ಕಷ್ಟಗಳನ್ನು ಮೆಟ್ಟಿ ನಿಂತು ಸಾಧನೆಗೈದ ವಿದ್ಯಾರ್ಥಿನಿ ಚೇತನಾಗೆ ಶೇ.83 ಫಲಿತಾಂಶ

ಸುಳ್ಯ, ಮೇ 26: ಕಷ್ಟಗಳನ್ನು ಮೆಟ್ಟಿ ನಿಂತು, ಮೆಡಿಕಲ್ ಕೆಲಸದ ಮಧ್ಯೆಯೂ ವಿದ್ಯಾರ್ಥಿನಿಯೋರ್ವಳು ಪಿಯುಸಿಯಲ್ಲಿ ಶೇ.83 ಅಂಕ ಪಡೆಯುವ ಮೂಲಕ ಸಾಧನೆ ಮೆರೆದಿದ್ದಾಳೆ.

ಅಪ್ಪಅಮ್ಮನ ಆರೈಕೆಯಲ್ಲಿ ಇಷ್ಟಪಟ್ಟು ಶಿಕ್ಷಣ ಪಡೆಯಬೇಕಾದ ಆಕೆ 3ನೆ ವರ್ಷದ ಎಳೆಯ ಪ್ರಾಯದಲ್ಲೇ ಅಮ್ಮನನ್ನು ಕಳೆದುಕೊಂಡಳು. ಸಾಕಿ ಸಲಹಬೇಕಾದ ಅಪ್ಪನೂ ದೂರವಾದ.. ವಿದ್ಯಾಭ್ಯಾಸದ ಮೆಟ್ಟಲು ಹತ್ತುವಾಗಲೇ ಅಪ್ಪ, ಅಮ್ಮ ಯಾರೆಂದು ತಿಳಿಯದ ಆಕೆ ಅಮ್ಮನ ತವರು ಮನೆಯ ಆರೈಕೆಯಲ್ಲಿ ಬೆಳೆದು ಎಸೆಸೆಲ್ಸಿವರೆಗೆ ಓದಿದಳು. ಶೇ.82 ಅಂಕಗಳೊಂದಿಗೆ ಉತ್ತೀರ್ಣಳಾದ ಆಕೆ ಪಿಯುಸಿ ವಿಜ್ಞಾನ ವಿಭಾಗ ಆರಿಸಿಕೊಂಡು ದ್ವಿತೀಯ ಪಿಯುಸಿಯಲ್ಲಿ ಅನುತ್ತೀರ್ಣಗೊಂಡು ಮೆಡಿಕಲ್‌ನಲ್ಲಿ ಕೆಲಸಕ್ಕೆ ಸೇರಿಕೊಂಡಳು. ಆದರೆ ಆಕೆಯ ಓದಿನ ಆಸಕ್ತಿ ಮತ್ತೆ ಶಿಕ್ಷಣದತ್ತ ಸೆಳೆಯುವಂತೆ ಮಾಡಿತು.

ಬೆಳ್ಳಾರೆಯ ಜ್ಞಾನದೀಪ ಶಿಕ್ಷಣ ತರಬೇತಿ ಸಂಸ್ಥೆಯ ಮೂಲಕ ಖಾಸಗಿಯಾಗಿ ಪಿಯುಸಿ ವಾಣಿಜ್ಯ ವಿಭಾಗದ ಪರೀಕ್ಷೆ ಬರೆದಿರುವ ಆಕೆ ಕೇವಲ 4 ತಿಂಗಳು ಮಾತ್ರ ವ್ಯಾಸಂಗ ಮಾಡಿ 500 ಅಂಕ ಪಡೆದುಕೊಂಡಿದ್ದಾಳೆ. ಆದರೆ ಮುಂದಿನ ಶೈಕ್ಷಣಿಕ ಜೀವನದ ಚಿಂತೆ ಆಕೆಯನ್ನು ಕಾಡುತ್ತಿದೆ.

