ಭಟ್ಕಳ | ‘ಉದಯಪುರ ಫೈಲ್ಸ್’ ಚಲನಚಿತ್ರ ನಿಷೇಧಕ್ಕೆ ತಂಝೀಮ್ ಆಗ್ರಹ

ಭಟ್ಕಳ: ವಿವಾದಾತ್ಮಕ ಚಲನಚಿತ್ರ ‘ಉದಯಪುರ ಫೈಲ್ಸ್’ ಬಿಡುಗಡೆಗೆ ಮಜ್ಲಿಸ್- ಎ-ಇಸ್ಲಾ ವ ತಂಝೀಮ್ ಸಂಘಟನೆ ವಿರೋಧವನ್ನು ವ್ಯಕ್ತಪಡಿಸಿದೆ.

ಈ ಕುರಿತು ಗುರುವಾರ ಪತ್ರಿಕಾ ಹೇಳಿಕೆಯನ್ನು ಹೊರಡಿಸಿದ ಮಜ್ಲಿಸ್- ಎ-ಇಸ್ಲಾ ವ ತಂಝೀಮ್ ಸಂಘಟನೆ, ‘ಉದಯಪುರ ಫೈಲ್ಸ್’ ಚಲನಚಿತ್ರ ತಪ್ಪು ಮಾಹಿತಿಯನ್ನು ಹರಡುತ್ತದೆ. ಕೋಮು ದ್ವೇಷವನ್ನು ಉತ್ತೇಜಿಸುತ್ತದೆ. ಮುಸ್ಲಿಂ ಸಮುದಾಯವನ್ನು ಗುರಿಯಾಗಿಸುತ್ತದೆ. ಆದ್ದರಿಂದ ಈ ಚಲನಚಿತ್ರವನ್ನು ತಕ್ಷಣ ಮತ್ತು ಶಾಶ್ವತವಾಗಿ ನಿಷೇಧಿಸಬೇಕು. ಚಿತ್ರದ ಬಿಡುಗಡೆಯು ದೇಶದಲ್ಲಿ ಅಸ್ತಿತ್ವದಲ್ಲಿರುವ ಕೋಮು ವಿಭಜನೆಗಳನ್ನು ಇನ್ನಷ್ಟು ಹೆಚ್ಚಿಸುತ್ತದೆ ಎಂದು ಎಚ್ಚರಿಸಿದೆ.

ನೈಜ ಘಟನೆಗಳನ್ನು ಆಧರಿಸಿದೆ ಎಂದು ಹೇಳಿಕೊಳ್ಳುವ ‘ಉದಯಪುರ ಫೈಲ್ಸ್’ ಚಲನಚಿತ್ರ ಸತ್ಯ ಹೇಳುವ ನೆಪದಲ್ಲಿ ಇಡೀ ಸಮುದಾಯವನ್ನು ನಕಾರಾತ್ಮಕವಾಗಿ ಚಿತ್ರಿಸುತ್ತದೆ. ಈ ಚಲನಚಿತ್ರವು ಪ್ರವಾದಿ ಮುಹಮ್ಮದ್ (ಸ) ಅವರ ಬಗ್ಗೆ ಆಕ್ಷೇಪಾರ್ಹ ಉಲ್ಲೇಖಗಳನ್ನು ಒಳಗೊಂಡಿದೆ ಮತ್ತು ಇಸ್ಲಾಮಿಕ್ ಧರ್ಮದ ಉಪದೇಶಗಳ ಬಗ್ಗೆ ತಪ್ಪಾಗಿ ತೋರಿಸಲಾಗಿದೆ. ದೇಶದ ಸಾಮಾಜಿಕ ಸಾಮರಸ್ಯಕ್ಕೂ ಗಂಭೀರ ಅಪಾಯವನ್ನುಂಟುಮಾಡುತ್ತದೆ ಎಂದು ತಿಳಿಸಿದೆ.

