430 ದಶಲಕ್ಷ ಡಾಲರ್ ಅಕ್ರಮ ವಹಿವಾಟು; ಡಾರ್ಕ್‌ ವೆಬ್ ಮಾರುಕಟ್ಟೆಯ ಸಹ-ಸ್ಥಾಪಕನಿಗೆ 40 ವರ್ಷ ಜೈಲು ಶಿಕ್ಷೆ

ಅಕ್ರಮ ಸರಕು ಮತ್ತು ಸೇವೆಗಳ ಖರೀದಿ–ಮಾರಾಟಕ್ಕೆ ಅವಕಾಶ ಕಲ್ಪಿಸಿದ್ದ ‘ಎಂಪೈರ್ ಮಾರ್ಕೆಟ್’ ಎಂಬ ಡಾರ್ಕ್‌ ವೆಬ್ ಮಾರುಕಟ್ಟೆಯ ಸಹ-ಸ್ಥಾಪಕ ರಹೀಮ್ ಹ್ಯಾಮಿಲ್ಟನ್ ಗೆ ಅಮೆರಿಕದ ನ್ಯಾಯಾಲಯ 40 ವರ್ಷಗಳ ಫೆಡರಲ್ ಜೈಲು ಶಿಕ್ಷೆ ಮತ್ತು 5 ಮಿಲಿಯನ್ ಡಾಲರ್ ದಂಡ ವಿಧಿಸಿದೆ.

ಅಮೆರಿಕದ ನ್ಯಾಯಾಂಗ ಇಲಾಖೆಯ ಪ್ರಕಾರ, 2018ರಿಂದ 2020ರವರೆಗೆ ಕಾರ್ಯನಿರ್ವಹಿಸಿದ್ದ ಎಂಪೈರ್ ಮಾರ್ಕೆಟ್‌ ನಲ್ಲಿ ನಾಲ್ಕು ದಶಲಕ್ಷಕ್ಕೂ ಹೆಚ್ಚು ವಹಿವಾಟುಗಳು ನಡೆದಿದ್ದು, ಅವುಗಳ ಒಟ್ಟು ಮೌಲ್ಯ 430 ದಶಲಕ್ಷ ಡಾಲರ್‌ ಗೂ ಅಧಿಕವಾಗಿತ್ತು. ಮಾದಕ ದ್ರವ್ಯಗಳ ಮಾರಾಟದಿಂದಲೇ ಸುಮಾರು 375 ದಶಲಕ್ಷ ಡಾಲರ್ ಮೌಲ್ಯದ ವಹಿವಾಟು ನಡೆದಿತ್ತು.

ಬಳಕೆದಾರರಿಗೆ ಅಕ್ರಮ ಸರಕು ಮತ್ತು ಸೇವೆಗಳನ್ನು ಅನಾಮಧೇಯವಾಗಿ ಖರೀದಿಸಲು ಹಾಗೂ ಮಾರಾಟ ಮಾಡಲು ಈ ಮಾರುಕಟ್ಟೆ ಅವಕಾಶ ನೀಡುತ್ತಿತ್ತು. ಮಾರಾಟವಾಗುತ್ತಿದ್ದ ವಸ್ತುಗಳಲ್ಲಿ ಮಾದಕ ದ್ರವ್ಯಗಳು, ಕಳವು ಮಾಡಿದ ಖಾತೆಗಳ ವಿವರಗಳು, ವೈಯಕ್ತಿಕ ಗುರುತಿನ ಮಾಹಿತಿ, ನಕಲಿ ಕರೆನ್ಸಿ ಮತ್ತು ಕಂಪ್ಯೂಟರ್ ಹ್ಯಾಕಿಂಗ್ ಪರಿಕರಗಳು ಸೇರಿದ್ದವು.

