಗೊಂಡ ತಂಡ 3:28.68 ಸೆಕೆಂಡ್ ಸಮಯದೊಂದಿಗೆ ಗೇಮ್ಸ್ ದಾಖಲೆ ನಿರ್ಮಿಸಿ ಚಿನ್ನದ ಪದಕ ಗೆದ್ದಿತ್ತು. ಅದೇ ಕೂಟದಲ್ಲಿ ವೈಯಕ್ತಿಕ 400 ಮೀ.ಓಟದಲ್ಲಿ ಕಂಚಿನ ಪದಕ ಗೆದ್ದಿದ್ದರು. 2018ರಲ್ಲಿ ಇಂಡೋನೇಶ್ಯದ ಜಕಾರ್ತಾದಲ್ಲಿ ನಡೆದ ಕೂಟದಲ್ಲಿ ಮಹಿಳೆಯರ 4x400 ಮೀಟರ್ ರಿಲೇ ಮತ್ತು ಮಿಶ್ರ ರಿಲೇ ಎರಡರಲ್ಲೂ ಚಿನ್ನದ ಪದಕ ಗೆದ್ದಿದ್ದರು.

ಇತ್ತೀಚೆಗೆ ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆದ ಏಶ್ಯನ್ ಗೇಮ್ಸ್‌ನಲ್ಲಿ ಮಹಿಳೆಯರ 4x400 ಮೀಟರ್ ರಿಲೇಯಲ್ಲಿ ಪೂವಮ್ಮ, ವಿದ್ಯಾ ರಾಮರಾಜ್, ಪ್ರಾಚಿ ಚೌಧರಿ ಮತ್ತು ಕಿರಣ್ ಪಹಲ್ ಅವರ ನ್ನೊಳಗೊಂಡ ತಂಡ 3:29.69 ಸೆಕೆಂಡ್‌ನಲ್ಲಿ ಗುರಿ ತಲುಪಿ ಚಿನ್ನದ ಪದಕ ಗೆದ್ದಿದ್ದು, ಇದು ಅವರ ಮೂರನೇ ಏಶ್ಯನ್ ಗೇಮ್ಸ್ ರಿಲೇ ಚಿನ್ನವಾಗಿದೆ. ಅದೇ ಕೂಟದ ಮಿಶ್ರ 4x400 ಮೀಟರ್ ರಿಲೇಯಲ್ಲಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ಒಟ್ಟು ಪದಕಗಳ ಸಂಖ್ಯೆಯನ್ನು ಆರಕ್ಕೆ ಏರಿಸಿದ್ದಾರೆ.

ಏಶ್ಯನ್ ಗೇಮ್ಸ್ ಮಾತ್ರವಲ್ಲದೆ 2013, 2015, 2017 ಮತ್ತು 2019ರ ಏಶ್ಯನ್ ಅತ್ಲೆಟಿಕ್ ಚಾಂಪಿಯನ್‌ಶಿಪ್‌ಗಳಲ್ಲಿ ಚಿನ್ನ, ಬೆಳ್ಳಿ ಮತ್ತು ಕಂಚಿನ ಪದಕಗಳನ್ನು ಗೆದ್ದಿದ್ದಾರೆ. 2016ರ ರಿಯೋ ಒಲಿಂಪಿಕ್ಸ್ ಮತ್ತು 2024ರ ಪ್ಯಾರಿಸ್ ಒಲಿಂಪಿಕ್ಸ್‌ನಲ್ಲಿ ಮಹಿಳೆಯರ 4x400 ಮೀಟರ್ ರಿಲೇಯಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದಾರೆ. 2008ರ ಕಾಮನ್ವೆಲ್ತ್ ಯೂತ್ ಗೇಮ್ಸ್‌ನಲ್ಲಿ 400 ಮೀ. ಓಟದಲ್ಲಿ ಬೆಳ್ಳಿ ಮತ್ತು 4x100 ಮೀಟರ್ ರಿಲೇಯಲ್ಲಿ ಚಿನ್ನ ಹಾಗೂ 2016ರ ಸೌತ್ ಏಶ್ಯನ್ ಗೇಮ್ಸ್‌ನಲ್ಲಿ ಪದಕ ಗೆದ್ದಿದ್ದಾರೆ. 

ಈ ಸಾಧನೆಯ ಹಿಂದೆ ಅಪಾರ ತ್ಯಾಗವಿದೆ. ಏಶ್ಯನ್ ಗೇಮ್ಸ್ ಗಾಗಿ ಏಳು ತಿಂಗಳು ಮನೆಗೆ ಹೋಗದೆ ಪೋಲೆಂಡ್‌ನಲ್ಲಿ ಕಠಿಣ ತರಬೇತಿ ಪಡೆದಿದ್ದರು. ಮುಖ್ಯ ಕೋಚ್ ಜಮ್ಮುವಿನ ಜೆಲ್ಲಿ ಲೀ ಹೋಬ್ಲೆ, ರಾಷ್ಟ್ರೀಯ ಕ್ಯಾಂಪ್ ಕೋಚ್ ಗಲಿನಾ, ಸ್ಥಳೀಯ ಕೋಚ್‌ಗಳಾದ ವಸಂತ, ದಿನೇಶ್ ಕುಂದರ್ ಮತ್ತು ನಾಗಪ್ಪ ರಮೇಶ್ ಅವರ ಮಾರ್ಗದರ್ಶನದಲ್ಲಿ ಬೆಳೆದಿದ್ದಾರೆ. ಪತಿ ಕ್ರೀಡಾಪಟು ಜಿತಿನ್ ಪಾಲ್ ಮತ್ತು ಕುಟುಂಬದ ಬೆಂಬಲವೇ ತಮ್ಮ ಶಕ್ತಿ ಎಂದು ಪೂವಮ್ಮ ಹೇಳುತ್ತಾರೆ. ನಾನು ಇನ್ನೂ ಪೀಕ್‌ನಲ್ಲಿದ್ದೇನೆ, 40 ವರ್ಷದವರೆಗೂ ಓಡಬಲ್ಲೆ ಎಂಬುದು ಅವರ ಆತ್ಮವಿಶ್ವಾಸದ ನುಡಿ.