ವಸ್ತುನಿಷ್ಟ ವರದಿಗೆ ಆದ್ಯತೆ ನೀಡುವುದು ಪತ್ರಕರ್ತನ ಜವಾಬ್ದಾರಿ: ಡಾ ರಾಜೇಂದ್ರ ಕೆ.ವಿ

ಕಡಬ, ಜು.20. ವಸ್ತುನಿಷ್ಟ ವರದಿಗೆ ಆದ್ಯತೆ ನೀಡಿ ಸಮಾಜದ ಸ್ವಾಸ್ಥ್ಯವನ್ನು ಕಾಪಾಡುವುದು ಪ್ರತಿಯೋರ್ವ ಪತ್ರಕರ್ತನ ಜವಾಬ್ದಾರಿಯಾಗಿದೆ ಎಂದು ಪುತ್ತೂರು ಸಹಾಯಕ ಆಯುಕ್ತ ಡಾ ರಾಜೇಂದ್ರ ಕೆ.ವಿ ಹೇಳಿದರು.

ಅವರು ಕಡಬ ತಾಲೂಕು ಪತ್ರಕರ್ತರ ಸಂಘದ ವತಿಯಿಂದ ಶ್ರೀ ರಾಮಕುಂಜೇಶ್ವರ ಪದವಿ ಕಾಲೇಜಿನಲ್ಲಿ ನಡೆದ ಪತ್ರಿಕಾ ದಿನಾಚರಣೆಯನ್ನು ಉದ್ಘಾಟಿಸಿ ಮಾತನಾಡಿದರು. ಇಂದು ಮಾಧ್ಯಮ ಲೋಕವು ಬಹಳ ವಿಸ್ತಾರವಾಗಿ ಬೆಳೆದಿದ್ದು, ಆದರೆ ಪತ್ರಿಕಾ ಧರ್ಮಕ್ಕೂ ಹಾಗೂ ಪತ್ರಿಕಾ ಮೌಲ್ಯಕ್ಕೂ ವ್ಯತ್ಯಾಸ ಕಂಡು ಬರುತ್ತಿದೆ. ರಚನಾತ್ಮಕ ಸುದ್ದಿಗಳಿಗಿಂತ ರೋಚಕ ಸುದ್ದಿಗಳಿಗೆ ಆದ್ಯತೆ ಹೆಚ್ಚಾಗುತ್ತಿದ್ದು, ಪತ್ರಕರ್ತರು ಮಾಡುವ ವರದಿಗಳು ಅಧ್ಯಯನದಿಂದ ಕೂಡಿರಬೇಕು. ಆ ಸುದ್ದಿಗಳು ಸಮಾಜದ ಕಣ್ಣು ತೆರೆಸುವಂತಿರಬೇಕು ಮತ್ತು ಅಧಿಕಾರಿಗಳನ್ನು, ಜನಪ್ರತಿನಿಧಿಗಳನ್ನು ಎಚ್ಚರಿಸುವಂತಿರಬೇಕು ಎಂದರು. ನಾನು ಪತ್ರಿಕೆಗಳನ್ನು ದಿನಂಪ್ರತಿ ಓದುತ್ತಿದ್ದು, ನಮಗೆ ತಿಳಿಯದ ವಿಷಯದ ಬಗ್ಗೆ ಅದೆಷ್ಟೋ ವಿಷಯಗಳನ್ನು ಪತ್ರಿಕೆಗಳು ವರದಿ ಮಾಡಿದಾಗ ಅಂತಹ ವರದಿಗೆ ಸ್ಪಂದಿಸಿ ಕ್ರಮ ಕೈಗೊಂಡಿದ್ದೇನೆ. ನಾವು ಹೆಚ್ಚು ಪತ್ರಿಕೆಗಳನ್ನು ಓದುವ ಹವ್ಯಾಸ ಬೆಳೆಸಿಕೊಂಡಾಗ ಜಗತ್ತಿನ ಬಾಗಿಲು ತೆರೆದು ಮಾಹಿತಿಯ ಆಗರೊಂದಿಗೆ ಜ್ಞಾನದ ಆಗರವಾಗುತ್ತದೆ.ಪತ್ರಿಕೆಗಳಲ್ಲಿರುವ ವಿಶೇಷ ಮಾಹಿತಿಗಳಿಂದಾಗಿ ಐಎಎಸ್, ಐಪಿಎಸ್ ಗಳಿಗೆ ಶೇ 90 ರಷ್ಟು ಪೂರಕ ಅಂಶಗಳು ದೊರೆಯುತ್ತವೆ ಎಂದು ಹೇಳಿದ ಸಹಾಯಕ ಆಯುಕ್ತರು ದ.ಕ., ಉಡುಪಿ ಜಿಲ್ಲೆಯಲ್ಲಿ ಐಎಎಸ್, ಐಪಿಎಸ್ ಮಾಡುವವರ ಸಂಖ್ಯೆ ಕಡಿಮೆ ಇದ್ದು ಈ ಬಗ್ಗೆ ಬೆಳಕು ಚೆಲ್ಲುವ ಕೆಲಸವನ್ನು ಪತ್ರಿಕೆಗಳು ವಾಡಬೇಕು ಎಂದು ಸಲಹೆ ನೀಡಿದರು.

