ಯುಕೆ ಮಾಧ್ಯಮಗಳಲ್ಲಿ ಮುಸ್ಲಿಮರ ವಿರುದ್ಧ ಪಕ್ಷಪಾತದ ವರದಿ: 40 ಸಾವಿರ ಲೇಖನಗಳ ಅಧ್ಯಯನದಲ್ಲಿ ಬಹಿರಂಗ

ಲಂಡನ್: ಬ್ರಿಟನ್‌ ನಲ್ಲಿ ಮುಸ್ಲಿಮರ ವಿರುದ್ಧದ ದ್ವೇಷ ಅಪರಾಧಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ದೇಶದ ಮಾಧ್ಯಮಗಳಲ್ಲಿ ಮುಸ್ಲಿಮರು ಮತ್ತು ಇಸ್ಲಾಂ ಕುರಿತು ಪಕ್ಷಪಾತದ ವರದಿಗಳು ಹೆಚ್ಚಾಗಿವೆ ಎಂದು ಹೊಸ ಅಧ್ಯಯನವೊಂದು ಹೇಳಿದೆ ಎಂದು aljazeera.com ವರದಿ ಮಾಡಿದೆ.

ಮಾಧ್ಯಮಗಳಲ್ಲಿ ಮುಸ್ಲಿಮರು ಮತ್ತು ಇಸ್ಲಾಂ ಅನ್ನು ಹೇಗೆ ಚಿತ್ರಿಸಲಾಗುತ್ತಿದೆ ಎಂಬುದನ್ನು ಪರಿಶೀಲಿಸುವ ಲಾಭರಹಿತ ಸಂಸ್ಥೆಯಾದ ಸೆಂಟರ್ ಫಾರ್ ಮೀಡಿಯಾ ಮಾನಿಟರಿಂಗ್ ವರದಿ ಬಿಡುಗಡೆ ಮಾಡಿದೆ. ಸುಮಾರು 30 ಮಾಧ್ಯಮ ಸಂಸ್ಥೆಗಳಲ್ಲಿ ಪ್ರಕಟವಾದ 40 ಸಾವಿರಕ್ಕೂ ಹೆಚ್ಚು ಲೇಖನಗಳನ್ನು ಪರಿಶೀಲಿಸಿದಾಗ, 70 ಶೇಕಡಕ್ಕೂ ಹೆಚ್ಚು ಲೇಖನಗಳಲ್ಲಿ ಮುಸ್ಲಿಮರು ಅಥವಾ ಇಸ್ಲಾಂ ಅನ್ನು ನಕಾರಾತ್ಮಕವಾಗಿ ಚಿತ್ರಿಸಲಾಗಿದೆ ಎಂದು ವರದಿ ತಿಳಿಸಿದೆ.

‘ಯುಕೆಯಲ್ಲಿ ಇದುವರೆಗೆ ನಡೆದ ಈ ರೀತಿಯ ಅತಿದೊಡ್ಡ ಅಧ್ಯಯನವಾಗಿದ್ದು, ಯುಕೆ ಪತ್ರಿಕೆಗಳಲ್ಲಿ ಮುಸ್ಲಿಮರನ್ನು ಹೇಗೆ ಚಿತ್ರಿಸಲಾಗುತ್ತಿದೆ ಎಂಬುದರಲ್ಲಿ ರಚನಾತ್ಮಕ ಪಕ್ಷಪಾತವಿರುವುದಕ್ಕೆ ಈ ವರದಿ ಆಳವಾದ ಪುರಾವೆ ಒದಗಿಸುತ್ತದೆ’ ಎಂದು ಸಂಸ್ಥೆಯ ನಿರ್ದೇಶಕಿ ರಿಝ್ವಾನಾ ಹಮೀದ್ ತಿಳಿಸಿದ್ದಾರೆ.

ಯುಕೆಯಲ್ಲಿ ಮುಸ್ಲಿಮರ ಬಗ್ಗೆ ಪ್ರಕಟವಾದ ಲೇಖನಗಳಲ್ಲಿ ಸುಮಾರು ಅರ್ಧದಷ್ಟು ಅಥವಾ 20 ಸಾವಿರದಷ್ಟು ಲೇಖನಗಳು ‘ಹೆಚ್ಚಿನ ಮಟ್ಟದ ಪಕ್ಷಪಾತ’ ಹೊಂದಿವೆ ಎಂದು ವರದಿ ಹೇಳಿದೆ.

