ಎಸ್‌ಸಿ, ಎಸ್‌ಟಿ ಮೀಸಲಾತಿಗೆ 'ಕೆನೆಪದರ' ಅನ್ವಯಿಸುವುದಿಲ್ಲ ಎಂದು ಕೇಂದ್ರ ಸರ್ಕಾರ ಹೇಳಲು ಕಾರಣಗಳೇನು?

ಪರಿಶಿಷ್ಟ ಜಾತಿ (SC) ಮತ್ತು ಪರಿಶಿಷ್ಟ ಪಂಗಡಗಳ (ST) ಮೀಸಲಾತಿಯಲ್ಲಿ 'ಕೆನೆಪದರ' (creamy layer) ನಿಯಮವನ್ನು ಜಾರಿಗೆ ತರಬೇಕು ಎಂಬ ಕೋರಿಕೆಯನ್ನು ಕೇಂದ್ರ ಸರ್ಕಾರ ವಿರೋಧಿಸಿದೆ. ಈ ಕುರಿತು ಸುಪ್ರೀಂ ಕೋರ್ಟ್‌ಗೆ ಸಲ್ಲಿಸಿರುವ ಪ್ರಮಾಣಪತ್ರದಲ್ಲಿ ಸ್ಪಷ್ಟನೆ ನೀಡಿರುವ ಕೇಂದ್ರವು, ಈ ಸಮುದಾಯಗಳು ಅನುಭವಿಸಿದ ಅನ್ಯಾಯ ಮತ್ತು ಸಾಮಾಜಿಕ ಹಿನ್ನಡೆಯನ್ನು ಕೇವಲ ಆರ್ಥಿಕ ಹಿಂದುಳಿದಿರುವಿಕೆಗೆ ಹೋಲಿಸಲು ಸಾಧ್ಯವಿಲ್ಲ ಎಂದು ಹೇಳಿದೆ. ಜೊತೆಗೆ, ಮೀಸಲಾತಿ ನೀತಿಯಲ್ಲಿ ಬದಲಾವಣೆ ಮಾಡುವ ಅಧಿಕಾರ ಸಂಸತ್ತಿಗೆ ಇದೆಯೇ ಹೊರತು ನ್ಯಾಯಾಲಯಗಳಿಗಲ್ಲ ಎಂದಿದೆ.

ಬಿಜೆಪಿ ನಾಯಕ ಹಾಗೂ ವಕೀಲ ಅಶ್ವಿನಿ ಕುಮಾರ್ ಉಪಾಧ್ಯಾಯ ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಗೆ ಪ್ರತಿಕ್ರಿಯೆಯಾಗಿ ಸರ್ಕಾರ ಈ ವಿವರಣೆ ನೀಡಿದೆ. ಎಸ್‌ಸಿ ಮತ್ತು ಎಸ್‌ಟಿ ವರ್ಗಗಳಲ್ಲಿರುವ ಆರ್ಥಿಕವಾಗಿ ಸಬಲರಾದ ಕುಟುಂಬಗಳೇ ಮೀಸಲಾತಿಯ ಹೆಚ್ಚಿನ ಸೌಲಭ್ಯಗಳನ್ನು ಪಡೆದುಕೊಳ್ಳುತ್ತಿದ್ದು, ಇದರಿಂದಾಗಿ ಅತ್ಯಂತ ಹಿಂದುಳಿದ ವರ್ಗದವರಿಗೆ ಶಿಕ್ಷಣ ಮತ್ತು ಸರ್ಕಾರಿ ಉದ್ಯೋಗಾವಕಾಶಗಳು ಸಿಗುತ್ತಿಲ್ಲ ಎಂದು ಅರ್ಜಿಯಲ್ಲಿ ವಾದಿಸಲಾಗಿತ್ತು. ಹೀಗಾಗಿ, ಇತರೆ ಹಿಂದುಳಿದ ವರ್ಗಗಳು (ಒಬಿಸಿ) ಮತ್ತು ಆರ್ಥಿಕವಾಗಿ ಹಿಂದುಳಿದ ವಿಭಾಗಗಳಂತೆ (ಇಡಬ್ಲ್ಯೂಎಸ್) ಎಲ್ಲಾ ಕಾಯ್ದಿರಿಸಿದ ವರ್ಗಗಳಿಗೂ ಆದಾಯ ಆಧಾರಿತ ಆದ್ಯತೆಯನ್ನು ಜಾರಿಗೆ ತರಬೇಕು ಎಂದು ಕೋರಲಾಗಿತ್ತು.