ಪತ್ರಿಕೆಗಳು ನಿಷ್ಪಕ್ಷಪಾತ ವರದಿಗಳಿಗೆ ಮಾತ್ರ ಸೀಮಿತವಾದಾಗ ಒಂದು ಸುಂದರ ಸಮಾಜ ನಿರ್ಮಾಣದ ಕನಸು ಸಾಕಾರಗೊಳ್ಳುತ್ತದೆ, ನಮ್ಮಲ್ಲಿ ದೃಶ್ಯ ಮಾಧ್ಯಮಗಳು ಹೆಚ್ಚಾಗುತ್ತಿದ್ದಂತೆ ಮುದ್ರಣ ಮಾಧ್ಯಮದ ಜನಪ್ರಿಯತೆ ಕಡಿಮೆಯಾಗುತ್ತದೆ ಎನ್ನುವ ಭಾವನೆ ಜನರಲ್ಲಿ ಇತ್ತು ಆದರೆ ಗುಣಮಟ್ಟದ ಮುದ್ರಣ ಮಾಧ್ಯಗಳು ಎಂದು ಲಯ ಕಳೆದುಕೊಂಡಿಲ್ಲ, ಓದುಗರ ಸಂಖ್ಯೆ ಕಡೆಮೆಯಾಗಿಲ್ಲ, ನಾವು ಹೆಚ್ಚು ಪತ್ರಿಕೆಗಳನ್ನು ಓದುವ ಹವ್ಯಾಸ ಬೆಳೆಸಿಕೊಂಡಾಗ ಜಗತ್ತಿನ ಬಾಗಿಲು ತೆರೆದು ಮಾಹಿತಿಯ ಆಗರದೊಂದಿಗೆ ಜ್ಞಾನದ ಆಗರವಾಗುತ್ತದೆ, ಪತ್ರಿಕೆಗಳಲ್ಲಿರುವ ವಿಶೇಷ ಮಾಹಿತಿಗಳಿಂದಾಗಿ ಐಎಎಸ್, ಐಪಿಎಸ್ ಗಳಿಗೆ ಶೇ 90 ರಷ್ಟು ಪೂರಕ ಅಂಶಗಳು ದೊರೆಯುತ್ತವೆ ಎಂದು ಹೇಳಿದ ಸಹಾಯಕ ಆಯುಕ್ತರು ದಕ. ಉಡುಪಿ ಜಿಲ್ಲೆಯಲ್ಲಿ ಐಎಎಸ್, ಐಪಿಎಸ್ ಮಾಡುವವರ ಸಂಖ್ಯೆ ಕಡಿಮೆ ಇದ್ದು ಈ ಬಗ್ಗೆ ಬೆಳಕು ಚೆಲ್ಲುವ ಕೆಲಸವನ್ನು ಪತ್ರಿಕೆಗಳು ವಾಡಬೇಕು ಎಂದು ಸಲಹೆ ನೀಡಿದರು.

ಪತ್ರಿಕೋದ್ಯಮದಲ್ಲಿನ ಸವಾಲುಗಳು ಹಾಗೂ ಅವಕಾಶಗಳು ಎನ್ನುವ ವಿಷಯದ ಬಗ್ಗೆ ಉಪನ್ಯಾಸ ನೀಡಿದ ಸುಳ್ಯ ಸುದ್ದಿ ಚಾನಲ್ ನಿರ್ದೇಶಕ ದುರ್ಗಾಕುಮಾರ್ ನಾಯರ್‌ಕೆರೆ ಮಾತನಾಡಿ, ಪತ್ರಿಕೆಗಳು ಇಂದು ನಗರ ಮತ್ತು ಗ್ರಾಮೀಣ ವರದಿಗಳಿಗೆ ಸಮಾನ ಅವಕಾಶ ನೀಡದೆ ಇರುವುದರಿಂದ ಗ್ರಾಮೀಣ ಪ್ರದೇಶದ ಅದೆಷ್ಟೋ ಉತ್ತಮ ಸುದ್ದಿಗಳು ಮರೆಯಾಗುತ್ತಿವೆ. ಅನಾವಶ್ಯಕ ರೋಚಕ ಸುದ್ದಿಗಳ ಬೆನ್ನು ಬಿದ್ದಿರುವುದರಿಂದ ರಚನಾತ್ಮಕ ವರದಿಗಳಿಗೆ ಆದ್ಯತೆ ಕಡಿಮೆಯಾಗುತ್ತಿದೆ. ಪತ್ರಿಕಾ ಮಾಧ್ಯಮ ಎನ್ನುವುದು ಪತ್ರಿಕಾ ಉದ್ಯಮವಾಗಿದೆ. ಸತ್ಯ ಸುಳ್ಳಿನ ಮಧ್ಯೆ ಅಂತರ ಕಿರಿದಾಗುತ್ತಿರುವುದರಿಂದ ಪತ್ರಕರ್ತರು ವಸ್ತನಿಷ್ಟ ವರದಿ ಮಾಡುವುದೆಂದರೆ ಸವಾಲಿನ ಸಂಗತಿಯಾಗಿದೆ. ಪತ್ರಕರ್ತನೊಬ್ಬ ನಿರಂತರ ಕ್ರಿಯಾಶೀಲ ಹಾಗೂ ಒಳಗಣ್ಣಿನಿಂದ ಎಲ್ಲವನ್ನೂ ನೋಡಿದಾಗ ಆತನಿಂದ ಉತ್ತಮ ವರದಿಗಳನ್ನು ನಿರೀಕ್ಷಿಸಬಹುದು. ಉತ್ತಮ ವರದಿಗಳಿಂದ ಪತ್ರಿಕೆಯ ಗುಣಮಟ್ಟ ಕೂಡಾ ವೃದ್ಧಿಯಾಗುತ್ತದೆ. ಪತ್ರಕರ್ತ ತನ್ನ ಚೌಕಟ್ಟಿನೊಳಗೆ ಪ್ರಾಮಾಣಿಕವಾಗಿ ದುಡಿದಾಗ ಸಮಾಜಕ್ಕೆ ಪೂರಕವಾಗುತ್ತಾನೆ. ಮಾಧ್ಯಮಗಳು ಕೂಡಾ ಉತ್ತಮ ಪತ್ರಕರ್ತರನ್ನು ಬೆಳೆಸುವಲ್ಲಿ ಅವಕಾಶ ಕಲ್ಪಿಸಬೇಕು ಎಂದರು.

