AI ತಂತ್ರಜ್ಞಾನದ ವೇಗವನ್ನು ತಗ್ಗಿಸುವ ಒತ್ತಾಯಗಳು ಅಮೆರಿಕ-ಚೀನಾ ನಡುವೆ ಹೊಸ ಸಂಘರ್ಷಕ್ಕೆ ಕಾರಣವಾಗಿದ್ದೇಕೆ?

ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಬೆಳವಣಿಗೆಯ ಬಗ್ಗೆ ಅಮೆರಿಕದ ಪ್ರಮುಖ AI ಕಂಪನಿಯೊಂದರ ಮುಖ್ಯಸ್ಥರು ಕಳವಳ ವ್ಯಕ್ತಪಡಿಸಿ, ಚೀನಾಕ್ಕೆ ಎಐ ಚಿಪ್‌ಗಳ ಮಾರಾಟದ ಮೇಲೆ ನಿರ್ಬಂಧ ವಿಧಿಸಬೇಕು ಎಂದು ಆಗ್ರಹಿಸಿದ ಬೆನ್ನಲ್ಲೇ, ಚೀನಾವು ಇದನ್ನು "ಭೀತಿ ಹುಟ್ಟಿಸುವ ತಂತ್ರ" ಎಂದು ಎಚ್ಚರಿಸಿದೆ.

ಅತ್ಯಂತ ಶಕ್ತಿಶಾಲಿ ಎಐ ವ್ಯವಸ್ಥೆಗಳ ಅಭಿವೃದ್ಧಿ ವೇಗವನ್ನು ತಗ್ಗಿಸಬೇಕು ಎಂದು ಆಂಥ್ರೋಪಿಕ್ (Anthropic) ಕಂಪನಿಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಡಾರಿಯೊ ಅಮೊಡೆ ಅವರು ಶನಿವಾರ ಕರೆ ನೀಡಿದ್ದಾರೆ. ಮುಂದುವರಿದು, ಈ ತಂತ್ರಜ್ಞಾನವು ಕೆಲವೇ ದಿನಗಳಲ್ಲಿ ಮಾನವ ಕುಲಕ್ಕೇ ಗಂಭೀರ ಮತ್ತು ಮಾರಕ ಅಪಾಯಗಳನ್ನು ತಂದಿಡಬಹುದು ಎಂದು ಅವರು ಎಚ್ಚರಿಸಿದ್ದಾರೆ.

ಅವರ ಈ ಪ್ರಸ್ತಾವನೆಯು, ಚೀನಾಕ್ಕೆ ಅತ್ಯಾಧುನಿಕ ತಂತ್ರಜ್ಞಾನದ ಲಭ್ಯತೆಯನ್ನು ಅಮೆರಿಕ ಸರ್ಕಾರವು ಕಡಿತಗೊಳಿಸಬೇಕು ಎಂದು ಒತ್ತಾಯಿಸುತ್ತದೆ. ಇದು ತನ್ನ ತಂತ್ರಜ್ಞಾನದ ಪ್ರಾಬಲ್ಯವನ್ನು ಕಾಯ್ದುಕೊಳ್ಳಲು ಅಮೆರಿಕವು ಎಐ ಸುರಕ್ಷತೆಯನ್ನು ಕೇವಲ ಒಂದು ನೆಪವನ್ನಾಗಿ ಬಳಸಿಕೊಳ್ಳುತ್ತಿದೆ ಎಂದು ಚೀನಾ ಆರೋಪಿಸಲು ಕಾರಣವಾಗಿದೆ.

ಹೆಚ್ಚು ಸಾಮರ್ಥ್ಯವಿರುವ ಎಐ ಮಾದರಿಗಳ ಅಭಿವೃದ್ಧಿಗಾಗಿ ಅಮೆರಿಕ ಮತ್ತು ಚೀನಾ ದೇಶಗಳು ತೀವ್ರ ಸ್ಪರ್ಧೆಯಲ್ಲಿ ತೊಡಗಿರುವ ಈ ಸಂದರ್ಭದಲ್ಲಿ ಈ ವಿವಾದವು ಮುನ್ನೆಲೆಗೆ ಬಂದಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, "ಯಾರು ಎಐ ಅನ್ನು ಗೆಲ್ಲುತ್ತಾರೋ ಅವರೇ ಜಗತ್ತನ್ನು ಗೆಲ್ಲುತ್ತಾರೆ" ಎಂದು ಈ ಹಿಂದೆ ಘೋಷಿಸಿದ್ದರು.

►ಎಐ ತಂತ್ರಜ್ಞಾನ ದಿಗ್ಗಜರು ಕಳವಳ ವ್ಯಕ್ತಪಡಿಸುತ್ತಿರುವುದೇಕೆ?

ಎಐ ತಂತ್ರಜ್ಞಾನದ ಸಾಮರ್ಥ್ಯವು ಅತ್ಯಂತ ವೇಗವಾಗಿ ಬೆಳೆಯುತ್ತಿದೆ ಎಂದು ವಾರಾಂತ್ಯದಲ್ಲಿ ಪ್ರಕಟವಾದ ಲೇಖನವೊಂದರಲ್ಲಿ ಆಂಥ್ರೋಪಿಕ್ ಕಂಪನಿಯ ಮುಖ್ಯಸ್ಥ ಅಮೊಡೆ ಎಚ್ಚರಿಸಿದ್ದಾರೆ. ಎಐ ತಂತ್ರಜ್ಞಾನದಿಂದ ಆಗಬಹುದಾದ ಅಪಾಯಗಳನ್ನು ನಿರ್ವಹಿಸಲು ಸರ್ಕಾರಗಳು ಮತ್ತು ಸಂಶೋಧಕರಿಗೆ ಹೆಚ್ಚಿನ ಸಮಯಾವಕಾಶ ಸಿಗುವಂತೆ, ಅತ್ಯಾಧುನಿಕ ಮಾದರಿಗಳ ಅಭಿವೃದ್ಧಿ ವೇಗವನ್ನು ಮಂದಗೊಳಿಸಬೇಕು ಎಂದು ಅವರು ಪ್ರಸ್ತಾಪಿಸಿದ್ದಾರೆ.