ಎಸ್‌ಸಿ ಮತ್ತು ಎಸ್‌ಟಿ ವರ್ಗಗಳ ಒಳಮೀಸಲಾತಿಗೆ ಅನುಮತಿ ನೀಡಿ 2024 ಆಗಸ್ಟ್‌ನಲ್ಲಿ ಸುಪ್ರೀಂ ಕೋರ್ಟ್ ನೀಡಿದ್ದ ತೀರ್ಪನ್ನು ಅರ್ಜಿದಾರರು ಆಧರಿಸಿದ್ದಾರೆ. ಆ ಪ್ರಕರಣದಲ್ಲಿ, ಏಳು ನ್ಯಾಯಮೂರ್ತಿಗಳ ಸಂವಿಧಾನ ಪೀಠದಲ್ಲಿದ್ದ ನಾಲ್ವರು ನ್ಯಾಯಮೂರ್ತಿಗಳು ಈ ವರ್ಗಗಳಿಗೂ ಕೆನೆಪದರ ಸಿದ್ಧಾಂತವನ್ನು ವಿಸ್ತರಿಸಬಹುದು ಎಂದು ಅಭಿಪ್ರಾಯಪಟ್ಟಿದ್ದರು. ಈ ಹೇಳಿಕೆಗಳನ್ನು ಆಧಾರವಾಗಿಟ್ಟುಕೊಂಡು, ಸಾಮಾಜಿಕವಾಗಿ ಮತ್ತು ಆರ್ಥಿಕವಾಗಿ ಮುಂಚೂಣಿಯಲ್ಲಿರುವವರನ್ನು ಮೀಸಲಾತಿ ಸೌಲಭ್ಯಗಳಿಂದ ಹೊರಗಿಡಬೇಕು ಎಂದು ಅರ್ಜಿಯಲ್ಲಿ ಮನವಿ ಮಾಡಲಾಗಿದೆ. ಈಗಾಗಲೇ ಸಾಮಾಜಿಕವಾಗಿ ಮುನ್ನಡೆ ಸಾಧಿಸಿರುವವರಿಗೂ ಮೀಸಲಾತಿ ವಿಸ್ತರಿಸುವುದರಿಂದ ಸಾಮಾಜಿಕ ನ್ಯಾಯದ ಮೂಲ ಉದ್ದೇಶವೇ ಹಾಳಾಗುತ್ತದೆ ಎಂಬುದು ಉಪಾಧ್ಯಾಯ ಅವರ ವಾದವಾಗಿದೆ.

►ಅನ್ಯಾಯ vs ಆರ್ಥಿಕ ಸ್ಥಿತಿಗತಿಯ ವ್ಯತ್ಯಾಸ

ತನ್ನ ಅಫಿಡವಿಟ್ ನಲ್ಲಿ ಕೇಂದ್ರ ಸರ್ಕಾರವು ಎಸ್‌ಸಿ, ಎಸ್‌ಟಿ ವರ್ಗಗಳನ್ನು ಗುರುತಿಸುವ ಮಾನದಂಡಗಳು ಹಾಗೂ ಒಬಿಸಿ (ಇತರೆ ಹಿಂದುಳಿದ ವರ್ಗಗಳು) ವರ್ಗಗಳನ್ನು ಗುರುತಿಸುವ ಮಾನದಂಡಗಳ ನಡುವಿನ ವ್ಯತ್ಯಾಸವನ್ನು ಸ್ಪಷ್ಟಪಡಿಸಿದೆ.

