ಜೇಮ್ಸ್ ಬಾಂಡ್ ಆಗಲು ಇದ್ರೀಸ್ ನನ್ನ ಪ್ರಥಮ ಆಯ್ಕೆ : ಸ್ಟೀವನ್ ಸ್ಪೀಲ್ಬರ್ಗ್

ಲಂಡನ್ , ಜು. 19 : ಸದ್ಯ ಜೇಮ್ಸ್ ಬಾಂಡ್ ಆಗಿ ಭಾರೀ ಖ್ಯಾತಿ ಪಡೆದಿರುವ ಬ್ರಿಟಿಷ್ ನಟ ಡೇನಿಯಲ್ ಕ್ರೇಗ್ ಅವರು ಆ ಪಾತ್ರದಿಂದ ನಿವೃತ್ತಿಯಾಗುವುದು ಖಚಿತವಾಗಿರುವಂತೆಯೇ ಮುಂದಿನ ಜೇಮ್ಸ್ ಬಾಂಡ್ ಯಾರಾಗಲಿದ್ದಾರೆ ಎಂಬ ಬಗ್ಗೆ ಊಹಾಪೋಹ ನಡೆಯುತ್ತಿದೆ. ಹಾಲಿವುಡ್ ನ ಖ್ಯಾತ ನಿರ್ದೇಶಕ  ಸ್ಟೀವನ್ ಸ್ಪೀಲ್ಬರ್ಗ್ ಅವರು ಖ್ಯಾತ ಇಂಗ್ಲಿಷ್ ನಟ ಇದ್ರೀಸ್ ಎಲ್ಬ ಬಾಂಡ್ ಪಾತ್ರಕ್ಕೆ ಸೂಕ್ತ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. 

" ಡೇನಿಯಲ್ ಈ ಪಾತ್ರ ನಿರ್ವಹಿಸುವುದಿಲ್ಲ ಎಂದಾದರೆ ಇದ್ರೀಸ್ ಎಲ್ಬ ನನ್ನ ಪ್ರಥಮ ಆಯ್ಕೆ " ಎಂದು ಸ್ಪೀಲ್ಬರ್ಗ್ ಹೇಳಿದ್ದಾರೆ. 

ಹಲವಾರು ಟಿವಿ ಧಾರಾವಾಹಿ ಸರಣಿ ಹಾಗೂ ಸಿನಿಮಾಗಳಲ್ಲಿ ನಟಿಸಿರುವ ಇದ್ರೀಸ್, ನೆಲ್ಸನ್ ಮಂಡೇಲಾ ಅವರ ಆತ್ಮಕತೆ ಆಧಾರಿತ ' ಮಂಡೇಲಾ : ಲಾಂಗ್ ವಾಕ್ ಟು ಫ್ರೀಡಂ' ಚಿತ್ರದಲ್ಲಿ ಮಂಡೇಲಾ ಅವರ ಪಾತ್ರ ನಿರ್ವಹಿಸಿದ್ದರು. 

ಜುರಾಸಿಕ್ ಪಾರ್ಕ್, ಮೆನ್ ಇನ್ ಬ್ಲ್ಯಾಕ್ , ಟ್ರಾನ್ಸ್ಫಾರ್ಮರ್ಸ್ ಮತ್ತಿತರ ವಿಶ್ವವಿಖ್ಯಾತ ಚಿತ್ರಗಳನ್ನು ನಿರ್ದೇಶಿಸಿರುವ ಸ್ಪೀಲ್ಬರ್ಗ್ " ತಾನು ಎರಡೆರಡು ಬಾರಿ ಬಾಂಡ್ ಚಿತ್ರ ನಿರ್ದೇಶಿಸಲು ಆಸಕ್ತಿ ತೋರಿಸಿದ್ದೆ. ಆದರೆ ಅವರಿಗೆ ನಾನು ಸೂಕ್ತ ನಿರ್ದೇಶಕ ಎಂದು ಅನಿಸಲಿಲ್ಲ. ಹಾಗಾಗಿ ಎರಡು ಬಾರಿಯೂ ಅವರು ನನ್ನನ್ನು ತಿರಸ್ಕರಿಸಿದರು. ಈಗ ಅವರಿಗೆ ನಾನು ದುಬಾರಿ ನಿರ್ದೇಶಕನಾಗಿದ್ದೇನೆ " ಎಂದು ಹೇಳಿದ್ದಾರೆ.