"ಎಐ ಸಾಮರ್ಥ್ಯದ ಅಭಿವೃದ್ಧಿಯು ವೇಗವಾಗಿ ಸಾಗುತ್ತಿರುವುದನ್ನು ನೋಡಿದರೆ, ಮುಂದಿನ 6ರಿಂದ 12 ತಿಂಗಳಲ್ಲಿ ಇಂತಹ ವ್ಯವಸ್ಥೆಯು ನಿರಂತರ ಬಾಟ್‌ನೆಟ್ ಮೂಲಕ ಇಡೀ ಅಂತರ್ಜಾಲವನ್ನೇ ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳುವ ಸಾಮರ್ಥ್ಯವನ್ನು ಪಡೆದುಕೊಳ್ಳಬಹುದು (ಇದು ಬಹುಶಃ ನೂರಾರು ಬಿಲಿಯನ್ ಡಾಲರ್‌ಗಳಷ್ಟು ನಷ್ಟವನ್ನುಂಟುಮಾಡಬಹುದು). ಅಗತ್ಯ ಸುರಕ್ಷತಾ ಕ್ರಮಗಳಿಲ್ಲದೆ ಎಐ ಮತ್ತಷ್ಟು ಶಕ್ತಿಶಾಲಿಯಾದರೆ ಈ ಹಾನಿಯ ಪ್ರಮಾಣವು ಇನ್ನೂ ಹೆಚ್ಚಾಗುತ್ತಲೇ ಹೋಗುತ್ತದೆ ಎಂಬುದು ನನ್ನ ಕಳವಳವಾಗಿದೆ" ಎಂದು ಅವರು ಬರೆದಿದ್ದಾರೆ.

ಅವರ ಈ ವಾದವನ್ನು ಅವರ ಪ್ರತಿಸ್ಪರ್ಧಿಗಳಾದ ಓಪನ್‌ಎಐ (OpenAI) ಮುಖ್ಯಸ್ಥ ಸ್ಯಾಮ್ ಆಲ್ಟ್‌ಮನ್ ಹಾಗೂ ಸ್ಪೇಸ್‌ಎಕ್ಸ್ (SpaceX) ಮತ್ತು ಟೆಸ್ಲಾ (Tesla) ಮುಖ್ಯಸ್ಥ ಎಲಾನ್ ಮಸ್ಕ್ ಕೂಡ ಬೆಂಬಲಿಸಿದ್ದಾರೆ.

ಎಐ ಸುರಕ್ಷತೆಯ ಜೊತೆಗೆ, "ಎಐ ಕ್ಷೇತ್ರದಲ್ಲಿ ಚೀನಾದ ಮುನ್ನಡೆಯು ಅಮೆರಿಕ ಮತ್ತು ಜಗತ್ತಿಗೆ ತೀವ್ರ ಅಪಾಯವನ್ನುಂಟುಮಾಡುತ್ತದೆ" ಎಂದು ಅಮೊಡೆ ಎಚ್ಚರಿಸಿದ್ದಾರೆ. ಅಲ್ಲದೆ, ಅತ್ಯಾಧುನಿಕ ಎಐ ಚಿಪ್‌ಗಳು ಮತ್ತು ಚಿಪ್ ತಯಾರಿಕಾ ಉಪಕರಣಗಳು ಚೀನಾಕ್ಕೆ ಪೂರೈಕೆಯಾಗುವುದರ ಮೇಲೆ ನಿರ್ಬಂಧಗಳನ್ನು ಮುಂದುವರಿಸುವಂತೆ ಅಮೆರಿಕಗೆ ಅವರು ಒತ್ತಾಯಿಸಿದ್ದಾರೆ. ಚೀನಾದ ಎಐ ಪ್ರಯೋಗಾಲಯಗಳು ಅಮೆರಿಕದ ಮಾದರಿಗಳನ್ನು ಅನುಕರಿಸುತ್ತಿವೆ ಎಂದು ಆರೋಪಿಸಿ, ಅವುಗಳ ವಿರುದ್ಧವೂ ಕ್ರಮ ಕೈಗೊಳ್ಳಬೇಕು ಎಂದು ಅವರು ಕೋರಿದ್ದಾರೆ.

ಆದರೆ ರವಿವಾರ ಮಾತನಾಡಿದ ಅಧ್ಯಕ್ಷ ಟ್ರಂಪ್, ಎಐ ಅಭಿವೃದ್ಧಿ ವೇಗವನ್ನು ತಗ್ಗಿಸಬೇಕು ಎಂಬ ಒತ್ತಾಯಗಳನ್ನು ತಳ್ಳಿಹಾಕಿದ್ದು, ಕೆಲವು ಕಳವಳಗಳು ಅತಿಶಯೋಕ್ತಿಯಿಂದ ಕೂಡಿದವು ಎಂದು ಬಣ್ಣಿಸಿದ್ದಾರೆ.

