ಹಿಂದೂಗಳಿಗೆ ಹೆಚ್ಚು ಮಕ್ಕಳಾಗಬೇಕು : ಆರೆಸ್ಸೆಸ್

 ಹೊಸದಿಲ್ಲಿ, ಆ.22: ಹಿಂದೂ ದಂಪತಿಗಳು ಹೆಚ್ಚು ಮಕ್ಕಳನ್ನು ಹೆರಬೇಕೆಂದು ಆರೆಸ್ಸೆಸ್ ಹೇಳಿದೆ. ನವದಂಪತಿಗಳಿಗಾಗಿ ಆಯೋಜಿಸಲಾಗಿದ್ದ ಸಮಾವೇಶವೊಂದರಲ್ಲಿ ಮಾತನಾಡಿದ ಆರೆಸ್ಸೆಸ್ ಕಾರ್ಯಕರ್ತ ದರ್ಪಣ್, ಸಂಘಟನೆಯ ಮುಖ್ಯಸ್ಥ ಮೋಹನ್ ಭಾಗವತ್ ಅವರ ಮಾತುಗಳನ್ನು ಉಲ್ಲೇಖಿಸುತ್ತಾ ''ಸಮಾಜಕ್ಕಾಗಿ ನಮ್ಮ ಸಂಸ್ಕೃತಿ ಹಾಗೂ ಜನಾಂಗಕ್ಕಾಗಿ'' ಹೆಚ್ಚು ಮಕ್ಕಳನ್ನು ಹೊಂದುವ ಬಗ್ಗೆ ಗಂಭೀರವಾಗಿ ಆಲೋಚಿಸಬೇಕು''ಎಂದು ಹೇಳಿದ್ದಾರೆ. ಯುರೋಪ್ ಖಂಡ ಹಾಗೂ ಇತರ ದೇಶಗಳಲ್ಲಿ ಮುಸ್ಲಿಮರ ಜನಸಂಖ್ಯೆ ಹೆಚ್ಚಾಗಿದೆಯೆಂದು ಬಿಂಬಿಸುವ ಒಂದು ವೀಡಿಯೊವನ್ನೂ ಸಮಾವೇಶದ ಸಂದರ್ಭ ಪ್ರದರ್ಶಿಸಲಾಯಿತು.
  ''ಫ್ರಾನ್ಸ್ ದೇಶದ ಮೂಲ ನಾಗರಿಕರ ಸಂತಾನೋತ್ಪತ್ತಿ ಪ್ರಮಾಣ 1.8 ಆಗಿದ್ದರೆ, ಇನ್ನೊಂದು ಸಮುದಾಯದ ಜನಸಂಖ್ಯೆ ಹೆಚ್ಚಳ ಪ್ರಮಾಣ 8.1 ಆಗಿದೆ. ಇದರರ್ಥ ಫ್ರಾನ್ಸ್‌ನ ಮೂಲ ನಿವಾಸಿಗಳು ಮುಂದಿನ 25 ವರ್ಷಗಳಲ್ಲಿ ಕಣ್ಮರೆಯಾಗುತ್ತಾರೆ ಹಾಗೂ ಇನ್ನೊಂದು ಸಮುದಾಯದ ಮಂದಿ ಅವರ ಬದಲು ಫ್ರಾನ್ಸ್ ದೇಶದ ಮುಖ್ಯ ನಾಗರಿಕರಾಗುತ್ತಾರೆ'' ಎಂದು ದರ್ಪಣ್ ಹೇಳಿದರು. ಅಲ್ಲಿನ ಪರದೆಯೊಂದರಲ್ಲಿ ತೋರಿಸಲಾಗುತ್ತಿದ್ದ ಸ್ಲೈಡ್‌ಗಳು ''ಇನ್ನೊಂದು ಸಮುದಾಯ''ವನ್ನು ಮುಸ್ಲಿಮರು ಎಂದು ತೋರಿಸುತ್ತಿತ್ತು. ರಷ್ಯ, ಬ್ರಿಟನ್ ಹಾಗೂ ಜರ್ಮನ್‌ಗಳಲ್ಲೂ ಹೆಚ್ಚುತ್ತಿರುವ ಮುಸ್ಲಿಮರ ಜನಸಂಖ್ಯೆಯ ಬಗ್ಗೆ ವೀಡಿಯೊದಲ್ಲಿ ಹೇಳಲಾಗಿದ್ದು ಕುಸಿಯುತ್ತಿರುವ ಜರ್ಮನಿಯ ಜನಸಂಖ್ಯೆಯನ್ನು ಹೆಚ್ಚಿಸಲು ಇನ್ನು ಸಾಧ್ಯವಿಲ್ಲ. ಅದು 2050 ರ ಹೊತ್ತಿಗೆ ಮುಸ್ಲಿಮ್ ದೇಶವಾಗಲಿದೆ ಎಂದು ಹೇಳಿಕೊಂಡಿದೆ.