ಬೆಳ್ಳಾರೆ ಗ್ರಾಮದ ಮಣಿಮಜಲು ನಿವಾಸಿಯಾಗಿರುವ ವನಿತಾರವರನ್ನು ಬಂಟ್ವಾಳದ ರಾಮ ಮೂಲ್ಯ ಎಂಬವರಿಗೆ ವಿವಾಹ ಮಾಡಿಕೊಡಲಾಗಿತ್ತು. ಈ ದಂಪತಿಯ ಪುತ್ರಿ ಚೇತನಾ ಕುಮಾರಿ 3 ವರ್ಷದ ಮಗುವಾಗಿದ್ದಾಗ ತಾಯಿ ವನಿತಾ ಕಿಡ್ನಿ ಸಂಬಂಧಿ ಕಾಯಿಲೆಗೆ ತುತ್ತಾಗಿ ಇಹಲೋಕ ತ್ಯಜಿಸಿದ್ದರು. ಆ ಬಳಿಕ ತವರು ಮನೆಯಾದ ಮಣಿಮಜಲಿನಲ್ಲಿ ಮಾವ ಜಾನಪ್ಪಹಾಗೂ ಚಿಕ್ಕಮ್ಮ ಪದ್ಮಿನಿಯ ಆರೈಕೆಯಲ್ಲಿ ಬೆಳೆದ ಚೇತನಾ ಪ್ರೌಢ ಶಿಕ್ಷಣವನ್ನು ಪೂರೈಸಿ ದ್ವಿತೀಯ ಪಿಯುಸಿ ವಿಜ್ಞಾನ ವಿಭಾಗದಲ್ಲಿ ಅನುತ್ತೀರ್ಣಗೊಂಡು ಮೆಡಿಕಲ್ ಕೆಲಸಕ್ಕೆ ಸೇರಿಕೊಂಡಳು. ಆದರೆ ಓದು ಆಸಕ್ತಿ ಆಕೆಯಲ್ಲಿ ಮತ್ತೆ ಜೀವಂತವಾಗಿ ಮೆಡಿಕಲ್‌ನಲ್ಲಿ ಕೆಲಸ ಮಾಡುತ್ತಾ ಖಾಸಗಿಯಾಗಿ ಪಿಯುಸಿ ಪರೀಕ್ಷೆ ಬರೆಯಲು ಬೆಳ್ಳಾರೆಯ ಜ್ಞಾನದೀಪ ಸಂಸ್ಥೆಗೆ ಸೇರಿದಳು. ಮೆಡಿಕಲ್‌ನಲ್ಲಿ ಕೆಲಸ ಮಾಡುತ್ತಾ ವಿದ್ಯಾಭ್ಯಾಸ ಪಡೆಯುತ್ತಿದ್ದ ಚೇತನಾ ಪಿಯುಸಿಯ ವಾಣಿಜ್ಯ ವಿಭಾಗದಲ್ಲಿ 500 ಅಂಕಗಳೊಂದಿಗೆ ಉತ್ತೀರ್ಣಳಾಗಿದ್ದಾಳೆ.

ಮೆಡಿಕಲ್‌ನಲ್ಲಿ ಕೆಲಸ

ಅಪ್ಪ ಅಮ್ಮನ ಆರೈಕೆಯಲ್ಲಿ ಬೆಳೆಯಬೇಕಾದ ಚೇತನಾ ಅಮ್ಮನನ್ನು ಕಳೆದುಕೊಂಡ ಬಳಿಕ ಊರಿಗೆ ಬಂದಿದ್ದು, ತನ್ನ ಅಪ್ಪಎಲ್ಲಿದ್ದಾರೆಂಬುದೇ ತಿಳಿದಿಲ್ಲ. ಆದರೂ ಧೃತಿಗೆಡದೆ ಮಾವನ ಮನೆಗೋ ಚಿಕ್ಕಮನ ಮನೆಗೋ ಹೋಗಿ ಮೆಡಿಕಲ್ ಕೆಲಸವನ್ನೂ ನಿರ್ವಹಿಸುತ್ತಿದ್ದಾಳೆ. ಚೇತನಾಳ ವಿದ್ಯಾಭ್ಯಾಸಕ್ಕೆ ಆಕೆಯ ಚಿಕ್ಕಮ್ಮ ಪದ್ಮಿನಿ ತನ್ನ ಕೈಲಾದ ಸಹಾಯ ಮಾಡುತ್ತಿದ್ದಾರೆ. ಪಿಯುಸಿ ಖಾಸಗಿ ಪರಿಕ್ಷೆ ಬರೆದರೂ 4 ತಿಂಗಳೂ ಮಾತ್ರ ತರಗತಿಗೆ ಹೋಗಿ ಪರೀಕ್ಷೆ ಬರೆದಿರುವ ಈಕೆ ಶೇ.89 ಅಂಕ ಪಡೆದಿದ್ದಾಳೆ.