ಅಸ್ಪೃಶ್ಯತೆಯ ಆಚರಣೆಯಿಂದಾಗಿ ಎಸ್‌ಸಿ ಸಮುದಾಯಗಳು 'ಹಿಂದಿನಿಂದಲೂ ಅನ್ಯಾಯ ಮತ್ತು ಸಾಮಾಜಿಕ ಹಿನ್ನಡೆ' ಅನುಭವಿಸಿವೆ ಎಂದು ಸರ್ಕಾರ ತಿಳಿಸಿದೆ. ಅದೇ ರೀತಿ, ಎಸ್‌ಟಿ ಸಮುದಾಯಗಳನ್ನು ಅವುಗಳ 'ವಿಶಿಷ್ಟ ಸಂಸ್ಕೃತಿ, ಭೌಗೋಳಿಕ ಪ್ರತ್ಯೇಕತೆ ಮತ್ತು ಹಿಂದುಳಿದಿರುವಿಕೆ'ಯ ಆಧಾರದ ಮೇಲೆ ಗುರುತಿಸಲಾಗುತ್ತದೆ. ಇದಕ್ಕೆ ವ್ಯತಿರಿಕ್ತವಾಗಿ, ಒಬಿಸಿ ಸಮುದಾಯಗಳನ್ನು ಮುಖ್ಯವಾಗಿ ಸಾಮಾಜಿಕ, ಶೈಕ್ಷಣಿಕ ಮತ್ತು ಆರ್ಥಿಕ ಹಿಂದುಳಿದಿರುವಿಕೆಯನ್ನು ಒಟ್ಟಾಗಿ ಪರಿಗಣಿಸಿ ಗುರುತಿಸಲಾಗುತ್ತದೆ.

ಎಸ್‌ಸಿ ಮತ್ತು ಎಸ್‌ಟಿ ಮೀಸಲಾತಿಯ ಮುಖ್ಯ ಉದ್ದೇಶ ಸಾಮಾಜಿಕ ಸಮಾನತೆ ಮತ್ತು ನ್ಯಾಯವನ್ನು ಸಾಧಿಸುವುದು, ಐತಿಹಾಸಿಕ ತಾರತಮ್ಯವನ್ನು ಹೋಗಲಾಡಿಸುವುದು ಹಾಗೂ ಸಾರ್ವಜನಿಕ ಜೀವನದಲ್ಲಿ ಅವರ ಸಕ್ರಿಯ ಭಾಗವಹಿಸುವಿಕೆಯನ್ನು ಖಚಿತಪಡಿಸುವುದಾಗಿದೆ ಎಂದು ಸರ್ಕಾರ ಒತ್ತು ನೀಡಿದೆ. ಸಮಾನತೆಯ ಈ ವಿಶಾಲ ಕಲ್ಪನೆಯನ್ನು ಗಮನದಲ್ಲಿಟ್ಟುಕೊಂಡು, ಈ ಸಮುದಾಯಗಳ ಮೇಲಿನ ತಾರತಮ್ಯವು 'ಕೇವಲ ಆರ್ಥಿಕ ಸ್ಥಿತಿಗತಿಯ ಆಧಾರದ ಮೇಲೆ ನಡೆಯುವುದಿಲ್ಲ' ಎಂದು ಪ್ರಮಾಣಪತ್ರದಲ್ಲಿ ಹೇಳಲಾಗಿದೆ.

►ನ್ಯಾಯಾಲಯದ ಹಿಂದಿನ ತೀರ್ಪುಗಳು

ತನ್ನ ವಾದಕ್ಕೆ ಬೆಂಬಲವಾಗಿ ಕೇಂದ್ರ ಸರ್ಕಾರವು ಸುಪ್ರೀಂ ಕೋರ್ಟ್‌ನ ಹಲವು ಪ್ರಮುಖ ತೀರ್ಪುಗಳನ್ನು ಉಲ್ಲೇಖಿಸಿದೆ. ಮಂಡಲ್ ಕಮಿಷನ್ ವರದಿಯ ಜಾರಿಯನ್ನು ಎತ್ತಿಹಿಡಿದ 1992ರ 'ಇಂದಿರಾ ಸಾಹ್ನಿ' ತೀರ್ಪನ್ನು ಸರ್ಕಾರ ಉಲ್ಲೇಖಿಸಿದೆ. ಆ ತೀರ್ಪು ಹಿಂದುಳಿದ ವರ್ಗಗಳಲ್ಲಿರುವ ಮುಂಚೂಣಿಯಲ್ಲಿರುವವರನ್ನು ಹೊರಗಿಡಲು 'ಕೆನೆಪದರ' (ಆದಾಯದ ಮಿತಿ) ಪರೀಕ್ಷೆಯನ್ನು ಪರಿಚಯಿಸಿತ್ತಾದರೂ, ಅದನ್ನು ಕೇವಲ ಒಬಿಸಿ ವರ್ಗಕ್ಕೆ ಮಾತ್ರ ಸೀಮಿತಗೊಳಿಸಿತ್ತು. ಪರಿಶಿಷ್ಟ ಪಂಗಡ ಮತ್ತು ಪರಿಶಿಷ್ಟ ಜಾತಿಗಳ ವಿಷಯದಲ್ಲಿ ಈ ನಿಯಮಕ್ಕೆ ಯಾವುದೇ ಸಂಬಂಧವಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟವಾಗಿ ತಿಳಿಸಿತ್ತು.

