ಪ್ಯಾರಿಸ್ ಒಲಿಂಪಿಕ್ಸ್‌: ಭಾರತದ ಪುರುಷರ ಆರ್ಚರಿ ತಂಡಕ್ಕೆ ಸೋಲು

ಪ್ಯಾರಿಸ್: ತರುಣ್‌ದೀಪ್ ರಾಯ್, ಧೀರಜ್ ಬೊಮ್ಮದೇವರ ಹಾಗೂ ಪ್ರವೀಣ್ ಜಾಧವ್ ಅವರನ್ನೊಳಗೊಂಡ ಭಾರತದ ಪುರುಷರ ರಿಕರ್ವ್ ಆರ್ಚರಿ ತಂಡವು ಒಲಿಂಪಿಕ್ ಗೇಮ್ಸ್‌ನ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಟರ್ಕಿಯ ವಿರುದ್ಧ ಸೋಲುಂಡಿದೆ. ಈ ಮೂಲಕ ಒಲಿಂಪಿಕ್ಸ್‌ನಲ್ಲಿ ತನ್ನ ಸವಾಲು ಅಂತ್ಯಗೊಳಿಸಿದೆ.

ಭಾರತೀಯ ತಂಡವು 2-6 ಅಂತರದಿಂದ ಸೋಲುಂಡಿದೆ. ಭಾರತವು ಮೊದಲೆರಡು ಸೆಟ್‌ನಲ್ಲಿ ಸೋತ ನಂತರ 3ನೇ ಸೆಟ್ ಗೆಲ್ಲಲು ಶಕ್ತವಾಯಿತು. ಆದರೆ ಟರ್ಕಿ ತಂಡ 4ನೇ ಸೆಟ್‌ನಲ್ಲಿ ಒಟ್ಟು 58 ಅಂಕ ಗಳಿಸಿ ಪ್ರಾಬಲ್ಯ ಮೆರೆಯಿತು. ಭಾರತವು ತನ್ನ ಕೊನೆಯ ಪ್ರಯತ್ನದಲ್ಲಿ ಒಟ್ಟು 54 ಸ್ಕೋರ್ ಗಳಿಸಿತು.