ಹ್ಯಾಮಿಲ್ಟನ್ (30) ವರ್ಜೀನಿಯಾದ ಸಫೊಲ್ಕ್ ನಿವಾಸಿ. ಆತ ಆನ್ ಲೈನ್ ನಲ್ಲಿ ‘ಸಿಡ್ನಿ’ ಮತ್ತು ‘ಜೀರೋ ಏಂಜಲ್’ ಎಂಬ ಹೆಸರುಗಳಿಂದ ಪರಿಚಿತರಾಗಿದ್ದರು. ಫ್ಲೊರಿಡಾದ ಓರ್ಮಂಡ್ ಬೀಚ್ನ 41 ವರ್ಷದ ಥಾಮಸ್ ಪಾವಿ ಅವರೊಂದಿಗೆ ಸೇರಿ ಎಂಪೈರ್ ಮಾರ್ಕೆಟ್ ಸ್ಥಾಪಿಸಿ, ನಿರ್ವಹಿಸಿದ್ದರು ಎಂದು ಅಭಿಯೋಜಕರು ತಿಳಿಸಿದ್ದಾರೆ. ಪಾವಿ ಆನ್ ಲೈನ್ ನಲ್ಲಿ ‘ಡೋಪೆನ್ಗಟ್’ ಎಂಬ ಹೆಸರಿನಿಂದ ಗುರುತಿಸಿಕೊಂಡಿದ್ದರು.

►ಅಕ್ರಮ ವಸ್ತುಗಳ ಮಾರಾಟ

ಅಮೆರಿಕದ ನ್ಯಾಯಾಂಗ ಇಲಾಖೆಯ ಪ್ರಕಟಣೆಯ ಪ್ರಕಾರ, ಎಂಪೈರ್ ಮಾರ್ಕೆಟ್‌ ನಲ್ಲಿ ನಿಯಂತ್ರಿತ ವಸ್ತುಗಳ ಮಾರಾಟವೇ ಪ್ರಮುಖ ಚಟುವಟಿಕೆಯಾಗಿತ್ತು. ಮಾದಕ ದ್ರವ್ಯಗಳಿಗೆ ಸಂಬಂಧಿಸಿದಂತೆ 1,66,000ಕ್ಕೂ ಹೆಚ್ಚು ಪಟ್ಟಿಗಳಿದ್ದವು. ಮಾರುಕಟ್ಟೆಯು 2020ರ ಆಗಸ್ಟ್ ನಲ್ಲಿ ಉತ್ತುಂಗದಲ್ಲಿದ್ದಾಗ ಸುಮಾರು 1.68 ದಶಲಕ್ಷ ನೋಂದಾಯಿತ ಬಳಕೆದಾರರನ್ನು ಹೊಂದಿತ್ತು. ಇವರಲ್ಲಿ 5,000ಕ್ಕೂ ಅಧಿಕ ಮಾರಾಟಗಾರರು ಮತ್ತು ಸುಮಾರು 3,60,000 ಖರೀದಿದಾರರು ಸೇರಿದ್ದರು.

ಮಾರುಕಟ್ಟೆಯಲ್ಲಿ ಮಾರಾಟವಾದ ಮಾದಕ ದ್ರವ್ಯಗಳಲ್ಲಿ ಕನಿಷ್ಠ 13,314.23 ಗ್ರಾಂ ಫೆಂಟನಿಲ್, 4,46,683.15 ಗ್ರಾಂ ಕೊಕೇನ್, 71,992.33 ಗ್ರಾಂ ಮೆಥಾಂಫೆಟಮೈನ್ ಮತ್ತು 1,03,396.21 ಗ್ರಾಂ ಹೆರಾಯಿನ್ ಸೇರಿದ್ದವು.