ಈ ಅಂಕಿ ಅಂಶಗಳು ದೇಶದ ಮಾಧ್ಯಮಗಳಲ್ಲಿ ಒಂದು ವ್ಯವಸ್ಥಿತ ಸಮಸ್ಯೆ ಇದೆ ಎಂಬುದನ್ನು ತೋರಿಸುತ್ತವೆ ಎಂದು ಹಮೀದ್ ಹೇಳಿದ್ದಾರೆ. ಮುಸ್ಲಿಮರನ್ನು ಪದೇಪದೇ ಅನುಮಾನ ಅಥವಾ ಬೆದರಿಕೆಯ ದೃಷ್ಟಿಯಿಂದ ಚಿತ್ರಿಸಿದರೆ, ಅದು ಸಾರ್ವಜನಿಕರ ಅಭಿಪ್ರಾಯ, ರಾಜಕೀಯ ಚರ್ಚೆ ಮತ್ತು ಬ್ರಿಟನ್‌ನ ಮುಸ್ಲಿಮರ ದೈನಂದಿನ ಜೀವನದ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅವರು ಹೇಳಿದ್ದಾರೆ. ಮಾಧ್ಯಮಗಳು ಮುಸ್ಲಿಮರನ್ನು ಕೆಟ್ಟ ರೀತಿಯಲ್ಲಿ ತೋರಿಸಿದರೆ, ಜನರ ಅಭಿಪ್ರಾಯ ಮತ್ತು ಅವರ ಜೀವನದ ಮೇಲೂ ಪರಿಣಾಮ ಬೀರುತ್ತದೆ.

ವರದಿ ಪ್ರಕಾರ, ಬಲಪಂಥೀಯ ಮತದಾರರ ಕಾಳಜಿ ಮತ್ತು ಹಿತಾಸಕ್ತಿಗಳನ್ನು ಪ್ರತಿಬಿಂಬಿಸುವ ಮಾಧ್ಯಮಗಳು ಮುಸ್ಲಿಮರ ಬಗ್ಗೆ ಪಕ್ಷಪಾತದ ವರದಿಗಳನ್ನು ಪ್ರಕಟಿಸುವ ಸಾಧ್ಯತೆ ಹೆಚ್ಚು.

ಈ ಹಿನ್ನೆಲೆಯಲ್ಲಿ ದಿ ಸ್ಪೆಕ್ಟೇಟರ್ ನಿಯತಕಾಲಿಕೆ ಮತ್ತು ಜಿಬಿ ನ್ಯೂಸ್ ಟೆಲಿವಿಷನ್ ಚಾನೆಲ್‌ಗಳನ್ನು ಮುಸ್ಲಿಮರ ಬಗ್ಗೆ ಪಕ್ಷಪಾತದ ವರದಿಯಲ್ಲಿ ಅತಿ ಕೆಟ್ಟ ಮಾಧ್ಯಮಗಳಾಗಿ ವರದಿ ಗುರುತಿಸಿದೆ. ನಕಾರಾತ್ಮಕ ವರದಿ, ಸಾಮಾನ್ಯೀಕರಣ, ತಪ್ಪು ನಿರೂಪಣೆ, ಸಂದರ್ಭದ ಲೋಪ ಹಾಗೂ ಸಮಸ್ಯಾತ್ಮಕ ಶೀರ್ಷಿಕೆಗಳು ಸೇರಿದಂತೆ ಐದು ವಿಭಾಗಗಳಲ್ಲಿ ಈ ಎರಡು ಮಾಧ್ಯಮಗಳು ಮುಸ್ಲಿಮರ ಬಗ್ಗೆ ಹೆಚ್ಚು ತಪ್ಪಾಗಿ ಅಥವಾ ಪಕ್ಷಪಾತದಿಂದ ವರದಿ ಮಾಡುತ್ತವೆ ಎಂದು ಅಧ್ಯಯನ ಹೇಳುತ್ತದೆ.