ಪ್ಯಾರಾ ಮೆಡಿಕಲ್ ಓದುವಾಸೆ

ಪಿಯುಸಿಯಲ್ಲಿ ಶೇ.89 ಅಂಕಗಳೊಂದಿಗೆ ಉತ್ತೀರ್ಣಳಾಗಿರುವ ಚೇತನಾಳಿಗೆ ಪ್ಯಾರಾ ಮೆಡಿಕಲ್ ಕೋರ್ಸ್ ಪಡೆದು ತನ್ನ ಕಾಲ ಮೇಲೆ ನಿಲ್ಲಬೇಕೆಂಬ ಮಹದಾಸೆಯಿದೆ. ಕಷ್ಟಪಟ್ಟು ಕೈ ತುಂಬಾ ಮಾರ್ಕ್ ಪಡೆದಿರುವ ಈಕೆಗೆ ಮಾತ್ರ ಪ್ಯಾರಾಮೆಡಿಕಲ್ ಕೋರ್ಸ್ ಗಗನ ಕುಸುಮವಾಗಿದೆ. ಚೇತನಾಳ ಮುಂದಿನ ವಿದ್ಯಾಭ್ಯಾಸಕ್ಕೆ ಆಕೆಯ ಪೋಷಕರು ತಮ್ಮಿಂದ ಸಾಧ್ಯವಿರುವಷ್ಟು ಸಹಕಾರ ನೀಡಿದ್ದಾರೆ. ಪ್ಯಾರಾಮೆಡಿಕಲ್ ಕೋರ್ಸ್ ಪಡೆಯುವ ಕನಸು ಹೊತ್ತಿರುವ ಚೇತನಾಳಿಗೆ ಸಹಕಾರ ದೊರೆತಲ್ಲಿ ಆಕೆಯ ಕನಸು ಈಡೇರಬಹುದು.

ಸಂಸ್ಥೆಯಲ್ಲಿ ತರಗತಿಗಳು ಆರಂಭವಾಗಿ 3-4 ತಿಂಗಳು ಕಳೆದಿದ್ದರೂ ಆಸಕ್ತಿಯಿಂದ ಓದಿರುವ ಚೇತನಾ ಶೇ.89 ಅಂಕಗಳನ್ನು ಪಡೆದು ಸಂಸ್ಥೆಗೆ ಕೀರ್ತಿ ತಂದಿದ್ದಾಳೆ. ಆಕೆಯ ಉನ್ನತ ವಿದ್ಯಾಭ್ಯಾಸದ ಕನಸಿಗೆ ದಾನಿಗಳ ಸಹಕಾರ ಬೇಕಿದೆ. ಆಕೆಯ ಮುಂದಿನ ಶಿಕ್ಷಣಕ್ಕೆ ಬೇಕಾದ ಸೂಕ್ತ ಮಾರ್ಗದರ್ಶನ ನೀಡಲು ಸಂಸ್ಥೆ ಸಿದ್ಧವಿದೆ.

ಉಮೇಶ್ ಮಣಿಕ್ಕಾರ, ನಿರ್ದೇಶಕರು, ಜ್ಞಾನದೀಪ ಬೆಳ್ಳಾರೆ.