"ನಾವು ಎಐ ಕ್ಷೇತ್ರದಲ್ಲಿ ಚೀನಾಕ್ಕಿಂತ ಮುಂದಿದ್ದೇವೆ. ನಾವು ಜಗತ್ತಿನ ಅತ್ಯಂತ ಮುಂದುವರಿದ ದೇಶವಾಗಿದ್ದೇವೆ ಮತ್ತು ಸ್ಪಷ್ಟವಾಗಿ ಹೇಳುವುದಾದರೆ ನಾನು ಅದನ್ನು ಹಾಗೆಯೇ ಉಳಿಸಿಕೊಳ್ಳಲು ಬಯಸುತ್ತೇನೆ. ಏಕೆಂದರೆ, ಯಾರು ಎಐ ಅನ್ನು ಗೆಲ್ಲುತ್ತಾರೋ ಅವರೇ ಜಗತ್ತನ್ನು ಗೆಲ್ಲುತ್ತಾರೆ" ಎಂದಿದ್ದಾರೆ.

►ಚೀನಾದ ಪ್ರತಿಕ್ರಿಯೆ ಏನು?

ಕೃತಕ ಬುದ್ಧಿಮತ್ತೆ ವಿಷಯದಲ್ಲಿ ದೇಶಗಳು "ಮುಕ್ತ, ಎಲ್ಲರನ್ನೂ ಒಳಗೊಂಡ ಮತ್ತು ಸೌಹಾರ್ದಯುತ ಧೋರಣೆಯನ್ನು" ಅನುಸರಿಸಬೇಕು ಎಂದು ಚೀನಾದ ವಿದೇಶಾಂಗ ಸಚಿವಾಲಯ ಸೋಮವಾರ ಆಗ್ರಹಿಸಿದೆ.

ಸಚಿವಾಲಯದ ವಕ್ತಾರ ಗುವೋ ಜಿಯಾಕುನ್ ಮಾತನಾಡಿ, "ವಿವಿಧ ಅಪಾಯಗಳ ಬಗ್ಗೆ ಭೀತಿ ಹುಟ್ಟಿಸುವುದು, ಸಂಘರ್ಷಕ್ಕೆ ಇಳಿಯುವುದು ಮತ್ತು ದುರುದ್ದೇಶಪೂರ್ವಕ ಸ್ಪರ್ಧೆಯಲ್ಲಿ ತೊಡಗಿಕೊಳ್ಳುವುದು ಕೃತಕ ಬುದ್ಧಿಮತ್ತೆಯ ಜಾಗತಿಕ ಆಡಳಿತ ಪ್ರಕ್ರಿಯೆಯನ್ನು ಮಾತ್ರ ಅಸ್ತವ್ಯಸ್ತಗೊಳಿಸುತ್ತದೆ. ಇದು ಯಾರಿಗೂ ಹಿತಕರವಲ್ಲ" ಎಂದಿದ್ದಾರೆ.

ಸರ್ಕಾರದ ಬೆಂಬಲ ಹೊಂದಿರುವ 'ಗ್ಲೋಬಲ್ ಟೈಮ್ಸ್' ಪತ್ರಿಕೆಯು ಮತ್ತಷ್ಟು ಕಟುವಾಗಿ ಪ್ರತಿಕ್ರಿಯಿಸಿದ್ದು, ಅಮೊಡೆ ಅವರ ಈ ಪ್ರಸ್ತಾವನೆಯು "ಶೀತಲ ಸಮರದ ತಂತ್ರ"ದಂತಿದೆ ಎಂದು ಬಣ್ಣಿಸಿದೆ. ಚೀನಾದ ಎಐ ಅಭಿವೃದ್ಧಿಯನ್ನು ತಡೆಯುವುದು ಮತ್ತು ಅಮೆರಿಕದ ತಂತ್ರಜ್ಞಾನ ಪ್ರಾಬಲ್ಯವನ್ನು ಕಾಪಾಡಿಕೊಳ್ಳುವುದೇ ಇದರ ನಿಜವಾದ ಉದ್ದೇಶ ಎಂದು ಅದು ಟೀಕಿಸಿದೆ.

"ಈ 'ಮೌನ ಎಐ ಶೀತಲ ಸಮರ'ವು ಅತ್ಯಂತ ಕಪಟತನದಿಂದ ಕೂಡಿದ್ದು, ದೂರದೃಷ್ಟಿಯಿಲ್ಲದ್ದು" ಎಂದು ಅದು ಹೇಳಿದೆ.

►ಅಮೆರಿಕ-ಚೀನಾ ಎಐ ಸ್ಪರ್ಧೆಯಲ್ಲಿ ಈಗೇನು ಪ್ರಗತಿಯಾಗಿದೆ?

ಎಐ ಸ್ಪರ್ಧೆಯ ಅತ್ಯಂತ ಪ್ರಮುಖ ಅಂಶಗಳಲ್ಲಿ ಅಮೆರಿಕವು ಇನ್ನೂ ಮುಂಚೂಣಿಯಲ್ಲಿದೆ, ಆದರೆ ಚೀನಾ ಆ ಅಂತರವನ್ನು ವೇಗವಾಗಿ ಕಡಿಮೆ ಮಾಡುತ್ತಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಖಾಸಗಿ ಹೂಡಿಕೆ ಮತ್ತು ಮುಂಚೂಣಿಯಲ್ಲಿರುವ ಎಐ ಮಾದರಿಗಳ ಉತ್ಪಾದನೆಯಲ್ಲಿ ಅಮೆರಿಕದ ಕಂಪನಿಗಳು ತಮ್ಮ ಪ್ರಾಬಲ್ಯವನ್ನು ಮುಂದುವರಿಸಿವೆ. ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯದ 2026ರ ಎಐ ಸೂಚ್ಯಂಕ ವರದಿಯ ಪ್ರಕಾರ, ಅಮೆರಿಕದ ಕಂಪನಿಗಳು 2025ರಲ್ಲಿ ಎಐ ಕ್ಷೇತ್ರಕ್ಕಾಗಿ 285.9 ಬಿಲಿಯನ್ ಡಾಲರ್‌ಗಳಷ್ಟು ಹೂಡಿಕೆ ಮಾಡಿದ್ದರೆ, ಚೀನಾ ಕೇವಲ 12.4 ಬಿಲಿಯನ್ ಡಾಲರ್ ಹೂಡಿಕೆ ಮಾಡಿದೆ.