ಇದೇ ರೀತಿಯ ವರದಿಗಳನ್ನು ಪ್ರಕಟಿಸಿರುವ ಮಾಧ್ಯಮಗಳ ಪಟ್ಟಿಯಲ್ಲಿ ದಿ ಟೆಲಿಗ್ರಾಫ್, ಯಹೂದಿ ಕ್ರಾನಿಕಲ್, ಡೈಲಿ ಎಕ್ಸ್‌ಪ್ರೆಸ್, ದಿ ಸನ್, ಡೈಲಿ ಮೇಲ್ ಹಾಗೂ ದಿ ಟೈಮ್ಸ್ ಕೂಡ ಸೇರಿವೆ. ‘ಈ ಮಾಧ್ಯಮಗಳಲ್ಲಿ ಕಂಡುಬರುವ ಹಾನಿಕಾರಕ ವರದಿ ಆಕಸ್ಮಿಕವಲ್ಲ’ ಎಂದು ವರದಿ ಹೇಳಿದೆ.

ಇನ್ನೊಂದೆಡೆ, ಮುಸ್ಲಿಮರು ಹಾಗೂ ಇಸ್ಲಾಂ ಕುರಿತು ಕೆಣಕುವ ಅಥವಾ ಪಕ್ಷಪಾತದ ವರದಿಗಳನ್ನು ಪ್ರಕಟಿಸುವ ಸಾಧ್ಯತೆ ಕಡಿಮೆ ಇರುವ ಮಾಧ್ಯಮಗಳಲ್ಲಿ ಐಟಿವಿ, ಮೆಟ್ರೋ, ಬಿಬಿಸಿ, ಪಿಎ ಸುದ್ದಿ ಸಂಸ್ಥೆ, ದಿ ಗಾರ್ಡಿಯನ್, ಅಸೋಸಿಯೇಟೆಡ್ ಪ್ರೆಸ್, ಲಂಡನ್ ಈವ್ನಿಂಗ್ ಸ್ಟ್ಯಾಂಡರ್ಡ್ ಹಾಗೂ ಸ್ಕೈ ನ್ಯೂಸ್ ಸೇರಿವೆ ಎಂದು ವರದಿ ತಿಳಿಸಿದೆ.

ದ್ವೇಷ ಮತ್ತು ಜನಾಂಗೀಯತೆಯ ಏರಿಕೆ:

ಬ್ರಿಟನ್‌ ನಾದ್ಯಂತ ಮುಸ್ಲಿಮರು ಹೆಚ್ಚುತ್ತಿರುವ ದ್ವೇಷವನ್ನು ಎದುರಿಸುತ್ತಿರುವ ಸಂದರ್ಭದಲ್ಲಿ ಈ ಅಧ್ಯಯನ ಬಿಡುಗಡೆಯಾಗಿದೆ. ತೀವ್ರ ಬಲಪಂಥೀಯ ಸಾರ್ವಜನಿಕ ವ್ಯಕ್ತಿಗಳ ಜನಪ್ರಿಯತೆ ಹೆಚ್ಚುತ್ತಿರುವುದು ಮತ್ತು ವಲಸೆ ವಿರೋಧಿ ಭಾವನೆಗಳು ಏರುತ್ತಿರುವುದು ಇದಕ್ಕೆ ಕಾರಣವೆಂದು ವರದಿ ಹೇಳಿದೆ.

‘ಮುಸ್ಲಿಮರ ನಕಾರಾತ್ಮಕ ಚಿತ್ರಣಗಳು ಮತ್ತು ಹೆಚ್ಚುತ್ತಿರುವ ದ್ವೇಷ ಅಪರಾಧಗಳು, ಉದ್ಯೋಗ ತಾರತಮ್ಯ ಹಾಗೂ ನಿರ್ಬಂಧಿತ ನೀತಿಗಳಿಗೆ ಬೆಂಬಲದ ನಡುವೆ ಸಂಬಂಧವಿದೆ ಎಂದು ವ್ಯಾಪಕ ಸಂಶೋಧನೆಗಳು ತೋರಿಸಿವೆ’ ಎಂದು ವರದಿ ತಿಳಿಸಿದೆ.