ಹ್ಯಾಮಿಲ್ಟನ್ ಮತ್ತು ಪಾವಿ ಎಲ್ಲ ವಹಿವಾಟುಗಳನ್ನು ಕ್ರಿಪ್ಟೋಕರೆನ್ಸಿ ಮೂಲಕವೇ ನಡೆಸುವ ವ್ಯವಸ್ಥೆ ಮಾಡಿದ್ದರು. ಕಾನೂನು ಜಾರಿ ಸಂಸ್ಥೆಗಳ ಕಣ್ಗಾವಲಿನಿಂದ ತಪ್ಪಿಸಿಕೊಳ್ಳಲು ಹಾಗೂ ಅಕ್ರಮ ವಹಿವಾಟಿನಿಂದ ಗಳಿಸಿದ ಹಣದ ಮೂಲವನ್ನು ಮರೆಮಾಡಲು ಬಳಕೆದಾರರಿಗೆ ನೆರವಾಗುವ ಉದ್ದೇಶದಿಂದ ಮಾರುಕಟ್ಟೆಯನ್ನು ರೂಪಿಸಲಾಗಿತ್ತು ಎಂದು ನ್ಯಾಯಾಂಗ ಇಲಾಖೆ ತಿಳಿಸಿದೆ. ಕ್ರಿಪ್ಟೋಕರೆನ್ಸಿ ವಹಿವಾಟುಗಳನ್ನು ಪತ್ತೆಹಚ್ಚುವುದು ಕಷ್ಟವಾಗುವಂತೆ ಮಾಡಲು ‘ಟಂಬ್ಲಿಂಗ್’ ಮತ್ತು ‘ಮಿಕ್ಸಿಂಗ್’ ಸೇವೆಗಳನ್ನು ಬಳಸುವಂತೆ ಹಾಗೂ ಸಂವಹನದ ವೇಳೆ ಎನ್ಕ್ರಿಪ್ಷನ್ ಬಳಸುವಂತೆ ಬಳಕೆದಾರರಿಗೆ ಪ್ರೋತ್ಸಾಹಿಸಲಾಗಿತ್ತು.

►ಆಲ್ಫಾಬೇ ಮಾದರಿಯಲ್ಲಿ ರೂಪಿಸಿದ್ದ ಮಾರುಕಟ್ಟೆ

ಎಂಪೈರ್ ಮಾರ್ಕೆಟ್ ಅನ್ನು ‘ಆಲ್ಫಾಬೇ’ ಎಂಬ ಮತ್ತೊಂದು ಡಾರ್ಕ್‌ ವೆಬ್ ಮಾರುಕಟ್ಟೆಯ ಮಾದರಿಯಲ್ಲಿ ರೂಪಿಸಿ, ಅದೇ ರೀತಿಯಲ್ಲಿ ಪ್ರಚಾರ ಮಾಡಲಾಗಿತ್ತು. ಜೂನ್ 2016ರಿಂದ ಜುಲೈ 2017ರ ನಡುವೆ ಹ್ಯಾಮಿಲ್ಟನ್ ‘ಜೀರೋ ಏಂಜಲ್’ ಎಂಬ ಬಳಕೆದಾರ ಹೆಸರಿನಲ್ಲಿ ಆಲ್ಫಾಬೇಯಲ್ಲಿ ವಸ್ತುಗಳನ್ನು ಮಾರಾಟ ಮಾಡಿದ್ದರು.

ಎಂಪೈರ್ ನಂತಹ ಡಾರ್ಕ್‌ ವೆಬ್ ಮಾರುಕಟ್ಟೆಗಳನ್ನು ಸಾಮಾನ್ಯ ಇಂಟರ್ನೆಟ್ ಬ್ರೌಸರ್ಗಳ ಮೂಲಕ ನೇರವಾಗಿ ಪ್ರವೇಶಿಸಲು ಸಾಧ್ಯವಿಲ್ಲ. ಇಂತಹ ಜಾಲತಾಣಗಳನ್ನು ಪ್ರವೇಶಿಸಲು ಬಳಕೆದಾರರು ಸಾಮಾನ್ಯವಾಗಿ ‘ದಿ ಆನಿಯನ್ ರೌಟರ್’ (TOR) ಜಾಲವನ್ನು ಬಳಸುತ್ತಾರೆ. ಇದು ಬಳಕೆದಾರರ ಗುರುತು ಮತ್ತು ಇಂಟರ್ನೆಟ್ ಚಟುವಟಿಕೆಗಳನ್ನು ಮರೆಮಾಡಲು ನೆರವಾಗುವ ವ್ಯವಸ್ಥೆಯಾಗಿದೆ.