ಈ ಹಿಂದೆ ಬಿಡುಗಡೆಯಾದ 'ದಿ ಕಾಶ್ಮೀರ್ ಫೈಲ್ಸ್' ಮತ್ತು 'ದಿ ಕೇರಳ ಸ್ಟೋರಿ' ಯಂತಹ ಚಿತ್ರಗಳಂತೆ ‘ಉದಯಪುರ ಫೈಲ್ಸ್’ ಕೂಡ ದ್ವೇಷ ಮತ್ತು ತಪ್ಪು ಸಂದೇಶ ನೀಡುವ ಉದ್ದೇಶದಿಂದ ಏಕಪಕ್ಷೀಯ ನಿರೂಪಣೆಯನ್ನು ಮಾಡುತ್ತದೆ. ಇಂತಹ ಚಿತ್ರಗಳು ಈ ಹಿಂದೆ ದೇಶಾದ್ಯಂತ ಕೋಮು ಉದ್ವಿಗ್ನತೆ ಹೆಚ್ಚಳಕ್ಕೆ ಕಾರಣವಾಗಿದ್ದವು. ‘ಉದಯಪುರ ಫೈಲ್ಸ್’ ಬಿಡುಗಡೆಯೊಂದಿಗೆ ಇದೇ ರೀತಿಯ ಪರಿಣಾಮ ಬೀರುವ ಭಯವಿದೆ ಎಂದು ತಂಝೀಮ್ ಆರೋಪಿಸಿದೆ

ಈ ರೀತಿಯ ಚಲನಚಿತ್ರಗಳು ನ್ಯಾಯ ಅಥವಾ ಪರಸ್ಪದ ಸಂವಾದಕ್ಕೆ ಉತ್ತೇಜನ ನೀಡುವುದಿಲ್ಲ. ಅವು ಭಯವನ್ನು ಸೃಷ್ಟಿಸುತ್ತವೆ ಮತ್ತು ಪೂರ್ವಾಗ್ರಹವನ್ನು ಹರಡುತ್ತವೆ. ಕೋಮು ಸಾಮರಸ್ಯ ದುರ್ಬಲವಾಗಿರುವ ಮತ್ತು ಉದಯಪುರ ಘಟನೆಯ ಕಾನೂನು ಪ್ರಕ್ರಿಯೆಗಳು ಇನ್ನೂ ನಡೆಯುತ್ತಿರುವ ಸಂದರ್ಭದಲ್ಲಿ ಈ ಚಿತ್ರ ಬಿಡುಗಡೆ ಆಗುತ್ತಿದೆ. ನ್ಯಾಯಾಲಯದ ಅಂಗಳದಲ್ಲಿರುವ ಈ ಪ್ರಕರಣವನ್ನು ಸಿನಿಮಾದ ಮೂಲಕ ಕಾಲ್ಪನಿಕಗೊಳಿಸುವುದು ಮತ್ತು ಕೋಮುವಾದೀಕರಿಸುವುದು ಬೇಜವಾಬ್ದಾರಿಯುತ ಮಾತ್ರವಲ್ಲ, ಅಪಾಯಕಾರಿಯೂ ಆಗಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (CBFC) ಮತ್ತು ಸರಕಾರ ಜವಾಬ್ದಾರಿಯುತವಾಗಿ ವರ್ತಿಸಬೇಕು ಮತ್ತು ಚಿತ್ರಮಂದಿರಗಳು, ದೂರದರ್ಶನ ಅಥವಾ ಆನ್‌ಲೈನ್‌ ವೇದಿಕೆ ಸೇರಿದಂತೆ ಯಾವುದೇ ಸ್ವರೂಪದಲ್ಲಿ ಚಲನಚಿತ್ರ ಬಿಡುಗಡೆಯಾಗದಂತೆ ತಡೆಯಬೇಕು ಎಂದು ಒತ್ತಾಯಿಸಿದೆ.