2008ರ 'ಅಶೋಕ್ ಕುಮಾರ್ ಠಾಕೂರ್' ಪ್ರಕರಣವನ್ನು ಸಹ ಸರ್ಕಾರ ಪ್ರಸ್ತಾಪಿಸಿದ್ದು, ಇದರಲ್ಲಿ ಕೆನೆಪದರ ಸಿದ್ಧಾಂತವು ಎಸ್‌ಸಿ ಮತ್ತು ಎಸ್‌ಟಿ ವರ್ಗಗಳಿಗೆ ಅನ್ವಯಿಸುವುದಿಲ್ಲ ಎಂದು ನ್ಯಾಯಾಲಯ ಪುನರುಚ್ಚರಿಸಿತ್ತು. ನಂತರ, 2005ರ 'ಇ.ವಿ. ಚಿನ್ನಯ್ಯ' ತೀರ್ಪನ್ನು ಉಲ್ಲೇಖಿಸಿದ ಸರ್ಕಾರ, ಎಸ್‌ಸಿ ವರ್ಗದಿಂದ ಕೆನೆಪದರವನ್ನು ಹೊರಗಿಡುವ ಪರಿಸ್ಥಿತಿ ಎಂದಾದರೂ ಎದುರಾದರೆ, "ಅದಕ್ಕೆ ಅಗತ್ಯವಾದ ಶಾಸನಬದ್ಧ ಕ್ರಮಗಳನ್ನು ತೆಗೆದುಕೊಳ್ಳುವ ಅಧಿಕಾರ ಸಂಸತ್ತಿಗೆ ಮಾತ್ರ ಇರುತ್ತದೆ" ಎಂದು ನ್ಯಾಯಾಲಯ ಹೇಳಿದ್ದನ್ನು ನೆನಪಿಸಿದೆ.

►ಅಧಿಕಾರ ವಿಭಜನೆಯ ಸಿದ್ಧಾಂತ

ಸರ್ಕಾರ ತನ್ನ ವಾದವನ್ನು ಸಮರ್ಥಿಸಿಕೊಳ್ಳಲು ಸಂವಿಧಾನಾತ್ಮಕ ಅಧಿಕಾರ ವಿಭಜನೆ ಸಿದ್ಧಾಂತವನ್ನು ಉಲ್ಲೇಖಿಸಿದೆ. ಸಂವಿಧಾನದ ವಿಧಿ 341 ಮತ್ತು 342ರ ಅಡಿಯಲ್ಲಿ ರಾಷ್ಟ್ರಪತಿಗಳು ಎಸ್‌ಸಿ ಮತ್ತು ಎಸ್‌ಟಿ ವರ್ಗಗಳ ಆರಂಭಿಕ ಪಟ್ಟಿಯನ್ನು ಪ್ರಕಟಿಸುತ್ತಾರೆ ಎಂದು ಅಫಿಡವಿಟ್‌ನಲ್ಲಿ ಹೇಳಲಾಗಿದೆ. ಒಮ್ಮೆ ಈ ಪಟ್ಟಿ ಪ್ರಕಟವಾದ ನಂತರ, ಇದರಲ್ಲಿ ಯಾರನ್ನಾದರೂ ಸೇರ್ಪಡೆಗೊಳಿಸುವುದು ಅಥವಾ ಹೊರಗಿಡುವುದನ್ನು ಸಂಸತ್ತಿನ ಕಾಯ್ದೆಯ ಮೂಲಕ ಮಾತ್ರ ಮಾಡಲು ಸಾಧ್ಯ. ಈ ಪಟ್ಟಿಗಳನ್ನು ತಿದ್ದುಪಡಿ ಮಾಡುವ, ಬದಲಾಯಿಸುವ ಅಥವಾ ಮಾರ್ಪಡಿಸುವ ಅಧಿಕಾರ "ರಾಜ್ಯ ಸರ್ಕಾರಗಳಿಗಾಗಲಿ, ನ್ಯಾಯಾಲಯಗಳಿಗಾಗಲಿ, ನ್ಯಾಯಾಧಿಕರಣಗಳಿಗಾಗಲಿ ಅಥವಾ ಇನ್ನಿತರ ಯಾವುದೇ ಸಂಸ್ಥೆಗಾಗಲಿ ಇಲ್ಲ" ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.

