ಕ್ಷೇತ್ರ ಪುನರ್ವಿಂಗಡಣೆ ಮಸೂದೆಗೆ ಮರುಜೀವ ನೀಡಲು ಬಿಜೆಪಿ ಕಸರತ್ತು: ನವೆಂಬರ್ ನಲ್ಲಿ ವಿಶೇಷ ಅಧಿವೇಶನ ಸಾಧ್ಯತೆ

ಹೊಸದಿಲ್ಲಿ: ಎಪ್ರಿಲ್ ನಲ್ಲಿ ಲೋಕಸಭೆಯಲ್ಲಿ ಮುಖಭಂಗ ಅನುಭವಿಸಿದ್ದ ಕ್ಷೇತ್ರ ಪುನರ್ವಿಂಗಡಣೆ ಮಸೂದೆಯನ್ನು ಮತ್ತೆ ಅಂಗೀಕರಿಸಿಕೊಳ್ಳಲು ಬಿಜೆಪಿ ಹೊಸ ರಾಜಕೀಯ ಲೆಕ್ಕಾಚಾರ ಆರಂಭಿಸಿದೆ. ಇದಕ್ಕಾಗಿ ಡಿಸೆಂಬರ್ ನ ಚಳಿಗಾಲದ ಅಧಿವೇಶನಕ್ಕೂ ಮುನ್ನ ನವೆಂಬರ್ ನಲ್ಲಿ ಸಂಸತ್ತಿನ ವಿಶೇಷ ಅಧಿವೇಶನ ಕರೆಯುವ ಸಾಧ್ಯತೆಯನ್ನು ಸರ್ಕಾರ ಪರಿಶೀಲಿಸುತ್ತಿದೆ ಎಂದು ‘The Indian Express’ ವರದಿ ಮಾಡಿದೆ.

ವಿಶೇಷ ಅಧಿವೇಶನದಲ್ಲಿ ಕ್ಷೇತ್ರ ಪುನರ್ವಿಂಗಡಣೆ ಮಸೂದೆಯನ್ನು ಮತ್ತೆ ಮಂಡಿಸುವ ನಿರೀಕ್ಷೆಯಿದೆ. ಮಸೂದೆ ಅಂಗೀಕಾರಕ್ಕೆ ಲೋಕಸಭೆಯಲ್ಲಿ ಮೂರನೇ ಎರಡರಷ್ಟು ಬಹುಮತ ಅಂದರೆ 361 ಮತಗಳು ಬೇಕು. ಸದ್ಯ 319 ಸದಸ್ಯಬಲ ಹೊಂದಿರುವ NDAಗೆ ಇನ್ನೂ 42 ಮತಗಳ ಕೊರತೆಯಿದೆ. ಈ ಸಂಖ್ಯಾಬಲ ಕ್ರೋಡೀಕರಿಸಲು ಪ್ರಾದೇಶಿಕ ಪಕ್ಷಗಳ ಬೆಂಬಲ ಪಡೆಯುವ ಪ್ರಯತ್ನವನ್ನು ಬಿಜೆಪಿ ಮುಂದುವರಿಸಿದೆ.

ಮಸೂದೆ 15ರಿಂದ 18 ಮತಗಳ ಅಂತರದಲ್ಲಿ ಅಂಗೀಕಾರಗೊಳ್ಳಲಿದೆ ಎಂಬ ವಿಶ್ವಾಸವನ್ನು ಸರ್ಕಾರದ ಮೂಲಗಳು ವ್ಯಕ್ತಪಡಿಸಿವೆ ಎಂದು ವರದಿ ತಿಳಿಸಿದೆ. ಆದರೆ, ಬೆಂಬಲ ನೀಡಲಿರುವ ಸದಸ್ಯರ ನಿಖರ ಸಂಖ್ಯೆಯನ್ನು ಸರ್ಕಾರ ಬಹಿರಂಗಪಡಿಸಿಲ್ಲ.