►ಹಠಾತ್ ಸ್ಥಗಿತ; ಎಕ್ಸಿಟ್ ಸ್ಕ್ಯಾಮ್ ಆರೋಪ

2020ರ ಆಗಸ್ಟ್ ನಲ್ಲಿ ಎಂಪೈರ್ ಮಾರ್ಕೆಟ್ ಯಾವುದೇ ಮುನ್ಸೂಚನೆ ನೀಡದೆ ಹಠಾತ್ತನೆ ಸ್ಥಗಿತಗೊಂಡಿತು. ಜಾಲತಾಣ ಮುಚ್ಚುವ ಮುನ್ನ ಅದರ ಮೇಲೆ ನಿರಂತರವಾಗಿ ‘ಡಿಸ್ಟ್ರಿಬ್ಯೂಟೆಡ್ ಡಿನಯಲ್ ಆಫ್ ಸರ್ವಿಸ್’ (DDoS) ದಾಳಿಗಳು ನಡೆದಿದ್ದವು. ಈ ದಾಳಿಯಲ್ಲಿ ಜಾಲತಾಣಕ್ಕೆ ಹೆಚ್ಚಿನ ಪ್ರಮಾಣದ ನಕಲಿ ಟ್ರಾಫಿಕ್ ಕಳುಹಿಸಿ, ಅದರ ಕಾರ್ಯನಿರ್ವಹಣೆಗೆ ಅಡ್ಡಿಪಡಿಸಲಾಗುತ್ತದೆ. ಜಾಲತಾಣದ ನಿರ್ವಾಹಕರಿಂದ ಹಣ ವಸೂಲಿ ಮಾಡಲು ಇಂತಹ ದಾಳಿಗಳನ್ನು ನಡೆಸಲಾಗುತ್ತದೆ.

ಜಾಲತಾಣ ಹಠಾತ್ತನೆ ಸ್ಥಗಿತಗೊಂಡಿದ್ದರಿಂದ ಬಳಕೆದಾರರಿಗೆ ತಮ್ಮ ಎಸ್ಕ್ರೊ ಖಾತೆಗಳಲ್ಲಿದ್ದ ಹಣವನ್ನು ಹಿಂಪಡೆಯಲು ಸಮಯ ಸಿಗಲಿಲ್ಲ. ಇದರಿಂದ ಜಾಲತಾಣದ ನಿರ್ವಾಹಕರು ಬಳಕೆದಾರರ ಹಣದೊಂದಿಗೆ ಪರಾರಿಯಾಗಿದ್ದಾರೆ ಎಂಬ ಆರೋಪ ಕೇಳಿಬಂದಿತ್ತು. ಆದರೆ, ಮಾಲೀಕರೇ ಹಣವನ್ನು ದೋಚಿದ್ದಾರೆ ಎಂಬ ಆರೋಪವನ್ನು ಸಾಬೀತಾದ ಸಂಗತಿಯೆಂದು ಪರಿಗಣಿಸಲಾಗದು.