ಅರ್ಜಿದಾರರು 'ರಿಟ್ ಆಫ್ ಮ್ಯಾಂಡಮಸ್' (ಸರ್ಕಾರಕ್ಕೆ ನಿರ್ದಿಷ್ಟ ಕರ್ತವ್ಯವನ್ನು ಮಾಡಲು ಸೂಚಿಸುವ ನ್ಯಾಯಾಂಗ ಆದೇಶ) ಕೋರಿದ್ದಾರೆ ಎಂದು ಕೇಂದ್ರ ವಾದಿಸಿದೆ. ಮೀಸಲಾತಿ ನೀತಿಗಳನ್ನು ರೂಪಿಸುವುದು ಅಥವಾ ಆದಾಯ ಆಧಾರಿತ ಆದ್ಯತೆಗಳನ್ನು ಪರಿಚಯಿಸುವುದಕ್ಕೆ ಸಮಗ್ರ ಪರಿಶೀಲನೆ, ಅಂಕಿ-ಅಂಶಗಳ ದತ್ತಾಂಶ ಮತ್ತು ಶಾಸಕಾಂಗದ ಅನುಮೋದನೆ ಅಗತ್ಯವಿರುತ್ತದೆ ಎಂದು ಸರ್ಕಾರ ಹೇಳಿದೆ.

ಸುಪ್ರೀಂ ಕೋರ್ಟ್‌ನ ಹಿಂದಿನ ತೀರ್ಪುಗಳನ್ನು ಉಲ್ಲೇಖಿಸಿರುವ ಅಫಿಡವಿಟ್, "ಹೆಚ್ಚು ಸೂಕ್ತವಾದ, ನ್ಯಾಯಯುತವಾದ ಅಥವಾ ಉತ್ತಮವಾದ ಪರ್ಯಾಯ ಲಭ್ಯವಿದೆ ಎಂಬ ಕಾರಣಕ್ಕಾಗಿ" ನಿರ್ದಿಷ್ಟ ನೀತಿಯನ್ನು ಜಾರಿಗೆ ತರುವಂತೆ ನ್ಯಾಯಾಲಯಗಳು ಕಾರ್ಯಾಂಗಕ್ಕೆ ನಿರ್ದೇಶನ ನೀಡಲು ಸಾಧ್ಯವಿಲ್ಲ ಎಂದು ವಾದಿಸಿದೆ. ಸರ್ಕಾರಿ ನೀತಿಗಳನ್ನು ನಿಗದಿಪಡಿಸುವ ಹಕ್ಕು ಶಾಸಕಾಂಗಕ್ಕಿದೆಯೇ ಹೊರತು ನ್ಯಾಯಾಂಗಕ್ಕಲ್ಲ ಎಂಬುದನ್ನು ಸರ್ಕಾರ ಪುನರುಚ್ಚರಿಸಿದೆ.

ಮೂಲಭೂತ ಹಕ್ಕುಗಳ ಉಲ್ಲಂಘನೆಯಾಗಿರುವುದನ್ನು ಸಾಬೀತುಪಡಿಸಲು ಅರ್ಜಿದಾರರು ವಿಫಲರಾಗಿರುವುದರಿಂದ, ಸಂವಿಧಾನದ ವಿಧಿ 32ರ ಅಡಿಯಲ್ಲಿ ಈ ಅರ್ಜಿ ಪುರಸ್ಕರಿಸಲು ಅರ್ಹವಲ್ಲ ಎಂದು ಕೇಂದ್ರ ವಾದಿಸಿದೆ. ಈ ಅರ್ಜಿಯು "ತಪ್ಪು ಕಲ್ಪನೆಯಿಂದ ಕೂಡಿದ್ದು" ಮತ್ತು ಯಾವುದೇ ಆಧಾರವಿಲ್ಲದ್ದು ಎಂದು ಕರೆದಿರುವ ಸರ್ಕಾರ, ಇದನ್ನು ವಜಾಗೊಳಿಸುವಂತೆ ಸುಪ್ರೀಂ ಕೋರ್ಟ್‌ಗೆ ಮನವಿ ಮಾಡಿದೆ.

ಕೃಪೆ : indianexpress.com