►ನ. 18ರ ಸಂಪುಟ ಸಭೆ ಮೇಲೆ ನಿರೀಕ್ಷೆ

ನ. 18ರಂದು ನಡೆಯಲಿರುವ ಸಚಿವ ಸಂಪುಟ ಸಭೆಯಲ್ಲಿ ಮಸೂದೆ ಅಂಗೀಕಾರಕ್ಕೆ ರೂಪಿಸಬೇಕಾದ ಕಾರ್ಯತಂತ್ರ ಚರ್ಚೆಯಾಗುವ ನಿರೀಕ್ಷೆಯಿದೆ. ನ. 19 ಮತ್ತು 20ರಂದು ವಿಶೇಷ ಅಧಿವೇಶನ ನಡೆಸುವ ಸಾಧ್ಯತೆಯ ಬಗ್ಗೆಯೂ ಚರ್ಚೆ ನಡೆಯುತ್ತಿದೆ. ಹೀಗಾಗಿ, ಸಂಪುಟ ಸಭೆಯ ನಿರ್ಧಾರದತ್ತ ರಾಜಕೀಯ ವಲಯದ ಗಮನ ನೆಟ್ಟಿದೆ.

ಆ. 13ರಂದು ಅನಿರ್ದಿಷ್ಟಾವಧಿಗೆ ಮುಂದೂಡಲ್ಪಟ್ಟ ಸಂಸತ್ತಿನ ಮುಂಗಾರು ಅಧಿವೇಶನ ಇನ್ನೂ ಅಧಿಕೃತವಾಗಿ ಮುಕ್ತಾಯಗೊಂಡಿಲ್ಲ. ಅಧಿವೇಶನ ಸಮಾಪ್ತಿಯಾಗಿ 91 ದಿನಗಳು ಕಳೆದಿರುವುದು ದಾಖಲೆಯಾಗಿದೆ. ಹೀಗಾಗಿ, ಹಾಲಿ ಅಧಿವೇಶನವನ್ನು ಮುಂದುವರಿಸಿ ಸಂಸತ್ತನ್ನು ಕರೆಯುವ ಅವಕಾಶ ಸರ್ಕಾರಕ್ಕಿದೆ. ಇದಕ್ಕೆ ಕನಿಷ್ಠ ಎರಡು ದಿನಗಳ ಮುನ್ಸೂಚನೆ ಸಾಕಾಗುತ್ತದೆ. ಹೊಸ ಅಧಿವೇಶನ ಕರೆಯಲು ಕನಿಷ್ಠ 14 ದಿನಗಳ ಮುನ್ಸೂಚನೆ ನೀಡಬೇಕಾಗುತ್ತದೆ. ವಿಶೇಷ ಅಧಿವೇಶನದ ದಿನಾಂಕ ಮತ್ತು ಅವಧಿಯನ್ನು ಸರ್ಕಾರದ ಮೂಲಗಳು ಇನ್ನೂ ಖಚಿತಪಡಿಸಿಲ್ಲ.

►TMK ಬಂಡಾಯ ಸಂಸದರು, DMK ಬೆಂಬಲದ ಲೆಕ್ಕಾಚಾರ

ಬಹುಮತದ ಕೊರತೆ ನೀಗಿಸಲು ಬಿಜೆಪಿ TMKಯಲ್ಲಿನ ವಿಭಜನೆ ಮತ್ತು ತಮಿಳುನಾಡಿನ ಬದಲಾದ ರಾಜಕೀಯ ಸಮೀಕರಣವನ್ನು ಬಳಸಿಕೊಳ್ಳಲು ಮುಂದಾಗಿದೆ.