ಡಾರ್ಕ್‌ ವೆಬ್ ಮಾರುಕಟ್ಟೆಗಳಲ್ಲಿ ಗ್ರಾಹಕರು ಪಾವತಿಸುವ ಕ್ರಿಪ್ಟೋಕರೆನ್ಸಿಯನ್ನು ವಸ್ತು ತಲುಪುವವರೆಗೆ ಮಧ್ಯಸ್ಥಿಕೆಯ ‘ಎಸ್ಕ್ರೊ’ ಖಾತೆಯಲ್ಲಿ ಇರಿಸಲಾಗುತ್ತದೆ. ವಹಿವಾಟು ಪೂರ್ಣಗೊಂಡ ಬಳಿಕ ಹಣವನ್ನು ಮಾರಾಟಗಾರನಿಗೆ ವರ್ಗಾಯಿಸಲಾಗುತ್ತದೆ. ಜಾಲತಾಣ ಹಠಾತ್ತನೆ ಸ್ಥಗಿತಗೊಂಡಾಗ ಇಂತಹ ಖಾತೆಗಳಲ್ಲಿದ್ದ ಹಣವನ್ನು ಹಿಂಪಡೆಯಲು ಬಳಕೆದಾರರಿಗೆ ಸಾಧ್ಯವಾಗದಿರಬಹುದು. ಈ ರೀತಿಯಲ್ಲಿ ಹಣದೊಂದಿಗೆ ಪರಾರಿಯಾಗುವ ವಂಚನೆಯನ್ನು ‘ಎಕ್ಸಿಟ್ ಸ್ಕ್ಯಾಮ್’ ಎಂದು ಕರೆಯಲಾಗುತ್ತದೆ.

►40 ವರ್ಷಗಳ ಜೈಲು ಶಿಕ್ಷೆ

ಮಾದಕ ದ್ರವ್ಯಗಳ ಸಂಚಿಗೆ ಸಂಬಂಧಿಸಿದ ಆರೋಪವನ್ನು ಹ್ಯಾಮಿಲ್ಟನ್ ಈ ವರ್ಷದ ಆರಂಭದಲ್ಲಿ ಒಪ್ಪಿಕೊಂಡಿದ್ದರು. ಅಕ್ರಮವಾಗಿ ಗಳಿಸಿದ ಹಣ ಮತ್ತು ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲು ಅವರು ಒಪ್ಪಿಕೊಂಡಿದ್ದರು. ಸುಮಾರು 1,230 ಬಿಟ್ಕಾಯಿನ್ಗಳು, 24.4 ಈಥರ್ ಮತ್ತು ವರ್ಜೀನಿಯಾದಲ್ಲಿರುವ ಮೂರು ಆಸ್ತಿಗಳು ಇದರಲ್ಲಿ ಸೇರಿವೆ.

ಅಮೆರಿಕದ ಜಿಲ್ಲಾ ನ್ಯಾಯಾಧೀಶ ಸ್ಟೀವನ್ ಸೀಗರ್ ಅವರು ಸೋಮವಾರ ಹ್ಯಾಮಿಲ್ಟನ್ಗೆ 40 ವರ್ಷಗಳ ಫೆಡರಲ್ ಜೈಲು ಶಿಕ್ಷೆ ವಿಧಿಸಿ, 5 ಮಿಲಿಯನ್ ಡಾಲರ್ ದಂಡ ಪಾವತಿಸುವಂತೆ ಆದೇಶಿಸಿದರು.

ಎಂಪೈರ್ ಮಾರ್ಕೆಟ್ ನ ಮತ್ತೊಬ್ಬ ಸಹ-ಸ್ಥಾಪಕ ಪಾವಿ ಕೂಡ ಫೆಡರಲ್ ಮಾದಕ ದ್ರವ್ಯಗಳ ಸಂಚಿನ ಆರೋಪವನ್ನು ಒಪ್ಪಿಕೊಂಡಿದ್ದಾರೆ. ಅವರಿಗೆ ಈ ತಿಂಗಳ ಕೊನೆಯಲ್ಲಿ ಶಿಕ್ಷೆ ಪ್ರಕಟವಾಗುವ ನಿರೀಕ್ಷೆಯಿದೆ ಎಂದು ಅಮೆರಿಕದ ನ್ಯಾಯಾಂಗ ಇಲಾಖೆ ತಿಳಿಸಿದೆ.