ಅತ್ಯಾಧುನಿಕ ಮಾದರಿಗಳಿಗೆ ತರಬೇತಿ ನೀಡಲು ಅಗತ್ಯವಿರುವ ಅತ್ಯುನ್ನತ ಸೆಮಿಕಂಡಕ್ಟರ್‌ಗಳ ವಿಷಯದಲ್ಲೂ ಅಮೆರಿಕವು ಮೇಲುಗೈ ಹೊಂದಿದೆ.

ಏತನ್ಮಧ್ಯೆ ಅಮೆರಿಕವು ಅತ್ಯಂತ ಸುಧಾರಿತ ಎಐ ಚಿಪ್‌ಗಳ ಲಭ್ಯತೆಯ ಮೇಲೆ ನಿರ್ಬಂಧಗಳನ್ನು ವಿಧಿಸಿದ್ದರೂ, ಚೀನಾದ ಕಂಪನಿಗಳು ಅತ್ಯಂತ ಸಮರ್ಥವಾದ ಎಐ ಮಾದರಿಗಳನ್ನು ರೂಪಿಸಬಲ್ಲವು ಎಂಬುದನ್ನು ಸಾಬೀತುಪಡಿಸಿವೆ.

ಜನವರಿಯಲ್ಲಿ, ಚೀನಾದ ಎಐ ಸ್ಟಾರ್ಟ್‌ಅಪ್ ಸಂಸ್ಥೆಯಾದ 'ಡೀಪ್‌ಸೀಕ್' (DeepSeek) ಬಿಡುಗಡೆ ಮಾಡಿದ ಮಾದರಿಯು ಜಾಗತಿಕವಾಗಿ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಯಿತು. ತನ್ನ ಪ್ರತಿಸ್ಪರ್ಧಿಗಳು ಎಐ ಕಾರ್ಯಕ್ರಮಗಳಿಗಾಗಿ ಖರ್ಚು ಮಾಡಿದ ಹಣದ ಒಂದು ಸಣ್ಣ ಭಾಗದಷ್ಟು ವೆಚ್ಚದಲ್ಲಿ ಮಾತ್ರ ಈ ಮಾದರಿಯನ್ನು ಸಿದ್ಧಪಡಿಸಲಾಗಿದೆ ಎಂದು ಅದು ತಿಳಿಸಿದ ಬೆನ್ನಲ್ಲೇ, ಅಮೆರಿಕದ ತಂತ್ರಜ್ಞಾನ ಕಂಪನಿಗಳ ಷೇರು ಬೆಲೆಗಳು ಕುಸಿದವು.

ಡೀಪ್‌ಸೀಕ್‌ನ ಇತ್ತೀಚಿನ ಮಾದರಿಗೆ ತರಬೇತಿ ನೀಡಲು ಅಂದರೆ ಪ್ರಶ್ನೆಗಳಿಗೆ ಉತ್ತರಿಸಲು ಅಗತ್ಯವಿರುವ ಮಾಹಿತಿಯನ್ನು ಒಟ್ಟುಗೂಡಿಸಲು ಎನ್‌ವಿಡಿಯಾ (Nvidia) H800 ಚಿಪ್‌ಗಳ ಕೇವಲ 6 ಮಿಲಿಯನ್ ಡಾಲರ್‌ಗಳಿಗೂ ಕಡಿಮೆ ಮೌಲ್ಯದ ಕಂಪ್ಯೂಟಿಂಗ್ ಶಕ್ತಿಯು ಸಾಕಾಗುತ್ತದೆ ಎಂದು ಕಂಪನಿಯು ಡಿಸೆಂಬರ್‌ನಲ್ಲಿ ಪ್ರಕಟಿಸಿದ ವರದಿಯಲ್ಲಿ ತಿಳಿಸಿತ್ತು. ಇದು ಎಐ ವಲಯದಲ್ಲಿ ದೊಡ್ಡ ಸಂಚಲನ ಮೂಡಿಸಿತ್ತು.

ಚಾಟ್‌ಜಿಪಿಟಿಗಾಗಿ ಓಪನ್‌ಎಐ (OpenAI) ಮತ್ತು ಜೆಮಿನೈಗಾಗಿ ಗೂಗಲ್‌ನಂತಹ ಅಮೆರಿಕದ ತಂತ್ರಜ್ಞಾನ ದಿಗ್ಗಜರು ಎಐ ಬಜೆಟ್‌ಗಾಗಿ ಶತಕೋಟಿ ಡಾಲರ್‌ಗಳನ್ನು ಖರ್ಚು ಮಾಡುತ್ತಿದ್ದರೆ, ಡೀಪ್‌ಸೀಕ್ ವೆಚ್ಚವು ಅದಕ್ಕೆ ಹೋಲಿಸಿದರೆ ಅತ್ಯಂತ ಕಡಿಮೆ. 2023ರ ಎಪ್ರಿಲ್‌ನಲ್ಲಿ 'ವೈರ್ಡ್' (Wired) ವರದಿ ಮಾಡಿದಂತೆ, ಓಪನ್‌ಎಐ ಮುಖ್ಯಸ್ಥ ಆಲ್ಟ್‌ಮನ್ ತಮ್ಮ ಸಂಸ್ಥೆಯ ಇತ್ತೀಚಿನ ಕಾರ್ಯಕ್ರಮವಾದ ಜಿಪಿಟಿ-4 (GPT-4) ತರಬೇತಿಗಾಗಿ 100 ಮಿಲಿಯನ್ ಡಾಲರ್‌ಗಳಿಗೂ ಹೆಚ್ಚು ಖರ್ಚಾಗಿದೆ ಎಂದು ತಿಳಿಸಿದ್ದರು.