ಯುಕೆ ಗೃಹ ಕಚೇರಿ ಮಾಹಿತಿ ಪ್ರಕಾರ, ಮಾರ್ಚ್ 2025ಕ್ಕೆ ಅಂತ್ಯಗೊಂಡ ವರ್ಷದ ಅವಧಿಯಲ್ಲಿ ಮುಸ್ಲಿಮರ ವಿರುದ್ಧದ ಧಾರ್ಮಿಕ ದ್ವೇಷ ಅಪರಾಧಗಳು ಶೇಕಡಾ 19ರಷ್ಟು ಹೆಚ್ಚಿವೆ. 2024ರಲ್ಲಿ ಸೌತ್‌ ಪೋರ್ಟ್‌ ನಲ್ಲಿ ಹುಡುಗಿಯರ ನೃತ್ಯ ತರಗತಿ ನಡೆಯುತ್ತಿದ್ದ ವೇಳೆ ನಡೆದ ಸಾಮೂಹಿಕ ಇರಿತದ ಘಟನೆ ಬಳಿಕ ಮುಸ್ಲಿಂ ವಿರೋಧಿ ದ್ವೇಷ ಅಪರಾಧಗಳು ಹೆಚ್ಚಾಗಿವೆ ಎಂದು ಗೃಹ ಕಚೇರಿ ತಿಳಿಸಿದೆ. ಈ ಘಟನೆಗೆ ಸಂಬಂಧಿಸಿ ಸಾಮಾಜಿಕ ಮಾಧ್ಯಮದಲ್ಲಿ ಕೆಲವರು ದಾಳಿಯನ್ನು ಮುಸ್ಲಿಂ ವಲಸಿಗರೊಂದಿಗೆ ತಳುಕು ಹಾಕಿ ತಪ್ಪು ಮಾಹಿತಿ ಹರಡಿದ್ದರು ಎಂದು ವರದಿ ಹೇಳಿದೆ.

ಇತ್ತೀಚಿನ ಅವಧಿಯಲ್ಲಿ ಮಸೀದಿಗಳನ್ನು ಗುರಿಯಾಗಿಸಿ ದಾಳಿಗಳು ನಡೆದಿವೆ. ಜೊತೆಗೆ ತೀವ್ರ ಬಲಪಂಥೀಯ ರಿಫಾರ್ಮ್ ಯುಕೆ ಪಕ್ಷದ ಬೆಳವಣಿಗೆಯೊಂದಿಗೆ ಬ್ರಿಟಿಷ್ ಮುಸ್ಲಿಮರು ಹಾಗೂ ಇತರ ಜನಾಂಗೀಯ ಅಲ್ಪಸಂಖ್ಯಾತ ಸಮುದಾಯಗಳಲ್ಲಿ ಅಶಾಂತಿ ಮತ್ತು ಅಭದ್ರತೆಯ ಭಾವನೆ ಹೆಚ್ಚುತ್ತಿದೆ ಎಂದು ವರದಿ ತಿಳಿಸಿದೆ.

ವೀಕ್ಷಕರ ಪ್ರಕಾರ, ಯುಕೆಯಲ್ಲಿ ಮತ್ತೆ ಕಾಣಿಸಿಕೊಳ್ಳುತ್ತಿರುವ ಈ ಜನಾಂಗೀಯತೆ 1970 ಮತ್ತು 1980ರ ದಶಕಗಳಲ್ಲಿ ಕಂಡುಬಂದ ತಾರತಮ್ಯದ ಪ್ರತಿಧ್ವನಿಗಳನ್ನು ನೆನಪಿಸುತ್ತದೆ. ಈ ಕುರಿತು ಮಾತನಾಡಿದ್ದ ಪ್ರಧಾನಿ ಕೀರ್ ಸ್ಟಾರ್ಮರ್, ‘ಇದು ನಮ್ಮ ದೇಶವನ್ನು ಹರಿದು ಹಾಕುತ್ತಿದೆ’ ಎಂದು ಕಳೆದ ವರ್ಷದ ಕೊನೆಯಲ್ಲಿ ಐಟಿವಿಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

ಟ್ರಂಪ್ ಹೇಳಿಕೆ ಉದಾಹರಣೆ:

