"ದೇಶ ವಿರೋಧಿ" ಜೆ ಎನ್ ಯು ಸೇರಲು ವಿದ್ಯಾರ್ಥಿಗಳ ಕ್ಯೂ

ಹೊಸದಿಲ್ಲಿ , ಮಾ. 29: ದೇಶ ವಿರೋಧಿ ಚಟುವಟಿಕೆಗಳು ಹಾಗು ದೇಶದ್ರೋಹಿಗಳಿರುವ ವಿವಿಯೆಂದು ಬಿಜೆಪಿಯ ಸಚಿವರು, ಸಂಘ ಪರಿವಾರ ಹಣೆಪಟ್ಟಿ ಹಚ್ಚಿರುವ  ಜೆ ಎನ್ ಯುಗೆ ಈ  ಬಾರಿಯೂ ದಾಖಲೆಯ ವಿದ್ಯಾರ್ಥಿಗಳು ದಾಖಲಾತಿಗಾಗಿ ಅರ್ಜಿ ಸಲ್ಲಿಸಿದ್ದಾರೆ. ಕಳೆದೊಂದು ತಿಂಗಳ ಅರ್ಜಿ ಸಲ್ಲಿಸುವ ಅವಧಿಯಲ್ಲಿ  ಒಟ್ಟು ಲಭ್ಯವಿರುವ 2700 ಪದವಿ, ಸ್ನಾತಕೋತ್ತರ ಪದವಿ ಹಾಗು ಸಂಶೋಧನಾ ಕೋರ್ಸುಗಳಿಗೆ 75,000 ವಿದ್ಯಾರ್ಥಿಗಳು ಆನ್ ಲೈನ್ ನಲ್ಲಿ ಹಾಗು ಸುಮಾರು 500 ವಿದ್ಯಾರ್ಥಿಗಳು ನೇರವಾಗಿ ಅರ್ಜಿ ಸಲ್ಲಿಸಿದ್ದಾರೆ ಎಂದು ಕ್ಯಾಂಪಸ್ ಮೂಲಗಳನ್ನು ಉದ್ದೇಶಿಸಿ ದಿ ಟೆಲಿಗ್ರಾಫ್ ವರದಿ ಮಾಡಿದೆ. ಕಳೆದ ವರ್ಷ 79,000 ಹಾಗು ಅದರ ಹಿಂದಿನ ವರ್ಷ 72,000 ವಿದ್ಯಾರ್ಥಿಗಳು ಅರ್ಜಿ ಸಲ್ಲಿಸಿದ್ದರು. 

ಬಿಜೆಪಿ ಹಾಗು  ಸರಕಾರವೇ ವಿವಿಯ ವಿರುದ್ಧ ಅಪಪ್ರಚಾರ ನಡೆಸಿಯೂ ಇಷ್ಟೊಂದು ದೊಡ್ಡ ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಅರ್ಜಿ ಸಲ್ಲಿಸಿರುವುದು ಉತ್ತಮ ಬೆಳವಣಿಗೆ ಎಂದು ವಿವಿಯ ವಿದ್ಯಾರ್ಥಿಗಳು ಹಾಗು ಶಿಕ್ಷಕರು ಅಭಿಪ್ರಾಯಪಟ್ಟಿದ್ದಾರೆ.  ಖುದ್ದು ಗೃಹ ಸಚಿವ ರಾಜ್ ನಾಥ್ ಸಿಂಗ್ ಅವರೇ ಜೆ ಎನ್ ಯು ನಲಿ ನಡೆದ ಕಾರ್ಯಕ್ರಮಕ್ಕೆ ಲಷ್ಕರೆ ತೈಬಾದ ಹಫೀಜ್ಹ್ ಸಯೀದ್ ನ ಬೆಂಬಲ ಇತ್ತು ಎಂದು ಹೇಳಿದ್ದರು. 

ಬಿಜೆಪಿ ಸಂಸದರು, ಸಂಘಪರಿವಾರದ ನಾಯಕರು  ವಿವಿಯಲ್ಲಿ ದೇಶವಿರೋಧಿ ಚತುವಟಿಕೆ ನಡೆಯುತ್ತಿರುವುದರಿಂದ ಅದನ್ನು ಮುಚ್ಚಬೇಕು ಎಂದೂ ಆಗ್ರಹಿಸಿದ್ದರು. 

ಇಷ್ಟೆಲ್ಲಾ ಅಪಪ್ರಚಾರದ ಹೊರತಾಗಿಯೂ ವಿದ್ಯಾರ್ಥಿಗಳು ದೊಡ್ಡ ಸಂಖ್ಯೆಯಲ್ಲಿ ಅರ್ಜಿ ಸಲ್ಲಿಸಿರುವುದು ಸುಳ್ಳು ಅಭಿಯಾನ ವಿಫ಼ಲ ವಾಗಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ ಎಂದು ಶಿಕ್ಷಕರ ಸಂಘದ ಅಧ್ಯಕ್ಷ ಅಜಯ್ ಪಟ್ನಾಯಕ್ ಹೇಳಿದ್ದಾರೆ. 

ಮುಂದಿನ ತಿಂಗಳು ಪ್ರವೇಶ ಪರೀಕ್ಷೆ ನಡೆಯಲಿದೆ .