ಅತ್ಯಾಧುನಿಕ ಚಿಪ್‌ಗಳು ಚೀನಾದ ಸೇನಾ, ಗುಪ್ತಚರ ಮತ್ತು ನಿಗಾ ಸಾಮರ್ಥ್ಯಗಳನ್ನು ಬಲಪಡಿಸಬಹುದು ಎಂದು ವಾದಿಸಿ, ಅಮೆರಿಕವು ಅತ್ಯಾಧುನಿಕ ಸೆಮಿಕಂಡಕ್ಟರ್‌ಗಳು ಹಾಗೂ ಚಿಪ್ ತಯಾರಿಕಾ ತಂತ್ರಜ್ಞಾನದ ಲಭ್ಯತೆಯ ಮೇಲೆ ಚೀನಾಕ್ಕೆ ನಿರ್ಬಂಧಗಳನ್ನು ವಿಧಿಸಿದೆ.

ಎನ್‌ವಿಡಿಯಾದ ಬ್ಲ್ಯಾಕ್‌ವೆಲ್ (Blackwell) ಪ್ರೊಸೆಸರ್‌ಗಳು ಸೇರಿದಂತೆ ಅತ್ಯಂತ ಸುಧಾರಿತ ಚಿಪ್‌ಗಳ ಮೇಲೆ ಟ್ರಂಪ್ ಆಡಳಿತವು ನಿಯಂತ್ರಣಗಳನ್ನು ಮುಂದುವರಿಸಿದೆ. ಅದೇ ಸಮಯದಲ್ಲಿ, ಕಡಿಮೆ ಸಾಮರ್ಥ್ಯದ ಕೆಲವು ಚಿಪ್‌ಗಳನ್ನು ಚೀನಾಕ್ಕೆ ಮಾರಾಟ ಮಾಡಲು ಅವಕಾಶ ನೀಡಿದೆ.

ಮತ್ತೊಂದೆಡೆ, ಎಐ ಸರಬರಾಜು ಸರಪಳಿಯ ಇತರ ಕ್ಷೇತ್ರಗಳಲ್ಲಿ ಚೀನಾವು ಮೇಲುಗೈ ಸಾಧಿಸಿದೆ. ಪ್ರಮುಖವಾಗಿ, ಅತ್ಯಾಧುನಿಕ ತಂತ್ರಜ್ಞಾನದಲ್ಲಿ ಬಳಸಲಾಗುವ ನಿರ್ಣಾಯಕ ಅಪರೂಪದ ಖನಿಜಗಳ ಉತ್ಪಾದನೆಯಲ್ಲಿ ಮತ್ತು ಅಮೆರಿಕಕ್ಕಿಂತ ಎರಡು ಪಟ್ಟು ಹೆಚ್ಚು ವಿದ್ಯುತ್ ಉತ್ಪಾದಿಸುವ ಮೂಲಕ, ಎಐ ಡೇಟಾ ಕೇಂದ್ರಗಳನ್ನು ನಡೆಸಲು ಅಗತ್ಯವಿರುವ ದೊಡ್ಡ ಪ್ರಮಾಣದ ಹಾಗೂ ತುಸು ಕಡಿಮೆ ವೆಚ್ಚದ ವಿದ್ಯುತ್ ಲಭ್ಯತೆಯಲ್ಲಿ ಚೀನಾ ಮುಂಚೂಡಿಯಲ್ಲಿದೆ.

ಅಕ್ಟೋಬರ್‌ನಲ್ಲಿ ಚೀನಾವು ಐದು ಪ್ರಮುಖ ಅಪರೂಪದ ಭೂಮಿಯ ಲೋಹಗಳ ಮೇಲಿನ ರಫ್ತು ನಿಯಂತ್ರಣಗಳನ್ನು ಬಿಗಿಗೊಳಿಸಿತು, ಜೊತೆಗೆ ಆ ಲೋಹಗಳನ್ನು ಶುದ್ಧೀಕರಿಸಲು ಬಳಸುವ ವಿಶೇಷ ತಾಂತ್ರಿಕ ಉಪಕರಣಗಳ ರಫ್ತಿನ ಮೇಲೆಯೂ ನಿರ್ಬಂಧಗಳನ್ನು ಹೇರಿತು.

ಯಾವ ದೇಶವಾದರೂ ನೈತಿಕ ಮೇಲುಗೈ ಸಾಧಿಸಬಹುದೇ?

ಅಮೆರಿಕ ಮತ್ತು ಚೀನಾ ಈ ಎರಡೂ ದೇಶಗಳು ತಮ್ಮ ಎಐ ವಿಧಾನವೇ ಹೆಚ್ಚು ಜವಾಬ್ದಾರಿಯುತವಾದುದು ಎಂದು ಬಿಂಬಿಸುತ್ತವೆ. ಆದರೆ, ಎರಡೂ ರಾಷ್ಟ್ರಗಳು ರಾಷ್ಟ್ರೀಯ ಭದ್ರತೆ ಮತ್ತು ಸೇನಾ ಉದ್ದೇಶಗಳಿಗಾಗಿಯೇ ಈ ತಂತ್ರಜ್ಞಾನವನ್ನು ಮುಂದುವರಿಸುತ್ತಿವೆ.