ಸೆಂಟರ್ ಫಾರ್ ಮೀಡಿಯಾ ಮಾನಿಟರಿಂಗ್ ವರದಿಯಲ್ಲಿ ಒಂದು ಉದಾಹರಣೆಯಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಲಂಡನ್ ಕುರಿತು ಮಾಡಿದ ಹೇಳಿಕೆಯನ್ನು ಉಲ್ಲೇಖಿಸಲಾಗಿದೆ. ಲಂಡನ್ ನಗರವನ್ನು ‘ಶರಿಯಾ ಕಾನೂನು ಆಳುತ್ತಿದೆ’ ಎಂಬ ಟ್ರಂಪ್ ಹೇಳಿಕೆಯನ್ನು ಕೆಲವು ಬಲಪಂಥೀಯ ಮಾಧ್ಯಮಗಳು ಹೆಚ್ಚಾಗಿ ಪ್ರಸಾರ ಮಾಡಿವೆ ಎಂದು ವರದಿ ಹೇಳಿದೆ.

ಸೆಪ್ಟೆಂಬರ್‌ ನಲ್ಲಿ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಮಾತನಾಡಿದ್ದ ಟ್ರಂಪ್, ‘ಲಂಡನ್‌ ನಲ್ಲಿ ಭಯಾನಕ ಮೇಯರ್ ಇದ್ದಾರೆ. ನಗರ ತುಂಬಾ ಬದಲಾಗಿದೆ. ಈಗ ಅವರು ಶರಿಯಾ ಕಾನೂನಿನತ್ತ ಹೋಗಲು ಬಯಸುತ್ತಾರೆ. ಆದರೆ ನೀವು ಬೇರೆ ದೇಶದಲ್ಲಿದ್ದೀರಿ; ಅದನ್ನು ಮಾಡಲು ಸಾಧ್ಯವಿಲ್ಲ’ ಎಂದು ಹೇಳಿದ್ದರು.

ಈ ಹೇಳಿಕೆಯನ್ನು ಮೆಟ್ರೋ ಪತ್ರಿಕೆ ಫ್ಯಾಕ್ಟ್ ಚೆಕ್ ಮಾಡಿತು. ದಿ ಇಂಡಿಪೆಂಡೆಂಟ್ ಅದರ ಹಿನ್ನೆಲೆ ವಿವರಿಸಿತು. ಆದರೆ ಡೈಲಿ ಎಕ್ಸ್‌ಪ್ರೆಸ್ ಸೇರಿದಂತೆ ಕೆಲವು ಅಭಿಪ್ರಾಯ ಪ್ರಧಾನ ಮಾಧ್ಯಮಗಳು ಆ ಪಿತೂರಿ ಹೇಳಿಕೆಯನ್ನು ಸತ್ಯದಂತೆ ಪ್ರಸಾರ ಮಾಡಿವೆ ಎಂದು ವರದಿ ತಿಳಿಸಿದೆ.

‘ಆಧಾರರಹಿತ ಹೇಳಿಕೆಗಳನ್ನು ಚರ್ಚೆಯ ವಿಷಯವಾಗಿ ಪ್ರಸ್ತುತಪಡಿಸುವುದು ತಪ್ಪು ಮಾಹಿತಿಯನ್ನು ಸಾಮಾನ್ಯಗೊಳಿಸುತ್ತದೆ ಎಂದು ಸಂಸ್ಥೆ ಹೇಳಿದೆ. ಇದರಿಂದ ಮುಸ್ಲಿಂ ವಿರೋಧಿ ನಿರೂಪಣೆಗಳಿಗೆ ಉತ್ತೇಜನ ಸಿಗುತ್ತದೆ. ಆದ್ದರಿಂದ ಸುಳ್ಳು ಹೇಳಿಕೆಗಳನ್ನು ಮಾಧ್ಯಮಗಳು ನಿರ್ಣಾಯಕವಾಗಿ ಪ್ರಶ್ನಿಸುವ ಜವಾಬ್ದಾರಿ ಹೊಂದಿವೆ ಎಂದು ಸಂಸ್ಥೆ ತಿಳಿಸಿದೆ.