ಪಶ್ಚಿಮ ಬಂಗಾಳ ಚುನಾವಣೆ ಬಳಿಕ TMKಯ 20 ಸಂಸದರು ಪಕ್ಷ ತೊರೆದು NDA ಸೇರಿದ್ದಾರೆ ಎಂದು ವರದಿ ತಿಳಿಸಿದೆ. ಇನ್ನು 22 ಸಂಸದರನ್ನು ಹೊಂದಿರುವ DMK ಇಂಡಿಯಾ ಮೈತ್ರಿಕೂಟದಿಂದ ಹೊರಗುಳಿದಿದೆ. ಈ ಬೆಳವಣಿಗೆಗಳನ್ನು ತನ್ನ ಪರವಾಗಿ ಬಳಸಿಕೊಳ್ಳಲು ಬಿಜೆಪಿ ಪ್ರಯತ್ನಿಸುತ್ತಿದೆ.

TMKಯಿಂದ ಹೊರಬಂದಿರುವ 20 ಸಂಸದರು ಮತ್ತು DMKಯ 22 ಸಂಸದರ ಬೆಂಬಲ ದೊರೆತರೆ NDAಗೆ ಅಗತ್ಯವಿರುವ 361 ಮತಗಳ ಗುರಿ ತಲುಪಲು ಸಾಧ್ಯವಾಗಲಿದೆ. ಆದರೆ, 1971ರ ಜನಗಣತಿಯ ಆಧಾರದಲ್ಲಿ ತಮಿಳುನಾಡಿನ ಲೋಕಸಭಾ ಸ್ಥಾನಗಳ ಪ್ರಮಾಣವನ್ನು ರಕ್ಷಿಸಬೇಕೆಂದು ಪಟ್ಟು ಹಿಡಿದಿರುವ DMK, ಬಿಜೆಪಿಗೆ ಇದುವರೆಗೆ ಬೇಷರತ್ತಿನ ಬೆಂಬಲ ಘೋಷಿಸಿಲ್ಲ. ಹೀಗಾಗಿ, DMKಯ ನಿಲುವು ನಿರ್ಣಾಯಕವಾಗುವ ಸಾಧ್ಯತೆಯಿದೆ.

ಎಪ್ರಿಲ್ 17ರಂದು ಮಹಿಳಾ ಮೀಸಲು ವಿಧೇಯಕ ಮತ್ತು ಕ್ಷೇತ್ರ ಪುನರ್ವಿಂಗಡಣೆಗೆ ಸಂಬಂಧಿಸಿದ ಸಂವಿಧಾನ ತಿದ್ದುಪಡಿ ವಿಧೇಯಕಗಳು ಅಗತ್ಯ ಸಂಖ್ಯಾಬಲದ ಕೊರತೆಯಿಂದ ಲೋಕಸಭೆಯಲ್ಲಿ ಸೋಲು ಕಂಡಿದ್ದವು. ಆ ಬಳಿಕ ಬಿಜೆಪಿ, ಇಂಡಿಯಾ ಮೈತ್ರಿಕೂಟದ ಹಲವು ಪಾಲುದಾರ ಪಕ್ಷಗಳೊಂದಿಗೆ ಸಂಪರ್ಕದಲ್ಲಿದ್ದು, ಮಸೂದೆಗೆ ಬೆಂಬಲ ಕ್ರೋಡೀಕರಿಸಲು ಪ್ರಯತ್ನಿಸುತ್ತಿದೆ.

ಇನ್ನೊಂದೆಡೆ, ವಿಶೇಷ ಅಧಿವೇಶನ ಕರೆಯುವ ಮೊದಲು ಸರ್ವಪಕ್ಷಗಳ ಸಭೆ ನಡೆಸಬೇಕು ಎಂದು ಕಾಂಗ್ರೆಸ್ ಒತ್ತಾಯಿಸಿದೆ. ಹೀಗಾಗಿ, ಮಸೂದೆಗೆ ಅಗತ್ಯ ಬೆಂಬಲ ದೊರೆಯಲಿದೆಯೇ ಮತ್ತು ಸರ್ಕಾರದ ವಿಶೇಷ ಅಧಿವೇಶನದ ಯೋಜನೆ ಕಾರ್ಯರೂಪಕ್ಕೆ ಬರಲಿದೆಯೇ ಎಂಬುದು ಕುತೂಹಲ ಮೂಡಿಸಿದೆ.