ಜೂನ್‌ನಲ್ಲಿ ಟ್ರಂಪ್ ಆಡಳಿತವು ಅಮೆರಿಕದ ಗುಪ್ತಚರ ಮತ್ತು "ಯುದ್ಧ" ಕ್ಷೇತ್ರಗಳಲ್ಲಿ ಎಐ ಬಳಕೆಯನ್ನು ಚುರುಕುಗೊಳಿಸುವಂತೆ ಆದೇಶಿಸಿತು.

ಮಾಹಿತಿಯನ್ನು ತ್ವರಿತವಾಗಿ ಸಂಸ್ಕರಿಸಲು ಇರಾನ್ ವಿರುದ್ಧದ ಯುದ್ಧದಲ್ಲಿ ತಾವು ಸುಧಾರಿತ ಎಐ ಸಾಧನಗಳನ್ನು ಬಳಸಿರುವುದಾಗಿ ಮಾರ್ಚ್‌ನಲ್ಲಿ ಅಮೆರಿಕದ ಸೇನೆಯು ಖಚಿತಪಡಿಸಿತು. ಆದರೆ, ಗುರಿ ನಿಗದಿಪಡಿಸುವ ಅಂತಿಮ ನಿರ್ಧಾರವನ್ನು ಮನುಷ್ಯರೇ ಮಾಡುತ್ತಾರೆ ಎಂದು ಅದು ಒತ್ತಿಹೇಳಿತು.

ದಕ್ಷಿಣ ಇರಾನ್‌ನಲ್ಲಿ ಶಾಲೆಯೊಂದರ ಮೇಲೆ ನಡೆದ ಬಾಂಬ್ ದಾಳಿಯಲ್ಲಿ ಬಹುಪಾಲು ಮಕ್ಕಳು ಸೇರಿದಂತೆ ಕನಿಷ್ಠ 156 ಜನರು ಸಾವಿಗೀಡಾಗಿದ್ದು, ಈ ಘಟನೆಯ ಬಗ್ಗೆ ಸ್ವತಂತ್ರ ತನಿಖೆ ನಡೆಸಬೇಕು ಎಂಬ ಒತ್ತಾಯಗಳು ಕೇಳಿಬಂದಿದ್ದ ಸಂದರ್ಭದಲ್ಲೇ ಈ ದೃಢೀಕರಣವು ಹೊರಬಂದಿತ್ತು.

ಇದಲ್ಲದೆ, ಗಾಝಾದ ಮೇಲೆ ಇಸ್ರೇಲ್ ನಡೆಸಿದ ನರಮೇಧದ ಯುದ್ಧದ ಸಮಯದಲ್ಲಿ ಎಐ ಅನ್ನು ಹೆಚ್ಚು ಅವಲಂಬಿಸಿತ್ತು ಎಂದು ಹಲವಾರು ವರದಿಗಳು ದೃಢಪಡಿಸಿವೆ. ಈ ಯುದ್ಧದಿಂದಾಗಿ ಅಕ್ಟೋಬರ್ 2023ರಿಂದ ಇಲ್ಲಿಯವರೆಗೆ ಸುಮಾರು 73,800 ಫೆಲೆಸ್ತೀನಿಯರು ಹತ್ಯೆಗೀಡಾಗಿದ್ದಾರೆ ಮತ್ತು ಬಹುತೇಕ ಪ್ರದೇಶವು ಧ್ವಂಸಗೊಂಡಿದೆ.

ಆಕ್ರಮಿತ ಫೆಲೆಸ್ತೀನ್ ಭೂಪ್ರದೇಶದಲ್ಲಿ ಮಾನವ ಹಕ್ಕುಗಳ ಕುರಿತು ವಿಶ್ವಸಂಸ್ಥೆಯ ವಿಶೇಷ ವರದಿಗಾರ್ತಿ ಫ್ರಾನ್ಸೆಸ್ಕಾ ಅಲ್ಬನೀಸ್ ಅವರು ಜುಲೈ 2025ರಲ್ಲಿ ವರದಿಯೊಂದನ್ನು ಬಿಡುಗಡೆ ಮಾಡಿದರು. ಅಂತರರಾಷ್ಟ್ರೀಯ ಕಾನೂನನ್ನು ಉಲ್ಲಂಘಿಸಿ ಫೆಲೆಸ್ತೀನಿಯರನ್ನು ಸ್ಥಳಾಂತರಿಸಲು ಮತ್ತು ಗಾಝಾ ಮೇಲೆ ನರಮೇಧದ ಯುದ್ಧ ನಡೆಸಲು ಇಸ್ರೇಲ್‌ಗೆ ನೆರವಾಗುತ್ತಿರುವ ಕಂಪನಿಗಳನ್ನು ಈ ವರದಿಯಲ್ಲಿ ಗುರುತಿಸಲಾಗಿದೆ. ಅಮೆರಿಕದ ತಂತ್ರಜ್ಞಾನ ಮತ್ತು ಎಐ ದಿಗ್ಗಜ ಸಂಸ್ಥೆಯಾದ ಪಾಲಂಟೀರ್ (Palantir) ಕೂಡ ಈ ವರದಿಯಲ್ಲಿ ಉಲ್ಲೇಖಿಸಲಾದ ಕಂಪನಿಗಳಲ್ಲಿ ಒಂದಾಗಿದೆ.