ಶ್ರೀ ರಾಮಕುಂಜೇಶ್ವರ ವಿದ್ಯಾವರ್ಧಕ ಸಭಾದ ಕಾರ್ಯದರ್ಶಿ ರಾಧಾಕೃಷ್ಣ ಕೆ.ಎಸ್ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು. ಈ ಸಂದರ್ಭದಲ್ಲಿ ರಾಮಕುಂಜದ ಹಿರಿಯ ಪತ್ರಿಕಾ ವಿತರಕ ಜೆಫ್ರಿ ಡಿಸೋಜಾ ಅವರ 34 ವರ್ಷಗಳ ಸುದೀರ್ಘ ಸೇವೆಯನ್ನು ಗೌರವಿಸಿ ಸನ್ಮಾನಿಸಲಾಯಿತು. ಕಾಲೇಜಿನ ಪ್ರಿನ್ಸಿಪಾಲ್ ಡಾ ಸಂಕೀರ್ತ್ ಹೆಬ್ಬಾರ್ ಅತಿಥಿಯಾಗಿ ಭಾಗವಹಿಸಿದ್ದರು. ಶ್ರೀ ರಾಮಕುಂಜೇಶ್ವರ ವಿದ್ಯಾವರ್ಧಕ ಸಭಾದ ಅಧ್ಯಕ್ಷ ಇ. ಕೃಷ್ಣಮೂರ್ತಿ ಕಲ್ಲೇರಿ ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಕಡಬ ತಾಲೂಕು ಪತ್ರಕರ್ತರ ಸಂಘದ ಅಧ್ಯಕ್ಷ ಕೆ.ಎಸ್. ಬಾಲಕೃಷ್ಣ ಕೊಲ ಪ್ರಸ್ತಾವನೆಗೈದು, ಕಾರ್ಯದರ್ಶಿ ನಾಗರಾಜ್ ಎನ್.ಕೆ ಸ್ವಾಗತಿಸಿದರು. ಕಾಲೇಜಿನ ಪತ್ರಿಕೋದ್ಯಮ ವಿಭಾಗದ ಉಪನ್ಯಾಸಕಿ ಮಮತಾ ವಂದಿಸಿದರು. ಉಪನ್ಯಾಸಕ ಕೃಷ್ಣಮೂರ್ತಿ ಕಾರ್ಯಕ್ರಮ ನಿರೂಪಿಸಿದರು. ಪತ್ರಕರ್ತರ ಸಂಘದ ಉಪಾಧ್ಯಕ್ಷ ಪ್ರವೀಣ್ ಚೆನ್ನಾವರ, ಕಾರ್ಯದರ್ಶಿ ವಿಜಯಕುಮಾರ್, ಕೋಶಾಧಿಕಾರಿ ಪ್ರವೀಣ್‌ರಾಜ್, ಸದಸ್ಯರಾದ ರಾಮಚಂದ್ರ ಬರೆಪ್ಪಾಡಿ, ಕಲ್ಲುಗುಡ್ಡೆ ಖಾದರ್ ಸಾಹೇಬ್, ತಸ್ಲೀಂ ಮರ್ಧಾಳ ಮೊದಲಾದವರು ಉಪಸ್ಥಿತರಿದ್ದರು.