ಈ ಕಳವಳಗಳ ಹೊರತಾಗಿಯೂ ಚಿತ್ರ ಬಿಡುಗಡೆಯಾದರೆ, ಭಾರತದ ಎಲ್ಲಾ ಶಾಂತಿಪ್ರಿಯ ಮತ್ತು ಜಾತ್ಯಾತೀತ ಮನಸ್ಸಿನ ನಾಗರಿಕರು ತಮ್ಮ ಪ್ರತಿಭಟನೆಯನ್ನು ವ್ಯಕ್ತಪಡಿಸಬೇಕು. ಸಿನಿಮಾದ ಮೂಲಕ ಕೋಮು ಪ್ರಚಾರ ಮಾಡುತ್ತಿರುವುದನ್ನು ವಿರೋಧಿಸಬೇಕು ಎಂದು ತಂಝೀಮ್ ಆಗ್ರಹಿಸಿದೆ.

ಚಲನಚಿತ್ರಗಳನ್ನು ಬಳಸಿಕೊಂಡು ತೀವ್ರ ಕೋಮು ಭಾವನೆಗಳನ್ನು ಪ್ರಚಾರಗೊಳಿಸುವ ಪ್ರಯತ್ನಗಳು ನಡೆಯುತ್ತಿವೆ. ಇಂತಹ ವಿಷಯಗಳು ಕೇವಲ ಮನರಂಜನೆಗೆ ಸೀಮಿತವಾಗದೆ, ಶಾಲೆ, ಕಚೇರಿ, ಮನೆ ಮತ್ತು ಸಾರ್ವಜನಿಕ ಜೀವನದ ಪ್ರಭಾವ ಬೀರುತ್ತವೆ. ಇಂತಹ ಚಿತ್ರಗಳ ಬಿಡುಗಡೆಯ ವಿರುದ್ಧ ರಾಜಕೀಯ ಪಕ್ಷಗಳು ಸ್ಪಷ್ಟ ನಿಲುವು ತಗೆದುಕೊಳ್ಳಬೇಕು ಎಂದು ಮಜ್ಲಿಸ್-ಎ-ಇಸ್ಲಾಹ್ ವ ತಂಝೀಮ್ ಒತ್ತಾಯಿಸಿದೆ.

ಜಾತ್ಯಾತೀತತೆ, ಪ್ರಜಾಪ್ರಭುತ್ವ ಮತ್ತು ನ್ಯಾಯಕ್ಕೆ ಬದ್ಧತೆ ಹೊಂದಿರುವವರು ಈ ವಿಷಯದಲ್ಲಿ ಮೌನವಾಗಬಾರದು. ಮೌನವು ದೇಶವನ್ನು ವಿಭಜಿಸಲು ಯತ್ನಿಸುವವರಿಗೆ ಬೆಂಬಲವಾಗಬಹುದು. ನಾಗರಿಕ ಸಮಾಜ ಗುಂಪುಗಳು, ವಿದ್ಯಾರ್ಥಿ ಸಂಘಟನೆಗಳು, ಕಾನೂನು ತಜ್ಞರು, ಪತ್ರಕರ್ತರು ಮತ್ತು ಚಲನಚಿತ್ರ ನಿರ್ಮಾಪಕರು ಸತ್ಯಗಳನ್ನು ವಿರೂಪಗೊಳಿಸುವ ಮತ್ತು ಸಾಂವಿಧಾನಿಕ ಮೌಲ್ಯಗಳನ್ನು ದುರ್ಬಲಗೊಳಿಸುವ ವಿಷಯದ ವಿರುದ್ಧ ನಿಲ್ಲಬೇಕು. ಭಾರತದ ಶಕ್ತಿ ಅದರ ಏಕತೆ ಮತ್ತು ವೈವಿಧ್ಯತೆಯಲ್ಲಿದೆ. ಚಲನಚಿತ್ರಗಳು ಮನಸ್ಸನ್ನು ವಿಷಪೂರಿತಗೊಳಿಸುವ ಮತ್ತು ನಮ್ಮ ಸಮಾಜವನ್ನು ಇಬ್ಭಾಗ ಮಾಡುವ ಆಯುಧಗಳಾಗಲು ನಾವು ಬಿಡಬಾರದು ಎಂದು ತಂಝೀಮ್ ಹೇಳಿದೆ.