ಮಾರ್ಚ್ 2021ರಲ್ಲಿ, ಅಮೆರಿಕದ ಕಂಪನಿಗಳಾದ ಗೂಗಲ್ ಮತ್ತು ಅಮೆಝಾನ್ ಸಂಸ್ಥೆಗಳು ಇಸ್ರೇಲ್ ಸರ್ಕಾರ ಹಾಗೂ ರಕ್ಷಣಾ ವ್ಯವಸ್ಥೆಗೆ ಕ್ಲೌಡ್ ತಂತ್ರಜ್ಞಾನವನ್ನು ಪೂರೈಸಲು 1.2 ಬಿಲಿಯನ್ ಡಾಲರ್‌ಗಳ ಒಪ್ಪಂದ ಮಾಡಿಕೊಂಡವು. 'ಪ್ರಾಜೆಕ್ಟ್ ನಿಂಬಸ್' (Project Nimbus) ಎಂದು ಕರೆಯಲ್ಪಡುವ ಈ ಒಪ್ಪಂದವು, ದೊಡ್ಡ ಪ್ರಮಾಣದ ಡೇಟಾವನ್ನು ಸಂಗ್ರಹಿಸಲು ಹಾಗೂ ಸಂಸ್ಕರಿಸಲು ಇಸ್ರೇಲ್ ಅಧಿಕಾರಿಗಳಿಗೆ ಕಂಪ್ಯೂಟಿಂಗ್ ಮೂಲಸೌಕರ್ಯವನ್ನು ಒದಗಿಸುತ್ತದೆ. ಜೊತೆಗೆ ಮುಖ ಹಾಗೂ ಭಾವನೆ ಗುರುತಿಸುವಿಕೆ, ಬಯೋಮೆಟ್ರಿಕ್ ವಿಶ್ಲೇಷಣೆ ಮತ್ತು ಜನಸಂಖ್ಯಾ ಮಾಹಿತಿಯ ನಿರ್ವಹಣೆಯಂತಹ ಸಾಧನಗಳನ್ನು ಬಳಸಲು ಇದು ಅವಕಾಶ ನೀಡುತ್ತದೆ.

ಅಲ್ಲದೆ, ಸಂಪೂರ್ಣ ಸ್ವಾಯತ್ತ ಶಸ್ತ್ರಾಸ್ತ್ರಗಳು ಅಥವಾ ಸಾಮೂಹಿಕ ನಿಗಾ ವೀಕ್ಷಣೆಗೆ ತನ್ನ ಮಾದರಿಗಳನ್ನು ಬಳಸಲು ಆಂಥ್ರೋಪಿಕ್ ಕಂಪನಿಯು ನಿರಾಕರಿಸಿದ ವಿಷಯಕ್ಕೆ ಸಂಬಂಧಿಸಿದಂತೆ ಪೆಂಟಗನ್ ಮತ್ತು ಆ ಕಂಪನಿಯ ನಡುವೆ ಭಿನ್ನಾಭಿಪ್ರಾಯಗಳು ಮೂಡಿವೆ.

ಎಐ ತಂತ್ರಜ್ಞಾನದ ಹೆಚ್ಚುತ್ತಿರುವ ಸೇನಾ ಬಳಕೆಯನ್ನು ಚೀನಾ ಟೀಕಿಸಿದೆ. ಅಲ್ಗಾರಿದಮ್‌ಗಳಿಗೆ "ಜೀವನ ಮತ್ತು ಮರಣವನ್ನು ನಿರ್ಧರಿಸುವ" ಅಧಿಕಾರವನ್ನು ನೀಡುವುದರ ವಿರುದ್ಧ ಈ ವರ್ಷ ಅದು ಎಚ್ಚರಿಕೆ ನೀಡಿತ್ತು.

ಜುಲೈನಲ್ಲಿ ರಾಯ್ಟರ್ಸ್ ಸುದ್ದಿ ಸಂಸ್ಥೆಯು ನಡೆಸಿದ ಸಂಶೋಧನೆಯೊಂದು, ಚೀನಾದ ರಕ್ಷಣಾ ಸಾಮರ್ಥ್ಯಗಳನ್ನು ಹೆಚ್ಚಿಸಲು, ವಿಶೇಷವಾಗಿ ನಿಗಾ ಉದ್ದೇಶಗಳಿಗಾಗಿ ಮುಂಚೂಣಿಯಲ್ಲಿರುವ ಅಮೆರಿಕದ ಎಐ ಮಾದರಿಗಳ ಔಟ್‌ಪುಟ್‌ಗಳನ್ನು ಚೀನಾದ ಸೇನಾ ನಂಟು ಹೊಂದಿರುವ ಸಂಶೋಧಕರು ಬಳಸಿಕೊಂಡಿದ್ದಾರೆ ಎಂದು ತಿಳಿಸಿತ್ತು.

ಉಯಿಘರ್‌ಗಳು ಮತ್ತು ಟಿಬೆಟಿಯನ್‌ಗಳು ಸೇರಿದಂತೆ ಭಿನ್ನಮತೀಯರು ಹಾಗೂ ಅಲ್ಪಸಂಖ್ಯಾತರ ಮೇಲೆ ಕಣ್ಣಿಡಲು ಬಳಸಲಾಗುವ ಬೃಹತ್ ಚೀನಾದ ನಿಗಾ ವ್ಯವಸ್ಥೆಯ ಭಾಗವಾಗಿ ಎಐ ಮತ್ತು ಇತರ ತಂತ್ರಜ್ಞಾನಗಳು ಮಾರ್ಪಟ್ಟಿವೆ ಎಂದು ಕಳೆದ ವರ್ಷ ಅಸೋಸಿಯೇಟೆಡ್ ಪ್ರೆಸ್ ತನಿಖೆಯು ಪತ್ತೆಹಚ್ಚಿದೆ. ಆದರೆ, ಆ ವ್ಯವಸ್ಥೆಯನ್ನು ನಿರ್ಮಿಸಲು ಸಹಾಯ ಮಾಡಿದ ತಂತ್ರಜ್ಞಾನವನ್ನು ಪೂರೈಸುವಲ್ಲಿ ಅಮೆರಿಕದ ತಂತ್ರಜ್ಞಾನ ಕಂಪನಿಗಳು ಪ್ರಮುಖ ಪಾತ್ರವಹಿಸಿವೆ ಎಂಬುದನ್ನೂ ಇದು ಪತ್ತೆಹಚ್ಚಿತ್ತು.

ಇದಲ್ಲದೆ, ಫೆಬ್ರವರಿಯಲ್ಲಿ ಸ್ಪೇನ್‌ನಲ್ಲಿ ನಡೆದ ಅಂತರರಾಷ್ಟ್ರೀಯ ಸೇನಾ ಎಐ ಶೃಂಗಸಭೆಯಲ್ಲಿ, ಯುದ್ಧದಲ್ಲಿ ಎಐ ನಿಯೋಜನೆಯನ್ನು ನಿಯಂತ್ರಿಸುವ ಘೋಷಣೆಗೆ ಸಹಿ ಹಾಕಲು ಈ ಎರಡು ಆರ್ಥಿಕ ಮಹಾಶಕ್ತಿಗಳು ನಿರಾಕರಿಸಿದವು.

ಮುಂದೇನು?

ಎಐ ತಂತ್ರಜ್ಞಾನದ ಅಭಿವೃದ್ಧಿ ವೇಗವನ್ನು ತಗ್ಗಿಸಬೇಕು ಎಂಬ ತಂತ್ರಜ್ಞಾನ ಕ್ಷೇತ್ರದ ನಾಯಕರ ಕರೆಗಳು, ಈ ತಂತ್ರಜ್ಞಾನವನ್ನು ನಿಯಂತ್ರಿಸುವ ಅವರ ಸಾಮರ್ಥ್ಯ ಮತ್ತು ಇಚ್ಛಾಶಕ್ತಿಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿವೆ ಎಂದು ಎಐ ನೌ ಇನ್‌ಸ್ಟಿಟ್ಯೂಟ್‌ನ ಹಿರಿಯ ಸಂದರ್ಶಕ ಫೆಲೋ ಅಯಾ ಇಬ್ರಾಹಿಂ ಅಭಿಪ್ರಾಯಪಟ್ಟಿದ್ದಾರೆ.

ಅಲ್ ಜಝೀರಾ ಜತೆ ಮಾತನಾಡಿದ ಅವರು, ಹೆಚ್ಚು ಶಕ್ತಿಶಾಲಿ ಎಐ ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸಲು ಕಂಪನಿಗಳು ಅಗಾಧವಾದ ಆರ್ಥಿಕ ಒತ್ತಡವನ್ನು ಎದುರಿಸುತ್ತಿರುವ ಸಂದರ್ಭದಲ್ಲೇ ಈ ಎಚ್ಚರಿಕೆಗಳು ಬಂದಿವೆ ಎಂದಿದ್ದಾರೆ.

"ಈ ತಂತ್ರಜ್ಞಾನವನ್ನು ಮಾರುಕಟ್ಟೆಗೆ ತರಲು ಮತ್ತು ಅದನ್ನು ಸರಿಯಾಗಿ ರೂಪಿಸಲು ಬಹಳಷ್ಟು ಹಣ ಖರ್ಚಾಗಿದೆ" ಎಂದ ಅವರು, ಈ ಎರಡನ್ನೂ ಮಾಡುವ ತಮ್ಮ ಸಾಮರ್ಥ್ಯದ ಬಗ್ಗೆಯೇ "ಹೆಚ್ಚುತ್ತಿರುವ ಅನುಮಾನಗಳಿವೆ" ಎಂದು ಹೇಳಿದರು.

ಎಐ ಅಭಿವೃದ್ಧಿಯನ್ನು ಒಂದು ಸ್ಪರ್ಧೆಯಂತೆ ಬಿಂಬಿಸುವುದನ್ನೂ ಅವರು ಪ್ರಶ್ನಿಸಿದರು. ಇದು ಪರಿಣಾಮಗಳನ್ನು ಕಡೆಗಣಿಸಿ ಸಾಧ್ಯವಾದಷ್ಟು ವೇಗವಾಗಿ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಲು ಕಂಪನಿಗಳನ್ನು ಪ್ರೇರೇಪಿಸಬಹುದು .ಸ್ಪರ್ಧೆಯ ನಿರೂಪಣೆಯು ಮೂಲಭೂತವಾಗಿ ಸಮಸ್ಯೆಯಿಂದ ಕೂಡಿದೆ. ಏಕೆಂದರೆ ಇದು ಹಲವು ವಿಧಗಳಲ್ಲಿ ನಮ್ಮನ್ನು ಸಂಪೂರ್ಣ ಅವನತಿಯ ಕಡೆಗೆ ಕೊಂಡೊಯ್ಯುತ್ತದೆ. ಹಾಗಾದರೆ ನೀವು ಗೆಲ್ಲುತ್ತೀರಿ, ನಂತರ ನೀವು ಗೆಲ್ಲುವುದು ಏನು ಮತ್ತು ಯಾವ ಬೆಲೆಗೆ?" ಎಂದು ಇಬ್ರಾಹಿಂ ಪ್ರಶ್ನಿಸಿದ್ದಾರೆ.

ಕೃಪೆ: aljazeera.com